Стихи́:

Послужи́ зверь Гера́симу на ста́рость,

Зве́ри страсте́й уби́вшему пре́жде оше́ствия жите́йскаго.

Вели́кая сла́ва по́стником Гера́сим. Мысль боже́ственую измла́да восприи́м, стра́хом Бо́жиим себе́ огради́в и мни́шеский свяще́нный о́браз наложи́в. В ну́треннюю пусты́ню Фиваи́дскую шед и вы́шняго гра́да граждани́н быв, иде́же есть всем веселя́щимся житие́. Не я́ко вещь подаде́, я́коже похвала́ми простре́ти себе́, в до́льнем и попира́емем оте́честве хотя́ не́кто того́ похвали́ти, ниже́ у́бо хотя́ше стяжа́ти от челове́к похвалы́, но то́чию от еди́ного Бо́га. Оба́че боже́ственная му́дрствуя и Софро́ние, па́стырь быв Иерусали́мский, и трудолю́бным свои́м пче́лным собра́нием себе́ вы́ну потруди́ти хотя́ житие́ его́ со смире́нием написа́ во вре́мя, егда́ Константи́н вели́каго царя́ Ира́клия внук, нарече́нный Брада́тый, ски́петры гре́ческаго ца́рства содержа́ше.

Я́коже рещи́ о предрече́ннем и равноа́нгельнем мужи, того в пустыни бывша, толи́ко приложи́вшу по́двигу доброде́телей показа́ти и к Бо́гу присвое́ние стяжа́ти и е́же по о́бразу и по подо́бию очи́стив и сохрани́в, я́ко и ди́виими зверьми́ облада́ти. Льву бо вели́ку тому́ служи́ти прише́дшу, и вся слу́жбы подо́бныя слугу́я бя́ше. И водоно́сиваго осла́ на па́ству отводя́ и доводя́. Вождь не́когда льву на со́лнце заспа́вшу на мураве́, наше́дше купцы́ срацы́ни, похвати́ша осла́ и к вельблу́дом привяза́вше отъидо́ша. Лев же возбну́в нача́т к ве́черу тужи́ти, иски́й осла́. Слуга́ же ста́рцев, ви́де льва еди́ного прише́дша, и́де к ста́рцу и рече́: Изъя́дл есть лев осла́ и до́йде. И поноси́в ста́рец льву, осуди́ его́ во́ду носит́и на потре́бу. Лев же с терпе́нием запреще́нием прие́м и а́бие два водоно́са, овогда́ на горбе́, овогда́ нога́ма влача́ше. Толи́ко вре́мя бя́ше льву во́ду нося́щу, елико вре́мя осел с купцы́ закосне́л бя́ше. Когда́ же купце́м врати́вшимся им те́мже путе́м с ку́плею иду́щим, прилучи́ся льву тогда́ по во́ду поити́. И ви́дев позна́ осла́ с вельблу́ды иду́ща, напра́сно устреми́ся и ры́кну, я́ко ужасну́тися купце́м и бежа́ти. И за у́ду похвати́ осла́ с вельблу́ды, привя́зани друг по дру́зе, приведе́ к ста́рцу к ке́лии. И о́пашию толки́й во врата́. И отве́рз ста́рец, ви́де бы́вшее, ти́хо ускла́бися и рече́ ко ученику́: Всу́е лев на́ми поноша́емь бя́ше. Да отпуще́н бу́дет от рабо́ты, и да и́дет к пе́рвому нра́ву. Тогда́ прекло́нь главу́ лев, и поклони́ся ста́рцу, отъи́де в го́ру. И приходя́ еди́ною в неде́ли и поклоня́ся ста́рцу Гера́симу. Уме́ршу же ста́рцу, и льву по обы́чаю прише́дшу, иска́ше поклони́тися ста́рцу. И не обрета́ше того́. Нача́т рю́ти и тужи́ти. Да я́ко уве́да от мни́ха кончи́ну ста́рчу, ве́лиим пла́чем и ча́стым воздыха́нием кончи́ну ста́рчу рыда́ше. И гроб наче́н иска́ти, да я́ко ко гро́бу приведе́н быв, иде́же честно́е те́ло ста́рче лежа́ше, объюха́в о́крест, и а́бие ры́кнув вельми́ верх гро́ба, пад, и́здше. Та́ко Бог прославля́ет Того́ сла́вящих. И та́ко угото́вает, и врата́ им отверза́ет, и́же по о́бразу и по подо́бию соблюда́ющих за́поведи Его́ чи́сто же и небла́знено.

Стихи́:

И́же Па́вел, сия́ же зна́ема

Иулиани́и, с бра́том посе́чени.

Стихи́ на Кодра́та, Ака́кия и Стратони́ка:

Трие́ излия́ша кровь я́ко во́ду мно́гу,

О́ коли́ко кро́ви излия́ша Тебе́ ра́ди Христе́ от меча́!

Па́вел и Иулиани́я сестра́ его́, бе́ста от страны́ Фини́ческия, от гра́да Птолемаи́ды. Аврилиа́н же царь иска́ше христиа́н, и ну́дяше их пожре́ти и́долом, а не жру́щих го́рькими му́ками от жития́ разлуча́ше. Проше́д же Асси́рию, и прии́де в Финики́ю. Входя́щу же ему́ во град Птолемаи́ду, блаже́нный же Па́вел стоя́ше, и смотря́ше с позо́рующыми царя. И рек ко Иулиани́и сестре́ свое́й: Дерза́й и внима́й се́стро, искуше́ние бо прии́де на христиа́ны: и прекрести́ лице́ свое́. Ви́дев же его́ царь прекрести́вшася, посла́в и ят его́: и се́де на престо́ле, и вопроси́ его. Он же христиа́на себе́ нарече́. Царь же запрети́ ему́ глаго́ля: Отве́рзися Христа́, и пожри́ бого́м, да не зле у́мреши го́рькими томи́мь му́ками. Рече́ же Па́вел: Никто́же отве́ржется Христа́, христиа́н сый. Рече́ бо Госпо́дь: И́же а́ще отве́ржется Мене́ пред челове́ки, и Аз отве́ргуся его́ пред а́нгелы святы́ми. Тогда́ повеле́ царь пове́сивши его́ му́чити. Ви́девши же Иулиани́я бра́та своего́ му́чима, текши ста пред царем, и возопи́: Аврилиа́не, почто́ му́чиши брата моего? И аз бо христиа́на есмь: и прекрести́ лице́ свое́. Тогда повеле царь и ту пове́сити на дре́ве, и бити ю́ кре́пко. Утруди́вшымся же слуга́м, повеле́ сня́ти ю́ с дре́ва. И ну́дяше я́ обою́ пожрети и́долом. Небре́гшима же има повеле́ развари́ти смолу́, и влия́ти во уста́ ею́. Во́ини же Кодра́т и Ака́кий, принесо́ста смолу́ клоко́чущу, и влия́ста во уста́ ею́, и бысть я́ко вода́ студена́: и диви́стася во́ина, и ве́роваста во Христа́. И прише́дше ко Аврилиа́ну царю́ ре́ста: Несть и́ного Бо́га, ра́зве Бо́га И́же на небесе́х И́же помога́ет Па́влу и Иулиани́и. Тогда́ царь повеле́ усе́кнути я́ а́ки прельсти́вшася. И усе́чена бы́ста и та за Христа́. И повеле́ царь развари́ти о́лово с се́рою, и рече́: да ви́жу Па́вле, а́ще и́змет вас Христо́с. И влия́ша па́ки о́лово во уста́ ею́. И ссе́дшуся о́лову, о́на же неврежде́на бы́ста. Диви́вся же царь, повеле́ воврещи́ я́ в темни́цу, и гри́вне вели́це возложи́ти на вы́я их, и вери́ги на но́зе. В пе́рвую же нощь а́нгел Госпо́день вшед в темни́цу, и прикосну́ся гри́вне ею́ и вери́гам, и исцели́ я́ от ран. И па́ки повеле́ царь представити я́ пред ся, и пону́ди я́ пожре́ти и́долом. И я́ко не покори́вшимася и́ма, повеле́ усе́кнути я́ во́ину и́менем Стратони́ку. Во́ин же иды́й, слы́ша Па́вла р́адующася, и рече́ ему: О ки́их у́бо весели́шися? Он же рече́: И́мже изба́вихся земны́х, и прииму́ небе́сная ве́чная. Се бо и а́нгели ра́дуются о стра́сти мое́й. Сия́ слы́шав Стратони́к, оста́ви Па́вла, и шед к царю испове́дася христиа́н, и усе́чен бысть и той за Христа́. Повеле́ же Па́вла повеси́вши строга́ти желе́зными ногты́, Иулиани́ю же предаде́ в любодея́ние. И елико их восхоте́ша обругати́ Иулиани́ю, вси ослепо́ша: и вси припадо́ша к ней, моля́щеся, да им да́рует свет. Она́ же взе́мши во́ду, окропи́ их, и прозре́ша. И те́кше в ц́ерковь Христо́ву, поклони́шася Бо́гу сла́вяще Его, испове́дающе грехи́ своя́, и бы́ша христиа́ны. Последи́ же святы́й му́ченик Па́вел и Иулиан́ия мно́га искуше́ния мук прия́ста, и на коне́ц мече́м усе́чена быста. И та́ко сконча́стася, ме́сяца ма́рта в четве́ртый день. Прише́дше же христиа́не, взя́ше телеса́ ею́ и погребо́ша че́стно.

Рече́ не́кто от ста́рец: Ве́ру ими́те ми, ча́да, яќо вели́ка сла́ва и хвала́ царю отмещущуся ца́рства и быва́ющу мни́ху, си́речь, не ско́ро износя́щу суд на пови́нныя, но претерпева́юща Бо́га ра́ди, поне́же честне́йша суть разу́мная чу́вственных. Вели́к же срам и безче́стие мни́ху, оставля́ющу мни́шеский чин и быва́ющу царю́, ре́кше яри́тися, и суд износи́ти на пови́нныя, и не полага́юща на Бо́га упова́ния, Воздаю́щаго кому́ждо по дело́м. Ами́нь.