Стихи́:

Ули́та со страда́льцы, боже́ственому Ки́рику:

Малоду́шествоваше главо́ю сокруше́нною:

В пятна́десятый Ули́та посе́чена и Ки́рику глава́ сокруше́на.

Свята́я Ули́та бя́ше при Диоклитиа́не царе́, от гра́да Икони́и. И обдержа́щаго ра́ди та́мо гоне́ния, пое́мши приснопомина́емаго Ки́рика, трем ле́том су́ща, и́де в Селевки́ю. Обре́те же и та́мо таково́ же гоне́ние на христиа́ны, до́йде в Тарс Килики́йский, иде́же Алекса́ндр иге́мон, су́ров и зверообра́зен нра́вом, Христа́ призыва́ющих му́чаше. Иде́же и та я́та бы́вши и му́чена. Исто́ржену же бы́вшу младе́нцу из руку́ ея́, и́же и мно́гими ласка́ньми к себе́ хотя́ше привлещи́ и́, и не возмо́же, но всегда́ бя́ше младе́нец взира́я и погляда́я к ма́тери, грубоязы́чествуя гла́сом, и Христо́во и́мя призыва́я. Ного́ю пхну в ре́бра отроча́, и низ восходи́мыя степе́ни приража́емо, сокруши́ся глава́ ему́, и испусти́ честну́ю свою́ ду́шу. Блаже́нная же Ули́та по мно́гих му́ках не повину́вшися, мече́м главу́ ей отсеко́ша. Соверша́ет же ся собо́р ею́ в благосозда́ннем до́ме ею́ близ арха́нгела Михаи́ла во А́ддах.

Стихи́:

Авди́мове кончи́не, ножь хода́тай,

Той же тому́ вене́ц бя́ше и сла́ва.

Му́ченик Христо́в Авди́м бе при Диоклитиа́не царе́, от о́строва Тида́на. Ят же бысть и мно́го му́чен отврещи́ся Христа́, и не покори́ся, но па́че испове́даше Христа́. Та́же по кольцу́ растяго́ша его́, и бие́н бысть девятию́ во́ин. Ви́девшым же слуга́м я́ко не восхоте́ вкуси́ти нечи́стых жертв, стро́ган бысть ногты́ желе́зными. И по ине́х му́ках не покори́ся, усе́кнуша его́ в по́лдень. И яви́ся му́ченик Диоклитиа́ну со а́нгелы ору́жие держа́, и стра́хом небе́сным устраша́я рече́: «Се аз Авди́м небе́снаго Бо́га челове́к, его́же ты уме́рша мни́ши. Но Бог по́мощию Свое́ю показа́ти мо́жет одоле́ние на поспе́шники твоя́ бе́сы, и́же тя беззако́нником до́лжен бе приложи́ти». Те́ло же муч́еника окая́нный огню́ предаде́.

Сей вели́кий князь Влади́мир бя́ше сын Святосла́вль, от пле́мени варя́жскаго. Пе́рвее же к и́долом мно́го тща́ние творя́ по о́тчу преда́нию, да егда́ восхоте́ Бог избра́ти Себе́ лю́ди но́вы, вдохну́ в сего́ благода́ть Свята́го Ду́ха, возбну́ я́ко от сна от лю́таго идолослуже́ния. И посла́ по всем язы́ком, испыта́я зако́ны их ка́ко ве́руют. И уве́дав святу́ю ве́ру гре́ческую, я́ко свещу́ на свети́ле, и рече́ в себе́: «Си́це да сотворю́, пойду́ в зе́млю их, и пленю́ гра́ды их, и обря́щу ту учи́теля». И е́же умы́сли, то и сотвори́: шед, взя Корсу́нь град. И посла́ к царе́ви гре́ческому, глаго́ля: «Дай за мя сестру́ свою́. А́ще ли не да́си, то сотворю́ гра́ду твоему́, я́коже и сему́ сотвори́х». Он же отвеща́: «Несть зде такова́го обы́чая, е́же христиа́ном дая́ти за пога́ныя. А́ще ли крести́шися, тогда́ и то получи́ши, и вя́щьше сего́ ‐ Ца́рство небе́сное». И рече́ Влади́мир: «Та́ко сотворю́. Прише́дшии от тебе́ с цари́цею, ти́и да крестя́т мя». И в то вр́емя впал бя́ше в неду́г Влади́мир очи́ма. И посла́вши цари́ца рече́ к нему́: «А́ще не крести́шися, то не избу́деши боле́зни сея́». Он же рече́: «Крести́те мя, и́бо на то есмь вас призва́л». Егда́ же крести́ша и́, сотвори́ся чу́до ве́лие. Вше́дшу ему́ во святу́ю купе́ль, отпадо́ша я́коже чешуя́ от о́чию, и отверзо́стася ему́ о́чи. И бысть я́ко николи́же име́в боле́зни. И прозре́в, похвали́ всех Бо́га. И просвеще́н бысть душе́ю и те́лом, ра́довашеся. И прише́д к Ки́еву, изби́ вся и́долы: Перу́на и Хо́рса, Да́жба и Мо́кша, и про́чия куми́ры. Посе́м возва́ все мно́жество люде́й, и запове́да им крести́тися. И наре́к им день, си́це глаго́ля: «А́ще кто не обря́щется у́тро на реце́, той бу́дет проти́вен мне». Тогда́ сниде́ся весь во́зраст, му́жи и жены́, с младе́нцы и де́ти, на Поча́йну реку́. И соверше́нии у́бо в воде́ стоя́ху, о́вии до по́яса, о́ви до вы́и, друзи́и же бродя́ху. А презви́теры по бре́гу стоя́ху, моли́тву творя́ще над крести́мыми. И отто́ле нарече́ся ме́сто то свя́то, иде́же ны́не церко́вь есть святу́ю му́ченику Бори́са и Гле́ба. Той у́бо бысть пе́рвый хода́тай на́шему спасе́нию, святы́й Влади́мир. И́же и возре́в на не́бо, помоли́ся за христиа́ны, глаго́ля: «Бо́же, Сотвори́вый не́бо и зе́млю, при́зри на новопросвеще́нныя лю́ди сия́. Даждь им Го́споди уве́дети Тебе́ Бо́га И́стиннаго, и утверди́ их в пра́вую ве́ру. И мне помози́ Влады́ко на сопроти́внаго врага́, и наде́яся на Твою́ держа́ву поперу́ ко́зни его́». Повеле́ же лю́дем ста́вити це́ркви по всем градо́м, посыла́я презви́теры крестя́ща лю́ди во и́мя Отца́ и Сы́на и Свята́го Ду́ха. А сам созда́ це́рковь Святы́я Богоро́дицы у Ди́вов, ей же и десяти́ну от всего́ име́ния своего́ вдаст. Пребы́в же не́колико лет, нача́ боле́ти, и преста́вися ко Го́споду, ме́сяца ию́лия в пятнадеся́тый день. Те́ло же его положи́ша в це́ркви Святы́я Богоро́дицы, ю́же сам созда́. И пла́кася его́ все мно́жество лю́дий всея́ Ру́сския земли́: боля́ре же а́ки отца́, лю́дие я́ко засту́пника, си́роты я́ко помо́щника и ни́щии и вдови́цы а́ки печа́льника и корми́теля.

Да ка́ко тя возмо́жем по достоя́нию похвали́ти, сотво́ршаго де́ло ра́вно апо́столом? Хва́лит у́бо Ри́мская земля́ Петра́ и Па́вла, Аси́йская земля́ ‐ Богосло́ва Иоа́нна, Еги́петская земля́ ‐ Ма́рка, Антиохи́йская ‐ Луку́, Гре́ческая ‐ Андре́я. Тебе́ же кня́же Влади́мире вся Ру́сская земля́, я́ко Госпо́дня апо́стола, моле́бными пе́сньми па́мять твою́ пра́зднующе

Похва́льныя венцы́ прино́сим ти глаго́люще: Ра́дуйся блаже́нный Влади́мире, прии́мый вене́ц от руки́ Вседержи́теля Бо́га. Ра́дуйся, свята́я главо́, вождю́ и учи́телю наш, и́мже избы́хом тмы и свет позна́хом. Ра́дуйся, честно́е дре́во само́го рая́, и́же израсти́ нам святы́я ле́торасли, свята́я му́ченика Бори́са и Гле́ба, от нею́же ны́не сы́нове Ру́сстии насыща́ются, прие́млюще неду́гом избавле́ние. Ра́дуйся, де́лателю ве́ры Христо́вы, истерза́в ле́стное те́рние от земли́ Ру́сския, и взора́в Креще́нием, и насе́яв святы́ми кни́гами, от ни́хже жнут сы́нове ру́сстии поле́зныя рукоя́ти покая́ние.

И друзи́и уже́ ядя́т ра́йскую пи́щу в Ца́рствии небе́снем, ея́же трапе́зы да сподо́бимся и мы гре́шнии и недосто́йнии, ка́ющеся о свои́х прегреше́ниях, и восхваля́юще Отца́ ку́пно же и с Сы́ном и Пресвяты́м Ду́хом, ны́не и при́сно и во ве́ки веко́в. Ами́нь.