Стихи́:

Дави́ду дре́внему совокупи́лся еси́, Дави́де но́вый:

Ино́го Голиа́да теле́сныя победи́в стра́сти:

В два́десят шесты́й изы́де Дави́д от врат жите́йских.

Сей блаже́нный име́яше рожде́ние от восто́ка, и я́ко звезда́ многосве́тлая весь мир облиста́. Из млады́х бо ногте́й воздержа́нием стра́сти теле́сныя покори́в, ви́димь бысть с пло́тию я́ко а́нгел. Ке́лию же водрузи́в под ду́бом мигда́льским, я́ко пти́ца доброгла́сная всех притека́ющих словесы́ обвесели́. Сам же ум свой на высоту́ боже́ственую впери́в, тем и чуде́сными соде́ловании обогати́ся, столп яви́ся светоза́рный, и всех просвеща́я чудесы́. Мра́зом томи́мь и ва́ром со́лнечным к безстра́стию премени́ся. Да я́ко попали́ теле́сныя стра́сти, на руку́ у́глие взем, пред лице́ же царе́во до́йде, и не опали́мь пребы́сть. Тем вся́кое челове́ческое естество́ житие́м и чудесы́ преудиви́в, и к Бо́гу пре́йде ра́дуяся, Его́же измла́да возлюби́в.

Стихи́:

Изы́де по всей земли́ веща́ние Ру́фово,

Зе́млю оста́вльшу и живу́щу на небеси́.

Стихи́:

Пло́ти ум вдав на растоя́теля о́тче,

Отме́тниче теле́сный па́че и до конца́.

Той бе при Константи́не царе́, и при Льве Иса́врянине от Ставроски́фския страны́, под вла́стию го́тфскою, сын Льва и Фоти́нии. По обеща́нию же роди́ся, и Богу пре́дан бысть. И поне́же в ме́ру теле́снаго во́зраста до́йде, от свои́х люде́й к Вири́йскому архиепи́скопу по́слан бысть, и от того́ поставле́ние прия́т. В Константи́нь град шед, и мно́го к цари́це Ири́не о пра́вой ве́ре подвиза́ся, и па́ки к свое́й стране́ обрати́ся, и мно́ги беды́ подъя́т, поне́же преда́ша его́ лю́дие кизи́ческим вла́стелем. И бежа́ в Мастриа́ду, и ко Го́споду отъи́де. Мо́щи же его́ положены́ бы́ша в це́ркви святы́х апо́стол.

Стихи́:

Дре́во не́кое боже́ственое доброли́ственых цве́тий,

При врате́х водото́чных теле́снаго то́ка.

Ви́дехом ста́рца Пала́дия доброде́тельнаго и просвеще́ннаго, и́же бесе́дова с на́ми душеполе́зная словеса́ и по́вести: В ни́хже и прилучи́вшаяся ему́ сказа́ нам, и ка́ко моли́твою отца́ Дании́ла дарова́ ему́ побе́ду Бог, и хотя́ нас по́льзовати ста́рец, пове́да нам си́це: Не́коей потре́бе рече́ бы́вши отцу́ Дании́лу во Александри́ю, пое́м и мене́ с собо́ю вни́де во град: И по слу́чаю сре́те нас брат ин зело́ исходя́щу ему́ от ба́ни, бе бо мы́лся в ба́ни. Ви́дев же его́ ста́рец, и воздохну́в глаго́ла ми: «Сей брат увы́ мне, поху́лено бу́дет и́мя Бо́жие о нем. Но после́дуем ему́ еда́ ка́ко ви́дим, где пребыв́ает», и ше́дше внидо́хом во след его́. Пое́м же его́ ста́рец осо́бь, и глаго́ла ему́: «Ю́ну ти су́щу ча́до и здра́ву, не подоба́ет ти в ба́ни измыва́тися: Веруй же ми ча́до, я́ко мно́гих соблажня́еши, не то́чию мирски́я, но и и́ноки». Отвеща́в же брат ста́рцу: «А́ще бых рече́ челове́ком угожда́л, Христу́ раб не бых был. Пи́сано бо есть: Не осужда́йте, да не осужде́ни бу́дете». Тогда́ сотвори́ ему́ ста́рец мета́ние, глаго́ля: «Прости́ мя ча́до Го́спода ра́ди, зане́ я́ко челове́к согреши́х». И отлу́чшеся от него́ отъидо́хома. И глаго́лах ста́рцу: «Еда́ ка́ко не́мощен есть брат о́тче, не и́мать греха́?». Воздохну́в же ста́рец и прослези́вся, рече́ ми: «Да извести́т ти и́стина бра́те, я́ко мно́жае пяти́десяти бесо́в ви́дех после́дующа ему́, и посыпа́юща его́ смра́дом, и му́рина седя́ща на ра́му его́ и целу́юща его́: и друга́го му́рина иду́ща пред ним и раздража́юща его́, и безсту́дию уча́ща, и о́крест у́бо его́ бе́си иду́ща, и веселя́щася о нем. Свята́го же а́нгела его не ви́дех, ниже́ близ его́, ниже́ издале́ча. Те́мже сматря́ю бра́та сего́, я́ко вся́кия де́тели бесо́вския испо́лнен есть. Свиде́тельтсвуют же и ри́зы его́, поне́же кози́чны и мя́кки суть. И е́же си́це безсту́дне ю́ну су́щу ему́, посреди́ сицева́го гра́да пребыва́ти, иде́же мно́зи по́стницы и отше́льницы вхо́дят, и па́ки ско́ро изхо́дят. А́ще бо не бы блудолюби́в был и миролюби́в, то не бы в баню входи́л наг, и на и́ны на́ги безсту́дне взира́л. К тому́ же святы́м отце́м на́шим, Анто́нию же, и Пахо́мию, Аммо́нию же, и Серапио́ну, и про́чим отце́м запове́давшым, я́ко да никто́же от и́нок кроме́ вели́кия боле́зни, или́ ну́жди обнажи́т те́ло свое́. Обрета́ем же и тех ра́ди ну́жныя потре́бы и служе́ния, хотя́щих реку́ прейти́, и кораблю́ не су́щу, и ни от кого́же ви́дими, стыдя́хуся после́дующаго а́нгела, и на ня сия́ющаго со́лнца, е́же на́ги зре́тися им от лучи́ со́лнечныя. А́ще ли случа́шеся кому́ от оте́ц реко́ю прейти́, и ученику́ его́ с ним су́щу, не обнажа́ху себе́, до́ндеже друг от дру́га да́лече разыду́тася, я́ко да не друг дру́га наготу́ ви́дит». Сия́ рек ми ста́рец, и умолче́. Прише́дшым же нам в скит, по ма́лех днех прише́дше бра́тия от Александри́и поведаша: «Я́ко брат и́же в хра́ме свята́го Иси́дора, прише́дый от Константи́ня гра́да обре́теся блуд творя́ с жено́ю епа́рха: И ят бысть от раб его́ и бли́жних сосе́д, и отрезаша ему́ о́бе ло́не с та́йным у́дом, и боле́в три дни скончася, и бысть всем мона́хом поруга́ние и укор». Сия́ слы́шав аз, и со слезами текох ко отцу́ Дании́лу, и обрето́х седя́ща отца́ Исаа́ка с ним, игу́мена ски́тскаго, и глаго́лах ему́: «О́тче, сие́ и сие́ прилучи́ся бра́ту о́ному исходя́щему из ба́ни, и сре́тшу нас, и́же отрече́ся наказа́ния твоего́». Прослези́вся же ста́рец рече́: «Показа́ние го́рдым паде́ние их». И сказа́х отай отцу́ Исаа́ку, я́же от ста́рца ви́денная и рече́нная ко мне: те́мже я́ко досто́йна писа́нию повеле́ оте́ц написа́тися, и положи́ти в кни́зе знаменоно́сных оте́ц, к по́льзе и созида́нию прочита́ющым.

Никто́же в зло́бе грехо́вней ходя́ сам ся отча́ет, ве́дый душе́вному неду́гу душе́вное бы́лие – покая́ние. Тем бо мо́щно вся́кий неду́г изврачева́ти, ему́же паде́т кре́постный столп. Бра́те, да не поху́лена ти бу́дет я́же на пи́щу бы́лия, ни затворе́н ти бу́ди испове́дания град. Ни во глубине́ злых оставля́й себе́, ни преда́йся сам человекоуби́йце. Весть бо воставля́ти па́дшыя Госпо́дь. А́ще ка́я наде́жда оста́вила есть тебе́ бра́те спасе́ния, или́ ка́я ти па́мять о Бо́зе, или́ кий по́мысл бу́дущих благ, или́ кий страх при обрете́ных му́ках не пока́явшимся, восклони́ся ско́ро, возведи́ о́чи свои́ на не́бо, и прииди́ в чу́вство. Преста́ни от зол твои́х, оттряси́ обдержа́щее пия́нство. Не супроти́вися бию́щему тя. Воспомяни́ блага́го Па́стыря, я́ко изба́вит ны. Отскочи́ от уязви́вшаго тя. Помяни́ щедро́ты Бо́жия, я́ко исцеля́ет древя́ным ма́слом и вино́м. Не отча́йся спасе́ния, но восприими́ па́мять напи́санных, я́ко пады́й воста́нет, и отвраща́яйся обрати́тся, звере́м неукроти́мым преодоле́ет. И испове́даяйся, не отгони́мь есть. Не бо́ хо́щет Бог сме́рти гре́шнаго, но обрати́тися и спасе́ну бы́ти. А́ще и в глубину́ зол впад, не отча́йся. Вре́мя ти воздержа́ния есть, вре́мя терпе́ния и исцеле́ния, и вре́мя исправле́ния. Поползе́ ли ся – воста́ни. Согреши́л ли еси́ – преста́ни. Не ста́ни на пути́ гре́шных, и отскочи́. Егда́ бо обрати́вся воста́неши, тогда́ воста́в спасе́шися. Есть бо от боле́зни здра́вие, и от покая́ния спасе́ние. Дерза́й не отча́йся! Несть бо зако́н Бо́жий, я́коже судя́щих власте́й, и́же без ми́лости на смерть осужда́ют, но благода́ти пребыва́ющи. Отлага́ет муче́ние, ожида́я исправле́ния, доне́леже затвори́тся дверь, и не услы́шит Неве́стник, но облада́ет грех в гее́нне.

А́ще прии́дет брат в монасты́рь ко́ею лю́бо вино́ю, и а́ще не возбуди́тся, поглоти́т его́ диа́вол напра́сно. На́чнет бо лю́тыя влага́ти ему́ по́мыслы глаго́ля: Что хо́щеши тружда́тися в доброде́тели и труд приима́ти и изнемощи́, воста́нию не су́щу? Еда́ бо свои́м изволе́нием прише́л еси́ в монасты́рь? А́ще не бы ти приключи́лася та́ко вещь, и пону́жден бы мона́х бы́ти, николи́же бы ты мона́х был. Не восхощи́ у́бо ны́не изнемога́ти, и́бо Бог и́мать благода́ть да́ти о сем. Сия́ враг по́мыслы влага́ет брату, хотя́ его́ воврещи́ во глубину отчая́ния. Тогда́ на́чнет брат про́чее в небреже́нии прбыва́ти и безстра́шии, проти́ву же глаго́лати ма́лым и вели́ким, и несы́та сна приима́ти. И а́ще что сотвори́т бла́го, тогда́ ка́ется, та́ко и тщету́ себе́ сотво́рша мнит, ча́сто ро́пщет и растлева́ет себе́, и еди́ною про́сто па́губе предает себе́. И е́же хотя́ше изли́ше тружда́тися в доброде́телех, то проти́вно начина́ет твори́ти, не разсужда́я в себе́ благодаре́ния Христо́ва. И зане́ бе ему́ глаго́лати в души́ свое́й: Коль бла́го и́же мно́гаго ра́ди поста́, и мно́гия ра́ди ми́лостыни в сие́ житие́ приити́! Он же неле́пая возглаго́лет, и та́ко всех благ отщети́тся. Не помина́я сего́, е́же неле́ностну мы и безмяте́жну житию сподо́блен от Го́спода на́шего Иису́са Христа́. Те́мже пра́ведне потщи́теся жи́ти и досто́йно покая́нию, и неле́стна дела́ твори́ти. Бо́гу на́шему сла́ва, ны́не и при́сно, и во ве́ки веко́в. Ами́нь.

P.S. В некоторых прологах данное поучение идет на 25 июня.