Стихи́:

Поне́же подо́бно тебе́, ка́ко а́ще рече́ши, Марино,

Твои́х крови́й струя́ мече́м лие́ши:

В седмьдеся́тый Мари́ну посече́ мечь остр.

Та бя́ше от Антиохи́и Писиди́йския. Дщи Едеси́я иере́я и́дольскаго. Приведена́ же бысть Олимври́ю епарху пожре́ти и́долом, и Христа́ отврещи́ся не восхоте́вши, многия му́ки подъя́т. И всажде́на в темни́цу, и воста́вшаго на ню зми́я расто́рже. Пото́м приведена́ и вопроше́на, и непоколе́блемо испове́дание Христо́во сохра́ньши, отсеко́ша главу́ ея́. Соверша́ется же собо́р ея́ у свята́го му́ченика Ми́ны.

В сне́дех и винопи́тиих иску́сни су́ще и благора́достни, в де́лании же за́поведей Бо́жиих не иску́сни. Той бо сам апо́стол рече́: Вся́ко сло́во гни́ло от уст ва́ших да не исхо́дит, но а́ще что бла́го к созда́нию потре́бы, я́ко да даст благода́ть слы́шащым. И не осокрбля́йте Ду́ха Свята́го Бо́жия, И́мже зна́менани бы́сте в день избавле́ния. И па́ки глаго́лет: Вся́ка го́ресть, и я́рость, и гнев, и вопль, и хула́, да во́змется от вас со вся́кою зло́бою. Быва́йте же друг дру́гу бла́зи, милосе́рди, угожда́юще друг дру́гу, я́коже и Бог о Христе́ угоди́л есть вам. Зри́те ли что завещава́ет? Коли́ко есть опасство запове́дное, и сия ки́им бесе́доваше? Не и́ночествующым, но про́сто всем жите́йским. О и́ноцех же о́но есть глаго́лати: О́ви же Христо́ви плоть распя́ша со страстьми́ и похотьми́ я́ко неде́йствени су́ще грехо́внаго дея́ния. А́ще сия́ та́ко и́мать, да смо́трят и́же ны́не свари́вшиися, кото́раго суть осужде́ния досто́йни, и́же не то́чию соверши́вшиися, но друг на дру́га ру́це возложи́ша. Простира́еши у́бо вся́ко ру́ку на и́ночествующаго, и́же и еще́ в просты́х лю́дех причита́емый. Ты же и́ночествуяй, сме́еши жезло́м уда́рити, новоприводи́маго к повинове́нию. Тем́же не́си и́нок, но самообо́рец: Ни по́стник, но разбо́йник. Ниже́ сын ми́ра, но ча́до гнев. Егда́ бо от доса́д приидо́ша ра́ны, и ра́нам послед́оваша сме́рти: Сотво́ршии убо сие́, вложе́ни будут в подоба́ющее запреще́ние, я́ко да не в го́ршее прии́дут. Вы же о возлю́бленнии, я́ко ученицы́ кро́ткаго и мирода́рнаго Влады́ки, кро́тце и ми́рне жи́тельствуйте: мир гоня́ще со все́ми и святы́ню, без нею́ же никто́же у́зрит Бо́га. Есть же не то́чию страсть сия́ смуща́юща и изменя́юща ду́шу, но и я́рость наипа́че воздви́жуща. Смути́ся бо рече́ от я́рости о́ко мое́, и я́рость их по подо́бию змиину́, и я́рость в не́дрех несмы́сленных водвори́тся. И уклоне́ние (час) я́рости его́, паде́ние тому́. Отку́ду бо такова́я страсть рожда́ется? От го́рдостнаго и презо́риваго мудрова́ния, мня́щуся ему́ бы́ти что, и востаю́щу на подру́чныя.