Стихи́:

Поби́ша су́лицами твою́ Христе́ Христи́ну,

Не отве́ргшися ей христиа́нския веры:

В дв́адесять четве́ртый сбоде́на бысть Христи́на о́стрыми су́лицами.

Сия́ бя́ше от Тиро́нскаго гра́да, Урва́на не́коего стратила́та дщи. И́же на высо́к столп сию́ возведе́, и своя́ бо́ги и́же от злат и ины́я вещи ско́ваныя, даде́ ей поклоня́тися, и та́мо той пребыва́ти повеле. Свята́я же разсмотри́вши я́ко сия́ безду́шная, и́же рука́ми сотворе́на не бо́зи суть. Взира́ше же и око́нцем на не́бо, и от сотворе́ния Созда́теля позна́вши, сокруши́ отца́ своего́ и́долы, и ни́щым раздая́. И сего́ ра́ди вся́кими муками от отца́ облага́ется. Посе́м вве́ржена в темни́цу, и а́лчна пребы́вши. Пи́щу же от а́нгела приима́ше, и вре́ды я́звеныя уврачева́ ей. Та́же в мо́ре вве́ржена, и от Го́спода боже́ственое креще́ние прие́мши, и Бо́жиим а́нгелом на су́хо изведена́ бы́вши. Посе́м уви́дена жи́ва су́щи, па́ки в темни́цу всаждена́ бысть, отцу́ ей та́ко повеле́вшу, иже в ту нощь и живота́ лиши́ся. Дио́н же не́который в ме́сто его́ прии́мый, на истяза́ние приве́д святу́ю непотре́бный. Она́ же Христ́а пропове́давши, вельми́ дручена́ бы́вши, и пресла́вная соверши́вши чудеса́, и приведе́ к ве́ре муже́й до трех ты́сящь. По Дио́не же Иулиа́н не́кто иге́монство восприя́т, и в пещь о́гненну вве́рже святу́ю, и сохранена́ бы́вши невреди́ма. И осуди́ ю́ вве́ржене бы́ти ей в пресмыка́емая ядови́тая. К сим же и святы́я сосцы́ ея уре́зати, из них же в кро́ви ме́сто млеко́ истече́. Та́же и язы́к. Коне́чное же от во́ин по се́рдце, и по ре́брех су́лицами сбодена́, дух Бо́гу предаде́. Соверша́ется же собо́р ея́ во святе́м ея́ муче́нии, су́щем в но́вей пала́те, и в вели́цей Нифи́и, и в муче́нии свята́го Три́фона, близ святы́я Ири́ны.

Молю́ у́бо вы бра́тие, бу́дите соверши́тели за́поведи Госпо́дни. Люби́те друг дру́га. И отложи́вше лжу, глаго́лите и́стину ко́ждо ко и́скреннему своему́, поне́же у́дове есмы́ себе́ мы единове́рнии. Да не за́йдет со́лнце во гне́ве ва́шем, ни дади́те в себе́ ме́ста диа́волу. Путие́ бо творя́щих зло́бу в се́рдцы ва́шем, дале́че суть от Бо́га: И поткну́выйся в них у́мрет, поне́же не положи́ Бога помо́щника себе́. Тем во вся́кой оби́де не бу́ди помина́я зла на бли́жняго своего́, и тогда́ моля́щуся тебе́ греси́ твои́ отпу́стит Госпо́дь. Не ложь бо есть реки́й: А́ще принесе́ши дар твой ко олтаре́ви, и ту помяне́ши я́ко брат твой и́мать не́что на тя, оста́ви ту прино́с твой, и шед смири́ся с ним пре́жде, и пото́м принеси́ дар твой, и бу́деши сын све́та, и прича́стник Ца́рствия небе́снаго. Блаже́ни бо рече́ ходя́щии в за́поведех Госпо́дних, и творя́щии во́лю Его́ во ве́ки возра́дуются во благи́х. Ему́же сла́ва, ны́не и при́сно, и во ве́ки веко́в. Ами́нь.