Стихи́:

Наг сый терпя́ше Прокл стре́лы,

Внутрь имы́й Бо́га всеору́жна:

Ила́рию всечестну́ю отсеко́ша главу́,

Страда́льческий прия́т всечестны́й вене́ц.

Си́и бя́ху при Трая́не царе́, и Макси́ме иге́моне, от страны́ Кали́пты, близ Агки́ры. Ят же бысть пе́рвее святы́й Прокл, и пред царе́м Христа́ испове́да. Пре́дан же бысть Макси́му иге́мону. Пове́шен бысть на дре́ве и стро́ган, и ка́мень тя́жек на но́зе ему́ привяза́ша. Посе́м же ведо́мь на стреля́ние, та́ко бо наречена́ бысть ему́ смерть, сре́те его́ анепсе́й (племя́нник) его́ Ила́рий, и́же и облобыза́ его́, и ят быв е́ллины. И уже́ святы́й Прокл стре́лами состре́лян ко Го́споду отъи́де. Святы́й же Ила́рий вопроше́н, и христиани́на себе́ наре́к, и пове́шен быв и бие́н. И на три по́прища влачи́мь. Пото́м главу́ его́ отсеко́ша, и положе́н бысть со святы́м Про́клом. Соверша́ет же ся собо́р их во оби́тели папи́йстей, близ Матро́ны.

Сей преподо́бный оте́ц Михаи́л, ро́да бя́ше вели́ка и сла́вна. Оте́чеством же ко́его гра́да или́ ве́си отку́ду бе, не изобре́тено бысть. Но я́коже пове́дает о нем во исто́риях гре́ческих, я́ко гре́ческому царю́ Ники́фору Фо́це стрый бя́ше. Вдан быва́ет от роди́телю свое́ю, в науче́ние боже́ственых писа́ний, и вско́ре извы́че. Уразуме́ блаже́нный ми́ра сего́ не стоя́щее житие́. Сего́ ра́ди вся отве́рже, отъи́де ко Святе́й горе́ Афо́ну, и всели́ся вскрай ея́ от восто́чныя страны́ на ме́сте иде́же Малео́н гора́ глаго́лема есть, на не́йже Ки́менская оби́тель. И ту восприи́м и́ночествующих житие́. И та́ко ему́ на доброде́тельныя труды́ подви́гшуся, я́ко и ста́рцу диви́тися о нем. И такова́го ра́ди доброде́тельнаго жития́ его́, поста́влен бысть ту игу́меном. Мно́го же о бра́тии монастыря́ того́ ропта́ния и хулы́ прие́м, и не смути́ся от сего́. Но сопроти́вное па́че показа́, непреста́нно в душеполе́зная веща́я наказа́ния к ним. По не́которых же днех, изы́де от Ки́менския оби́тели в ца́рствующих град ра́ди потре́бы. В то же вре́мя, бя́ше тогда́ во ца́рствующем гра́де воево́да Зефиназе́р имену́емый. И обре́т та́мо о́трока не́коего им́енем Авра́мия, и́же по́слежде бысть Афана́сий, имену́емый Афо́нский, и похвали́в Бо́га о ра́зуме его́. Проразуме́ бо о нем, я́ко сосу́д хо́щет бы́ти свята́го Ду́ха, зело́ возлюби́ о́трока и благослови́ его́, и́же не по мно́зе вре́мени и прии́де к нему́ и постриже́ся от него́. И вме́сто Авра́мия Афана́сий именова́ся. Преподо́бный же оте́ц Михаи́л поживе́ ле́та дово́льна в до́бром испове́дании в труде́х и поще́ниих, и до́йде ста́рости глубо́кой, и ника́коже изнемо́же ста́рости ра́ди от до́браго тече́ния своего́, в сих и преста́вися. Отъи́де же ко Го́споду в ве́чную жизнь.

Влади́мир вели́кий еще́ пога́н сый победи́ ятвя́ги, и прии́де к Ки́еву и творя́ше ж́ертвы куми́ром о побе́де с боля́ры свои́ми. И ре́ша ста́рцы: «Ме́тнем жре́бия на сы́ны и на дще́ри на́ша, да заре́жем бого́м на́шым на жертву». Бя́ше же челове́к Бо́жий не́кто Варя́г ро́дом, прише́л из Царя́ гра́да с сы́ном свои́м Иоа́нном живы́й в Ки́еве, и держа́ ве́ру христиа́нскую. И сего́ не терпя́ диа́вол, наусти́ нань киевля́н, и ре́ша: «По́слем к нему́». И реко́ша по́сланнии к нему́: «Паде́ жре́бий на сы́на твоего́, возлюбиша бо его́ бо́зи на́ши, да его́ сотвори́м тре́бу бого́м». Он же ре́че: «Не суть то бо́зи, но дре́во соде́лано безду́шно, и пома́ле согние́т, не ядя́т бо ни пию́т, ни глаго́лют: Но Бог есть Еди́н на небесе́х, Ему́же служат гре́цы: Та́коже и мы во и́мя Иисус́а Христа́ Сы́на Бо́жия креще́на есма́. Той бо сотвори́ не́бо и зе́млю: А ва́ши бо́зи ничто́же сотвори́ли, но са́ми соде́лани ва́ми суть: Того́ ра́ди не дам бесо́м сы́на моего́». И ти́и ше́дше пове́даша лю́дем. Киевля́не же взе́мше ору́жия, и приидо́ша на ня, и ре́ша: «Дай нам сы́на на тре́бу бого́м». Он же рече́: «А́ще суть бо́зи, да пришли́те еди́наго по сы́на моего́ себе́, а вы чему́ тре́буете его́». И кли́кнувше киевля́не, и уби́ша я́, и та́ко сконча́стася.

Пове́даше Иоа́нн Си́рин а́ки о не́коем мни́се, сам же бе сему́ ви́дец, я́ко не́кто глаго́ля ста́рец бе во у́жасе, и ви́де се, я́ко три мни́си стоя́ху чрез мо́ре. И се бысть глас к ним со о́ноя страны́ глаго́лющь: «Приими́те криле́ о́гнени, и прииди́те ко Мне». Два же прия́ста, и прелете́ста на он пол. А тре́тий оста́ пла́чася и вопия́. Последи́же да́стася и ему́ криле́, но не о́гнени, и не́мощни и неси́льни, но с трудо́м потопля́яся, и с печа́лию мно́гою пре́йде на он пол. Та́ко и род сей после́дний, а́ще прии́мет криле́, но не о́гнени, и не́мощни и неси́льни. Пе́рвии же суть мни́си прии́мшии о́гнени криле́, единомы́слие иму́ще к Бо́гу, и безъиме́ние ве́ка сего́. Втори́и же по них, иму́ще в монастыре́х притяжа́ние. А и́же прия́ша криле́, но не о́гнени и не́мощни, и́же ну́ждею спасо́шася. Род ны́нешняго вре́мени опле́тшийся жите́йскими су́етами, и́же николи́же возлетя́т умо́м к Бо́гу, а́ще не напа́стьми спасу́тся. Бо́гу на́шему сла́ва, ны́не и при́сно и во ве́ки веко́в. [Ами́нь.]