Стихи́:

Изведе́ дре́вле из челю́сти Сампсо́н во́ду:

Ны́нешний же Сампсо́н из гро́ба то́чит ми́ро:

В два́десят седмы́й день Сампсо́н у́мер, то́чит ми́ро.

Сей бя́ше ро́дом ри́млянин, сро́дник в царе́х вели́кому Константи́ну. И́же и расточи́в ни́щим оста́вленое ему́ от роди́телей бога́тство си́рым и убо́гим, и и́де в ца́рствующий град, и благостоя́нныя честны́я до́мы обте́к и че́стне безмо́лвие восприи́м, богодухнове́ннаго писа́ния себе́ напита́, и еди́ному Бо́гу прилежа́в. Тем объявле́н бысть честно́му патриа́рху, и поста́влен бысть от него́ презви́тером, и еди́н от кли́рик быв. И бя́ше спасе́ное приста́нище ни́щим, и неду́жным, и тре́бующим по́мощь, я́ко и враче́бскому худо́жеству искус́ен бя́ше. Той Иустиа́на царя́ в неисцели́мую страсть впа́дшася уврачева́. О се́мже царь возлюби́в доброде́тель му́жа, и честь ему́ возда́в, вели́к дом и преди́вен тому́ воздви́же, странноприи́мство сотвори́, и сосудохрани́теля вели́цей Бо́жией це́ркви того́ поста́ви. То́йже до́бре и боголюбе́зне пожи́в, почи́ о Го́споде. И положе́но бысть честно́е те́ло его́ в вели́цей це́ркви свята́го Моки́я, точа́ всегда́ цельбы́ в сла́ву и хвалу́ Го́спода на́шего Иису́са Христа́. Соверша́ет же ся собо́р его́ в це́ркви созда́нней от него́ и в ста́вленей больни́це.

Стихи́:

Его́же гро́бу предстоя́ла еси́, Иоа́нно:

Того́ и напосле́док предстоя́щи престо́лу.

Стихи́:

Пре́йде Лука́ безгорта́нных рече́й,

И́же и напосле́док воструби́ти во обои́х.

Стихи́:

Совокупи́шася имены́ Марки́е и Марки́я,

И́хже и ме́чное сече́ние соприобщи́.

Стихи́:

Я́ко же́ртву Тебе́ Пио́рия, Сло́ве,

Принесо́ша злочести́вии верх у́глия.

Не́кто ста́рец и́менем Марти́н, быв пре́жде по́вар епи́скопом Ту́ровским, Симео́ну, Игна́тию, и Иоаки́му. Сего́же епи́скоп Гео́ргий свободи́ ста́рости ра́ди, и бысть мних. Пребыва́ше в епи́скопли монастыре́ у святу́ю му́ченику еди́н живы́й. Ча́сто же боля́ше ста́рец ло́ном, чре́во бо его́ в ло́но изхожда́ше. И егда́ сие́ быва́ше, тогда́ лежа́ше ста́рец вопия́, не моги́й воста́ти, и послужи́ти своему́ те́лу. Еди́ною же боля́щу ему́ те́мже неду́гом, и лежа́ше в ке́лии, от жа́жди водны́я изнемога́ше, никому́же посети́вшу его́, зане́ бе вода́ вели́ка около монастыря́. В тре́тий же день внидо́ста к нему́ свята́я мученика Бори́с и Глеб я́ве, в свое́м подо́бии, я́ко и на ико́не напи́сана еста, и глаголаста: «Чим боли́ши, ста́рче?». Он же испове́да и́ма неду́г свой. И реко́ста ему́: «Хо́щеши ли воды́?». И рече́ старец: «О́ господи́на моя, уже́ ея давно́ жада́ю». И взем еди́н ру́чку (круш) ста́рчу, и принесе́ воды́, и взе́мша коре́ц, напои́ста ста́рца. И рече ста́рец: «Чи́я еста́ де́тища?». И глаго́ласта ему́: «Яросла́вля». И мнев ста́рец Гео́ргиева Яросла́ва слузе́ еста́. И рече́: «Бог да сотвори́т ва́ма мно́га ле́та, господи́на моя́, обаче са́ми взе́мша хлеб яди́та, аз же не могу́ служити ва́ма». О́на же ре́ста: «Да бы тебе́ хлеб был, мы у́бо отъи́дема отсе́ле, а ты не боли́, но почи́й». И ́абие неви́дима бы́ста. Ста́рец же обре́теся здрав, и воста́в просла́ви Бо́га, и свята́я му́ченика. И пребы́сть про́чее здрав, сам сказа́ отцу́ духо́вному.

Во страна́х Туре́я гра́да между́ двою́ го́ру во юдо́лине, и бесе́дою ме́ста того́, Ентерокли́на имену́ема: бе це́рковь Влады́чицы на́шея Богоро́дицы при́сно Де́вы Мари́и. Муж не́кий Севи́р и́менем, зело́ чу́дна жи́тельства, в той це́ркви свяще́нник бе. До́му же влады́ка не́кий в после́дний день сме́рти его́ прише́д, вско́ре к презви́теру тому́ посла́в моля́шеся, я́ко да со тща́нием к нему́ прии́дет, и моли́тву о нем сотвори́т, я́ко да испове́дание и покая́нием соде́янная им согреше́ния разреше́ния прии́мут, пре́жде да́же ему́ от те́ла сего́ изы́ти. Случи́ся же по прилу́чаю презви́теру тому́, во е́же виногра́д обре́зати бы́ти упра́жнену. И к нему́ прише́дшым рече́: «Предвари́те вы, и се аз достигу́ вас». Ви́дев же я́ко ма́ло есть, оста́вльше в де́ле его́, умы́сли ма́ло пожда́ти я́ко да соверши́т е́. То́же соверши́в, нача́т к боля́щему ити́. Иду́щу же ему́ срето́ша его́ на пути́, и́же пре́жде к нему́ прише́дшии, глаго́люще: «Почто́ о́тче укосне́л еси́? Ктому́ у́бо не тружда́йся, он у́бо у́мре». Се же презви́тер слы́шав, и тре́петен быв нача́т пла́кати, и ве́лиим гла́сом себе́ уби́йцу тому́ нарица́ти. Пла́ча у́бо дости́же, иде́же те́ло уме́ршаго лежа́ше, и себе́ пред одро́м его́ со слеза́ми на зе́млю пове́рже. Тому́ же зело пла́чущу, и главу́ о зе́млю ударя́ющу, и себе́ пови́нна сме́рти его́ глаго́лющу: внеза́пу уме́рый ду́шу восприя́т. Сие́ же предстоя́щии уви́девше, зело́ о чудеси́ уди́вльшеся, и нача́ша наипа́че от ра́дости пла́кати, и того́ вопраша́ти: «Где был еси́, и ка́ко возврати́лся еси́?». То́йже отвеща́ рече́: «Му́жие не́цыи го́рди зело́ бя́ху и́же мя поя́ша, им же от уст и от ноздре́й огнь исхожда́ше, его́же терпе́ти не можа́х. Внели́це же сквозе́ те́мныя ме́ста обвожда́ху мя. Напра́сно ю́ноша зело́ благогове́ин, и со други́ми во сре́тение нам прии́де, и к водя́щым мя рече́: Возврати́те его́ я́ко Севи́р презви́тер пла́чет о нем. О́ному бо слез ра́ди его́ Госпо́дь сего́ дарова́»». Севи́р же презви́тер от земли́ воста́в, и Бо́га благодари́в, и е́же о покая́нии словесы́ того́ наказа́в. И моли́твою его́ немощны́й очище́ние грехо́в прии́м. Седмь дний в жизнь сию́ возвра́щься сотвори́, о соде́янных покая́ние творя́: во осмы́й же день веселя́ся ко Го́споду отъи́де. Разуме́й у́бо, в какове́ любви́ Госпо́дь Севи́ра презви́тера имя́ше, его́же ни в час оскорби́тися хотя́ше.

Не лени́теся присеща́ти боля́щих Го́спода ра́ди, ра́вно бо есть ми́лостыни, е́же присеща́ти боля́щих. Слы́ши Го́спода глаго́люща: «Бо́лен бех, и посети́сте Мене́». А и́же загради́т у́ши свои́ не слы́шати боля́щаго – и той помо́лится, и не бу́дет послу́шающа его́.

А́ще бо в вели́це са́ну еси́, бо́льшу у́бо от Христа́ мзду прии́меши, и сего́ ра́ди возлю́блен бу́деши.

А́ще ли еси́ нищь и не и́маши что донести́ на потре́бу им, то себе́ донеси́, и е́же от слове́с утеше́ние тому́ принеси́.

И та́ко во он день услы́шиши от Него́: «Прииди́те благослове́нии Отца́ Моего́, насле́дуйте угото́ванное вам Ца́рство, я́ко бо́лен бых и посети́сте Мене́».

Ему́же сла́ва ны́не и при́сно и во ве́ки веко́в. [Ами́нь.]