Стихи́: Ма́ти преста́вльшися, ма́тери Де́вы Отрокови́цы Ражда́ющим матере́м Спасе́ние: В два́десять пя́тый изы́де А́нна от жития́.

Сия́ бя́ша ба́ба Го́спода на́шего Иису́са Христа́ е́же по пло́ти. Бя́ше же от коле́на Леви́ина, дщи Матфа́на иере́я, и Мари́и жены́ его́. Бя́ше бо Матфа́н святи́тельствуя в ца́рство Клеопа́трово, и Сопо́ра царя́ пе́рсскаго, пре́жде ца́рствия И́родова, сы́на Антипа́трова. Сей у́бо Матфа́н име́яше три дще́ри: Мари́ю, Софи́ю, А́нну. Заче́нши же пе́рвая в Вифлее́ме, и роди́ Елисаве́ть. Заче́нши же втора́я, и роди́ Саломи́ю. Заче́нши же тре́тия в земли́ Галиле́йстей, и роди́ Богоро́дицу Мари́ю. Дще́ри бы́вше трие́х сестре́ниц. Сия́ у́бо свята́я А́нна по е́же роди́ти Спасе́ние всего́ ми́ра, и по отдое́нии в це́ркви Сию́ возложи́вши, я́ко непоро́чный дар Вседержи́телю, посты́ и мольба́ми, и тре́бующим благого́бзия в про́чее вре́мя соверши́вши, и с ми́ром ко Го́споду отъи́де. Соверша́етжеся собо́р ея́ в Девте́рии.

Стихи́:

Олимпиа́да па́дши оте́ческим трудо́м,

К Вы́шнему ра́дующися восхо́дит оте́честву.

Сия́ бя́ше в ца́рство вели́каго Феодо́сия, отца́ Оно́рия, и Арка́дия царе́ма. Дщи бы́вши Секу́нда не́коего от коми́т. Ро́да же Евла́вия епа́рх: Неве́ста же бы́вши Евре́дия и́же от епа́рх: Жена́ же ничи́я: Еще́ же деви́це ей су́щи, хотя́щему бо ту́ю на брак поя́ти, от землены́х отше́дшу: Сия́ же деви́ца су́щи и вдови́ца пребыва́ше. Соверши́вши же все житие́ свое́ посты́ и моли́твами. И тре́бующым все бога́тство свое́ в благоутро́бие истощи́вши, и во учрежде́ние архиере́ом Христо́вым. И блаже́ннаго Иоа́нна Златоу́стаго приве́дши почте́, и к коне́чней бесе́де украси́вши себе́. И́стины ра́ди прогна́ние непра́ведное прия́т, иде́же и житию́ коне́ц восприе́мши.

Диа́кон не́кий наро́чит, и всем сла́вен бе в монастыре́ во Еги́пте. И не́кто прост люди́н гони́мь от кня́зя, прии́де со всем до́мом свои́м в монасты́рь кры́яся, и от неприя́зненыя си́лы паде́ся с жено́ю его́ диа́кон. Обличе́н же быв о гресе́ его́же сотвори́, и бысть всем в студ, и и́де к не́коему ста́рцу возлю́бленному от него́, и испове́да ему́ свой грех. Имя́ше же ста́рец темни́цу вне ке́ллии своея́, и моля́ше глаго́ля: «Погреби́ мя зде жи́ва, и не возвести́ о мне никому́же». И вле́зши в темни́цу ту ка́яшеся. И по ле́те еди́ном не бысть дождя́ отню́д. И всем Богу моля́щымся, и со кресты́ ходя́щым, яви́ Бог не́коему от святы́х, я́ко а́ще не прии́дет сокрове́нный диа́кон мона́хом, не бу́дет вам дождя́ на зе́млю. И слы́шавше диви́шася и просла́виша Бо́га. И прише́дше изведо́ша его́ из ме́ста иде́же седя́ше. И тогда́ взем он сан свой помоли́ся Бо́гу, и сни́де дождь. И та́ко мно́зи соблазни́вшиися, и отча́явшиися грех ра́ди, по́льзу прия́ша о покая́нии его́, и просла́виша Бо́га.