Стихи́:

Испо́лньшися лю́тыми ра́нами, Агрипи́но:

И мно́гия восприя́ла еси́ венцы́:

Два́десять тре́тияго у́мре Агрипи́на.

Сия́ от млады́х ногте́й Бо́гу себе́ вда́вши, рожде́ние и воспита́ние име́ пресла́внаго гра́да Ри́мскаго. Да я́ко я́блоко или́ ши́пок благоуха́нен объюха́ющи ве́рных сердца́, и смрад страсте́й отгоня́щи. Де́вством и чистото́ю ду́шу украси́вши и Христо́ви обручи́вши себе́, де́рзостно и му́жески к муче́нию потече́. И любве́ ра́ди своего́ Жениха́ Христа́, на мно́ги себе́ му́ки вда́вши. Же́злием у́бо по те́лу бие́на бысть, и ко́сти сокрушиш́а ей. И от оде́жди совлечена́, и у́зами стя́гнута, и боже́ственным а́нгелом разрешена́, вся́ко нече́стие разруши́ те́лом свои́м. И в тех му́ках Бо́гу дух свой предаде́. Ва́сса же и Па́вла, и Агафоники́я, та́йно взе́мше те́ло му́ченицы от Ри́мскаго гра́да, от ме́ста до ме́ста преходя́ще, до́лгою пучи́ною Сикили́йския епа́рхии дости́гше, и та́мо те́ло святы́я спря́тавше. Да внегда́ же Сикили́я те́ло ея́ восприя́т, внеза́пу мра́чныя бесо́вския изба́вися зло́бы, па́че же и ага́ряне, дерзну́вшии на град иде́же це́ркви ея́, хотя́ще его́ взя́ти, поги́бели всеконе́чней пре́дани бы́ша. Отто́ле у́бо да́же и до днесь прокаже́ннии очища́ются приходя́щии с ве́рою, и скорбь вся́кого неду́га моли́твами ея ́прогоня́ется.

По е́же в раи́ ра́дости, согреше́ний преслуша́ния сотвори́в пра́отец челове́ческаго ро́да, отту́ду изгна́н бысть, и в заточе́ние сея́ слепоты́ и печа́ли, я́же стра́ждем, прии́де. Согреши́в бо и вне себе́ изве́дся, ктому́ про́чее не можа́ше видети ра́дость о́ну, небе́снаго оте́чества, я́же пе́рвее зря́ше. В раи́ бо челове́к сый Бо́жиих слове́с слы́шати обы́че, и во блаже́нных а́нгел устрое́нии, чистото́ю се́рдца, и высото́ю виде́ния, внутрь бя́ше. И по е́же самому́ па́сти ему́ по́мыслы о́ного, и́мже све́та исполня́шеся, отступи́. Отню́дуже от того́ пло́ти мы, в сей заточе́ния слепоте́ ро́ждшеся, оте́чество у́бо небе́сное слы́шим, и того́ жи́тели а́нгелы слы́шим: о́бщники же того́ блаже́нных а́нгел, ду́хи пра́ведных сконча́вшихся. Пло́тяни же не́цыи, неви́димая о́на ви́дети не могуще, и ра́ди неиску́сства, в страх низпа́дающе в двове́рии су́ть, вменя́юще бы́ти о́на, я́же теле́сныма очи́ма ви́дети не мо́гут. Сие́ же страхова́ние в праотце на́шем не бе. А́ще бо и изгна́н бысть от ра́йския пищи, но обаче воспомина́ше е́же бе ви́дел, а́ще и отве́ргл бе то. Си́и же помы́слити и воспомяну́ти слы́шаная не могут, за е́же ни еди́н же иску́с изве́стно держа́ти им, я́коже он от мимоше́дших. Я́коже бо непра́здна жена́ в темни́цу вложена́ бы́вши, и та́мо отроча́ роди́т, рожде́ное же отроча́ в той темни́це воспита́ется и возрасте́т: Того́ же ро́ждшая ма́ти мно́гажды ему́ со́лнце и луну́ и зве́зды, го́ры же и поля́ и пти́цы паря́ща, и кони теку́ща сказу́ет. О́но же в темни́це рожде́но и воспита́но, ничто́же и́но, ра́зве темни́чную тму весть. И сия́ у́бо бы́ти слы́шит, за е́же во иску́се та не ве́дети. И́стинне же сия́ бы́ти не не ве́рует. Си́це и в сей заточе́ния их слепоте́ ро́ждшеся челове́цы, высо́кая и неви́димая слы́шаще бы́ти, неудо́бь ве́руют, а́ще вои́стину суть. То́кмо бо сия ве́дят худа́я и ви́димая, в ни́хже роди́шася. Отту́ду же про́чее бысть, я́ко да Сам неви́димым и ви́димым Зижди́тель, Единоро́дный Сын Оте́чь, во избавление челове́ческаго ро́да прии́дет, и Дух Его́ в сердца́ на́ша всели́т. Я́ко да тем оживотворе́ни бы́вше, ве́руем о ни́хже и еще́ иску́сом в ра́зуме бы́ти не мо́жем. Ели́цы у́бо Дух сей насле́дия на́шего зало́г прия́хом, о неви́димых жи́зни не сомни́мся. А и́же и еще́ во извеще́нии сем несть утверже́н, до́лжен есть себе́ без сомне́ния соверше́ных муже́й словесы́ к ве́ре приложи́ти. И́же про́чее Святы́м Ду́хом неви́димым иску́с и́мут, и тем ве́ровати. Су́етен бо есть про́чее он о́трок а́ще сего́ ра́ди о све́те свою́ ма́терь солга́ти мнит, за е́же о́ному ничто́же и́но ве́дети, ра́зве темни́чную тму.

Стихи́:

Свет сый, Евсто́хие, к мечу́,

Непщу́я мни́ши, и кий тебе́ вене́ц бу́дет:

Боже́ствеными враты́ Га́ие огражде́н,

Душе́ю не посе́чен пребыва́ет, мече́м посе́чен:

Ко Го́споду прише́дши Ло́лие мече́м,

Прекро́вку обагри́вши неве́стную от свои́х крове́й:

Ши́ею излия́вшия то́ки кровны́я,

Ра́дующеся и́деши к Богу, Прове:

И ши́и ти пресе́чене Урва́не мече́м,

Молчи́ши я́ко и кро́тко а́гня.

Евсто́хий святы́й, и Га́ий анепсе́й его́, и и́же с ни́ма, в ле́та бя́ху Максимиа́на царя́, от гра́да Садо́на. Евстохий же пре́жде бя́ше жрец и́дольский. И внегда́ зря́ше му́чащихся святы́х по Христе́, и пресла́вная чудеса́ творя́щих, зазре́ свое́ слу́жбе, приступи́ к Евдокси́ю епи́скопу Антиохи́йскому, и крести́ся от него́, и поставле́ния пресви́терскаго сподо́бися. И шед в весь нарица́емую Лу́стру, обре́те анепсе́й своего́ Га́ия с треми́ о́троки Про́вием, Ло́лием, и Урва́ном, я́же о Христе́ прии́м и научи́ и крести́ я́, и все родство́ свое́. Тем уве́ден бысть, и ят и приведе́н быв ко иге́мону, и Христа́ испове́дав. Пове́шен быв на дре́ве, и стро́ган бысть зело́. Посе́м по́слани бы́ша во Агки́ру ко Агрипи́ну ту су́щу иге́мону, и предста́вше на испыта́ние, Христа́ отврещи́ся не восхоте́ша. И пе́рвое у́бо пове́шена бы́ста Ло́лий и Урва́н пря́мо себе, и стро́гана бы́ста зело́. И́хже кровь подъем Гаий, и биен бысть по плеще́ма и по чре́ву. Свято́му же Евсто́хию главу́ отсеко́ша, и подъя́т ю́ Га́ий. А младе́нцы и́же приведе́ни бы́ша к ме́дяну колеси́, и от него́ сохране́ни бы́ша пресла́вно, колеси́ не подви́гнувшуся отню́д. И остри́гше главы́ им, и гво́зди пригвозди́ша я́. А я́же бе же́неск пол, сосца́ уре́заша им. А Урва́н мече́м посе́чен бысть. Младе́нцы же не повину́вшеся, но велегла́сно Христа́ испове́давше, отсеко́ша главы́ их.

В ле́то шесть ты́сящь де́вять сот о́смьдесять о́семь, нечести́вый царь Ахма́т больши́я орды́ вооружи́вся прии́де на вели́каго кня́зя Иоа́нна Васи́лиевича ра́тию на реку́ Угру́ со мно́гою си́лою. Тогда́ же Москва́ бе во оса́де, вели́кий же князь моли́твою вооружи́вся, и благослове́нием тогда́ су́щаго Геро́нтия митрополи́та всея́ Росси́и, и Росто́вскаго архиепи́скопа Васиа́на и́же бе ему́ духо́вный оте́ц, от ни́хже умоле́н бысть кре́пко подвиза́тися проти́ву пога́ных за правосла́вное христиа́нство. По́йде та́коже с вои проти́ву супоста́т к реке́ Угре́, и та́мо мно́го бра́вся с ни́ми, и уби́ от них нема́ло. Последи́ же соверши́ся ди́вное чу́до предста́тельством Пресвяты́я Богоро́дицы: страх бо нападе́ на тата́р, еди́ни други́х боя́хуся, и бежа́ху ники́м же гони́ми: Преми́лостивый бо Бог моли́тв ра́ди Пресвяты́я Богоро́дицы, све́тлу и изря́дну побе́ду без кро́ве показа́ христиа́ном на проти́вныя, и та́ко пощаде́ достоя́ние Свое́ град Москву́ и всю Росси́ю. Вели́кий же князь Иоа́нн Васи́лиевичь, прии́де к Москве и с сы́ном свои́м вели́ким кня́зем Иоа́нном и со всею си́лою. И возра́довашася вси лю́дие ра́достию вели́кою зело́, и похвали́ша Бо́га, и Пресвяту́ю Богоро́дицу о пресла́вном спасе́нии. Во гра́де же богоспаса́емом Москве́ от того́ вре́мене уста́виша пра́здник пра́здновати Пресвяты́я Богоро́дицы Влади́мирския, и хожде́ние со кресты́, сего́ ме́сяца иу́ния в два́десять тре́тий день.

Не жела́й владе́ти душа́ми, еда́ каќо взы́деши на безстра́стие ме́ры, да и себе́ сотвори́ши па́кость, и су́щим под тобо́ю. А́щели нево́лею привлече́шися, попецы́ся да не свое́ю во́лею привле́кши сотвори́ши поручи́шваго ти слове́сных ове́ц попече́ние. Глаго́лет бо проро́ком Иезеки́илем: «Го́ре вам пастуси́, я́ко не до́бре пасо́сте ове́ц Мои́х, но до́брыя закала́ете и во́лною их одева́етеся, не радите́ о овца́х Мои́х. Немощна́го не укрепи́сте, и крастава́таго не исцели́сте, сокруше́ннаго не утверди́сте, и поги́бшаго не взыска́сте. И разыдо́шася о́вцы Моя́ на го́ры и на вся хо́лмы высо́кия, зане́ не бы́ти пастухо́м, и по лицу́ всея́ земли́ разыдо́шася, и несть взыска́ющаго ни обраща́юшаго. Сего́ ра́ди пастуси́, слы́шите сло́во Госпо́дне. Живу́ аз, глаго́лет Госпо́дь, зане́ бы́ти овца́м на снеде́ние пти́цам небе́сным, зане́ не бы́ти пастухо́м, и не взыска́ша ове́ц Мои́х, но пасо́ша пастуси́ себе́, ове́ц же Мои́х погуби́ша. Того́ ра́ди изба́влю Аз о́вцы изоу́ст их, и ктому́ не бу́дут в снеде́ние». Разуме́йте что потре́ба старе́йшинам, коли́ку беду́ и́мут небрегу́щии пещи́ся поруче́нными им. Подоба́ет у́бо игу́мену хи́тру быт́и, востанли́ву на спасе́ние владе́емым, и коего́ждо разумет́и ступа́ние, и неподо́бныя облича́ти. Руководи́ти, и на бол́ьшая учи́ти, не то́кможе соста́вы писа́ния ученико́м каза́ти, но подоба́ет и де́лы на труды́ возводи́ти, и от предста́тель да́же до ме́ньших ко спасе́нию присовокупля́ти, и прелага́ти к бра́тии я́. И прети́мыя му́ки лени́вым глаго́лати. И во́лцы, ви́девше па́стырево приле́жание, отбе́гнут, и ста́до слове́сных ове́ц соблюде́тся, и па́стыри от Бо́га похвале́ни бу́дут. Ему́же сла́ва ны́не и при́сно и во ве́ки веко́в. [Ами́нь.]