Стихи́:

Фео́филу отсеко́ша главу́

Бо́га ра́ди Лю́бящаго ро́да челове́ческаго:

Три с десятию́ му́жий со друже́бники.

Трофи́м име́я сострада́льцы:

Посе́чен бысть с ни́ми ку́пно в два́десять тре́тий.

Ти́и бы́ша при Диоклитиа́не царе́ безбо́жном мучи́тели. И зане́же не повину́вшеся во́ли его́, не пожро́ша истука́нным, и Христа́ отврещи́ся не восхоте́ша, пове́сивши плоть их строга́ху. И не покори́вшеся повеле́нию царе́ву, ка́мением побива́еми бя́ху. Посе́м го́лени их изби́вше, и во огнь вверго́ша. И Бо́гу по обы́чаю чудоде́ющу без вре́да изыдо́ша святи́и. Разгне́вавжеся мучи́тель даде́ на них осужде́ние. И пое́мше их во́ини мече́м главы́ их отсеко́ша.

Аполина́рий во святы́х оте́ц наш, бысть учени́к свята́го апо́стола Петра́, и тем освяще́н бысть на епи́скопство: И по́слан бысть в Раве́нский град, пропове́дати Христа́ Сы́на Божия су́ща. И прия́т бысть не́ким во́ином, его́же сле́па су́ща моли́твою прозре́ти сотвори́, и пребы́сть у него́ два ле́та. Во́ин же той возвести́ кня́зю о нем я́ко жена́ его больна́ бе все ле́то, и прише́д Аполина́рий здра́ву ю́ сотвори́. Князь же сотвори́ ему́ вне гра́да це́рковь ма́лу, и слу́жаше в ней. И пребы́сть ту двана́десять лет. И мно́ги научи́ ве́ровати во Христа́, и свя́ти от них ов́ы попы́, а и́ны диа́коны. И уве́девше о нем кумирослужи́тели я́ша его́, и пону́диша его пожрети и́долом. О́ному же не покори́вшуся, бие́н бысть кре́пко от идолослужи́тель. И пове́ргше его за нозе у́жем влеча́ху его́ из гра́да е́ле жи́ва су́ща, и оста́вльше его́ отъидо́ша. И отъи́де блаже́нный в не́кое село́, и ту напа́дше нань нечести́вии, и приведо́ша его́ пред воево́ду, и пону́жден бысть пожре́ти и́долом. Святы́й же моли́твою и́долы сокруши́, и заточе́н бысть в не́кий о́стров. И та́мо та́коже пону́жден бысть пожре́ти куми́ром, и не покори́ся, мно́ги му́ки претерпе́в. Посем заточи́ша его́ на Дуна́й, и та́мо мно́га чудеса́ сотвори́. И уве́давше о нем идолослужи́тели, ну́дяще его́ старейшиною бы́ти кумирослужи́телем. Свято́му же не хоте́вшу, много му́чиша его́, и прогна́ша его́ от себе́. И па́ки прии́де в Раве́нский град, и прия́т бысть ученики́ свои́ми. И пребы́сть два ле́та, и мно́га чудеса́ сотвори́. И мно́ги ра́ны на те́ле свое́м понесе́. Во глубо́це ста́рости, ко Го́споду отъи́де.

Рече́ Госпо́дь к Е́ве: к му́жеви твоему́ возвраще́ние твое́, и той тобо́ю да облада́ет, емуже ты повини́ся в молча́нии. Жена́ бо своего́ му́жа че́стна творя́щи. Пе́рвое, аще за́поведь Бо́жию сохрани́т, благослове́на бу́дет. Второ́е, от человеќ похвалена́ есть. Жена́ бо добра́, страдолюби́ва, и молчали́ва, вене́ц му́жеви своему́ есть. Обреты́й жену́ добру́, изно́сит из до́му своего́ блага́я. Бла́жен есть таковы́я жены́ муж, и ле́та своя́ испо́лнит в бла́зе ми́ре, я́ко бла́гу часть от Бо́га прим жену́ молчали́ву. Жены́ же в це́ркви да молча́т, не вели́т бо им апо́стол в це́ркви глаго́лати, но молча́ще моли́тися. А́ще ли чему́ учи́тися хотя́, в до́мех муже́й свои́х да вопроша́ют. Гну́сно бо есть жена́м в це́ркви бесе́довати. Се слы́шавше жены́, научи́теся молча́нию и кро́тости, и от Бо́га благослове́ни бу́дете, и от челове́к похвале́ни. Бо́гу на́шему сла́ва, ны́не и при́сно, и во ве́ки веко́в.