Стихи́:

У́мер Кири́лл, Александри́и па́па,

Ко Го́споду пре́йде, всем Го́сподеви:

Обре́те гроб пе́рстьный Кири́лл де́нию в девя́тый.

Кири́лл ди́вный оте́ц наш, бе от гра́да Алекса́ндрьскаго, сестри́чищь Фео́фила патриа́рха того́же гра́да Александри́и. Воспита́н же бысть в том же гра́де во мно́зе наказа́нии. Ри́мским же и е́ллинским научи́ся кни́гам. По успе́нии же отца́ своего́ о́бщим при́чтом прия́ престо́л Алекса́ндрьский. Еретики́ же а́ки во́лки от це́ркве отгна́, и неве́рныя в ве́ру обрати́, и вселе́нную благоче́стием насади́в. И вся́ко писа́ние ве́тхое и но́вое сказа́в. Еретика́ же Несто́рия с престо́ла све́рже. И Пречи́стую Де́ву Мари́ю Христа́ ро́ждьшую, Богоро́дицу нарече́. При Феодо́сии ю́ннем царе́, собо́р во Ефе́се совокупи́в, и Несто́рия посрами́в я́коже бысть рече́но, и Богоро́дицу возвели́чив и Бо́га просла́вив. И доше́д Александри́и мно́ги кни́ги написа́ душеполе́зны, и ко Го́споду отъи́де.

Стихи́:

Язы́к име́яше я́ко мечь на пре́лесть,

Ана́ния му́чени егоже мечь посече́.

Стихи́:

М́ысленаго о́браза не оскверни́ Кири́ле,

Бо́гу предпоста́в, Ему́же бя́ше по о́бразу

Стихи́:

Почто́ша себе́ тече́нием кро́вным,

Бо́жия три неве́сты и́хже мечь посече́

И преподо́бныя Пелаги́и, зане ра́стрене бы́ти ей. И све́ржена бысть с высоты́ на зе́млю, и ту у́мре. И сию́ Иоа́нн Златоу́ст похвала́ми почте́.

Преподо́бный оте́ц наш Кири́л, рожде́ние и воспита́ние преимени́таго гра́да Москвы́. Благоро́дну и благочести́ву роди́телю сын. Вдан же бысть от мла́да во́зраста на уче́ние святы́х книг. И любоучи́телен и благогове́ин бе о́трок зело́. Того́ ра́ди вско́ре свяще́нная писмена́ извы́к, умудря́шеся и́ми во спасе́ние. В воздержа́нии же и чистоте́ расты́й, преспева́ше в де́ле Бо́жии. По преставле́нии же роди́телю своею́, изво́ли себе́ примета́ти в дому́ Бо́жии. Отре́кшися ми́ра, еди́ному Го́сподеви рабо́тати. И испыта́ше ме́ста и о́бразы и седа́лища, где удо́бно есть ему́ спасти́ся. И сия́ жела́я со мно́гим ра́зумом, и попече́нием худо́жным обрести́ му́жа наста́вника своему́ спасе́нию непреле́стна. Смотре́нием же Бо́жиим наста́влен бысть от не́коего ста́рца и́менем Стефа́на, прии́де во оби́тель зово́мую си́монову, ко архимари́ту Фео́дору, и́же и созда́тель бе тоя́ оби́тели. Бе же той Фео́дор мужь разсуди́телен боже́ственаго писа́ния, до́бре веды́й наставля́ти и́же к Бо́гу гряду́ща. Бя́ше бо учени́к и сро́дник вели́каго Се́ргия, и́же во мно́гих си́лах и зна́мениях просия́вшаго. Сей у́бо Фео́дор прия́ блаже́ннаго Кири́ла, и повеле́ ему́ вре́мя не́кое пребы́ти в монастыре́, и испыта́ изве́стно о нем. И разуме́ я́ко в стра́се Бо́жии со тща́нием хо́щет спасти́ся, а́бие постриже́ его́ и бра́тии сочета́. Бе же тогда́ не́кий ста́рец во оби́тели той, велми́ чу́дна жи́тельства, и́менем Михаи́л. И́же по́слежде ра́ди доброде́тельнаго его́ жития́, епи́скоп бысть гра́да Смоле́нска. И тому́ дан бысть Кири́л нака́зан бы́ти и́ноческому житию́. Ви́дев же он своего́ учи́теля Михаи́ла гобзу́ющаго в доброде́телех, и наказу́юща его́ по ра́зуму боже́ственых писа́ний, и́стиному пути́ спасе́ния. Тем у́бо Кири́л всю свою́ во́лю отве́рг, послу́шаше его́ во всем. И вре́мя дово́лно пребы́сть у него́ в послуша́нии. Та́же повеле́но бысть ему́ архимари́том, по сове́ту его́ ста́рца слу́жбы монасты́рьския проходи́ти, хле́бню и пова́рню и про́чая. О́нже во всем послу́шая усе́рдно сия́ творя́ше. Устна́ма же от моли́твы не преста́яше, умо́м в ра́зум Бо́жий упражня́шеся. Имя́ше же и пи́щу ума́лену зело́, жа́ждею и бде́нием се́рдце согнета́я. И прия́т умиле́ния дар, слеза́м исто́чники пролива́ше. Бя́ше бо предугото́влен от преподо́бнаго послуша́ния. И во мно́зе вре́мени с трудо́м и тща́нием бра́тии служа́. Поне́же бе иску́сен во вся́ку слу́жбу. Бя́ше бо прему́др по Бо́зе, и чист естество́м, со смире́нием послушли́в во вся́ко де́ло бла́го. И сего́ ра́ди люби́мь бе и почита́емь от всех. Боголю́бец сый и нача́ть твори́тися юро́д. Ви́дев же его́ оби́тели о́ноя оте́ц в такове́ устрое́нии его́ су́ща, запреще́ния налага́ше ему́, на мно́ги дни и́но ничто́же вкуша́ти, ра́зве хлеб и во́ду. Де́ла же монасты́рьская тя́жкая вруча́ше ему́. О́нже запреще́ние держа́ с ра́достию, в слу́жбах же усе́рдно тружда́яся. И та́ко доброде́тели скрыва́ше. И позна́н бысть от разу́мных оте́ц, я́ко того́ ра́ди твори́тся юро́д, да Бо́гови прему́дро бу́дет. Пону́жен же бысть от отца́ своего́ прия́ти свяще́ньство. И не хотя́ повину́ся на се. Свяще́ньства у́бо слу́жбу в чину́ чреды́ своея́ проходя́. Егда́ же имя́ше пра́здно вре́мя, от рабо́ты не преста́яше. Смире́нию же бо́лшему вдая́ше себе́, ра́ди глаго́лющаго. И́же хо́щет старе́йший бы́ти, да бу́дет всем раб. Ниже́ в вас ме́нший, сей есть вели́к. По избра́нии же Фео́дора архимари́та на престо́л росто́вския архиепископи́и, почуди́вшеся вси во всем блаже́ннаго Кири́ла исправле́нием, ну́ждею на архимари́тию си́моновскую возведоша его. Он же помина́я сло́во Госпо́дне глаго́лющее, ему́же мно́го дано́ бу́дет, мно́жае и взы́щется от него́. Наипа́че подвиза́шеся не то́чию о себе́, но и о бра́тском спасе́нии печа́шеся, со смире́нием и любо́вию духо́вною. Сия́ же ви́дяще, наипа́че почита́ху его́ и сла́вляху. О́нже смире́н умо́м сый, и ненави́дя сла́вы, безмо́лвие же любя́, оста́ви нача́льство, и отъи́де в монасты́рь ста́рый зово́мый, недале́че отту́ду. И та́мо безмо́лствовати нача́. Су́щу же ему́ в нощне́м бде́нии обы́чное пра́вило сотворя́ющу, и пою́щу Святе́й Богоро́дице неседа́лно, и до́йде ме́ста пи́саннаго, стра́нно рождество́ ви́девше, устрани́мся ми́ра. Уди́вльжеся о словеси́ сем, помышля́ше в себе́, ка́ко сего́ ра́ди высо́кий в вели́честве Божества́, на земли́ яви́ся во пло́ти, и смире́н челове́к бысть. Да устрани́вшыяся ми́ра любве́ Его́ ра́ди, к высоте́ боговиде́ния возведе́т. И нача́ жела́ти вся́чески устрани́тимися ми́ра любве́ ра́ди Бо́жия. И моля́ше Го́спода Бо́га и Святу́ю Богоро́дицу, да наста́влен бу́дет ка́ко спасти́ся. И а́бие слы́шит глас глаго́лющь ему́, Кири́ле иди́ на бе́ло е́зеро, и добр поко́й обря́щеши. Отвори́в же око́нце ке́лии, зрит свет сия́ющь с небесе́, к страна́м се́верным, иде́же есть бе́ло е́зеро. И я́ко пе́рстом показу́юще ему́ ме́сто вселе́ния его́. Обре́те же и се́рдце свое́ ра́дости и ми́ра испо́лнено. И пребы́сть всю нощь веселя́ся и сла́вя Бо́га, и Пречи́стую Его́ Ма́терь. Имя́ше же ту духо́вна бра́та и ве́рна ему́ су́ща и́менем Ферапо́нта, и сему́ пове́да я́же ви́де и слы́шав, и просла́виста Бо́га, и согласи́вшася о́ба идо́ста в путь. И прише́дша в страны́ бе́ла е́зера, обрето́ста ме́сто удо́бно безмо́лвию. И пре́же потко́ша ма́лу коли́бу седо́ша. Пото́же блаже́нный оте́ц нашь Кири́л, жела́я коне́чнаго безмо́лвия, по сове́ту разлучи́стася с Ферапо́нтом. И ископа́ себе́ пеще́ру в земли́, и ра́дуяся всели́ся в ню и безмо́лвствоваше. Егда́ же благоволи́ Бог показа́ти жи́тельство его́ на по́лзу мно́гим, пронесе́ся сла́ва его́ повсю́ду о нем. И прихожа́ху к нему́ мно́зи созида́ний ра́ди духо́вных. И у́же благода́тию Ду́ха Свята́го до́бре возде́лану се́рдцу его́, сла́дки плоды́ уче́ний подава́ше. И слы́шаще сия́, и видяще чу́дное житие́ его́, мно́зи моля́ху его́, хотя́ще пребыва́ти с ним, я́ко да бу́дет к Бо́гу наста́вник и па́стырь. О́нже на мно́зе отрица́шеся, недосто́йна себе́ и гре́шна имену́я. Побежа́ем же бысть от ми́лования и братолю́бия, едва́ повину́вся, нача́т приима́ти бра́тию. И я́коже собра́шася к нему́ нема́ло число́ бра́тии. О́нже воздви́же це́рковь во и́мя Святы́я Богоро́дицы честна́го Ея́ успе́ния и монасты́рь соста́ви. И законоположе́ния о́бща жития́ предаде́. Сам же о́браз и прописа́ние во всем су́щым у него́ свои́м ученико́м бысть, и по нем хотя́щым ревнова́ти доброде́телному его́ житию́. Претерпе́ же пре́жде мно́ги напа́сти от бесо́в, и от лука́вых челове́к наве́ты. И от всех благода́тию Бо́жиею сохране́н бысть, и в соверше́ную ста́рость доспе́. Я́коже бы́ти всех лет жития́ е́го де́вятьдесять. И ма́ло поболе́в с ми́ром ду́шу в ру́це Бо́гу предаде́. Чудесе́м мно́гим пре́жде сме́рти де́латель быв. Та́коже и по сме́рти от гро́ба честны́х его́ моще́й приходя́щым с ве́рою, зна́мения разли́чна и исцеле́ния источа́ет, во сла́ву Бо́гу прославля́ющему уго́дники Своя́. Ему́же сла́ва, ны́не и при́сно и во ве́ки веко́в.

Вся́ку в ра́дость има́йте бра́тия моя́. Егда́ впаде́те в разли́чныя напа́сти и́бо блаже́н мужь. Терпи́те напа́стей, я́ко иску́сен быв. И приими́те вене́ць жи́зни. Лю́то бо есть Бо́гови пода́ти по́мощь одержи́мых ско́рьбию. Взыска́ющих Его́. Боли́ши ли хвали́ Бо́га. Его́же бо лю́бить Госпо́дь и есть убо́г ли еси́ ра́дуйся а не скорби́. Я́ко Ла́заря ни́щаго прии́муть тя блага́я. Безчеству́ем ли еси́ и оби́дим ли тръпи́ и блаже́н еси́. И твой студ на сла́ву а́нгельскую премени́тся. О бра́тия бу́дем терпели́вии в вре́мя и́скуса не от челове́ка по́мощи и́щем к Бо́гу притеце́м. Во слеза́х и во стона́нии люботру́дною ти моли́твою и бде́нием притеце́м к Бо́гу и прии́мем по́мощь от печа́ли. А челове́ческыя по́мощи не тре́буем. Я́ко в пу́стоше приоби́дим. Кто стерпи́вый да аканыя?? той спасе́тся Бо́гу на́шему сла́ва и ны́не и при́сно и во ве́ки веко́в.

Раба́ во крило́ съпоста́вити. Бе о спо́дскыя во́ля. Не повелева́ем поне́же скорбь есть стяжа́вшему. До́му бо развраще́ние таковы́й и сдева́еть. А́щели когда́ досто́ин бу́деть наставле́ние степе́ний?, я́коже вашь Они́сим. Яви́ся да прести́ть его́ господи́нь. И отсту́пить на свобо́ду из дому́ своего́. Та́коже в манасты́рь. Ини́ еди́наго раба́ не прии́ма и́ на постриже́ние. Без повеле́ния господи́на своего́ предступа́ющего же. Си́и зако́н пусти́в в повелева́ем без комка́ния бы́ти. Да Бо́жие и́мя ху́лится. А́ще бо кто раба́ вино́ю благоче́стья учи́ть приоби́дить господи́ну и отлучи́тся от рабо́ты а́ко по сне покоре́нием раб служи́т своему́ господи́ну да про́клят бу́деть.