Стихи́:

Рука́ бя́ше Бо́жия Феодо́та крепля́я,

Рука́ бя́ше Феодо́та порази́вшия мече́м:

Феодо́т посе́чен в седмы́й, пре́йде от земли́.

Сей бя́ше во Агки́ре Гала́тстей. Оклевета́н же бысть к Феоте́кну иге́мону, я́ко телеса́ святы́х деви́ц вве́рженая в е́зеро, той изнесе́ и погребе́. Приведе́н же бысть к нему́ и испыта́н, и себе́ наре́к препро́ста су́ща, и па́че царе́й сильне́йша. И себе́ вдав на Христо́во испове́дание. И ничто́же кня́зю внима́ти, [па́че же и еле́нския бо́ги укори́ти поклоня́ющеся им, посрами́ я́ и уро́дивы и окая́нны я́ нарече́, и тогда́] бие́н бысть зело́. И пове́шен на дре́ве и по ребро́м свеща́ми пожже́н бысть и стро́ган бысть по пло́ти кре́пко, и посе́м прия́т ме́чное осужде́ние, пре́жде помоли́вся, и та́ко усече́н бысть во главу́. Презви́тер же Фро́унтон и́менем быв, и ви́де и́, стрегу́ще его́ во́ином, шед к ним и моли́ их да во́змет те́ло его́, и не дадя́ше его́. Се же скры́шася, до́ндеже усну́ша, взем свята́го Феодо́та мо́щи и возложи́ на осля́ свое́. Прине́с и положи́ на селе́ свое́м. И то́чит цельбы́ и до сего́ дни во сла́ву Бо́жию.

Стихи́:

Севастиа́ни я́ко и про́чая житию́,

Че́стен всем и житию́ коне́ц

Стихи́:

Пра́во принося́ Анфи́м Христу́ житие́,

Че́стна вся́ким и житию́ кончи́на

Стихи́:

Иоа́нна посеко́ша с Тара́сием

Рек посече́нию ме́чному себе́ замя́тьше

Кирияки́я Христо́ва му́ченица и Кале́рия и Мари́я бы́ша от гра́да Кесари́и палести́нския, от не́коего христия́на научи́шяся ве́ре Христо́ве. И отверго́шася жертв ме́рзских и́дол, и приступи́шя к Христу́, и крести́шяся. И седя́ху в молча́нии в не́коей хи́же пребыва́юще моля́ше Бо́га, я́ко да разори́тся лесть и́дольская, до конца́ же восия́ет Христо́ва ве́ра во всем ми́ре. И да преста́нет на христия́ны гоне́ние. И та́ко творя́ще, оклевета́ни же бы́ша от идолослужи́тель ко кня́зю страны́ тоя́, и пону́жени бы́ша отврещи́ся Христа́, и поклони́тися и́долом. И не восхоте́вше того́ сотвори́ти, му́чени бы́ша ра́нами неща́дно. И в тех му́ках в ру́це Бо́гу ду́шя своя́ преда́ша.

Сей у́бо оте́ц Дани́л от младе́нства отре́кся ми́ра, и живя́ше в ски́те. Еди́ною же прише́дшим ва́рваром и взе́мшим его́, и пребы́сть с ни́ми две ле́те. И не́кий христолю́бец мужь искупи́ его́ от них. И па́ки по ле́те не́коем прише́дше ва́рвари и плени́ша и́, и сотвори́ с ни́ми шесть ме́сяц, и убеже́ от них. И па́ки трети́цею прише́д плени́ша и́, и озло́биша его́ мно́гими муче́ньми и ра́нами неми́лостивно. Еди́ною у́бо взем ка́мень, и уда́ри нечести́ваго ва́рвара и у́мре. И по отбежа́нии отцу́ Дани́лу от ва́рвар, раска́явшуся о ве́щи уби́йства е́же сотвори́. И прише́д во Александри́ю пове́да Тимофе́ю патриа́рху о ве́щи. Слы́шав же патриа́рх о ве́щи укори́ его́ рек, я́ко Бог изба́ви те́бе два́щи от них, и трети́цею можа́ше изба́вити тя, но оба́че уби́йство несть се, зве́ря бо уби́л еси́. Влез же в кора́бль оте́ц Дани́л, и доплы́ Ри́ма, пове́да и та́мо па́пе о ве́щи, е́же рече́ ему́ патриа́рх алекса́ндрский. И отвеща́ ему́ па́па ри́мский, я́ко до́бре рече́ ти патриа́рх алекса́ндрский. Ше́дшу же ему́ в Константи́нь град, и во Ефе́с и Иеросали́м, и во Антиохи́ю, пове́доваше патриа́рхом я́же о уби́йстве; И то же сло́во слы́шав от всех патриа́рхов. Па́ки же возврати́вся во Александри́ю, и глаго́ла в себе́, Дани́ле Дани́ле уби́йство сотвори́вый, подоба́ет ти самому́ убие́ну бы́ти. И шед к судия́м глаго́ла, поне́же крамолу́ с не́ким сотвори́х, взем ка́мень и уби́х его́. Сего́ ра́ди молю́ся вам, предади́те мя кня́зю, я́ко да умори́т мя за уби́йство я́же сотвори́х, и лише́н бу́ду ве́чныя му́ки. Слы́шавше же сия́ судии́, всади́ша и́ в темни́цу, и пребы́сть в ней три́десят дней. Пото́м же сказа́ша кня́зю я́же о нем. Князь же изведе́ его́ из темни́цы, и истяза́ ка́ко у́бийство сотвори́. И пове́да ему́ ста́рец всю и́стину. Князь же почуди́ся разсужде́нию ста́рца, и отпусти́ его́ глаго́ля, шед моли́ за мя а́вво а́ще бы и други́я седмь ва́рвар уби́л. Ста́рец же глаго́ла в себе́, упова́ю на человеколю́бие Бо́жие, я́ко ктому́, не вмени́т ми бы́ти уби́йство бла́гость. И отны́не же всего́ вдаю́ себе́ Христу́, я́ко по вся дни живота́ моего́ служи́ти ми еди́ному прокаже́нному, вме́сто уби́йства, е́же сотвори́х. И взя ста́рец еди́ного от прокаже́нных, и служа́ше ему́. И глаго́ла в себе́, а́ще у́мрет прокаже́нный сей, иду́ во Еги́пет, и возму́ друга́го вме́сто сего́. Вси же ски́тяне не ве́дяху сего́, я́ко и́мать прокаже́нна. Никто́ же можа́ше ви́дети лице́ его́, то́чию ста́рец еди́н. Во еди́н же от дний призва́ ста́рец ученика́ своего́ сне́сти хлеб по обы́чаю. И по смотре́нию Бо́жию прилучи́ся забы́ти ста́рцу, и оста́вити две́ри отве́рсты ке́лии своея́, и седя́ше на со́лнце ста́рец служа́ше прокаже́нному. Бе же прокаже́нному согнила́ вся плоть его́, и от мно́жества ран лю́тых. Ученику́ же иду́щу к ста́рцу, и обре́те две́ри ке́лии его́ отве́рсты, и ви́де ста́рца ка́ко служа́ше прокаже́нному. Вшед бо в ке́лию и принесе́ снедь, и влага́ше во уста́ его́, зане́ не име́ти прокаже́нному ру́ку. И зане́же не мощи́ ему́ поглота́ти снедь, поне́же бы́ти ему́ до конца́ гнилу́ устна́ма. Ста́рец же влага́ше во уста́ его́ свои́ма рука́ма, и я́же не можа́ше снеда́ти, изъима́ше ста́рец изоу́ст его́ и сам снеда́ше. Ви́дев же учени́к ди́вное де́ло е́же творя́ше ста́рец, удиви́ся, и просла́ви Бо́га о такове́м де́ле, подаю́щаго таково́е терпе́ние ста́рцу, е́же си́це служи́ти прокаже́нному.

Скрыл есть Госпо́дь от ми́ра напа́сти вре́́мя, не по (по)лучению, па́чеже благополуче́нию. И́бо се а́ще бы́ша ве́дали, никто́же бы ся ми́ра отве́рг, вся́ка плоть, поне́же по апо́столу пло́тный челове́к не прие́млет духо́вных. Блу́дство бо ему́ есть, а и́же к Бо́гу ре́вность духо́внаго есть и́же бо в ми́ре живу́ще ка́ко могу́ть свои́х студ отврещи́ся и отбы́ша и. А́ще не бы Бог напа́стьми призыва́л ко и́ночеству из ми́ра и бо плоть (и) кровь ца́рствия Бо́жия насле́довати не мо́жет

А́ще ревну́еши Христу́ Бо́гу, бу́деши блаже́н, и сме́ртию да не у́мрет душа́ твоя́. И не прии́дет зло́ба к телеси́ твоему́, но бу́дет исхо́д твой я́ко исхо́д звезды́ и воста́ние твое́, я́ко со́лнце просвети́тся. Го́ре беззако́ннику в день сме́рти, и непра́ведных ду́шы поги́бнут во вре́мя лю́то. Ду́шы пра́ведных во́дят а́нгели, ду́шы же злых прии́мут бе́си. Отку́ду же бо вни́дет зло́ба, туде́же и неразу́мие. Сердца́ же пра́ведных испо́лнятся ра́зума. Неми́лостивый не пода́тлив есть, кормя́й же ни́ща насле́дит сокро́вища. [О́ бра́тия, глаго́лю вам,] Лу́чше убо́жество с ра́зумом, не́же бога́тство без рассужде́ния и без ра́зума. Красота́, главе́ вене́ц - [ум до́брый], красота́ же се́рдцу - ра́зум Бо́жий. [О́ челове́че,] притяжи́ [себе́] ра́зум, лу́чши бо сребра́ му́дрость, и па́че бога́тства мно́га. Лука́внующии бо потребя́тся, терпя́щии же Го́спода, ти́и насле́дят зе́млю. Ми́луяй убо́гия утоля́ет я́рость, и пита́яй тех, испо́лнится благ. Бо́гу на́шему сла́ва, ны́не и при́сно и во ве́ки веко́в. Ами́нь.

Слы́шите бра́тие я́ко кни́ги суть всему́ добру́ ма́ти кормя́ще де́ти своя́, и отсе́ле попыта́й святы́х книг мно́гу скро́вищу лежа́щу в них и прода́жь су́щее у тебе́ все, и купи́ си кни́ги, вся́кую доброде́тель спасе́ния честна́я сведа́ния святы́х книг. В ни́хже сокрове́н Госпо́день Бо́жий и́стинная му́дрость о́тча, его́же кто обря́щеть блаже́н бу́дет. Пи́шеть бо ся блаже́н челове́к и́ обря́ще му́дрость. Попыта́й люби́миче а́ще бога́т еси́, а́ще нищь или́ свобо́ден или́ раб. Святы́я бо кни́ги скро́вище суть всему́ добру́. То се да обрето́хом у́же святы́я кни́ги, и разгну́вьше обря́щем в них путь спасе́ния. Путь жи́зни ве́чныя, не иму́ще вся́кому добру́ конца́. Сему́же пути́ свято́му нача́ло святы́х оте́ць уче́ние во предсло́вьи честна́го покоя́ния, да а́ще кто нача́ло пути́ обре́те и потече́т по нему́, то а́ще и потону́л есть во гресе́х, тем путе́м тека́я не погреши́т жи́зни ве́чныя. И ра́дости со все́ми святы́ми. Тому́ же бу́ди по́слух Святы́й Дух. Научи́вый прописа́ти душе́ поле́зная уче́ния святы́ми отцы́. А́щели кто и свят есть, а по тому́ пути́ не потече́т, Ему́же нача́ло предсло́вие покоя́нию, отъи́мется от него́ свя́тость. И да́сться тому́ и́же кто по тому́ пути́ потече́ть. Восприе́мь уче́ние предсло́вие покоя́нию, не слы́шаем то кто и де́лом и творе́нием и бу́деть таково́е творе́ние в ра́дость а́нгелом, и всемь святы́м. Та́ко бо творя́й к тем причте́н бу́дет.