Небесе́ и земли́ реть ви́жу настоя́щаго ра́ди торжества́, па́мятию апо́стол. Небе́сным у́бо си́лам благохва́лящим почте́нными гла́сы, боле́зненых учи́лище я́ко те́ми позна́но бу́дет: «Ны́не нача́лом и власте́м на небе́сных Це́рковию многоразли́чная Бо́жия прему́дрость» (Ефес. 3, 10). Су́щым же на земли́ челове́ком ну́дящимся досто́йно благохвале́ние к верхо́вным че́сти ра́ди показа́ти, я́ко тех ра́ди во спасе́ние прише́дшим.

Что бо Петра́ бо́льши? Что же Па́влу то́чно? И́же сло́вом и де́лом всю я́же на небесе́х и на земли́ тварь удиви́ша. И́же бре́нием теле́сным соплете́ны, но лу́чши а́нгел обре́тшеся. Что у́бо рече́м соучи́телем го́рняго и до́льняго созда́ния? Не обрета́ю бо досто́йна словесе́ похвали́вших род наш, и зе́млю всю и мо́ре обше́дших, и ко́рение грехо́вное истерза́вших, и се́мена благоче́стия посе́явших, в сердца́х непокори́вых челове́к.

Петр – наста́вник апо́столом; Па́вел - каза́тель смотре́ния вы́шним си́лам. Петр – злонра́вным иуде́ом брозда́; Па́вел – язы́ком утеше́ние. И виждь ми Влады́ки преиму́щую прему́дрость. Петра́ бо от ры́барей избра́. Па́вла же от усма́рь. И не кроме́ по́льзы се сотвори́; погряза́ше бо сла́ва иуде́йская. Сего́ ра́ди ры́барю вве́ри Госпо́дь, рек к нему́: «Иди́ в мо́ре, и вве́рзи у́дицу, и восходя́щую пе́рвее ры́бу ем, и отве́рзи уста́ ея́ и обря́щеши стати́р» (Матф. 17, 27), – мо́ре глаго́ля, беззако́нных иуде́й нрав; у́дицу, благохи́тростное сло́во уче́ния; ры́бу, зако́н назна́менает. А е́же отве́рсти уста́ ея́, е́же ска́зовати его́ глаго́лет. Па́влу же вся язы́ки я́коже усмарю́ вручи́, да облече́т зако́ном и благода́тию наги́я червле́ною ко́жею, я́коже водо́ю и кро́вию Влады́чнею обагре́ною. Си́це тому́ Влады́ка вопия́, я́ко «Аз в язы́ки дале́че послю́ тя» (Деян. 22, 21).

О́ блаже́нная дво́ице, вве́рена бы́вшая всего́ ми́ра ду́ши. Петр – нача́ло правосла́вия, вели́кий церко́вный священноглаго́льник, ну́ждный сове́тник христиа́ном, сосу́д вы́шних сил, почте́нный от Влады́ки челове́к. Па́вел – ну́ждный церко́вный а́нгел. Похва́ла вселе́нныя. И́же на небесе́х челове́к, и на земли́ а́нгел. Сла́ва церко́вная, высокопа́рный оре́л, свире́ль духо́вная, ла́стовица и щур и сосу́д Влады́чень, потре́бный Христо́в служи́тель.

Петр и Па́вел – впряже́на вола́ церко́вная, и́же до́брую ку́плю вселе́нней прине́сше, и́же крест в ме́сто ярма́ взе́мше. В ме́сто вса́дника – Спа́са Христа́. В ме́сто у́бо теле́с – писа́нии заве́та. В ме́сто же бре́мене – благода́ть Свята́го Ду́ха, и́же Це́рковь по вся дни просветля́ющу. Сокро́вища Влады́чня. Гости́нницы вселе́нныя, прия́телища Свята́го Ду́ха, Святы́я Тро́ицы сказа́телие. Смотре́ния Бо́жия Словесе́ испове́дателие. Мое́ духо́вное раче́ние.

Па́вел сосу́д избра́нный, моя́ па́лица; Петр – Це́рковь Бо́жия. Па́вел – уста́ Христо́ва. Трила́котный, небе́с каса́яся. И́же в ме́сте опису́емь, и мир Влады́це опису́я. И́же от Иерусали́ма, и о́крест да́же до Иллири́ка испо́лнив благове́стием (Римл. 15, 19). Быстроте́чный пу́тник, и́же на небеса́ возлетева́я оре́л. И́же боже́ственыя благода́ти испо́лненыя свиде́тельствованный от Го́спода пронести́ и́мя Его́ пред все́ю вселе́нною. И́же трикро́вное не́бо проше́д, и в рай вшед, и да́же до необмы́слимаго престо́ла вшед. И вшед, слы́шав неизрече́нных та́инств, «и́хже не леть есть челове́ком глаго́лати» (2Кор. 12, 14).

Что же и к Петру́ рече́м? Петр – сла́дкое Це́ркви виде́ние, свети́ло вселе́нныя. Нескве́рная голуби́ца. Вождь апо́столом. Те́плый апо́стол горя́ ду́хом. А́нгел и челове́к, и́же благода́ти испо́лненый. Тве́рдый ве́ре ка́мень. Ста́рческое Це́ркви мудрова́ние. Блаже́нный сын. Голуби́ца зва́тися услы́шав, чистоты́ ра́ди от Влады́чних уст. И́же ключи́ Ца́рствия небе́снаго от Самого́ Го́спода восприи́м.

А́нгельския чи́ны вы окрадо́ста. И что мно́го глаго́лю? Сам Госпо́дь похваля́ет вас глаго́ля: «Вы есте́ соль земли́» (Матф. 5, 13). Вы царе́й крепча́йше. «Вы есте́ свет ми́ру» (Матф. 5, 14). Бога́тых благооби́льнейше. Прему́дрых и любому́дрых прему́дрейше. Ри́тор благоязы́чнейше. Ничто́же иму́ще, а вся содержа́ще (2Кор. 6, 10). Вы есте́ му́чеником терпе́ние, патриа́рхом правосла́вие, и́ночествующым по́стничество, де́вам вене́чницы. И́же в супру́жестве миротво́рцы. Хи́щником бога́тым восхлаще́ние , возде́ржным уцелому́дрителие. Покро́в правосла́вным царе́м. Сте́ны христиа́нския. Ва́рваром сопротивобо́рцы. И́же брозду́ еретико́м наложи́вше. И́же стра́сти умерщвля́юще. И́же легио́ны бесо́вския прогна́вше. И́же тре́бища е́ллинская низложи́вше. И́же го́рняя и до́льняя насле́довавше. Го́рних у́бо ключи́ прии́мше, до́льних же реши́ти и вяза́ти согреше́ния власть иму́ще.

О́ гру́баго чудесе́! О безкни́жнаго прему́дрости! Петр и́же се́нию свое́ю разсла́бленыя стягну́в, и смерть разреша́я. Па́вел и́же ри́зами свои́ми неду́ги отгоня́я и бе́сы прогоня́я. И́же посреди́ смерть Госпо́дню иму́ще, и лу́чше вся́каго Ду́ха пра́ведных су́ща. Па́вел – немо́лчная ла́стовица церко́вная, Петр – и́же всегда́ вселе́нней я́коже слави́й непреста́нно поя́. Столпа́ церко́вная, вселе́нней свети́льника, и́же лу́чша друг дру́га, и бо́льша всея́ вку́пе тва́ри.

Ра́дуйся Пе́тре, ка́меню ве́ры! Ра́дуйся Па́вле, церко́вная похвало́!

И́же тма́ми лю́тая Ея́ ра́ди претерпе́вый; В темни́це затворя́ема, от иуде́й ненави́дима. От ва́рвар влачи́ма, дыха́ти не попуща́ема, и преста́ти не трепе́щуща уче́ния. И́же и уд теле́сный подви́гнути не могу́ща тя́жести ра́ди у́зныя, но всю вселе́нную свя́занную грехописа́ньми, разреша́юща. Бесо́вския полки́ измени́ста. Ва́ма Свята́го Ду́ха благода́ть во вселе́нную простре́ся. Мглу пре́лести от земли́ сопря́таста.

Кото́рая благодаре́ния возда́мы ва́ма, толи́ка нас ра́ди труди́вшимся! Помина́ю Петра́, и удивля́юся. Воспомина́ю Па́вла, и ужаса́юся, слеза́ми содержи́мь есмь. Что бо реку́, или что возглаго́лю, взира́я на ва́ша ско́рби? Не ве́де.

Коли́ко темни́ц освяти́сте! Коли́ко вери́г просвети́сте! Коли́ко мук претерпе́сте! Коли́ка хуле́ния отрази́сте! Коли́ко Христа́ понесо́сте! Ка́ко це́ркви све́тлы сотвори́сте про́поведию! Благослове́н сосу́д язы́ка ва́шего. Кро́вию смеше́ны у́ды ва́ша Це́ркви ра́ди. Неоску́дно во всем Христа́ подража́сте. Во всю зе́млю изы́де веща́ние ва́ю, и в концы́ вселе́нныя глаго́лы ва́ю (Пс. 18, 5). Не расто́ржену и́же ва́ма уневе́щенную Це́рковь сохрани́ Христо́с. Никто́же пре́жде вас, ниже́ по вас яви́ся тако́в, кто бо учи́тельское сло́во имы́й, дерзну́ глаго́лати что кроме́ ва́шего преда́ния, вся учи́тели вы сокруши́сте. Одоле́ на́шим омраче́ниям ва́ше терпе́ние. Ана́фема са́ми моля́щеся бы́ти от Христа́, да челове́ки приобря́щете. Что у́бо возда́м вам о всех, и́хже возда́ста нам благи́х, днесь ва́шего страда́ния па́мять есть.

Ра́дуйся Пе́тре, и́же дре́ва кре́стнаго наслади́вся, и подо́бно Учи́телю распя́тися не восхоте́в, пра́вым о́бразом, я́коже Влады́ка нашь; но па́че стремгла́в на не́бо ше́ствие творя́ от земли́. О́ благослове́ни гво́здия, и́же святы́я у́ды проидо́ша, мне вожделе́нныя и лу́чшия небе́сныя сла́вы су́ща! И́же со дерзнове́нием в ру́це Влады́чне ду́шу преда́в! Рабо́тавый Го́сподеви без попече́ния, и уневе́щанной Тому́ Це́ркви со вся́ким усе́рдием, Владыколюбо́вный и благорабо́тный Го́сподеви. И сему́ ревну́я горя́щим ду́хом, па́стырю Влады́чний всех апо́стол.

Па́вел же блаже́нный мече́м во главу́ усе́чен бысть, неисповеди́мый челове́к. Кото́рый у́бо мечь про́йде о́ного горта́нь, Влады́чняго сосу́да, и́же от небесе́ удивля́ема, и от земли́ ужаса́ема? Кото́рое же ли ме́сто прия́т кровь твою́, я́же млекови́дна ви́дена бысть на ри́зе? И́же тебе́ усе́кнувшаго, я́же ва́рварскую ду́шу его́ па́че ме́да услади́в, ве́рна устро́и бы́ти и с дружи́ною, мне мечь он да бу́дет в венца́ ме́сто. И́же три́десят пять лет рабо́тав Го́сподеви со вся́ким усе́рдием. Сконча́в же ся благоче́стия тече́нием, почи́ о Го́споде, сый лет шести́десяти осми́.

Супроти́в веща́ем ва́ма боже́ственая ва́ша гла́са: «Ра́дуйтася о Го́споде всегда́» (Фил. 4, 4), безпреста́ни о нас моли́тася обеща́ния ва́ю испо́лнити. Возвыша́еши бо блаже́нне Пе́тре, си́це глаго́ля: «Потщу́ же ся и всегда́ име́ти вас по мое́м отше́ствии я́же о сих па́мять твори́ти» (2Петр. 1, 15).

Есть у́бо блаже́нный апо́стол Христо́в Петр от Вифсаи́ды Галиле́йския, иде́же Госпо́дь наш Иису́с Христо́с мно́жайшая чудотворе́ния соде́лав, от него́же и Фили́пп бя́ше гра́да. Всему́дрый же Па́вел от Та́рса Килики́йскаго. Успо́ша же в вели́ком Ри́ме ста́ром, при Неро́не беззако́ннейшем царе́. Убие́на бы́вша, и ко Учи́телю и Го́споду всех со мно́жайшею ку́плею отше́дша.

Вся́ко у́бо тща́ние показа́ти до́лжни есмы́ возлю́бленнии, моля́щеся всех Царю́ Христу́ Бо́гу на́шему. Да и нас сподо́бит того́же человеколю́бия, в тех преда́нии и уче́нии пребыва́ти, да прии́мем тех ра́ди ми́лость пред суди́щем Христо́вым.

С Ни́мже Бо́гу Отцу́ сла́ва, ку́пно и с Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. [Ами́нь.]

Стихи́:

Распя́тие кре́стно умори́ пропове́дника Петра́:

Посе́к же Па́вла, посе́кшаго пре́лесть:

В два́десят девя́тый крест Петра́, Па́вла же мечь.

Сим не́кую от похвалы́ при́тчу бо́льшую кто домы́слитися и́мать, не́жели Госпо́дня свиде́тельства и про́поведь. О́вого у́бо ублажи́вша, и Ка́мень наре́кша, на не́мже водрузи́ти Це́рковь рече́. О́вого же, сосу́д избра́ния бы́ти предре́кша, е́же пронести́ и́мя его́ пред цари́ и мучи́тели.

Бя́ше же святы́й Петр, брат первозва́ннаго Андре́я, от гра́да несла́вна и худа́ Вифсаи́ды. Сын Ио́нин, от коле́на Симео́нова, при Урка́не архиере́и, в нищете́ после́дней живы́й, и свои́ма рука́ма е́же жи́ти сниска́я. То́муже сконча́вшуся, Си́мон у́бо себе́ в нае́м отда́в, и поя́т дщерь Аристову́лову, бра́та Варна́вы апо́стола, и ча́да роди́. Андре́й же чистоте́ себе́ отда́л есть. По вре́мени же в не́же всажде́н бысть Иоа́нн в темни́цу, Иису́с к е́зеру Генисаре́тскому прише́д и обре́т Андре́я и Петра́, поправля́юща се́ти своя́, возва́ я́, и а́бие после́доваста ему́. И про́чее пропове́дав Петр Ева́нгелие во Иуде́и и Антиохи́и, и в По́нте, и Галати́и, и Каппадоки́и, Аси́и же и Вифини́и. Сни́де да́же до Ри́ма. И за е́же преодоле́ти ему́ в чудесе́х, Си́мона волхва́, тогда́ Неро́ну ца́рствующу, ра́спят быв стремгла́в я́коже сам испроси́, и та́ко блаже́нную кончи́ну прия́т.

Святы́й же Па́вел, евре́ин у́бо бя́ше ро́дом и той, от коле́на Вениами́нова. Е́ресию фарисе́й. Науче́н от Гамалии́ла, и в коне́ц Моисе́йскому зако́ну нака́зан. В Та́рсе живы́й, е́же и преи́злиха ревни́тель быв зако́ну, разоря́ше Бо́жию Це́рковь. Того́ и предложе́нием, убива́ется Стефа́н первому́ченик. Позва́н же быв от Бо́га в полу́дне, и ослепле́ну очи́ма гла́су ему́ боже́ственому прише́дшу свы́ше, посыла́ется ко Ана́нии дре́вню ученику́, живу́щу в Дама́сце. Его́же огласи́в и крести́в, поне́же сосу́д избра́ния бысть, я́коже перна́т не́кий, всю обше́д вселе́нную, улови́в есть. И в Рим дости́г и научи́в мно́ги, та́мо житие́ разреши́, ле́то по́слежде по Петре́ живе́. И в вы́ю усече́н. От я́звы же истещи́ ре́ша, кро́ви со млеко́м.

А́ще же и по́слежде сконча́ся блаже́нный Па́вел ле́том, но в еди́ном ме́сте положи́шася ею́ мо́щи. Тою́ моли́твами Христе́ Бо́же поми́луй и спаси́ нас. [Ами́нь.]

Прише́дшу у́бо свято́му апо́столу Петру́ от Антиохи́и в Рим, и обита́ близ торга́ у Кли́мента не́коего кора́бленика, и уча́ше сло́ву Бо́жию приходя́щыя к нему́. И возвести́ша ему́: я́ко Си́мон не́кто зде от Еги́пта прише́л, и нарица́ет себе́ Христа́, твори́т же и чудеса́ мно́га: И царь Тиве́рий в сла́дость послу́шает его́. И разжже́гся Петр Святы́м Ду́хом, прии́де к нему́ иде́же бе Си́мон, и мно́ги обре́те стоя́ща у врат, и ти́и возбрани́ша ему́ вни́ти. Рече́ же Петр: «Почто́ возбраня́ете ми вни́ти ко льсти́вому волхву́?». Они́ же ре́ша: «Не волхв есть, но бог си́лен, и той поста́ви стра́жа у врат, ве́дуща помышле́ния челове́ческа». И показа́ша ему́ че́рна пса во врате́х лежа́ща, и ре́ша: «Сий пес умерщвля́ет, о Си́моне непра́вду помышля́ющих». Рече́ же Петр: «Аз пра́вая о нем глаго́лю, я́ко от бе́са есть Си́мон». И приступи́в рече́ ко псу: «Иди́ и рцы Си́мону: Петр апо́стол Христо́в хо́щет к тебе́ вни́ти». И прише́д пес челове́ческим гла́сом рече́, я́же повеле́ ему́ Петр к Си́мону. И ужасе́ся весь наро́д иже о Си́моне. Си́мон же та́коже пса, и рече́: «Да вни́дет се́мо». И вше́дшу Петру́, нача́ Си́мон мечты́ твори́ти пред наро́дом при Петре́. Петр же си́лою Христо́вою бо́льша показа́ чудеса́. И возвести́ша о них Тиве́рию царю́. И повеле́ я́ привести́ к себе́. Вопроси́ же царь Си́мона: «Ты ли еси́ Христо́с?». Си́мон же рече́: «Аз есмь Христо́с». Петр же рече: «Ни, но аз учени́к есмь Христо́в, и пред нам ра́спят бысть во Иерусали́ме Пила́том, и в тре́тий день воскресе́, а в четыредеся́тый день вознесе́ся на небеса́». И повеле́ царь призва́ти Пила́та, и рече́ ему́: «Сей ли есть Христос его́же ты испе́рва непра́вдою осуди́л еси́ на распя́тие?». И рече́ Пила́т: «Не сей, царю́. Христо́с бе смугл лице́м, и добр брадо́ю, о́чи име́я све́тлы: А сей муж голеу́с, черн вельми́, сти́щен бровьми́, зекр очи́ма, и мню я́ко ложь есть». И показа́ царь на Петра́ и рече́: «А сего́ ви́дел ли еси́ со Христо́м, я́ко учени́к Его́ твори́тся?». И рече́ Пила́т: «Сего́ у́бо зна́ю, я́ко приведо́ша его́ пред мя, отве́ржеся Христа́, я́ко не зна́ю Его́». И повеле́ царь изринути обою́ из пола́ты, Си́мона я́ко солга́вша, Петра́ же я́ко отве́ргшася. И бысть межд́у и́ма пря вел́ика. И повеле́ царь Агри́ппе епа́рху суди́ти я́. Си́мон рече́: «Повели́ да мя усе́кнут, и воскре́сну в тре́тий день.» И поста́ви в мечте́ ове́н, и усе́кну главу́ овну́. Петр же обличи́ его́. Посе́м повеле́ Си́мон поста́вити столп, да нань возше́д вознесе́тся на не́бо, и па́ки сни́дет. Тому́ же бы́вшу, возле́з Си́мон на столп, и взят бысть бе́сы, и неся́ху его́ на возду́х. Петр же запрети́ бесо́м, и пове́ргше Си́мона бежа́ша, и низ пад Си́мон, сокруши́ся на четы́ре ча́сти, и та́ко сконча́ окая́нный свой живо́т. Петро́ви же мно́зи ве́роваша от ри́млян, и крести́шася во и́мя Отца́, и Сы́на, и Свята́го Ду́ха.

Слы́шасте бра́тие в Ева́нгелии Самого́ Го́спода глаго́люща ко ученико́м Свои́м живо́тная словеса́, и́хже послу́шающе, и напису́юще на сердца́х на́ших, духо́вни да бу́дем. Та́же ца́рски я́же рече́ Бог к Петро́ви: «Я́ко ты еси́ Петр, си́речь, тве́рдый ве́ры ка́мень». Петр бо ка́мень нари́чется на не́мже созда́ Христо́с Це́рковь духо́вную, ейже врата́ сме́ртная не мо́гут одолети. Иде́же Сам Творе́ц основа́ние положи́, и сте́ны возгради́ ве́рою, кто возмо́жет ей проти́витися? К той бо ве́рою всяк прите́к, спасе́тся. К той бра́тие прибежи́м, ту всех грехо́в отпу́ст прии́мем: Ту исцеле́ние страсте́м получи́м: Ту весе́лия и ра́дости наслади́мся. Сему́ бо верхо́вному апо́столу Петру́ даде́ власть Госпо́дь Бог глаго́ля: «Се Аз даю́ тебе́ ключи́ Ца́рства небе́снаго: И его́же свя́жеши на земли́, бу́дет свя́зан и на небеси́: И его́же разреши́ши на земли́, бу́дет разреше́н и на небес́и». К той ны́не припаде́м бра́тие, прося́ще разреше́ния ве́рою и чистото́ю, и любо́вию незави́стною, де́лы до́брыми украси́вшеся, ми́лостынею, и посто́м очи́стившеся, ни́щыя ми́лующе, да и са́ми от Бо́га ми́лость получи́м. Стра́нныя прие́млюще, наги́я одева́юще, а́лчныя насыща́юще, жа́дныя напая́юще: те́ми бо отверза́ется Ца́рство небе́сное, и греси́ отдаю́тся. Те́мже не мо́жем их презре́ти. Тех бо ра́ди дано́ есть име́ние, да и о́нех насы́тим, и свой дово́л испо́лним. Я́коже рече́ Госпо́дь: «В ню́же ме́ру ме́рите, возме́рится вам». Да добро́ есть бра́тие житие́м непоро́чным сконча́ти житие́ све́та сего́, не́жели злым ве́чную му́ку восприя́ти. Приити́ бо и́мать Сын Бо́жий Иису́с Христо́с, суди́ти живы́м и ме́ртвым, и возда́ти кому́ждо по дело́м его́.

Сей у́бо блаже́нный Петр от ца́рскаго ко́рене, орды́нских царе́й. Не́когда убо, Росто́вскому архиепи́скопу Кириллу це́ркве ра́ди Бо́жия, и благове́рия, ходи́вшу во орду́ к Берка́ю царю́. Сей же блаже́нный царе́вичь Петр слы́ша от Кири́лла архиепи́скопа боже́ственных слове́с поуче́ние, и осени́вся свы́ше благода́тию Свята́го Ду́ха, возгоре́ся ду́хом, е́же прия́ти правосла́вную ве́ру. И прии́де с ним из орды́ во град Росто́в, и прия́т от архиепи́скопа Кири́лла свято́е креще́ние, и богоуго́дно подвиза́яся. И по не́колицех ле́тех, яви́шася ему́ верхо́внии апо́столи Петр и Па́вел, повелева́юще ему́ воздви́гнути це́рковь себе́. Сему́ же не име́ющу земли́, иде́же це́рковь воздви́гнути себе́. И купи́ себе́ земли́ у вели́каго кня́зя Росто́вскаго, на мно́зе зла́те и сребре́, и не доста́вшу зла́та, да́ша ему́ два мешца́ зла́та на созида́ние ме́ста того́. И воздви́же храм во и́мя верхо́вных апо́стол Петра́ и Па́вла, иде́же и до ны́не монасты́рь стои́т. И доброде́тельнаго ра́ди жития́ его́ вельми́ люби́мь бя́ше вели́ким кня́зем Росто́вским, и нареко́шася бра́тома. И дово́льно и богоуго́дно поживе́, и в глубоцей старости преста́вися к ве́чным оби́телем, в ле́то шесть ты́сящь седмь сот седмь. И положе́н бысть в це́ркви верхо́вных апо́стол Петра́ и Па́вла, иде́же сам созда́.

P.S. В некоторых прологах на 30 июня.