Стихи́:

Саве́л, Ману́ил и Исма́ил, пе́рсяне ро́дом, са́ном му́ченицы:

Мече́м в седмьна́десятый день:

Трие́х бра́тий меч посече.

Си́и святи́и му́ченицы бя́ху от Перси́ды, самобра́тия су́ще. По́слани бы́вше Валта́ном царе́м Пе́рсским, е́же ко смире́нию хода́тайствовати, во времена́ Иулиа́на престу́пника, его́же ви́девше в Халкидо́не жру́ща и́долом, и мно́гим пре́лести его́ покаря́ющимся. Си́и же христия́не су́ще и служа́ще Христо́ви, и моля́щеся Ему́, е́же сохрани́тися им в свое́й ве́ре, и не приобщи́тися идолослуже́бней пре́лести. Уве́дани же бы́вше и ска́зани злочести́вому Иулиа́ну, бие́ни бы́вше, и гвоздьми́ гле́зна их пронзо́ша, и свеща́ми горя́щими мы́шцы их опали́ша. Пото́мже ласка́ньми и уте́хами святы́й Мануи́л от скве́рнаго Иулиа́на вопроси́мь, не повину́ся же́ртвы принести́ и́долом, пригвозди́ша главу́ ему́ гвоздьми́. И обои́ ему́ плещи́ тростьми́ обви́вше, стяго́ша и́ велми́, и ине́м тро́стием о́стрым сбоде́н быв. И та́мо ку́пно со обе́ма бра́тома его́, с Саве́лием и Исмаи́лом ко Фраки́йстей стране́ глаго́лемей Константи́и, на ме́сто брегови́то веде́ни бы́шя, и ту им главы́ отсеко́ша. Престу́пнику же повеле́вшу сожещи́ телеса́ святы́х, и а́бие разсяде́ся земля́, и прия́т телеса́ святы́х. Мно́зи же о таково́м чудеси́ ве́роваша во Христа́. По сих же благочести́вым не́ким, явле́ни бы́ша Иису́с Христо́м Бо́гом на́шим мо́щи их и открове́ни, и погребе́ни бы́ша телеса́ их свята́я со благоуха́ньми и фимиа́мы. Беззако́нный же Иулиа́н тогда́ возвраща́яся от ра́ти Пе́рсския, пораже́н бысть я́звою небе́сною, и ве́чному огню́ предаде́ся. Соверша́ет же ся собо́р их во святе́м их муче́нии, су́щем близ свята́го проро́ка Илии́.

А́ще у́бо брат прии́дет ко́ею вино́ю в монасты́рь, а́ще не воспря́нет напра́сно, а́бие поглоти́т его́ дия́вол: на́чнет бо лю́тая ему́ влага́ти по́мыслы, глаго́ля: «Что хо́щеши тружда́тися в доброде́тели, и труды́ приима́ти и изнемощи́, возда́нию не су́щу? Еда́ свое́ю во́лею прише́л еси́ в монасты́рь? А́ще не бы ти приключи́лася та́ко вещь, и пону́жден бысть мних бы́ти: А николи́же бы и ты был мних: И восхо́щеши у́бо ны́не изнемога́ти: И́бо не и́мать благода́ть да́ти о сем Бог». И сия́ влага́ет бра́ту враг, хотя́ воврещи́ и́ в глубину́ неча́яния. Тогда́ на́чнет брат про́чее в небреже́ние пребыва́ти и безстра́шии: Проти́ву же глаго́лати ма́лым и вели́ким, и несы́тна сна приима́ти. А́ще что сотвори́т бла́го, тогда́ ка́ется, и я́ко тщету́ себе́ сотво́рша мнит и ча́сто ро́пщет, и разжиза́ет себе́. И еди́ною себе́ па́губе преда́ст, в не́же ме́сто хотя́ше изше́д тружда́тися в доброде́телех, проти́вная на́чнет твори́ти, и не разсужда́я себе́ в благодарова́ниях Христо́вых. И зане́же бы в ме́сто глаго́лати: «Душе́ моя́, коли́ко бла́го сотвори́ тебе́ Госпо́дь, и́же мно́гаго ра́ди поста́ и ми́лостыни, сподо́биховеся сие́ житие́ прия́ти, и не ле́стну и немяте́жну житию́ сподо́блена бы́вша от Го́спода Бо́га на́шего Иису́са Христа́. Те́мже душе́ и мы потщи́мася досто́йна покая́нию неле́стна де́ла твори́ти, да не во двою́ му́ку обря́щемася, я́коже благода́ти Бо́жии отве́ргшаяся, и благи́х Его́ не помяну́вшая».

Рече́ ста́рец, веру́ ими́те ми ча́да, ничто́же та́ко смуща́ет и оскорбля́ет и струп твори́т и погуби́т и опеча́лит бе́сы, и самого́ того́ зле́йшаго сатану́, я́ко поуча́тися нам псалмо́м, и почита́ти приле́жно Псалты́рь. Вся бо нам кни́ги на по́льзу суть, и печа́ль нема́лу творя́т бесо́м, но не та́ко я́коже Псалты́рь. Того́ ра́ди да не неради́м о ней. И́бо поуча́ющимся нам псалмо́м, о́во о себе́ мо́лим, о́во бе́сы клене́м. Я́коже се, егда́ глаго́лем: «Поми́луй мя Бо́же, по вели́цей ми́лости Твое́й. Очи́сти беззако́ния моя́. Не отве́рзи мене́ во вре́мя ста́рости, внегда́ изнемощи́ кре́пости мое́й, не оста́ви мене́», – ту о себе́ мо́лим. О́во же бе́сы клене́м, егда́ глаго́лем: «Да воскре́снет Бог, и разыду́тся врази́ Его́. И да бежа́т от лица́ Его́ вси ненави́дящии Его́». И па́ки: «Разжени́ язы́ки хотя́щыя бра́нем и любодея́нию. И ви́дех нечести́ваго превознося́щася и вы́сящася я́ко ке́дры лива́нския, и ми́мо идо́х, и сего́ не бе, и взыска́х его́, и не обре́теся ме́сто его́». И па́ки: «Ору́жие их вни́де в се́рдца их, и лу́цы их сокруша́тся. Ров изры́ и ископа́ и́, впаде́тся в я́му ю́же сотвори́, обрати́тся болез́нь его́ на главу́ его́, и на верх непра́вда его́ сни́дет». Таковы́ми бо глаго́лы бе́сы клене́м. Бо́гу на́шему сла́ва ны́не и при́сно и во ве́ки веко́в. [Ами́нь.]