Стихи́:

Лукиллиа́н пригвозди́ся до́лу на кресте́,

Се я́ко Христо́с ти́тлу принося́ вы́шше:

В тре́тий на кресте́ Лукиллиа́на усмерти́ша:

Недосто́йная к бу́дущим, я́ко и Па́вел сла́ве,

Ны́не стра́сти страда́вши посе́чена бысть Па́вла:

О́трок су́щих и́хже число́м по два́щи и два,

Христа́ Отца́ положи́ сынови мечь.

Сей святы́й му́ченик Лукиллиа́н, бя́ше во времена́ Аврилиа́на царя́, пе́рвее иере́й ему́ сый и́дольский, стар взо́ром, и бел власы́: жили́ще име́я недале́че Никомиди́йскаго града. Преложи́ся же ко Христо́ве ве́ре, и приведе́н быв к Лива́нию коми́ту: и не повину́ся отврещи́ся Христа́, и и́дольстей приобщи́тися слу́жбе, сокруши́ша его́ че́люсти: и же́злием бие́н, и стремгла́в пове́шен. Та́же в темни́цу вве́ржен, иже и обре́т та́мо че́тверо дете́й: [Кла́вдия, Ипа́тия, Па́вла и Диони́сия], вве́ржены Христо́вы ра́ди ве́ры: и́же и с ни́ми я́влься коми́ту. И еди́наче пребыва́юще во Христо́ве ве́ре в пещь о́гненную вве́ржен быв с детьми́. И свы́ше излия́вшуся дождю́, и пла́мень погаси́вшу, изыдо́ша невреди́ми. И́же и ку́пно осужде́ние с детьми́ прия́т, заведе́н бысть в Византи́ю, та́ко коми́ту повеле́вшу. И де́ти у́бо мече́м посе́чени бы́ша: святы́й же Лукиллиа́н на кресте́ пове́шен, и по всему́ те́лу гвоздьм́и пригвожде́н, Бо́гу дух предаде́.

Святе́й же деви́це Па́вле прише́дшей, и по пути́ ра́нам его́ прилежа́щей. И внегда́ сконча́тися им, телеса́ их собра́вши: [бя́ше бо от роди́телей ве́рных]. И таково́е дело творя́щи, во темни́цах ходя́щи, и за Христа́ стра́ждущих устрабля́ше и пита́ше, и та я́та бы́вши, и приведена́ к коми́ту. И не поко́ршися пожре́ти идолом, пе́рвие обнажена́ бы́вши, и дубцы́ бие́на, таже же́злием. И от мно́гих ран телеси́ ея́ разслабе́вшу. Я́же и настоя́нием а́нгеловым оздраве́вши, дерзнове́нна к муче́нию показа́ся. И па́ки к коми́ту приведена́, и бие́на бысть по усто́м, зане́же его́ укори́. Та́же в темни́цу вве́ржена, и па́ки на испыта́ние изведен́а. И в пещь вве́ржена, изы́де без вре́да. Прие́мши же ме́чное осужде́ние, и в Византи́ю дости́гши по повеле́нию коми́тову: и бы́вши на ме́сте, иде́же святы́й Лукиллиан сконча́ся, та́мо и та восприя́т вене́ц муче́ния. Соверша́ется же собо́р их, во святе́м их муче́нии, су́щем близ це́ркве арха́нгела Михаи́ла во Окси́и.

Христо́ва му́ченица Па́ула прише́дши на страсть и по́двиг святы́х Лукиллия́на и дете́й. В темни́цы же и на пути́ омыва́ше телеса́ святы́х. Кро́ви и стру́пы гно́йныя. Служа́щим по си́ле телесе́м святы́м. Бе бо от прароди́тель крестья́на. И верна́. И то бе де́ло ея́ посеща́ти су́щих в темни́цы. По Христе́ му́чащихся. Исцеля́ше пита́юще я. Того́ ра́ди ята́ бы́вши. Приведена́ бысть к коми́ту Силива́ну. И не повину́вшися пожре́ти и́долом бье́на бысть зле учаще́нием же́злия [и] разби́ша ей те́ло прише́ствием же а́нгеловым здра́ва бысть. И па́ки приведена́ бысть к коми́ту. И вве́ржена бысть в пещь огне́м горя́щую исше́дши же без вреда́ пу́щена бысть. И ше́дши во Вуза́нтию. И та́мо усечена́ бысть. Со святы́м Лукилия́ном за Христа́.

Стихи́:

Я́же чи́сте целому́дрена су́щи Ие́рия,

[Неве́стника не оста́ся кроме́ Госпо́дня]

Стихи́:

У́мер Па́па не дед быв вну́ком,

Но па́че от оте́ц доброде́тельных и дще́рий

После́дуйте у́бо челове́кы Христа́, ка́ко во след Его́ ходи́ти. В покоре́нии ста́рець не хотя́ше бы́ти и от ме́ста на ме́сто приходя́ще. И пе́рво е́же подоба́еть, кому́ждо испыта́ти свою́ мысль почто́ и́ноче, хотя́ше отъити́ от ме́ста своего́. Где власы́ свои́ постриже́. А в не́мже обеща́лся еси́ бы́ти егда́ ка́ко и́ноче труда́ ра́ди хо́щеши бежа́ти во ин монасты́рь. Мни́ши себе́ хо́щеши лежа́ труда́ обрести́. А́ки лу́чешу дружи́ну да ка́ко па́ки от до́браго де́ла, ненави́дяще нас бес, ре́вностью и за́вестию устреля́ете нас. Я́ко бра́ту на́шему кой ино́му манастирю́ поспешеству́ющу ненави́димое. И та́мо не полу́дше ему́ бу́деть нача́кта. А се хо́щеть оста́вити ме́сто, егда́ ка́ко бра́ни бе́гая. А не хотя́ прия́ти доброде́телий о Христе́ повинове́ние. И́нны монастыри́ обхо́дить егда́ ка́ко насле́дие Христо́во земно́е го́нить, и ме́сто своего́ пострига́ния оставля́еть. И́бо помы́слите сия́ бра́тия моя́, а́ще у́бо пре́же испыта́емся, и уви́девше я́же есть в нас смерть, и́же мы гре́шнии сему́ не после́дуем. Да впада́ем в ру́це злых бесо́в. И́хже мно́го обра́зныя се́ти на нас ме́щуты. О бра́тия смире́нием и тръпе́нием и поще́нием и убежи́м от клеветы́ и злых бесо́в губя́щих нас. Бо́гу на́шему сла́ва и ны́не и при́сно и во ве́ки веко́в.

И́же кто чужа́го жела́еть име́ния и то по ма́ле дний по свое́м рыда́еть. У́несть по ма́лу прилага́ти к своему́ житю́ с утеше́нием не́жели внеза́пу възвы́ситися чужи́м име́нием, а последи́ обнажи́тися от своего́. И́же кто чу́же гра́бя, ми́лостыню твори́ть, то сам не поми́лован бу́дет. Обе́дил и съгреши́л грех после́дний, а́ще тем ми́лостыню твори́ши что гра́биши, и то неприя́тно суть Бо́гу. И́же кого́ гра́биши и́же пре́же тех поми́луй, и отда́й втори́цею, и то тебе́ есть благоче́стно и́же кто мно́ги ми́луеть, и еще́же нико́го не оби́дити ни оклевета́ти, и́же бла́га де́ла нача́ло твори́ти паки востуби́ть, на пе́рвый обы́чай но не то́кмо всу́е труди́лся еси́, но и бо́лшему осуже́нию сподо́биться, ниже́ во гресе́х живи́, да не отлуча́ется. Ве́домо бу́ди я́ко копа́яй садя́, вели́к сад разстро́ит. И па́ки и́ предая́й изменя́ться. Са́жено есть слово́. А душе́вное строе́ние мо́жеть возде́ржати вся́кый неду́г. Я́коже че́рвие во гни́ле дре́ве ража́ется. Та́коже печа́ли в челове́ки вхо́дять. И́же глаго́леть писа́ние, не досто́ить пра́веднику печа́ли име́ти. То не мо́жеть издрещи́. Я́ко недосто́йно борцу́, проти́вно име́ти. Но ка́ко позна́ется хи́трость его́ безпроти́вна. Бо́гу на́шему сла́ва и ны́не и при́сно и во ве́ки веко́в.

Послу́шайте жены́ за́поведи Бо́жия, и научи́теся молча́ти, да спасе́те ду́ши своя́. Внача́ле бо Бог рече́ к Е́ве: «От му́жа взята́ еси́ и той тобо́ю да облада́ет, ему́же ты повини́ся в молча́нии». Жена́ бо своего́ му́жа че́стна творя́щи, мудра́ и похва́льна пре́до все́ми показу́ется, и от Бо́га почтена́ и благослове́на есть. Жены́ муже́м свои́м да не супроти́вятся. Я́ко бо Христо́с глава́ есть Це́ркви, та́ко и мужь глава́ есть жене́. Я́коже Це́ркви повину́ется Христу́, та́ко и жены́ свои́м муже́м во всем. Жены́ же во це́ркви да молча́т, гну́сно бо есть жене́ в це́ркви бесе́довати. А́щели что хотя́т вопраша́ти, то в до́мех мужь свои́х да вопроша́ют. Жена́ добра́ и молчали́ва, вене́ц есть му́жу своему́ есть. Обреты́й жену́ добру́, изно́сит из до́му своего́ блага́я. Прему́дрыя бо жены́ возгради́ша до́мы, а безу́мныя раскопа́ша язы́ком свои́м. Жены́ добры́ блажи́мь есть мужь, жена́ добра́ весели́т му́жа своего́, и ле́та его́ испо́лнит в безпеча́лии. Честь бла́га от Го́спода - жена́ молчали́ва. Жена́ же язы́чна, мужеви за грехи́ дае́тся. Лю́те же тому́ му́жу, и́же зрит на лице́ жене́ и слу́шает язы́ка ее́, а не пыта́ет дел ея́, и от тех познава́ет ю́. Лу́чши есть боле́ти тряса́вицею, не́жели жено́ю облада́нну бы́ти. Тря́сца бо тря́сши пу́стит, а зла́я жена́ и до сме́рти му́жа своего́ суши́т. Слы́шите же Па́вла глаго́люща: «Жене́ учи́ти не велю, ни владе́ти му́жем, но повинова́тися во всем Бо́гови».

Пове́даше оте́ц Пафно́тий. Помы́слих ити́ в пусты́ню. Егда́ кде обря́щу челове́ка работа́юще Влады́це Христу́ и шед дни 30 обрето́х пеще́ру и стопы́ му́жески к ней. И рад бысть прибли́жися к пе́ще и вшед в ню никого́же не обрето́х. Глаго́лах я́ко подоба́еть рабу́ Бо́жию зде бы́ти. Иде́же а́ще есть. [Ти] я́ко день ми́мо идя́ше. [И ве́черу приближа́ющуся] Ви́дех вельблю́ды гряду́ща и с ни́ми раба́ Бо́жия на́га и власы́ свои́ми закры́вша сра́мныя у́ды. Егда́ же прибли́жися ко мне и мнев мя ду́ха су́ща. Ста на моли́тве бе бо я́коже последи́ же сказа́ мно́го па́кости прия́л от дух. Аз же разуме́в глаго́лах челове́к есмь ра́бе Бо́жий. Вижь стопы́ моя́ и осяжи́ мя. Я́ко плоть и кровь есмь. Егда́ рече́ ами́нь. Ви́де мя и уте́шив. И пое́м мя в пеще́ру вопроша́ше, ка́ко се́мо при́де. Аз же рех взиска́ть раб Бо́жий в пусты́ни и не лиши́л есть Госпо́дь жела́ния моего́. Аз же проси́х его́ глаго́ля, сам же ка́ко се́мо прии́де. И коли́ко лет и́маеши и чим пита́еши ся. И ка́ко наг сый не тре́буеши ри́зы. Он же рече́ аз в манастыри́ бех под игу́меном и де́ло имя́х тка́ния. Вни́де же в мя по́мысл глаго́лющи. Изъи́ди и живи́ еди́н и мо́жеши бо́лшую мзду стяжа́ти от труд дел свои́х. И я́коже изъидо́х из бра́тства созда́х собе́ ке́лью. Мно́го же име́ние имя́х и сбира́х и подвиза́хся ни́щим и стра́нником раздая́х и се враг наш дия́вол возревнова́ ми. Я́коже при́сно и на всех вою́еть [и сетии́ мещи́т] и тща́шеся труды́ моя́ испроврещи́ е. Ви́дех еди́ну чернори́зицу, повелева́ющу ми устро́ити полотно́, и сотво́ршу ми се и да́вшу ми ей ну́дит мя и друго́е доспе́ти. Ти я́ко у́же свы́чай бысть. И дерзнове́нее бо́лше, посе́м осяза́ние руце́, и смех, и сужи́тие. И заче́нши роди́хове безако́ние. Ти я́ко пребы́х с нею 6 ме́сець впа́дая помы́слих я́ко день или́ у́тро или́ по ле́те смерть вари́т мя и прия́ти и́мам ве́чную му́ку. А́ще бо кто жену́ му́жеску просмради́т пови́нен есть ве́чьней му́це. Коли́цем же страсте́м досто́ин есмь, просмраже́й неве́сту Христо́ву. И та́ко в пусты́ню сию́ тай избего́х. Оста́вле вся жене́ и зде прише́д обрето́х пеще́ру сию́. И исто́чник сей. И фю́ник сей иму́ще 12 ве́тви. На ме́сяц же ражза́еть ка́яждо ве́тви е́же ми довле́ет на 30 и посе́м созре́ет дуга́я. По ле́тех же мно́зех возрасто́ша ми власи́ те́ми закрыва́ю я́же ми подоба́ет телеси́ срамоту́. И па́ки вопроша́х его́ егда́ в нача́тче стужа́ше ли́ту и рече́ ми, в нача́тце зело́ изнемога́х. Я́ко и на земли́ па́дати ми от утро́бы. И не можа́х стоя́ти и моли́твы сотвори́ти но лежа́ на земли́ в пе́ще. В ту́зе мно́зе и во стра́сти. Я́ко у́же не можа́х вон исходи́ти. Ви́дех му́жа вле́зша и глаго́люща ми чим боли́ши. Аз же едва́ возмого́х рех утро́ба ми боли́т и рече́ ми кде боли́ши  [, покажи́ ми ме́сто] и показа́х ему́. Он же персты́ руки́ своея́ упра́вль и прере́за ме́сто я́ко ноже́м. И исто́рг я́тра моя́ показа́ ми стру́пы. И руко́ю острога́в в плате́ стру́пы положи́в. И па́ки вложи́ я́тра и руко́ю ме́сто зама́за. И рече́ ми се здрав бысть служи́ Влады́це Христу́. Я́коже подоба́ет. И отто́ле бых здрав. И та́ко без труда́ зде живу́. И мно́го же и́ моли́х да бых жил близ его́ в пеще́ре, и рече́ ми не може́ши терпе́ти напа́сти де́моньския. Аз же помоли́хся да моли́тву сотвори́т и отпу́стит мя. И помоли́вся отпусти́ мя. И се пове́даю вам по́лзы ра́ди.