Стихи́:

Пропове́дники Твоя́ Си́лы и Силуа́на

Спа́се уме́рша, ка́ко без пропове́дания оста́влю:

Ку́пно уме́ршу таи́нницы Бо́жии в тридеся́тый.

Си́и бя́ху от седми́десяти апо́стол. И́же Си́ла потруди́ся с блаже́нным Па́влом. И́же в про́чих потруди́вшемуся во благове́стии, терпя́ в напа́стех. По вре́мени же нема́ле в Кори́нфе епи́скопом поста́влен бысть. Посла́ния его́ известу́я и к лу́чшему направля́я вита́тельники. Мно́га же зна́мения сотвори́в, и всех ко Христо́ве ве́ре потверди́в, ко Го́споду отъи́де. Силуа́н же епи́скоп Селу́нский поста́влен бысть, и́же и мно́ги побе́ды подъя́в по́двига ра́ди о ве́ре. Связа́в бо сло́во селу́няном в совраще́ниих. И та́ко до́бре подвиза́вся, к Жела́емому изы́де.

Стихи́:

А́ще ва́рвар не ве́дев, бе́сове ка́ко?

Да́же и до сконча́ния, бежал еси Христов оружниче.

Сей святы́й Иоа́нн, при Иулиа́не престу́пнице во́инствуя. По́слан же бысть со ине́ми во́ины на убие́ние христиа́нское. Бе же у́бо ви́дящым я́ко гони́тель, посо́бствова же нема́ло тай христиа́ном, о́вем пре́жде у́бо я́тия возвеща́я бежа́ти, о́вем же по я́тии отпуще́ние на свобо́ду дава́ше: Не то́чию же милосе́рдие свое́ к сицевы́м явля́ше, но и тре́бующым дава́ше потре́бная. Моли́твами и поще́нием упражня́яся, и посеще́нием немощны́х, и к скорбя́щым утеше́нием житие́ свое́ украша́ше, и на чистоту́ управля́шеся. И та́ко богоуго́дно пожи́в, ко Го́споду отъи́де. И погребе́н бысть на ме́сте, иде́же полага́хуся стра́ннии. Последи́ же сказа́ не́коей жене́ открове́нием все дея́ние е́же в житии́ сотвори́, и и́мже нарица́шеся и́менем возвести́. Глаго́лют же свята́го того́ и и́на чудеса́ сотво́рша, изря́днее же рабо́м уго́дства удержа́ет, и татьбы́ извеща́ет, и уче́ние я́ве твори́т. Доброде́тельнаго бо его́ ра́ди жития́ таково́ю от Бо́га ообогати́ся де́телию чудотворе́ния.

Елма́ смире́нный се́рдцем, по подража́нию Госпо́дню кро́ток и молчали́в, не пререка́я ни вопия́: Но и а́ще прилучи́тся, досажда́емь есть па́че, а не досажда́ет: бие́мь есть, а не бие́т. А́ще ли о ни́хже сло́во, не то́чию с я́ростию досажда́ют, но и би́ти начина́ют. Та́же и бра́тии единообра́зны. Пото́м же поноша́еми о продерза́нии, отвеща́ют, не по пра́вилом я́тым бы́ти, поне́же рече́ не собо́ю, но ине́ми би́хом: соглаго́лание стра́сти, е́же в ле́ствице принося́ще сло́во: Не ве́дяще я́ко сло́во о́но принужде́но есть, не име́я взаконе́ния: И явля́ет той сам оте́ц воспомина́яй апо́стольское, си́це глаго́лет: обличи́, запрети́, умоли́, а не бий. А́ще у́бо не рече́ би́ти, кто сме́яй приложи́ти. Или́ отъя́ти, от и́же апо́стольских преда́ний. И ника́коже а́ще е́же не собо́ю, но ине́м би́ти оставля́ет от согреше́ния, да оста́влени бу́дут от уби́йственаго греха́. И вси мучи́тели я́ко не собо́ю, но и слуга́ми свои́ми уби́ша, проро́ки же и му́ченики. И да никто́же глаго́лет: я́ко он имяре́к му́чи сего́ и сего́, но да и́щет по и́мени глаго́лати слугу́ющыя, е́же есть не согла́сно и не содру́жно. Ка́ко же и апо́стольское презре́но бу́дет глаго́лющее: епи́скопа или́ презви́тера, или́ диа́кона бию́ща ве́рныя согреша́юща, или́ неве́рныя непра́вдовавша, изврещи́ повелева́ем. У́бо еда ка́ко утаи́ся Ду́ху Свято́му воспомяну́ти е́же ине́ми бити, но да не бу́дет блядь сия́. Да при́точествуется же, и о и́же на зла́те поста́вленых, у́бо я́ко не собо́ю, но ино́ю руко́ю, или́ прия́ша, или́ да́ша, вне суть пра́вильнаго изверже́ния: Ни у́бо, ника́коже. То́жде у́бо и зде да мним да вменя́ем я́рости от ро́ды бы́ти, и убива́ем я́коже и злу́ю по́хоть от души́, и ни на де́сно, ни на ле́во, но путе́м ца́рским, си́речь, ева́нгельским, и апо́стольским законоположе́нием да хо́дим. Та́ко бо по стопа́м ходя́ще святы́х, дости́гнем с ни́ми в живо́т ве́чный.

Разуме́йте бра́тие све́та сего́ мяте́жь и челове́ческаго жития́. Мяте́тся челове́к, и коне́ц его́ вско́ре погиба́ет. Мяте́тся вы́ся себе́, и па́ки без ве́сти быва́ет, я́ко о́блак распростира́ется, и я́ко се́но изсыха́ет, и я́ко го́вор водны́й надымля́йся, и а́ки и́скра угаса́ет. Мяте́тся и собра́нию бога́тства и́щет, и ничто́же восприи́мь отхо́дит; Тому́ греси́, а бога́тство ине́м оста́нется. Тому́ боле́знь, а ине́м пи́ща. Тому́ печа́ль и грабле́ния, а ине́м сла́дость и насыще́ние. Тому́ кля́твы, и на того́ воздыха́ние, а ине́м изоби́лие. На того́ сле́зы, а ине́м име́ние. Той во а́де му́чимь есть, а ини́и в дому́ его́ кормя́щеся воспева́ют. Во и́стинну мяте́тся всяк челове́к живы́й. Ма́ло зде пожи́в, а во ве́ки в сме́рти. Многохи́тривый зде в непра́вде гото́в, и на лихоима́ние тщали́в. Велича́ваго го́рдость, удо́бь уловля́емая де́рзость, и развева́емый пе́пел, и бо́рзо погиба́ющий пла́мень, и ско́ро увяда́ющая трава́, и умерщвля́ющая пучи́на. Днесь претя́, а у́тре скончава́яся. Днесь в бога́тстве, а у́тре с пла́чем и ко гро́бу. Днесь в порфи́ру облача́ется, а у́тре мертв изно́сится. И́же ны́не грози́тся, а у́тре опла́кай. И́же во име́нии изоби́лен, от него́ ско́ро отлуча́емь, и о себе́ не све́дый, вы́шних пыта́ет, и́же естество́м сме́ртен, а возноше́нием твори́тся ве́чен. О́ коли́ка жития́ на́шего суета́! Коли́к челове́ческия не́мощи ука́з! И сия́ вся изре́к, ничто́же ключи́ма изобрето́х, ра́зве проро́ческаго словесе́, е́же рече́: «В пу́стошь мяте́тся всяк челове́к». Да се ве́дуще бра́тие, попеце́мся о душа́х на́ших. В нас бо есть живо́т и смерть. Самовла́стны бо ны сотвори́л есть Госпо́дь. Ему́же сла́ва, ны́не и при́сно и во ве́ки веко́в. Ами́нь.