Стихи́:

Ме́ртва мя, Фео́дора оте́чество, приими́,

И́мже жи́ва су́ща обогате́вша му́ченическаго оте́чества град:

Бога́тне во осмы́й Фео́дорово те́ло принесе́ся.

Вели́кий Фео́дор стратила́т, бя́ше во времена́ Ликини́я царя́. Оте́чество име́яше в Евхаи́тех. Жи́тельство же имя́ше во Ира́клии По́нтстей. Мужь речи́ст и красе́н, мно́гих ста́рых ра́зумом преходя́. Бя́ше же по ра́тному рачи́тельству, и речеви́тия ра́ди и сла́вы, и царе́м зна́емь. Те́мже его́ жи́тельствие и друголю́бие любоче́ствовашеся, и повсю́де плоди́мо. Бя́ше бо сла́док словесы́ и пре́ю, и ви́дом благоле́пен, и лице́м све́тел. Уве́дав же о нем Ликини́й царь, я́ко христия́нскаго Бо́га чтет, и руга́ется бого́м е́ллинским, и уничижа́ет их, посла́ от Никомиди́и по него́, и повеле́ с че́стию привести́ его́. И́хже блаже́нный к нему́ посла́в и рече́: «Я́ко па́че подоба́ет царю́ с бо́льшими свои́ми бо́ги приити́, и́мже повелева́ет нам же́ртвы приноси́ти». Они́ же ше́дше пове́даша ему́. Ца́рь же Ликини́й возра́довася, подви́гся от Никомиди́и, и идя́ше во Ира́клию. В ве́чер же прилучи́ся с небесе́ глас слы́шати укрепля́ющь му́ченика. И де́рзость прии́м, внегда́ приближа́тися Ликини́ю во град, всед на конь Фео́дор, и сре́те его́ подо́бно, и почте́ его́ я́ко царя́. Царь же десни́цу вдав ему́, и облобыза́в его́. И вшед во град на высо́це престо́ле сед, блаже́нному повелева́ше Фео́дору бого́м его́ же́ртву принести́. Свято́му же наро́читейшыя бо́ги испроси́вшу его́, я́ко да о́нех в дому́ учреди́т и же́ртвы и жре́ния принесе́т. По повеле́нию же царе́ву, пое́м златы́я и сре́бреныя бо́ги, и в полу́нощи сокруши́в их, и издроби́в, раздаде́ ни́щим в тре́бование. По не́колицех же днех царю́ иду́щу, честь возда́ти свои́м бого́м, я́ве у́бо святы́й срази́ся с царе́м и рече́ ему́: «Сокруши́х царю́ бо́ги твоя́ и издроби́х и тре́бующим ни́щим разда́х». Максе́нтию коментари́сию су́щу ре́кшу ему́: «Ви́дех Артеми́ды вели́кия боги́ни главу́ убо́гим не́которым носи́му». О сем же му́ченику возсмея́вшуся и ре́кшу: «Ка́ко у́бо бо́зи мо́гут нам помощи́, а́ще себе́ оборони́ти не возмого́ша?». Ликини́й же вели́ких наде́жд отпа́д. Пе́рвое в недоуме́нии быв, и бысть во у́жасе. И вспомяну́вся, пре́лести свое́й поноша́ше, «царю́ держа́вну прише́дшу к гу́бителю сему́» рек. Та́же за бо́ги своя́ пла́каше. Посе́м я́ростию неистовле́ния напо́лнься, совлещи́ свята́го повеле́, и на четве́ро растя́гнути и волу́ями жи́лами по хребту́ седмь де́сять ран наложи́ти, и по чре́ву пять сот, и оловя́ными млаты́ по ши́и би́ти. Та́же те́ло его́ строга́ти, и свеща́ми до́лу поджига́ти, и чрепи́нами ра́ны его́ потира́ти. Он же тве́рдо сия́ му́ки терпя́. По си́хже вса́жден бысть в темни́цу, и но́зе его́ тве́рдо заби́ша. И пребы́сть та́мо а́лчен до пяти́ дний. И посе́м па́ки изведе́н, и на кресте́ пригвожде́н рука́ма и нога́ма. И еди́н гвоздь вонзи́ша в та́йный уд его́, да́же и до вну́трених проити́ ему́. Ста́вше же ю́ноши стреля́ху его́ в лице́ и в о́чи, и исторго́ша стре́лы зе́ницы свята́го. Друзи́и же по та́йных удесе́х крои́лы семеноно́сных ре́заху. И на кресте́ но́щию еди́н оста́влен. Мне́вшу Ликини́ю царю́, я́ко уме́ршу у́же свято́му. А́нгел же сшед от гво́здия снят его́, и всего́ здра́ва сотвори́. И бя́ше он поя́ и благословя́ Бо́га: «Вознесу́ тя Го́споди Царю́ мой и Бо́же мой, и благословлю́ и́мя Твое́ в век и в век ве́ка», и про́чая. И у́же дни явля́ющуся, по́сланнии от Ликини́я приидо́ша, е́же обрести́ те́ло его́ мертво́, и воврещи́ в мо́ре. И я́ко доидо́ша, и ви́деша свята́го здра́ва, и ве́роваша во Христа́. Ви́дев же Ликини́й царь весь град жа́лящь по Фео́доре, и всех приходя́щих к ве́ре Христо́ве, повеле́ мече́м главу́ свята́го отсещи́. Иде́же снаходи́вше мно́гое мно́жество, хотя́ще ви́дети убие́ние свята́го, и сотвори́ша плищ вели́к, едва́ не́когда утоли́ святы́й наро́д. И Христо́ви помоли́вся, и усе́чен бысть во главу́. И положено́ бысть в де́днем его стяжа́нии, во осмы́й день ию́ня ме́сяца, я́коже сам му́ченик А́вгарю своему́ скоропи́сцу пре́жде своего́ посече́ния повеле́ написа́ти. И́же и той все́ю свое́ю си́лою устраби́вся, не без разсуже́ния разли́чным му́кам о́бразы ши́ршы проначерта́, ничто́же от и́стины оста́вив.

Стихи́:

Прогна́вши Мела́ния всяк уд духо́вный,

Убелизне́ным ду́хом к Бо́гу прино́сит сло́во

Стихи́:

Добро́ты землены́я му́дрено оплева́в,

Ви́диши добро́ты своего́ Влады́ки

Стихи́:

Ви́дех же и Ника́ндра му́жа добре́йшаго,

Побе́днаго прие́мше венца́ мече́м

Сей бе пре́же воево́да, зело́ же бе ми́лостив и тепл о ве́ре Го́спода на́шего Иису́са Христа́. По́слан же бысть Анаста́сием царе́м на созда́ние Антиохи́и гра́да, я́ко бе па́лся от тру́са. По изволе́нию же Бо́жию поста́влен бысть патриа́рхом, и мно́го подвиза́шеся о ве́ре Христо́ве. И слы́шав о еди́ном сто́лпнице, я́ко злове́рныя е́реси севи́ровы есть, и без прича́стия есть. И и́де к нему́ хотя́ его́ обрати́ти и научи́ти ве́ре. И моли́ его́, дабы́ прия́л апо́стольское преда́ние и приобщи́лся бы святе́й апо́стольстей Це́ркви. Отвеща́в же сто́лпник, аз с ва́ми не причащу́ся, ни ве́ры ва́шея прииму́, я́ко сия́ лу́чши есть. Ефре́м ре́че, то ка́ко ти уго́дно бу́дет, я́ко благода́тию Го́спода н́ашего Иису́са Христа́ свобо́дна бысть Це́ркви от вся́кия е́реси и скве́рны и ерети́ческаго уче́ния. И рече́ сто́лпник, Го́споди вожже́ма огнь, и вни́дема в него́ а́зже и ты, да и́же изы́дет невреже́н, той и правове́рен есть, и тому́ вси после́дуем; Се же рече́, дабы́ устраши́л патриа́рха. Отвеща́в же Ефре́м, подоба́ет тебе́ мене́ я́ко отца́ послу́шати, и ничто́же истяза́ти от нас. Но поне́же восхоте́ ве́щи преходя́щия мое́ окая́ньство, наде́юся на щедро́ты Сы́на Бо́жия, я́ко спасе́ния ра́ди души́ твоея́ сотворю́ се. И глаго́ла предстоя́щим, благослове́н Госпо́дь, принеси́те дрова́ и огнь, и возже́г я архиепи́скоп пред столпо́м. И глаго́ла сто́лпнику, сни́ди по суду́ твоему́, да вни́дема о́ба. Сто́лпник же чуди́вся е́же к Бо́гу упова́нию его́, и не хоте́ сни́ти. Глаго́ла ему́ Ефре́м, не ты ли се избра́ та́ко искуси́ти Бо́га, то ка́ко ны́не се твори́ти не хо́щеши. Тогда́ патриа́рх сне́мши омфо́р вне́мже бя́ше оболче́н, и прише́д близ огня́, и помоли́ся глаго́ля, Го́споди Иису́се Христе́ Бо́же наш, нас ра́ди роди́тися изво́ли от Пречи́стыя Влады́чицы на́шея Богоро́дицы и при́сно Де́вы Мари́и, ны́не покажи́ нам и́стинную ве́ру. И конча́в моли́тву, и све́рже омфо́р свой посреде́ огня́. Огню́ же три часы́ пребы́вшу, и дрова́м изгоре́вшим, и взя́ша омфо́р цел и не сгоре́вш. Тогда́ сто́лпник ви́де бы́вшее, и извести́ себе́, и покле́п Севги́ра еретика́, и свое́ злове́рие. И прии́де ко святе́й собо́рней и апо́стольстей Це́ркви, и от руки́ блаже́ннаго Ефре́ма прия́ обще́ние. И просла́ви Бо́га и ве́рова во Христа́. Мно́га же зна́мения и и́на сотвори́ святы́й, и преста́вися к Бо́гу.

Услы́шите де́ти наказа́ние о́тчо, и внемли́те разумева́ти помышле́ние. Дар благ даю́ вам, сло́ва моего́ не оставля́йте. Сын бо бых и аз послушли́в отцу́, и возлю́блен сый пред лице́м ма́тере. Я́же глаго́ласта и уча́ста мя, да утвержа́ется на́ше сло́во в твое́м се́рдцы. Сохраня́й за́поведи и не забыва́й. Стяжи́ ра́зум, не уклони́ся от глаго́л уст мои́х. Ниже́ пре́зри глаго́лание мои́х уст, не оста́ви его́ и име́тся тебе́. Похощи́ ему́ и соблюде́т тя. Нача́ток прему́дрости стяжа́ти прему́дрость, и во вся́ком стяжа́нии твое́м, стяжи́ ра́зум. Взыщи́ его́, и вознесе́т тя. Почти́ ея́, да тя объи́мет, да даст главе́ твое́й вене́ц благослове́н. Венце́м же пи́щным защити́т тя. Слы́ши сы́не, и приими́ моя́ словеса́, и умно́жатся ле́та живота́ твоего́. Да ти бу́дут мноз́и пути́ животу́. Путе́м бо прему́дрости учу́ тя, наставля́ю же тебе́ на тече́ния пра́вая. А́ще бо хо́диши, не за́пнутся стопы́ твоя́. А́щели тече́ши, не труди́шися. Ими́ся по мое́ наказа́ние, и не отпусти́ся. Сохрани́ я́ себе́ в живо́т твой. На путь нечести́вых не найди́. Ни возревну́й путе́м законопресту́пник. На не́мже ме́сте а́ще во́я беру́т, не найди́ на то, уклони́ся от них и ра́знстви. Не у́снут бо а́ще зла не сотворя́т. Нас же да сохрани́т Бог от сих. Ему́же сла́ва ны́не и при́сно и во ве́ки веко́в. Ами́нь.

Авдики́й мал есть в гора́х всива́ньстей??, прамога?? Усифана?? и в той град аз приидо́х пре́же 30 и 5 лет и досто́йну па́мять слы́шах вещь от су́щих ста́рець, реко́ша бо я́ко поп не́хто зде пре́же двою́ сконча́вся. И тому́ во еди́ну нощь старе́йшина ме́сту том потыска́ем, и воста́ти ча́до его́ крести́ти мла́до су́щи, у́же хотя́ше умре́ти и внеза́пу и воста́в у́бо от ло́жа поп, и аби начя́ моли́тву твори́ти креще́нию. Я́коже устро́ив во́ду и свято́е ма́сло и ме́жу тем скончя́ся ди́тище пре́же креще́ния и взем его́ и положи́ пред крести́лищем и ре́че, тебе́ разбо́йнику моему́ и а́нгелу Бо́жью и то́юже дал нам Христо́с чисти́телем быть им на власть вязя́ти? и реша́ти на небеси́ и на земли́, возда́й же Го́споди ду́ша де́тища те́лу сему́ до́ндеже крести́тся, но повеле́но бо ти есть некреще́нно взя́ти его́. Ве́си бо Влады́ко мой и твоя́ я́ко небрего́х, я́коже а́бие восирану́х? отрочя́ нача́х моли́тву твори́ти и просвеще́ние. И сия́ попу́ ко а́нгелу ре́кшу и воста́ де́тище и крещено́ бысть. И тогда́ па́ки о Го́споде успе́. Да а́ще а́нгелом мо́жеть сло́во из уст чисти́теля коли́ко па́че к челове́ком, Бо́гу на́шему сла́ва и ны́не и при́сно и во ве́ки веко́в.