Стихи́:

Власть же́нская - добро́та Февро́нии:

Сече́ние главно́е я́ко и вино́ до́брое тебе́ же́но:

Подаде́ Февро́ния тыл мечу́ в два́десять пя́тый день.

Сия́ от ю́наго во́зраста яре́м Госпо́день восприе́мши, преподо́бне живу́щи во свое́й оби́тели, в преде́лех гре́ческих и пе́рсских, лежи́мей Нисиви́и, и́же нари́чется Антио́хия Мигдони́йская. И всех и́же су́щих с не́ю превзы́де, посто́м же и ра́зумом, и кни́жными чте́нии. Исхожда́ше же и поучава́ше сию́ нарица́емая Врие́ния. Во времена́ Диоклитиа́на, Сели́ну иге́мону гоня́щу христиа́ны, и тогда́ у́бо про́чия и́нокини изыдо́ша из монастыря́, тща́щеся угонзну́ти от належа́щия сме́рти. Блаже́нная же Февро́ния неду́гом содержи́ма, и не могу́щи что сотворит́и, в не́коем подо́лии лежа́ше, приседя́щи ей Врие́ния, и сигклитики́я Ие́рия. А́бие нападо́ша Сели́новы во́ины, и секи́рами врата́ разсе́кше внидо́ша. И извле́кше же мечи́ своя́, и хотя́ху ссещи́ Врие́нию. Но ту́ю заступи́в Прим Лисима́хов стрый, и́же ко христиа́ном кро́ток и ми́лостив явля́яся. Февро́нию же похи́тивше, к Сели́ну приведо́ша, е́йже после́довавше Врие́ния и Ие́рия и Фомаи́да, утвержда́юще ю́ к ве́ре, и наказа́юще ю́ не убоя́тися мук, но в Христо́ве пребыва́ти благоче́стии. Помяни́ бо глаго́лаху Ливи́ю и Леони́ду, се́стры своя́, и отрокови́цу Евтро́пию, ка́ко Ливи́и главу́ отсеко́ша Христа́ ра́ди, а Леони́ду огню́ преда́ша. Отрокови́ца же Евтро́пия слы́шавши от ма́тере, да побе́гнеши рече́ ча́до, но ру́це свои́ нао́пак сотво́рши, слуга́м главу́ преклони́. Врие́ния же по наказа́нии дово́льнем обрати́ся в монасты́рь слезя́щи и пла́чущи, и коне́чнаго стра́ха боя́щися, и победу́ ей от Бо́га на диа́вола прося́щи. Фомаи́да же и Ие́рия в му́жеская обо́лкшеся, спосле́дствовасте святе́й со слуга́ми себе́ замеси́вше. Пе́рвее же приведена́ бысть Лисима́ху Сели́нову анепсе́ю, и вопроше́на бы́вши, испове́да и́мя и род и слу́жбу. И в ме́сто вся́ких, христиа́нку себе́ именова́. На истяза́ние Сели́на о́ного ста́вши, и́же и той ласка́нием, и тихоглагол́анием наче́н, преложит́и ю́ от Христо́вы ве́ры, и не возмо́г, растящи́ ю́ повеле́ на́четверо, издо́лу огнь подгнеща́ти. Свы́ше же во́ины бие́ме, и ма́сло на огнь. Возлива́ти и от мно́гих ран и о́гненаго запале́ния, та́яти и низтека́ти пло́ти ея́. Пото́м повеле́ пове́сити ю́, и желе́зными тесла́ми строга́ти ю́, и свеща́ми опаля́ти. Та́же язы́к ей отре́зати, и зу́бы искорени́ти, и о́ба сосца́ ея́ отре́зати, и ру́це и но́зе отсещи́. И пото́м главу́ ей отсеко́ша. И та́ко святу́ю блаже́нную свою́ ду́шу Бо́гу предаде́. Ску́тати же свято́е те́ло ея́ христиа́ном, Лисима́ху та́ко повеле́вшу, Фи́рмом коми́том, и́же и несе́но бысть Фи́рмом коми́том, и собра́вшу и сло́жьшу вся у́ды ея́, коего́ждо в чи́ну свое́м, зубо́м же и язы́ку на пе́рсех ея́ положе́ным. И та́ко со псалмы́ и пе́сньми соше́дшимся епи́скопом, и кли́риком ку́пно и мни́хом и мно́гу мно́жеству христиа́н, пе́ние погребе́нию сотво́рше, и погре́бше че́стне отъидо́ша. Та́же па́мяти ея́ приле́жне во оби́тели ея́ твори́ме.

Глаго́лется, я́ко му́ченице в полу́нощи явля́тися явле́нно, и с деви́цами пою́щи, и свое́ ме́сто иде́же стоя́ше исполня́ющи, да́же до отпу́стныя моли́твы. Я́же и не́когда Врие́ния ру́ку стисну́вши, и а́бие неви́диме бы́ти ей, я́ко и не могу́щи стерпе́ти ру́чнаго стисну́тия, возопи́вши. Лисима́ху же тя́жкое нападе́ние опове́да сбы́тися, зане́же бы́ти ему́ от ма́тере христиа́нки, и за е́же су́рово о́ну и зверообра́зно, Сели́ном потре́бованне, и растли́ти де́вству ю́ностную добро́ту, лу́чшее бя́ше, е́же не по челове́честву, тогда́ у́бо а́лчну бы́ти, и му́ченицы смерть ви́дети, и пла́кати го́рько. Вма́ле же напосле́док с При́мом приступи́ти ко Христу́, и боже́ственое восприя́ти креще́ние. Сели́ну же во изступле́нии бы́ти, и к небеси́ возре́ти, и я́ко и вол вели́к, к еди́ному от мра́морных вели́ких столпо́в срази́ти главу́, и та́ко зле ду́шу свою́ исто́ргнути.

Соверша́етжеся собо́р святы́я, в проро́чествии свята́го проро́ка и Предте́чи, Крести́теля Иоа́нна, су́щаго во Окси́и.

Сей благочести́вый князь Петр роди́ся от благочести́ва и свя́та ко́рене, и нака́зан бысть в до́бре испове́дании и целому́дрии, во гра́де Му́роме, и пра́ведно власть свою́ пра́вя. По вре́мени же сочта́ся святы́й Петр со благове́рною свое́ю княги́нею Февро́ниею. И сия́ та́коже от благочести́ва ко́рене роди́ся, и до́бре научена́ бысть благоче́стию. И та́ко о́ба свя́та и пра́ведна бе́ста, и любя́ста целому́дрие и чистоту́, и бы́ста ми́лостива и пра́ведна и кро́тка, и оби́димыя изъима́ста из руки́ оби́дящих. И и́ноческий, и свяще́ннический чин до́бре любя́ста, и ми́лостыню подава́ста им. Та́коже и нищыя ми́ловаста вельми́, и посту́ и воздержа́нию прилежа́ста. И па́ки по премно́гу Христу́ угоди́вша во всем до́брыми де́лы свои́ми, жела́юща по Госпо́дню словеси́ кро́тких зе́млю насле́дити, и поко́й пра́ведны обрести́. И посе́м блаже́нный князь Петр, в ста́рости масти́те в боле́знь теле́сную впаде́, и постриже́ся. И во и́ноческом чи́ну нарече́но бысть и́мя его́ Дави́д. И по сих ма́ло поболе́в, преста́вися к Бо́гу, в до́бре испове́дании в Ца́рство Небе́сное. Та́коже и свята́я княги́ня Февро́ния с вели́ким жела́нием постриже́ся, и во и́ноческом чи́ну нарече́но бысть и́мя ей Евфроси́ния: Та́коже и та в до́бре испове́дании и в чи́стой со́вести преста́вися, и предаде́ в ру́це Бо́жии ду́шу свою́. И о́ба насле́доваста кро́тких зе́млю, и́же измла́да вожделе́вша. Посе́м пла́кахуся боля́ре и вельмо́жи блаже́ннаго я́ко отца́. Гра́ждане я́ко засту́пника и оборони́теля. Ни́щии же и вдови́цы, и а́лчущии, я́ко пита́теля и наказа́теля. И та́ко святы́х весь град проводи́вше че́стно, и положи́ша честны́я ею́ мощи в том же гра́де Муроме, в це́ркви, во еди́ном гро́бе, Творя́т же разли́чная чудеса́ от святы́х свои́х моще́й, с ве́рою приходя́щым и до сего́ дне, во сла́ву Бо́жию.

Стихи́:

Скочи́ Леони́да во огнь пе́щный,

Е́же я́ко лев в корми́лищи зело́ пи́щи взыску́юще*:

Теле́сную не́кую багрь, неве́ста Госпо́дня,

Омака́ет Ливи́я вда́вши тыл к мечу́:

Я́ко хвале́ная пти́ца прие́мши суд,

Евтро́пия игра́ет по посече́нии.

И о́ву огне́м, ины́х же мече́м сконча́вшихся.

* - в оригинальном славянском варианте: Скочи́ Леони́да в пе́щу пи́щную, и в пи́щи ле́е нань скочи́ зело́. В греческом оригинале: Πηδά Λεωνίς εις το πυρ της καμίνου, Ως εις τροφήν λέαινα πεινώσα σφόδρα. [Вскочила Леонида во огнь печи, который как львица в питомнике голодная очень.]

Стихи́:

Сы́тость Си́мону теле́сная есть вина́,

Не́бо же ду́ху его́ жили́ще.

Слы́шах не́кия мирски́я лени́во живу́ща, и глаго́люща ко мне: «Ка́ко мо́жем с подру́жием живу́ще и в печа́лех су́ще, черне́чески жи́ти?» К ни́мже отвеща́х: «Все ели́ко мо́жете бла́го твори́ти, твори́те. Никого́же не оклевета́йте, никого́же не окради́те, никому́же не пре́зрите. Це́ркви не отлуча́йтеся, немощны́я ми́луйте и никого́же не соблазни́те. Чужи́м жена́м не приближа́йтеся, и дово́льни бу́дите уро́ки ва́шими. Посе́м у́бо разуме́й я́ко вся су́щыя при́сныя рабы́ Бо́жия и дру́ги уго́ждьшия, в миру́, и в бога́тстве, и со ча́ды свои́ми к Бо́гу приведе́ни. Реку́ же, Авраа́ма и И́ова, и Дави́да, и подо́бныя сим. Благо́е бо бога́тство, в не́мже несть греха́. Да а́ще та́ко сотворите́, то недале́че бу́дете Ца́рства Небе́снаго». Бо́гу на́шему сла́ва, ны́не и при́сно и во ве́ки веко́в. [Ами́нь.]