Стихи́:

Зва́ние трегу́бное тебе́:

И трисугу́бную страсть блаже́нне:

Возведе́н же на страсть тристреля́нную.

Той у́бо от Луки́ Иу́да имену́ется, от Матфе́я же и от Ма́рка – Фадде́й или Леве́й, брат же по пло́ти Го́спода на́шего Иису́са Христа́, сын Ио́сифов. Той же Иу́да по́слан бысть саме́м Христо́м на пропове́дание, и разгоре́вся ре́вностию, я́ко угль, всю лесть попали́ и неве́рныя просвети́. Сей же и в Междоре́чии пропове́да Ева́нгелие, и ту су́щыя лю́ди уча́ сло́ву Бо́жию. И во Еде́сский град по́слан ко А́вгарю ме́стному кня́зю на исцеле́ние его́, и прише́д, исцели́ его́ от неду́га. По вознесе́нии же Го́спода на́шего Иису́са Христа́, ре́вность боже́ственую прии́мь, прохожда́ше вся страны́ и гра́ды, пропове́дая велегла́сно Христа́, и из ме́ртвых воскресе́ние Его́ возвеща́я всем, и явля́я Его́ Судию́ живы́м и ме́ртвым. И ка́ко спасе́ния ра́ди на́шего Сын Сло́во Бо́га Отца́ смири́в Себе́, сни́де на зе́млю, и воплоти́ся от Свята́го Ду́ха, и от при́сно Де́вы Мари́и вочелове́чився, всего́ Ада́ма поне́с, ра́звее греха́. Искуше́н же быв и пору́ган и поноше́н и зауше́н бысть от руки́ ю́же созда́, и наконе́ц на кресте́ ра́спят бысть, и воскре́се в тре́тий день. И яви́ся апо́столом, пред ни́ми же и вознесе́ся, и се́де одесну́ю Бо́гу Отца́ на небесе́х, и па́ки прии́дет суди́ти живы́м и ме́ртвым. Си́це учи́в, и мно́ги от неве́рных крести́в. Последи́ отъи́де во арави́тский град, и от неве́рных пове́шен и растре́лян бысть. И та́мо Бо́гу дух свой предаде́.

Стихи́:

Ду́шу Зоси́ма Тебе́ ра́ди, Лю́блениче, положи́в,

Мече́м у́мер, живе́т душе́вною жи́знию, Сло́ве.

Сей бя́ше во́ин при Троя́не царе́, от Аполониа́ды Cозопо́льския. Облада́ющу же в Писиди́и Антиохи́йстей Доментиа́ну, пове́рг своя́ ору́жия, и прибе́г к боже́ственей Це́ркви, и сподо́бися Христо́ву креще́нию. Тем приведе́н бысть к иге́мону, и се́бе христиа́на испове́да, пове́шен быв и стро́ган. И посе́м бие́н бысть четы́рьми во́ины. Та́же на одре́ ме́дяне разжже́нне положе́н, и прело́жшуся огню́ в ро́су. Мно́зи же от предстоя́щих удиви́шася сему́ чудеси́, и приступи́ша к Христу́. Посе́м святы́й Зоси́ма к степе́нем пригвожде́н, и к ко́нем неуче́ным привя́зан бысть, и пону́жден быв иге́моном на мно́зе тещи́ с ни́ми. И по три дни гла́дом томи́мь. И свы́ше два о́трочища я́вльшася ему́, еди́ному хлеб держа́щу в руце́, а друго́му в сосу́де во́ду, и благода́рствив Бо́га вкуси́. И па́ки приведе́н быв на испыта́ние, и мно́го му́чен, и наконе́ц усече́н бысть. И та́ко муче́нию вене́ц восприя́т.

Стихи́:

Обрела́ еси́ уме́рша Христа́ Жи́ва, Мари́е,

Его́же дре́вле во гро́бе иска́ше ме́ртва и безду́шна.

Стихи́:

Асигкри́та закла́на бы́вша Госпо́дни ра́ди любв́е,

Без рассужде́ния венча́н бысть венцы́ досто́йными.

Соверша́етжеся собо́р его́ в муче́нии свята́го Иси́дора, внутрь це́ркве святы́я Ири́ны, и́же к мо́рю.

Иоа́нн преподо́бный оте́ц наш, оста́вль мир, и бысть мних. Име́яше ре́вность Бо́жию, и вни́де в пеще́ру, и седя́ше в страна́х Сеху́ста села́, по́приша ма́ла от Иеросали́ма. Ико́ну же име́яше в пеще́ре свое́й Пречи́стыя и Святы́я Влады́чицы на́шея Богоро́дицы и при́сно Де́вы Мари́и, в руку́ иму́щу Христа́ Бо́га на́шего. Егда́ же хотя́ше ка́мо ити́, или́ в пусты́ню дале́че или́ во Иеросали́м целова́ти Честна́го Креста́, и святы́х мест, или́ в Сина́йскую го́ру помоли́тися, или́ ко святы́м му́чеником отстоя́щим от Иеросали́ма: бе бо любя́ ста́рец святы́м честь воздая́ти. И се егда́ идя́ше ко свято́му Фео́дору в Евхаи́ты, и ко святе́й Фе́кле в Саври́ю, и в Селевки́ю ко свято́му Се́ргию, и в Ласафа́с, ко всем святы́м отходя́ устроя́ше кади́ло, и вжига́ше, я́коже обы́чай име́яше. И на моли́тве став моля́шеся Бо́гу, да упраздни́т путь его́. И зря ко ико́не Пречи́стыя Богоро́дицы глаго́лаше: «Поне́же на путь хощу́ дале́че ити́ мно́гим днем нарече́ние иму́щи, и ты кади́ло Свое́ сохрани́ и неугаса́емо предложе́ние сие́ соблюди́. Аз бо Твою́ по́мощь спу́тницу име́я отхожу́». И сия́ рек ко ико́не, отхожда́ше в предло́женый путь, и сотвори́в в пути́ овогда́ ме́сяц, и обраща́шеся. Овогда́ два и три, овогда́ пять и шесть, и обрета́ше кади́ло по́лно горя́що я́коже на путь идя́ше оста́ви, и николи́же обре́те е уга́сшо. И та́ко пребы́в преста́вися к Бо́гу.

Хо́щете ли уве́дати, коли́ка честь и си́ла иере́йская? Помы́сли креще́ние, и́мже омыва́ет всех грехи́, и в сынотворе́ние приво́дит. От тех бо ся породи́хом покая́нием. И зри, коли́ка на них Бо́жия честь, и мно́гая благода́ть, я́ко положе́нием рук их на ны, благослове́ние прихо́дит. Те́мже и за вся моли́тву творя́т, и за всех сло́во им отвеща́ти. Да се помышля́юще бра́тие, ни в чем не пререка́йте иере́ом, Бо́жии бо суть слуги́, и предста́тели, но досто́йную честь твори́те им. И по за́поведем тех пра́вдою неукло́нно хо́дим, да спасе́ние получи́м, и небе́сных благ насле́дницы бу́дем.

Презви́тер не́кий от своего́ епи́скопа отлуче́н бысть, е́же не твори́ти боже́ственыя Литурги́и. И бысть отъити́ ему́ в весь не́кую о не́коей потре́бе. По отше́ствии же его́ прилучи́ся епи́скопу сконча́тися. Презви́тер же я́ко пребы́сть во отлуче́нии, в ско́рби и пренемога́нии вели́це бысть, и недоуме́яше что сотвори́ти, взы́де в Константи́нь град. И прии́де ко архиепи́скопу не́коему челове́ку Бо́жию, и испове́да ему́ о ве́щи. О́нже рече́ ему́: «Скажи́ ми согреше́ние свое́, а́ще у́бо чрез зако́н отлучи́ тя епи́скоп твой, пода́м ти разреше́ние запреще́нию». О́нже к нему́ рече́: «На потре́бу не́кую посыла́ше мя влады́ко, и не бе проти́ву мое́й си́ле да совершу́ я, разгне́вався, отлучи́ мя». Архиепи́скоп же рече́: «Прегреше́ние твое́ ча́до я́коже глаго́леши, ничто́же есть, и чрез зако́н епи́скоп твой отлучи́л тя есть. Но а́ще и си́це есть вещь я́коже мню, несть досто́йно, да ин вя́жет, а други́й разреша́ет. Оба́че я́коже хо́щет Госпо́дь, си́це да сотвори́т о тебе́». Пое́мже архиепи́скоп презви́тера, и и́де в еди́н от монастыре́й. И рече́ ко игу́мену и к бра́тиям: «Сия́ и сицева́ прилучи́шася презви́теру сему́, молю́ вы отцы́ святи́и, Го́спода ра́ди потруди́теся неде́лю сию́, бде́нием и посто́м и моли́твою, и Бог моли́тв ра́ди ва́ших поми́лует презви́тера сего́, и́же без пра́вды отлуче́наго». Они́же ре́ша: «Повеле́л еси́ влады́ко, и сотвори́м твоея́ ра́ди святы́ни». Пребы́вшу же епи́скопу с презви́тером та́мо, и бде́нием и моли́твами постя́щимся в сокруше́нии се́рдца. Сконча́вшижеся неде́ли, на у́тренем славосло́вии, яви́ся епи́скоп, отлучи́вый презви́тера, посреди́ оте́ц, стоя́ и поя́ с ни́ми. Узре́в же его́ архиепи́скоп, глаго́ла презви́теру: «Познава́еши ли стоя́щаго с на́ми?» О́нже рече́: «Ей влады́ко, епи́скоп мой есть». И глаго́ла ему́: «Шед поклони́ся ему́, я́ко да прии́меши проще́ние». Шед у́бо презви́тер, пад на ногу́ его́ глаго́ля: «Прости́ мя влады́ко, Го́спода ра́ди». О́нже отвеща́в три́щи: «Бог ча́до прости́т тя». И сия́ рек, неви́дим бысть. Ви́дев же архиепи́скоп со игу́меном и бра́тиями бы́вшее зна́мение, просла́виша Бо́га творя́щаго ди́вная и неизсле́димая чудеса́.

Я́коже святы́й Иоа́нн Златоу́стый глаго́леть, кто мо́жеть та́ко благоче́стие обрести́ я́коже Христо́с сказа́л. Аз рече́ оте́ць, Аз брат, Аз жени́х. Аз дом, Аз корми́тель, Аз ри́зы, Аз коре́ние. Аз основа́ние. Вся яже хо́щеши Аз есмь. Не тре́бую ничто́же. Аз и служу́ не приидо́х бо да ми послужа́т но да послужу́. Аз есмь и глава́, и всем есмь дру́г и брат и сестра́ и ма́ти, то́кмо люби́ся со Мно́ю и Мой бу́ди и во́лю Мою́ твори́. Аз у́бо убо́г и нищь тебе́ ра́ди, на небеси́ молю́ за тя Отца́. Аз на зе́млю моли́твеньник есмь прише́л. Кто бе от Отца́ все́ми еси ты иу́ди? друг и насле́дник. Почто́ ктому́ хо́щеши, вску́ю отвраща́ешися лю́бящаго тя, вску́ю мирски́м угожа́еши и вску́ю ри́щеши не́коеждо ли ремество́ коне́ць и́маеть. Покажи́ ми жития́ сего́ кончи́ну. Все прах и все по́пел. Все су́етие су́етных. Но то́кмо по́мощь от до́брых дея́ний. И́же бо кто чужа́я гра́бяя ми́лостыню твори́т не то́кмо не поми́лован бу́деть, но и бо́лшу муче́нию сподо́бится. А́щели же прие́м ум и поми́луеть тех в ни́хже гра́бив не муче́ния то́кмо избу́дет, но и жи́зни ве́чней прича́стник бу́дет.