Стихи́:

Тебе́ провозвести́вшему, воплоще́ние Ума́

Че́стию подо́бною вся́ка плоть чтет сло́ве:

В тринадеся́тый, собра́ние Гаврии́ла чтут земни́и.

Стихи́:

Пожре́ся Христу́ же́ртва непоро́чная:

К Бо́гу прише́д во огнь вверже́ный:

Сей бя́ше во времена́ Севи́ра царя́, муж благочести́в и нра́вом благ. Ят же бысть Аки́лою кня́зем и вопроше́н бысть: «Коея́ слу́жбы еси́?» И испове́да себе́ христиани́на, и со дерзнове́нием рече́: «Христа́ чту, И́стиннаго Бо́га», тем огню́ пре́дан бысть и муче́нию вене́ц восприя́т.

Серапио́н Христо́в му́ченик, бе в лета Севи́ра царя́, мужь благочести́в о́бразом и благ. Ят же бысть Агки́ром кня́зем, и вопроше́н бысть коея́ ве́ры есть. И испове́да не обину́яся Бо́га Иису́са Христа верою. Тем в разли́чныя его́ му́ки вложи́ша. И па́ки виде его́ не покаря́ющася, повеле́ преда́ти его́ огню́. И вве́ржен бысть вонь, и та́ко муче́ния коне́ц восприя́т.

Маркиа́н святы́й му́ченик юн сый, ят бысть и му́чен во Икони́йстем гра́де. И посе́м приведе́н к Перини́ю кня́зю, и стро́ган бысть по жи́лам и по лани́том: обличи́ бо его́ му́жески о нече́стии е́ллинстем: Христа́ же Бо́га и Влады́ку испове́да дерзнове́нно. Тем не дово́лен бысть о пе́рвых му́ках, но по рече́нии том, на сковраде́ разжже́не повеле́ возложит́и. Та́же язы́к его избоде́н бысть. Сим же бы́вшым неосла́бно свято́му пребыва́ющу, и Христа́ испове́дающу. И даде́ князь нань осужде́ние. Пое́мше же его́ во́ини благодаря́ща Бо́га и моля́щася, и усе́кнуша его́.

Бра́тие бу́дите благотво́рцы и ми́лостиви. Подража́ем своего́ Влады́ку, да не сгори́м в пла́мени о́ном ве́чном. Не прии́мем бога́тства зле, и́мже ини́и убо́зи быва́ют. Не смеша́ем своего́ име́ния со слеза́ми убо́гих, да ве́чная блага́я прии́мем. Да та́ко получи́м Бо́га глаго́лавшаго: «Поми́луй, поми́лован бу́деши». «В ню́же ме́ру ме́рите, возме́рится вам». Возри́м на святы́я му́жи и жены́, и́же Бо́жия любве́ де́ля еди́на телеса́ име́ша, но и та телеса́ исся́кла, и умерщве́на посто́м и бде́нием и жа́ждею, в предстоя́нии нощне́м и в моли́твах, кла́нянием со слеза́ми Вседаю́щему Бо́гу. Ре́кше: уста́ на моли́тву, о́чи на бде́ние и сле́зы, ру́це на воздея́ние к Бо́гу, но́зе на предстоя́ние день и нощь. Плоть попра́ти изво́лим, да ду́шу на не́бо возвы́сим. Согреша́ющии к покая́нию притецы́те, теку́щии поспеши́те, бога́тии подава́йте убо́гим, санови́тии - смире́нием украси́теся, ни́щии ‐ благодаре́нием и покоре́нием. Попо́ве облецы́теся в кро́тость и в пра́вду. Судии́ пра́веден суд твори́те, изба́вите убо́га, и вдови́цу и си́роту. Оби́димаго искупи́те, пле́нныя изба́вите от сме́рти. И не мни́те лежа́щаго пред враты́ ва́шими. О́бщаго во след и́дем Блага́го Влады́ки. Бежи́м лестьца́ врага́ губя́щаго ду́шу на́шу. Потщи́мся на бу́дущую жизнь в ню́же ны приступи́ти ма́ло поме́дливше в ве́це сем. А́ще ли лени́мся, то помяне́м за ны Пострада́вшаго крест и гво́здия, И́мже отреши́тися и́мамы от уз грехо́вных. И преложи́м печа́ль пло́тскую малого́дную на духо́вную. И приснобу́дущаго живота́ получи́м. Бо́гу на́шему сла́ва, ны́не и при́сно и во ве́ки веко́в. Ами́нь.

Бра́тия и отцы́ ма́ло отступи́хом от вас, и па́ки а́бие прише́дше обрето́хом в вас безчи́ние: подоба́ет бо пред собо́ром яви́ти сие́. И толи́ко безчи́ние, я́ко не́цыи ру́це просте́рше, друг дру́га похвати́ша со гне́вом и я́ростию и крича́нием. И о еди́ном у́бо немно́го стра́нно, зане́же миряни́н есть, и еще́ не сочта́н бра́тии: О друго́м же вся́ко стра́нно и отчужде́нно, я́ко и́ночествующий и ми́рови распя́тый пригвожде́нныя у́ды, сие́ сотвори́л есть. Когда́ у́бо вопроша́ю тя бра́те, с креста́ сшел еси́? Когда́ же свобожде́ния свободи́вся, возложи́л еси́ ру́це на Иису́са иуде́йски? Сотвори́вый рече́, еди́ному от бра́тий сих Мои́х после́дних, Мне сотвори́л есть. Не убоя́лся ли еси́ Лица́ сия́ глаго́лющаго? Не усрами́лся ли еси жи́зни твоея́ храни́теля а́нгела? Не усрами́лся ли еси зря́щих тя бра́тий и дивя́щихся? Та́ко да просия́ет рече́, свет ваш пред человеки, я́ко да ви́дят до́брая ва́ша дела́, и просла́вят Отца́ ва́шего И́же на небесе́х. Тебе́ же сопроти́вно помрачи́ толи́кое зло де́ло, я́ко и похули́тися и́мени Бо́жию тебе́ ра́ди. Увы́ мне гре́шному, в какову́ю высоту жития́ зва́ни бы́хом, и где снидо́хом, ра́вно злонра́вных челове́к мирски́х безчи́нствующе? Но я́ко он нача́т пре́жде сва́ду рече́. Та́же не услы́шал ли Го́спода глаго́люща, к зауши́вшему Его́ слузе́: А́ще зле реко́х, свиде́тельствуй о зле, а́ще ли же до́бре, что мя бие́ши? И па́ки на кре́сте: О́тче, остави́ им грех сей, не ве́дят бо что творя́т. Те́мже до́лжен еси́ оклевета́емь, благословля́ти: И бие́мь о бию́щих тя, моли́тися: и ху́лимь, не гне́ватися. Ты же Благо́му Влады́це не подо́бяся, зрим кому́ подо́бишися? Те́мже у́бо не́си и́нок, но ра́тник: Ниже́ по́стник, но разбо́йник: Ниже́ сын ми́ра, но ча́до гне́ва. Еда́ бо не от доса́д изыдо́ша ра́ны, и ра́нам после́доваша сме́рти. И́же у́бо си́це творя́щии, да положа́тся прили́чному запреще́нию, я́ко да не в го́ршая прии́дут. Где бо и апо́стольско пра́вило положи́м глаго́лющее: Епи́скоп, или́ презви́тер, или́ диа́кон, бия́ ве́рныя согреша́ющыя, или́ неве́рныя оби́ды творя́щыя, да изве́ржется. Ника́коже нас Госпо́дь сему́ научи́. Сопроти́вное же, Сам бие́мь, не бия́ше. Оклевета́емь, не восклевета́ваше: Стражда́, не воспреща́ше. Ему́же сла́ва, ны́не и при́сно, и во ве́ки веко́в. Ами́нь.