По шестой песни:
И поется кондак и икос (или мученичен, аще несть).Стихи́:
О́бразы гвозди́ныя Ко́нон Го́сподеви принесе́, я́ко гво́здие в ногах нося:
О́стрыми гвоздьми́ Ко́нон по нога́ма пригвожде́н в пя́тый.
Сей бя́ше во времена́ Де́кия царя́, от Назаре́та Галиле́йскаго. И дви́гся отту́де, дойде во град Магидо́н Памфили́йский и бя́ше в ме́сте нарица́емем Карме́на. Огра́ду не́которую сотвори́в и зе́лию прилежа́. И творя́ насажде́ние, и та́ко пита́яся бя́ше. Бя́ше же нра́вом препрос́т и трезв, я́ко того́ обышед́ших я́ти, целова́ти и приима́ти вседу́шно. Рече́ к ним: Де́ти, что потре́буете? Вопроша́ше вину́, они́ же реко́ша: Тебе́ тре́бует Пу́влие иге́мон, е́же отве́товати. И рече́: Ку́ю потре́бу он со мно́ю и́мать, су́щу ми христиани́ну? Да зове́т своя́ единомы́сленники и прича́стники ве́ре свое́й. Свя́зан же быв и веде́н ко иге́мону. И от него́ повеле́но ему́ бысть е́же пожре́ти и́долом. Святы́й же из глубины́ воздохну́в, иге́мона опсова́в и в ве́ре Христо́ве пребыва́ти себе́ изве́ствовав, и ника́ко рече́ поколеба́тися. Гвоздьми́ желе́зными но́зе тому́ пригво́здьше и тещи́ пред коле́сницею ну́димь, до́ндеже малоду́шествова и на коле́ну пад помоли́ся. И та́ко Бо́гу дух преда́сть.
В то́йже день па́мять преподо́бнаго отца́ на́шего Иси́хия по́стника
Той святы́й оте́ц наш Иси́хий, бе от страны́ Арме́нския, и восхоте́ бы́ти мона́х, и молча́ше. Исходя́ше же к Ми́рским страна́м, и на го́ру восходя́щу ему́ высоку́, бе́си вше́дше в два челове́ка, во Иоанна и Илариона, сре́тша вопроси́ста и, ка́мо и́деши? И уве́давша реко́ста: По́лно есть ме́сто звере́й и разбо́йников. Он же рече́ им: Аз досто́ин ся сотвори́х сме́рти, и бежа́ к сме́рти иду́. И отвеща́ста ему́, челове́ческия ли сме́рти бои́шися, а звери́ны не бои́шися? Тогда́ разуме́в бесо́вское устраше́ние, и зна́менався крестным зна́мением, отгна́ я́ от себе́. Сам же шед на ме́сто, иде́же хотяше созда́ти це́рковь ма́лу, и моли́тися в ней Богу, и ди́вен бысть на доброде́тель. И мно́га чудеса́ сотвори́в, у́спе. Мо́щи же его́ пренесены́ бы́ша, и положе́ни во Амаси́йстем гра́де.
В то́йже день страсть свята́го му́ченика друга́го Ко́нона и́же во Иса́врии
Стихи́:
Вита́еши ктому́ Самому́ Бо́гу возложе́нием,
В земли́ оста́вив свое́ те́ло, Ко́ноне о́тче.
Сей у́бо святы́й Ко́нон, бе в лета святы́х апо́стол, от села́ глаѓолемаго Вида́ния, отстоя́ща осемна́десять по́прищ от Исаври́йскаго гра́да, сын сый Не́сторов и На́дин. Во́зраста же дости́г, сочета́ся с жено́ю, и не то́кмо не прибли́жися ей, но и увеща ю́ де́вствовати: и в про́чее вре́мя пребы́сть я́ко с сестро́ю. И прии́де к ни́ма, и крести́ я́ архистрати́г Михаи́л: то́йже и ве́ре Христо́ве научи́, и чести́ в Тро́ице Еди́наго Бо́га непрело́жна. И даде́ и́ма от святы́х Та́ин, и до конца́ с ни́ма бя́ше неви́димо: и пресла́вных чуде́с де́тельство подавая. Крести́ же и роди́теля своя́. Оте́ц же его́ Не́стор, по Христе́ пострада́ти сподо́бися, зане́ идолослужи́телем противля́шеся. Святы́й же Ко́нон, к бесе́де идолослуже́бников приступи́, вопроше́нию их су́щу: кий у́бо от бого́в лу́чши есть? Ко́нон же глаго́лаше: Я́ко еди́н есть Христо́с Бог, а не ин. Они́ же творя́ху бо́ги и́долы в ня́же ве́роваша. И сотвори́ша зало́г с Ко́ноном глаго́люще: Се и́дем на ме́сто иде́же стоя́т бо́зи на́шы, и хо́щем пожре́ти им, и ты пойди́ ины́м путе́м. А́ще ли упреди́ши, сотвори́ е́же хо́щеши. А́ще ли от нас вари́т тя кто, и тогда́ уразуме́еши. Они́ же на ко́нех, а Ко́нон пешь вари́в си сокруши́ и́долы. Оста́вив еди́наго, возврати́вся же сре́те кумирослужи́тели, и чуди́шася вси приклю́чшиися ту. Е́ллини же безсту́дни су́ще, помоли́шася оста́вльшему ка́пищу, и́щуще уве́дати кто есть Бог бо́лий. И по повеле́нию свята́го, бе́су изше́дшу и ре́кшу: Христо́с Бог Ко́ноном пропове́даемый. Тогда́ возопи́ наро́д: Еди́н Бог Ко́нонов преодоле́, и ве́роваша Христо́ви. Таковы́й же глаго́л и до ны́нешняго дне иса́вряне глаго́лют: в па́мять свята́го Ко́нона. Прия́т же над бе́сы о́бласть, о́вы устро́и де́лати на селе́ и плоды́ сохраня́ти, о́вы же в корча́зех заключи́, и запеча́тав погребе́ под основа́нием своего́ до́му. И по уме́ртвии его́, до́му его́ на це́рковь устро́ену. Копа́ющии же основа́ние це́ркве, обрето́ша сосу́д скуде́льный, и мне́вше зла́то. Сокруши́вше еди́н сосу́д: и изыдо́ша бе́си в виде́нии о́гненне, и вси устраши́шася, я́ко не мощи́ прейти́ из до́му по захожде́нии со́лнца, до́ндеже помо́лятся свято́му Ко́нону, и па́ки исчеза́ху. О́браз же муче́ния его́ си́цев бысть: иге́мону Магдо́ну прише́дшу, ят бысть, и Христа́ испове́да, и не покори́вся пожре́ти и́долом, св́язан бысть и бие́н вельми́. И сте́кшеся люде́й мно́жество, да убию́т иге́мона, и сей отбежа́. Пое́мше же Ко́нона, и кровь его́ оте́рше е́юже бе пома́зан, во свое́м дому́ устро́иша его́. И пото́м два ле́та пожи́в, к Бо́гу отъи́де, Его́же возлюби́.