Стихи́:

Четверочи́сленаго ли́ка апо́стольскаго:

Христо́с Бог восприя́т вы́сшее.

Стихи́ на апо́стола Тимо́на:

Чту тебе́ Тимо́не яќо апо́стола еди́наго:

И я́ко в му́ченицех сожже́нна еди́наго:

Пострада́ Тимо́н огне́м в два́десять осмы́й.

Блаже́нная реко́ша уста́: «Вся́кая во сла́ву Бо́гу твори́те». А е́же предлага́ти апо́стольская при́тча в сла́ву Бо́гу. Прилежи́т пи́шущему просвеща́тися ра́ди послу́шающим. Или́ не мнит ти ся просвеще́нием души́ бы́ти толи́ких му́жий пропове́даемыя доброде́тели?

Си́и диа́кони и апо́столи, с первому́чеником и архидиа́коном Стефа́ном, по е́же непоро́чне преста́ти от слу́жбы.

Апо́стол же Про́хор напе́рснику и Богосло́ву Иоа́нну в путь ше́ствоваше, обходя́ о́стровы и места́ кня́жия, и в благове́стии трудя́ся с ним и пиша́, и ника́ко в напа́стех отступа́я от учи́теля. По преставле́нии же Богосло́вле, пе́рвый епи́скоп Никомиди́йский поста́влен бысть. И всех и́же та́мо су́щих сличи́в во уста́в лу́чший. Разсуди́тельное достоя́ние приле́жне поучи́в, я́ко не снисходи́ти лу́чшему под у́ньшим. И та́ко узаконева́я от жития́ пре́йде.

Та́коже и Никано́р в той день внегда́ ка́мением первому́ченик Стефа́н побие́н бысть, ку́пно ду́хи в ру́це Бо́гу преда́ша. И́хже бо бя́ху бра́тская мудрова́ния, бы́ша и ра́вни со святы́ми концы́.

Парме́на же апо́столом служа́ сконча́ся, и от о́нех саме́х погребе́н бысть, и попла́кан бысть смире́не.

Пла́чем же и мы умерщве́ныя на́ша ду́ши грехми́, рыда́ем доне́леже вре́мя есть, да во вре́мя воздая́ния возра́дуемся.

Евста́фий Христо́в му́ченик во́ин бе. Христиа́н же сый. И приведе́н бысть к Корни́лию иге́мону Агки́рскому, и вопроше́н бысть, со дерзнове́нием Христа́ испове́да: тем бие́н бысть неща́дно. Посе́м пя́те проверте́ша ему́, и у́жем обя́зан и влачи́мь бысть от гра́да Агки́рскаго, и влеко́ша до друга́го гра́да Сага́рска, восле́дующу и зря́щу иге́мону. И та́мо в ко́рсту вложе́н быв, и вве́ржен бысть в реку́. По изволе́нию же Бо́жию прише́д боже́ственный а́нгел, изнесе́ ко́рсту на су́хо, и обре́теся в ней святы́й жив, поя́: Живы́й в по́мощи Вы́шняго: и про́чая. Уве́дев же сие́ иге́мон посрами́ся, и извлек ножь уби́ себе́. Святы́й же му́ченик помоли́вся Бо́гу, и причасти́вся боже́ственных Та́ин, по́сланных к нему́ с небесе́ го́лубем, и рука́ма я́вльшася а́нгела, и тогда́ предаде́ дух свой в ру́це Госпо́дни. И положе́н бысть в том же гра́де Агки́рстем.

В ле́то шесть ты́сящь девятьсо́т четве́ртое во дни княже́ния вели́каго кня́зя Василия Васи́лиевича, всея́ Росси́и: и при преосвяще́нном Ио́не митрополи́те всея́ Росси́и. Прии́де от гра́да Смоле́нска в Москву́ к вели́кому кня́зю Васи́лию Васи́лиевичу, смоле́нский епи́скоп Мисаи́л с наме́стники, и мно́гими наро́читыми жи́тели гра́да того́: моля́ше вели́каго кня́зя, да бы поми́ловал их, и отпусти́л ико́ну Пресвяты́я Богоро́дицы, ея́же бе пре́жде взял от них Юрга́ пле́ном. Князь же вели́кий положи́ о том сове́т со отце́м свои́м, преосвяще́нным Ио́ною митрополи́том всея́ Росси́и, и с про́чими святи́тели росси́йския земли́, и с боля́ры свои́ми глаго́ля: ка́ко в пле́не держа́ти неодержи́мую Влады́чицу всего́ ми́ра? И мно́го почти́в епи́скопа и су́щих с ним. Посе́м же сотворя́ет пра́зднество на отпуще́ние тоя́ честны́я ико́ны, и призыва́ет преосвяще́ннаго Ио́ну митрополи́та всея́ Росси́и, и весь е́же о нем свяще́нный собо́р во це́рковь Благове́щения Пресвяты́я Богоро́дицы, я́же на его́ двор́е. И́бо та́мо стояше та честна́я ико́на на десне́й стране́, святы́х двере́й ца́рских. Митрополи́т же со освяще́нным собором всено́щное бде́ние сотво́рьше, и Литурги́ю соверши́вше. И по соверше́нии Литу́ргии прихо́дит князь вели́кий, и де́ти его́, и вели́кая княги́ня Мария, и ко о́бразу Пресвяты́я Богоро́дицы. Преосвяще́нный же митрополи́т, и вси приключи́вшиися ту зна́менавшеся, мно́гия сле́зы излива́юще. И взе́мше из киво́та, вруча́ют ю́ проси́вшему ея́ епи́скопу смоле́нскому Мисаи́лу, еще́ и и́ны мно́ги святы́я ико́ны кроме́ тоя́, укра́шены сребро́м и зла́том и би́сером того́же пле́на. И та́ко исхо́дят из це́ркве с честны́ми кресты́ и ико́нами, после́дующу митрополи́ту со освяще́нным собо́ром. Иду́щу же по них вели́кому кня́зю с ча́ды свои́ми, и со кня́зи и боля́ры, и со мно́жеством во́инств, и весь наро́д сла́внаго гра́да Москвы́ провожда́юще че́стне за град два по́прища, и та́ко возврати́вшеся во град моле́бная соверша́юще. Повеле́ же вели́кий князь с тоя́ святыя ико́ны снем ме́ру преписа́ти таку́ю же ико́ну, и поста́вити на том ме́сте, иде́же пре́жде [бе] стоя́ла та честна́я ико́на. По ле́тех же не́колицех во дни княже́ния вели́каго кня́зя Васи́лия Иоа́нновича всея Росси́и, в лето седмь ты́сящь три́десять тре́тие, поста́влен бысть на том ме́сте иде́же проводи́ша ту честну́ю ико́ну де́вичь монасты́рь. И о́ну препи́санную ико́ну постав́иша та́мо. И уста́виша пра́здновати ме́сяца иу́лия, в дв́адесять осмы́й день.