Чтение на день: Июль, 14 число (старый стиль)
По шестой песни:
И поется кондак и икос (или мученичен, аще несть).Стихи́:
Избра́ннаго Па́стыря избра́н же и учени́к:
Посыла́ше бо избра́ннаго Ти:
Избра́нный сосу́де уловля́й Ти челове́ки:
В четыринадеся́тый Аки́лу уби́ша неве́рия испо́лнении челове́цы.
Сей святы́й апо́стол, бысть учени́к свята́го апо́стола Па́вла, и от него́ поста́влен бысть епи́скоп и́же мно́гое мно́жество от и́дольскаго обрати́ неи́стовства к богоразу́мию. И сквозе́ разли́чная ме́ста проше́д просия́ доброде́телию я́ко и со́лнце. Обре́те же и Аполло́са не соверше́на, и того́ на ве́ру потверди́в извести́. И мно́ги огласи́в и поучи́в, и крести́. И и́долы разврати́в, и це́ркви воздви́г, и свяще́нники поста́вив, и напа́сти мно́ги претерпе́в, убие́н бысть от неве́рных.
В то́йже день свята́го му́ченика Иу́ста
Стихи́:
Не же́ртву врещи́ на ка́пище огнь хотя́,
Но огнь Иу́ст же́ртва ве́ржеся стра́нно:
Иу́стово очи́стися те́ло зело́.
Той бе от гра́да Ри́мска, в ну́мерех вою́я под триву́ном Кла́вдием. Возвра́щься же от се́чи иноплеме́нник, и ви́дев крест хрусталообра́зен, и от него́ глас исходя́щь: «Сим побежда́й». От него́же и навы́че благоче́стия та́йне. Доше́д же Ри́ма, разда́ име́ние свое́ ни́щым: и бе свобо́дь сего́, и в ве́ре Христо́ве ра́дуяся. И яко уве́дано бысть я́же о нем, приведе́н бысть к триву́ну, и моле́н бысть отступи́ти ве́ры Христо́вы, и не поко́рься по́слан бысть с кни́гами ко иге́мону Магне́нтию. Он же вопроси́в, обрете́ его́ в вере Христо́ве пребыва́юща, и протя́гши повеле́ би́ти его́ жи́лами говя́жиими. Та́же шлем разжже́н возложи́ша на главу́ его́, и и́ны мно́ги му́ки претерпе́в. Наконе́ц огню́ пре́дан бысть. И та́ко житию́ коне́ц восприя́т.
В то́йже день сло́во о покая́нии, я́ко не то́кмо Бог испове́давших грехи́ Своя́ прие́млет, но и обрати́вшихся от грех к покая́нию
Пов́едаше не́кто от оте́ц глаго́ля: я́ко в Селу́ни есть монасты́рь деви́чески. Еди́на же от них от де́йства вра́жия пуще́на бысть отъити́ от монастыря́, и ше́дши впаде́ в блуд, и та́ко бо ю́ прельсти́ враг. И в то па́дши, не́колико лет сотвори́ блудя́щи, и помяну́вся к Бо́гу па́ки, умо́м мы́сляше на покая́ние. И прише́дши к монастырю́ своему́ в нем же бе хотя́ше ка́ятися, и па́дши пред враты́ и у́мре. И яви́ Бог еди́ному епи́скопу смерть ея́, и ви́де святы́я а́нгелы прише́дша, и прии́мша ду́шу ея́, и бе́сы во след их иду́ща, и пря́щася с ни́ми. Святы́м же а́нгелом глаго́лющым: нам рабо́та толи́ко лет, на́ша есть душа́. До́лго же пря́щымся о том. И реко́ша бе́сове: «Я́ко и́де и в монасты́рь в ле́ности, да ка́ко глаго́лете покаялася есть?» И отвеща́ша а́нгели глаго́люще: «Поне́же Бог ви́дев ра́зум ея́ на то уже́ прекло́ньшся, прия́ ея́ покая́ние. Да покая́нием она́ владе́яше, е́же на ум наложи́ сие, живото́м же Влады́ка Бог владе́ет». И та́ко посра́мльшеся бе́си отбего́ша. Того́ ра́ди блюду́щеся хо́дим и живе́м: не ве́мы бо в кий час смерть нас во́змет.
В то́йже день от глав свята́го Ни́ла, о осми́ по́мыслех
Веждь ча́до, я́ко осмь есть по́мысл и́же вся зла́я содева́ющии: чревобе́сие, блуд, сребролю́бие, я́рость, печа́ль безвре́менная, уны́ние, тщесла́вие, горды́ня. Сия́ суть боря́щая вся́кого челове́ка.
Ты же ча́до, а́ще хо́щеши победи́ти чревобе́сие, возлюби́ воздержа́ние, и име́й страх Бо́жий, и победи́ши.
А́ще хо́щеши победи́ти блуд, возлюби́ а́лчбу и жа́жду и бде́ние, и воспомяни́ смерть, и николи́же бесе́дуй с жено́ю, и победи́ши.
А́ще хо́щеши победи́ти сребролю́бие, возлюби́ нестяжа́ние и ху́дость.
А́ще хо́щеши победи́ти я́рость, стяжи́ кро́тость и долготерпе́ние. И помина́й коли́ко зла́я сотвори́ша иуде́и Го́споду на́шему Иису́су Христу́, и Человеколюби́вый не прогне́вая на ня но па́че моля́шеся о них глаго́лаше: «О́тче оста́ви им грех сей, не ве́дят бо что творя́т».
А́ще хо́щеши победи́ти безвре́менную печа́ль – не опеча́лися никогда́же за ку́ю любовре́менную вещь. И а́ще бие́н бу́деши, или́ обезче́стен, или́ отгна́н, не опеча́лися, но па́че ра́дуйся. Тогда́ то́кмо опеча́лися, егда́ согреши́ши, но и тогда́ в ме́ру, да не впаде́ши во отча́яние, и поги́бнеши.
А́ще хо́щеши победи́ти уны́ние, твори́ что лю́бо ма́ло рукоде́лие. И прочита́й и моли́ся ча́сто. А́ще хо́щеши победи́ти тщесла́вие, не люби́ похвалы́. Ниже́ по́чести, ниже́ до́брыя ри́зы, ниже́ предпочита́ние. Ниже́ председа́ние. Но па́че возлюби́ да тя укаря́ют, и охужда́ют, и безче́стят лжу́ще. И держи́ себе́ вся́кого гре́шника гре́шнейша.
А́ще хо́щеши победи́ти горды́ню, что лю́бо а́ще твори́ши, не глаго́ли я́ко от своего́ труда́ или́ от своего́ му́жества быва́ет. Но лю́бо пости́ши, лю́бо бди́ши, лю́бо мо́лишися, лю́бо ни́зу лега́еши, лю́бо пое́ши лю́бо слу́жиши, лю́бо мета́ния мно́го твори́ши: глаго́ли, я́ко не от твоего́ тща́ния, но от Бо́жия по́мощи и заступле́ния быва́ют.
Ему́же сла́ва, ны́не и при́сно и во ве́ки веко́в. [Ами́нь.]