Стихи́:

Тимофе́й мече́м умре́ти хотя́,

Бо́ги нечести́выя ника́ко чти́ти хотя́:

Изы́де Тимофе́й от соу́за теле́снаго в деся́тый мече́м.

Тимофе́й священному́ченик бе при Иулиа́не престу́пнице. Епи́скоп бе гра́да пруси́йскаго, благове́рен, и прия́ чудотво́рныя да́ры. Зми́я бо превели́ка угнезди́вшася под кипари́сом в пеще́ре, и врежа́юща скоты́ и челове́ки: сего́ у́бо помоли́вся уби́, вдав ему́ ерехи́й во уста́, си́речь, ри́зный плат е́же ноша́ше. И Ари́ту царю́ неду́гующу, и к двере́м а́довым прибли́жившуся, воскреси́ и́. И и́на мно́га чудеса́ сотвори́. И уче́нием свои́м вся просвети́в, и мно́ги от неве́рных обрати́в к Бо́гу. И уве́дав о нем Иулиа́н, посла́в пе́рвие всади́ и́ в темни́цу, запрети́в ему́ не учи́ти о и́мени Иису́сове, и посе́м па́ки уве́дав его́ без стра́ха уча́ща о и́мени Христо́ве, и посла́ спекула́таря, и усе́кну его́.

Стихи́:

Вверго́ша Алекса́ндра во о́гненый ров,

Рва уго́нзшаго е́ллинския ве́ры:

Прите́кше, вверго́ша в ров о́гненый

Антони́ну слуги́ прельсти́вии.

Свята́я му́ченица Антони́на, бя́ше от ве́си дрида́нския, чи́сте и преподо́бне житие́ провожа́ющи. Я́та бы́вши Фи́стом, и непоко́ршися отврещи́ся Христа́, и послужи́ти бесово́м не восхоте́, в хра́мину блудни́ц ведена́ бы́вши, и три дни а́лчна пребы́вши. И преста́ ей свет но́щию, и гро́му сше́дшу, хра́мине врата́ разседо́шася с небеси́ бысть глас повелева́ющь ей воста́ти и пи́щи вкуси́ти. Проси́вши ей и яду́щи. И изы́де а́бие преста́ти иге́мону, не покори́ся пожре́ти и́долом, пята́ми сопха́на бы́вши, и мече́м секо́ма. Та́же во блуди́лище ведена́ бы́вши, во вне́же открове́нием а́нгеловым, Алекса́ндр ю́ностнаго ра́ди во́зраста, бя́ше бо лет два́десяти трех, мне в я́ко на де́ло беззако́нно и́дет. И потаи́в святу́ю от доме́тия, и изведе́ воскри́лием свои́м покры́ главу́ ея́. То́йже та́мо изше́дши. По ма́ле же обия́влену бы́вшу де́лу си от не́ких во́ин прише́дших е́же проку́дити святу́ю, и́же приведо́ша Алекса́ндра к иге́мону. И вопроше́н быв о сбы́вшейся вине́, и не отве́ржеся. Пе́рвие мече́м сре́зан, та́же и святе́й изведе́не бы́вши, и пе́рсты ручны́я и ножны́я отре́заша обои́ма. И та́ко в ров о́гненый все те́ло ею́ смоло́ю пома́завше ври́нуша, и та́мо прия́ша блаже́нную кончи́ну. Соверша́етжеся собо́р ею́ во оби́тели максимиа́нстей, прилежа́щей к Константи́ню гра́ду, иде́же честна́я ею́ телеса́ лежа́т.

Стихи́:

Феофа́н взят бысть от земли́,

Я́ко зрел грозд я́влься ре́кше:

А́ще и у́мре от жития́ Пансе́мна,

И Христо́с абие жизнь подаде́.

Стихи́:

Страда́льческое ору́жие кол нари́чу,

Поне́же Вениами́н душе́вную истощ́и тяготу́

Фео́фан во святы́х оте́ц наш, бе у́бо от антиохи́йскаго гра́да, роди́ся от неве́рну роди́телю. И прише́д в соверше́ный во́зраст, сочта́ся с жено́ю. То́йже уме́рши, са́мся у́бо крести́, и затвори́ся в хи́жине близ гра́да. И прилежа́ше доброде́тели, уча́ вся приходя́щыя к нему́, е́же вся Госпо́дни за́поведи храни́ти, изря́днее же целому́дрствовати. Уве́дав же о блудни́це нарица́емей честна́я, я́же мно́ги погуби́, изле́зе из хи́жи своея́, и облече́ся в ри́зы све́тлыя. И испроси́ у отца́ де́сять литр зла́та. Я́ко хотя́ше поя́ти жену́ си. И шед к ней дав ей зла́то, и умоли́ ю отступи́ти от блуда́, и крести́ ю, и сотвори́ ей и́ну хлеви́ну близ своея́ хи́жи. И введе́ ю ту, и устро́й Ду́ха Свята́го оби́телище. И та́ко Бо́жиею благода́тию о́ба в еди́н день преста́вистася, и восприя́ста нестаре́ющееся присносу́щее блаже́ньство.

Не свари́ся с челове́ком си́лным, да не когда́ впаде́ши в ру́це его́. Не тяжи́ся с челове́ком бога́тым, да не когда́ утяготи́т ти ме́ру. Мно́ги бо погуби́ зла́то, и се́рдце царе́м уклони́. Не свари́ся с челове́ком язы́чном, и не наклада́й на огнь его́ дров. И не игра́й с ненака́занным да не прии́мут безче́стия прароди́тели твои́. Не поноси́ челове́ку обраща́ющуся от греха́, помяни́ я́ко вси есмы́ во епитемия́х. Не безче́сти челове́ка в ста́рости его́, и́бо и ты сам состаре́ешися. Не ра́дуйся о мертвеце́, помяни́ я́ко вси умира́ем. Не пре́зри по́вести прему́дрых, и в при́тчах их живи́. Я́ко от них навы́кнеши наказа́ние, и служи́ти вельмо́жам не отступа́й от за́поведей ста́рец, и́бо ти́и навыко́ша от оте́ц свои́х, я́ко от них навы́кнеши ра́зума, и во вре́мя потре́бно возда́ти отве́т. Не возгнеща́й у́глие гре́шнику, да не изгори́ши огне́м пла́мени его́. Не воста́ни от лица́ досади́телева, да не положи́ши я́ко вла́яние во усте́х твои́х. Взаи́м не дай челове́ку кре́пльшу себе́, и а́ще да́си бу́ди я́ко и погуби́в. И не поруча́ешися вы́ше си́лы своея́, и а́ще поруча́ешися я́ко вдая́ пецы́ся.

Те́мже а́ще и́же солга́вшии то́кмо такова́я пострада́ху, а и́же и кля́тву преступа́ющии, что ли не постра́ждут па́чеже а́ще про́сте ре́кшая жена́, ей на толи́це, толи́ку подъя́т казнь, и не отбеже́. Помы́слите клену́щиися вы и клятвопреступа́ющии, ко́его бу́дете досто́йни муче́ния; Благовре́менно есть и от ве́тхаго указа́ти днесь лю́тость клятвопреступле́ния. Серп, рече́, летя́щ бе, в долготу́ лакте́й два́десять, а в широту́ лакте́й де́сять. Е́же летя́щ, зело́ скоре́йшее наше́ствие томле́ния явля́ет, кля́твам восле́дующее. Е́же бо лакте́й мно́гих бы́ти широте́ же и долготе́, зе́лность зна́менует, и вели́чество злых. А е́же с небесе́ лете́ти, е́же с вы́шняго суди́лища, суду́ низно́ситися. Серпови́дное же, не избежи́мое томле́ние явля́ет. Я́коже бо серп, иде́же а́ще впаде́т, не сам о себе́ извлече́тся то́кмо, но и главе́ отсека́емей. Си́це и казнь на клену́щихся находя́щая, стра́шна не́кая есть, и не у́бо отступи́ти и́мать, не пре́жде испра́вивши де́ла своего́. А́ще же убе́гаем клену́щиися, да не дерза́ем, на на́ше бо зло сие́ быва́ет. Елма́ что непщу́ете; Коли́цы по Ана́нии и Сапфи́ре, та́яжде о́нем дерзну́ша, а не та́яжде пострада́ша. И ка́ко рече́, не пострада́ша; Не поне́же прости́ся им, но поне́же на бо́лшее соблюда́еми суть зло. Те́мже и́же мно́гая согреша́ющии, не му́чими па́че не́жели му́чими, боя́тися и трепета́ти до́лжни. Возраста́ют бо им томле́ния не томле́ния ра́ди, и долготерпе́ния Бо́жия. Те́мже у́бо да не сие́ ви́дим, я́ко не му́чими есмы́, но а́ще не согреши́хом. А́щеже согреша́юще, не му́чими быва́ем, па́че трепета́ти до́лжни есмы́. Рцы бо ми, а́ще ко́его раба́ име́л бы еси́, и запреща́л бы еси́ ему́ то́кмо, и не бил бы еси́, когда́ па́че бои́тся, когда́ ли бе́гает, когда́ ли в беглеца́ быва́ет; Не егда́ ли запреща́еши то́кмо, отню́дуже и друг дру́га наказу́ем не прети́ти ча́сто, я́ко да не стра́хом па́че позыба́ти ду́шу, я́ко да не терза́ти и́, па́че не́жели возложе́нием ран. И́нако же, и та́мо у́бо привре́менно бе то́мление, зде́же всегда́шнее. Да не у́бо, а́ще никто́ же, серпо́вная стра́ждет ны́не, сие́ да ви́диши. Но о́но помы́сли, а́ще такова́я твори́т. Елма́ мно́гая быва́ют ны́не, якова́же при пото́пе, но пото́м не быва́ет, гее́ною бо воспре́тися и томле́нием. Мно́зи согреша́ют яково́же содо́мляне, но о́гненый не сни́де дождь, о́гненая бо угото́вана есть река́. Мно́зи фараони́тская дерзну́ша, но не пострада́ху я́же фарао́н, ниже́ потопле́ни бы́ша в черно́м мо́ри. Пучи́на бо их ожида́ет бе́здны, иде́же не с нечу́вствием томле́ние, ниже́ потопи́тися мо́щно есть, но намно́жае му́чимым, жго́мым, души́мым не изнуря́тися. Мно́зи в я́же изра́ильтяне согреше́нная дерзну́ша, но не угрыза́ху их змия́. Ожида́ет бо их червь несконча́емый. Мно́зи гнези́ева дерза́ху, но прокаже́ни не бы́ша. Ожида́ет бо их вме́сто прока́зы, е́же полма́ расте́саном бы́ти, и положи́тися с лицеме́ры. Мно́зи и кля́хуся и кля́тву преступи́ша. А́ще же и убего́ша, да не дерза́ем, ожида́ет бо их скре́жет зу́бный. Но и зде не́гли постра́ждут, и не и́мут убе́гнути, а́ще и не а́бие ту, но во ины́х гресе́х, да́же и люте́йшее томле́ние бу́дет. Ельма́ и мы мно́гажды вины́ прие́мше от ма́лых, и от вели́ких весь гнев истоща́ем. Те́мже егда́ уви́диши что тебе́ слу́чьшееся, воспомяни́ грех твой о́ный. Сие́ бо и в сыно́х ия́ковлих бысть. Помяни́те бра́тии ио́сифовых и́же прода́ша бра́та. Уби́ти начина́ху, па́чеже и уби́ша ели́ко бе еже от них. Бо́гу на́шему сла́ва ны́не и при́сно и во ве́ки веко́в.

Всяк воздре́вый рече́ на жену́ согреша́ет, я́ко похоте́ти ему́, у́же прелюбодея́ние с не́ю в се́рдцы свое́м по и́стинне стра́шна за́поведь Госпо́дня. Велико́ зре́ние ле и жены́. Велико́ трезвоство́. Что есть жена́ ле́па сеть утверже́на. Прилща́ющи челове́кы во сласте́х. Све́тлым у́бо лице́м и высо́кима очи́ма нам мига́ющи и лани́тома трепа́ющи, и скалбя́щися язы́ком и пою́щи гла́сом, скверня́ющи словесы́ и наруга́ющися. Ри́зы повлача́ющи, нога́ма игра́ющи де́лы убива́ющи мно́гия бо рече́ уязви́вше погуби́. Те́мже глаго́леть боже́ственое писа́нье. В добро́те же́нестей мно́зи прелща́ються и от того́ огнь возгаря́еться. Что есть жена́ ле́па. Что на земле́ ей подо́бно. Исто́чник зло́бе. Скро́вище нечистоты́ и сла́бая бесе́да. Оче́м ползе́ние. Душе́ па́губа. Что есть ле́па жена́. Се́рдцу копие́. У́ным па́губа. Что ле́па жена́ ху́рвии дья́вола. И сподае́мое жела́ние. Что есть жена́ ле́па. Святы́м обло́жница. Поко́ище змии́но. Дия́воль уве́т. Без уве́та боле́знь. Подгре́юща акла́да. Что есть жена́ ле́па. Спаса́емым собла́зн. Безъисце́лняя зло́ба. Дневна́я блядь. Со́нная гости́нница. Ку́пчина бесо́вьская. Что есть жена́ ле́па. Безсту́дный зверь. Неудржи́мое стремле́ние. Невозсхище́нная узда́. Та́йнам облече́ние. Те́мен путь. Грехо́м учи́телница. Что есть жена́ ле́па. Пи́ща зла́я. Несы́тая по́хоть. Земна́я мысль. Му́жу ле́ность спя́щая. Въстава́юща печа́ль. Украше́нная ехи́дна. Самохо́тная ра́дость. Дневна́я тще́та. Домо́вная бу́ря. Му́жу пото́п. Что есть жена́ ле́па. Неукроти́мый зверь. Любоде́ем прибе́жище. Ору́жие дья́воле. По́хотное неи́стовьство. Всеми́рная смерть. В подо́бне у́бо глаго́лаше. Прему́дрый Соломо́н ма́ла зло́ба. Проти́ву зло́бы же́ньския. Ты же челове́че, ка́ко хо́щеши такова́ зве́ря убежа́ти. Послу́шай прито́чника что глаго́леть. О́чи бо твои́ да здрять пред ни. Вене́ц же твой ле́пота пра́вде. Да не одоле́еть тя. Доброхо́тная по́хоть. И да не уловле́н бу́деши очи́ма ея́. Жена́ бо ле́па, му́жеска ду́ша уловля́еть. Ны́не у́бо сы́ну мой. Послу́шай мене́, и внима́й словеса́ уст мои́х. Да не уклони́ в пути́ ея. Се́рдца своего́. И не прелща́йся во сте́гнах пути́ ея́. Мно́ги бо му́жи уя́звении же́ньскою добро́тою без числа́ суть я́же погу́бни. И нездри́ свои́ма очи́ма на же́ньскую красоту́. Отскочи́ и уме́дли. Егда́ у́бо жену́ уви́диши ле́пу красъто́ю се́яющи и твоя́ по́мыслы и по́хоть растя́ше. И разуме́й я́ко жена́ есть чуди́мое лице́. Я́ко пе́пел поджига́я. Откры́еть же ко́жу личи́ную. И то уздре́ши красоту́ и хо́дость ея́. И ничто́же ина́го обря́щеши то́кмо ко́стни жи́лы, и то смрад помы́сли же па́ки. И коли́ челове́че състаре́ешися и применя́ющися и умира́ющи и всему́ исходя́щу цве́ту тому́, помы́сли же челове́че, чему́ чуди́шися, постыди́ся и пока́яся Бо́гу.