Стихи́:

Анфиноге́н мече́м убие́н бысть,

Ло́жную боги́ню не чтый Афи́ну:

Поидо́ша десяти́на страда́лец к мечу́,

Телеса́ убива́ющаго не боя́щася:

В шестьна́десятый Анфиноге́на мечь умори́.

Святы́й му́ченик Анфиноге́н бя́ше от Севасти́и, при Диоклитиа́не царе́. И приле́жныя его́ ра́ди доброде́тели и ра́зума, бысть епи́скоп Пидахтои́тский. Ят же бысть Филима́хом иге́моном, с десятию́ свои́х учени́к, и мно́гия сме́ртныя му́ки претерпе́в с ни́ми. Наконе́ц же мече́м прия́т кончи́ну. Глаго́летжеся о нем я́ко пре́жде я́тия своего́, прише́д в монасты́рь, ученики́ своя́ не обре́те, я́ти бо бы́ша пе́рвее. Усре́т же кошу́ту, ю́же воспита́л бя́ше во оби́тели. И́же и моли́твовав благослови́ ю́, да не уловле́но бу́дет се́мя ея́ ловцы́. Но на ко́еждо ле́то приводи́ти в па́мять его́ себе́, и е́же от нея́ ражда́емаго тельца́ еди́наго, е́же и бысть. Ви́дима бо бя́ше по чте́нии свята́го Ева́нгелия входя́щи кошу́та, и лань водя́щи, веселя́хуся в сла́ву и честь свята́го му́ченика. Ученицы́ же его́ не послу́шаша пожре́ти и́долом, и отсеко́ша им главы́. Соверша́етжеся собо́р их в муче́нии свята́го Гео́ргия, су́щем в Кипари́сии.

Ти́и бе́ша ро́дом еги́птяне, я́ти бы́ша, и во град в Кесари́ю приведе́ни: предста́ша же кня́зю, и вопроше́ни бы́вше, испове́даша Христа́ Бо́га И́стиннаго, и сожгоша но́ги ле́выя их, и десна́я очеса́ избодо́ша мечи́. Посе́м огне́м сконча́шася, и про́чии с ни́ми му́жи и жены́ ве́ровавшыя Христо́ви. Свята́я же Хиони́я на дре́ве пове́шена бысть и стро́гана. И сестра́ ея́ Алевти́на на судию́ напа́дши разори́ тре́бище нога́ми, и му́чена бысть неща́дно. Па́вел же святый му́ченик став, помоли́ся за христиа́ны, и за вся язы́ки, яко да в ра́зум Бо́жий прии́дут о преста́тии гоне́ния христиа́нска, и на сле́зы подви́же предстоя́щыя. По сих главу́ его́ отсеко́ша.

Ста́рец не́кий бе в Вифаи́де, име́яше у себе́ ученика́ иску́сна, обы́чай же бе ста́рцу тому́ по вся дни и ве́черы учи́ти е́же о по́льзе: И по поуче́нии творя́ше моли́тву, и отпуща́ше спа́ти. Прилучи́ся же иногда́ про́стей ча́ди не́коей гове́йне приити́, ве́дуще вели́кое поще́ние ста́рца, и сотвори́ и́ма вкуше́ние. И по отше́ствии тех па́ки се́де ста́рец ве́чер по слу́жбе свое́й, по обы́чаю уча́ бра́та и бесе́дуя ему́, и бысть со́нен: И пребыва́ше брат до́ндеже воспря́нет ста́рец, и нужда́шеся мы́сльми отъити́ спа́ти без отпуще́ния, и ну́ждею проти́вися мы́слем, и пребы́сть па́ки до́ндеже возбуди́тся. И та́ко до седми́жды ну́дяся отъити́, и не отъи́де, проти́вяся мы́слем. Пото́м же уже́ но́щи мимоше́дши, возбну́в ста́рец и обре́те и приседя́ща, и глаго́ла: Досе́ле ли не отше́л еси́? Он же рече́: Не отпусти́л бо еси́ мене́ о́тче. Рече́ же ста́рец: Да почто́ мене́ не возбуди́л еси́? Он же рече́: Не смех тебе́ дви́гнути, да тебе́ не осла́блю. Воста́вше же нача́ста у́треницу. И по отпе́нии отпусти́ бра́та ста́рец. И егда́ седя́ше ста́рец осо́бь, и бысть во у́жасе, и се не́кое ме́сто сла́вно показа́ся ему́, и престо́л на нем, и верху́ престо́ла седмь венце́й лежа́ще: Вопроша́ше же ста́рец показа́ющаго ему: Кому́ си́и венцы́? Он же рече́: Ученику́ твоему́, ме́сто у́бо и престо́л, отне́леже не отъи́де даде́ ему́ Бог, и седмь вене́ц в сию́ нощь прия́ти. И слы́шав сия́ ста́рец, диви́ся, и пристра́шен быв, призва́в же бра́та, рече́ ему́: Что сотвори́л еси́, рцы ми, или́ что еси́ помы́слил в сию́ нощь? Он же рече́: Отда́ждь ми а́вво, я́ко не сотвори́х ничто́же. Ста́рец же непщева́ше, я́ко смиря́яся не испове́дает ему́. Рече́ же ему́ ста́рец: Не осла́блю ти а́ще не испове́си. Рече́ же ему́: Что еси́ сотвори́л в сию́ нощь? Брат же ничто́же себе́ рещи́ и отвеща́ти уме́яше, но то́кмо рече́: Прости́ мя о́тче: се сотвори́х, я́ко пону́дихся помышле́ньми мои́ми седми́жды отъити́ без твоего́ отпуще́ния спасти́, и не отъидо́х. Слы́шав же ста́рец, и уразуме́, я́ко колькра́ты проти́вяшеся помышле́нием брат, толи́ко и венча́шеся от Бо́га, и ничто́же брату рече́ о сих. Но по́льзы ра́ди пове́даше к духо́вным муже́м, да навы́кнут, яко ма́лыми помышле́нии Бог дае́т нам венцы́. Добро́ ну́дитися Го́спода ра́ди о всем. Ну́жно бо есть Ца́рство небе́сное, и ну́жницы восхища́ют е́.