Стихи́:

Злочести́вых ве́ру бесе́дами потреби́в,

Посе́чен быв Кодра́те, свое́ю кро́вию омы́вся:

Зна́емыми Ане́кт обои́ми убие́н бысть мече́м,

Во е́же и Ане́кт Бо́га ра́ди умры́й:

Ви́дев Криске́нта уме́рша мече́м,

Тщи́тся с ним Киприа́н умре́ти:

В деся́тый Кондра́та мечь умори́.

В ца́рство Де́киево, гоне́нию подви́гшуся, и христиа́не е́млеми быва́ху и закала́еми. О́ви же бе́гаху кры́ющеся в гора́х до вре́мене. Бежа́вши же ма́ти Кодра́това от гра́да Кори́нфа, и ше́дши в гору́ кры́яшеся, зане́же бе непра́здна. И роди́ же сы́на, и нарече́ и́мя ему́ Кодра́т. И посе́м ма́ло пожи́вши Руфи́на у́мре, та́ко бо бе и́мя ей, оста́вльши сы́на младе́нца: и той бе пита́емь от о́блак состоя́щихся над ним, и во́ду снося́щих. И мимоше́дшу вре́мени, позна́ша его́ нецыи уже ю́ношею суща, и прихожда́ху к нему́: от ни́хже бя́ше Киприа́н, и Диони́сий, и Ане́кт, и Па́вел, и Криске́нт, и предхожда́ше пред вс́еми святы́й Кодра́т, и уча́ше я́ ве́ре Христо́ве. По не́коем же вре́мени от идолослужи́тель оклевета́ни бы́ша кня́зю, и я́ти бы́ша, и приведе́ни в Кори́нф, и му́чени бы́ша кре́пко, и до конца́ Христа́ испове́даху кре́пко. И усе́чени бы́ша главы́ их за Христа́ И́стиннаго Бо́га на́шего.

Глаго́лаху не́цыи о Ма́рце мона́се Еги́петстем, я́ко бысть три́десять лет не исходя́ из ке́ллии своея́. Имя́ше же обы́чай презви́тер приходи́ти к нему́. И соверши́в святу́ю слу́жбу, подаваше ему святы́х Та́ин. Диа́вол же взави́де доброде́тели его́ и терпе́нию, восхоте́ во осужде́нии искуси́ти его́. И приведе к нему́ му́жа дух лука́вый иму́ща, вино́ю моли́тву прия́ти. Науче́ный же диа́волом пре́жде всего́ глаго́лаше ста́рцу: презви́тер твой полк есть вся́кого смра́да греховнаго, и уже́ не даждь ему́ вни́ти к себе́. Богодухнове́нный же мужь Ма́рко рече́ к нему́: ча́до, вси лю́дие скве́рну вон изме́щут, ты же ко мне прине́сл еси́. А пи́сано есть: Не суди́те, да не осужде́ни бу́дете. Оба́че а́ще и гре́шен есть, но Бог спасе́т и́. Пи́шетбося: Моли́теся друг за дру́га, да исцеле́ете. И се рек сотвори́ моли́тву, и отгна́ бе́са от челове́ка, и отпусти́ его́ здра́ва. И я́ко прии́де презви́тер, и прия́т его́ ста́рец с ра́достию. Благи́й же Бог ви́дев беззло́бие ста́рчо, и показа́ ему́ зна́мение. Хотя́щу бо презви́теру ста́ти пред свято́ю Трапе́зою, и виде ста́рец а́нгела Госпо́дня с небесе́ сше́дша, и положи́вша руку свою́ на главу́ презви́теру. И а́бие бысть презви́тер весь я́ко столп о́гнен. Мне же рече, чудя́щуся о виде́нии. И слы́шах глас глаго́лющь ко мне. О́ челове́че, что чуди́шися о ве́щи сей? А́ще бо и земны́й царь не оста́вит вельмо́жам свои́м скве́рным ста́ти пред собо́ю, а́ще не с чи́стою со́вестию, и сла́вою мно́гою, кольми́ па́че небе́сный Царь, не очи́стит ли слуг святы́х Та́ин, стоя́щих пред престо́лом Его́, и сла́вою небе́сною освети́т. Сие́ у́бо преподо́бный Ма́рко ви́дев, и всем пропове́дав, да иере́я не осужда́ют о вся́ком гресе́, поне́же предста́тели суть Бо́жии, и а́нгелом сожи́тельницы.

Во дни Уистиниа́на вели́каго царя́, бя́ше не́кая жена́ в Византи́и, Анастаси́я име́нем, благочести́ва и боя́щися Бо́га, от благоро́дных и бога́тых роди́телей. И та пе́рвая патрики́я бы́вши царе́ва, и страх Бо́жий в себе́ иму́щи, хожда́ше по за́поведех Бо́жиих, имя́ше есте́ственое добродея́ние, и мно́гую кро́тость, я́коже всем ревнова́ти доброде́телем ея́, оба́че и тому самому́ царю́. Но елма́ пле́велом все́ятель, и до́брым завистник, и́же и вы́ну всажда́я и не оставля́я ра́товати челове́ческий род, за́вистию не́нависть наведе́ к цари́це на Анастаси́ю. И уве́девши Анастаси́я за́висть от кого́ есть, е́йже пои́стинне по Бо́зе сопребыва́ющи, и рече́ в себе: О́ Анастаси́е, вре́менней и и́стинней прит́чи прише́дши, спаси сама ду́шу твою́, и цари́цыну, и бежи́: и́маши бо преложи́ти безслове́сную не́нависть, себе́ же исходатаиши небе́сное Ца́рство. И я́ко такова́я в себе́ умы́сливши, искупи́вши кора́бль, и взе́мши от своего́ бога́тства часть не́кую, про́чая же вся оста́вльши, и отъи́де во Александри́ю. И созда́вши монасты́рь, тка́ше кружи́ла та́мо седя́щи. И боже́ственая словеса́ на язы́це иму́щи, и Бо́гу угоди́ти тща́щися. Да́же и додне́сь оби́тель ея́ спаса́ема и изоби́льствующи, и патрики́йское и́мя на себе́ иму́щи. По не́ких же вре́менех преше́дши цари́цы от жития́ сего́, помяну́ царь о патрики́и, посла́в повсю́ду со мно́гим испыта́нием ища́ ону. Сие́ же уве́девши и́стинная а́гница Бо́жия Анастаси́я, но́щию оста́вльши свой монасты́рь, отъи́де ко а́вве Дании́лу. И сказа́вши о всем свято́му ста́рцу. Сей же облече́ о́ну во оде́жду му́жескую, именова́в ю́ Анаста́сий ка́женик, и введе́ ю́ в верте́п дале́че от своея́ ла́вры, и затвори́ ю́ та́мо, пода́в ей пра́вила покая́ния. И повеле́ ей ника́коже из верте́па изходи́ти, и никому́же весма́ к ней входи́ти. Вообрази́ же еди́ному бра́ту приноси́ти ей еди́ною в неде́ли хлеб, и воды́ скуде́льник, и полага́ти пред верте́пом вне, и взима́ти моли́тву и отходи́ти. Та́мо у́бо тверде́йшая о́на и святе́йшая душа́, несумне́нно соверши́в два́десять и осмь лет, храня́ше пра́вило непоткнове́нно и неразло́жно ста́рчо. Кий убо ум или язы́к в два́десяти и осми́ ле́тех е́же к Бо́гу доброде́тели ея́ доуме́ется испове́дати, или́ Писа́нию преда́ти, е́же та́я еди́на собо́ю вы́ну к Бо́гу приноша́ше, сле́зы, воздыха́ния, бде́ния, пе́ния, моли́твы, чте́ния, стоя́ния, коленопреклоне́ния, на земли́ лега́ния, скудоту́ и пост? К сим же по сих и бесо́вская сплете́ния и напа́дания, теле́сныя сла́сти, и лука́вая воспомина́ния, и сих прекосраже́ния. К сим же ей бы́ти о всех небоя́зниве, я́же по вся дни толи́кими ле́ты жена́ боля́рыня, и в ца́рская вы́ну обы́кнувши, со мно́жеством муже́й же и жен воспита́вшися, ужаса́ет всяк ум и по́мысл. С си́ми все́ми подвиза́вшися, бысть сосу́д Свята́го Ду́ха. Проуве́девше е́же к Бо́гу свое́ отше́ствие, написа́ на зде ста́рцу глаго́лющи: Честны́й о́тче, пойми́ с собо́ю со тща́нием принося́щаго во́ду ученика́, и до унарече́ннаго бре́га к погребе́нию прииди́, да погребе́ши ча́до свое́ Анаста́сия скопца́: сия́ я́ко написа́вши, положи́ извну́ пред врат верте́па. Ста́рец же нощны́м виде́нием изве́стен быв, рече́ ко ученику́: потщи́ся ча́до к верте́пу, иде́же есть брат наш Анаста́сий скопе́ц, и погля́дай пред враты́ столпа́, и обрести́ и́маши зод напи́сан, и того́ взем, со мно́гим тщанием обрати́ся к нам. О́но му́жу ше́дшу, и прине́сшу. И проче́т ста́рец, прослези́ся: И посе́м со тща́нием с бра́том с потре́бами по́йде. И отве́рзше верте́п, обрето́ша ка́женика огне́м содержи́ма. И припа́д на пе́рсех ея́ ста́рец пла́ка глаго́ля: Блаже́н еси́ Анаста́сие, я́ко сего́ ра́ди дне вы́ну пеки́йся, преоби́дел еси́ земна́го царя́. Она́ же: блаже́н еси́ рече́ но́вый Авраа́ме. И рече́ ста́рец: сотвори́ моли́тву. Она́ же изрече́: Честны́й ста́рче па́че потре́бу моли́твам и́мам в час сей. И глаго́ла ста́рец: А́ще предвари́л бых аз, име́л бых е́же помоли́ти Бо́га. Она́ же се́дши на рого́зине, облобыза́ главу́ ста́рчу, и благослови́вши его́. И пое́м ста́рец ученика́ своего́, ве́рже его́ к нога́ма ея́ глаго́ля: Благослови́ ча́до свое́ ученика́ моего́. Она́ же рече́: Бо́же оте́ц мои́х предстоя́й ми в час сей, е́же разлучи́ти мене́ от се́го телесе́: ве́дый в верте́пе стопы́ моя́: и́мене твоего́ ра́ди, и моея́ ра́ди не́мощи и окая́нства, ты упоко́й дух отца́ на нем, я́коже препочи́ дух Илии́н на Елиссе́и. И обрати́вся скопе́ц к ста́рцу рече́: Го́спода ра́ди о́тче, да не совлече́та мене́ и́миже есмь оде́яна, и никто́же да узна́ет я́же о мне. И причасти́вшися святы́м Тайнам, рече́: Дади́та ми о Христе́ любовь, и помоли́тася о мне. И воззре́вши к восто́ку, и просия́ лице́ ея я́ко огнь. И сотво́рши зна́мение кре́стное, рече́: Го́споди в ру́це твои́ предаю́ дух мой. И се ре́кши предаде́ дух. Ископа́ста же гроб пред верте́пом, и совлек ста́рец к себе́ ря́су, ю́же ноша́ше, рече́ ученику: облецы́ бра́та ча́до. Облача́я же о́ну яви́шася сосцы́ ея́, я́коже ли́ствие су́хо, и ника́ко о том ста́рцу пове́да. По погребе́нии же иду́щыма и́ма во своя́, рече́ учени́к: Позна́х о́тче, я́ко ка́женик жена́ бя́ше. Ста́рец же отвеща́: Вем и аз ча́до: но сего́ ра́ди в му́жескую оде́жду одеях ю́, и Анаста́сия скопца́ нареко́х ю́ нахожде́ния ра́ди, да не прочу́ется повсю́ду. Мно́го бо взыска́ние бысть от царя́ по всех страна́х, па́че же в страна́х сих. Но се благодат́ию Бо́жиею сохранена́ бысть на́ми. И тогда́ испове́да ста́рец ученику́ пото́нку житие́ ея́.

Богоно́сный Игна́тий повелева́ет, глаго́ля: Епи́скопом внима́йте, да и Бо́г ва́ша душа́ прии́мет и спасе́т повину́ющимся епи́скопом и свяще́нником и служи́телем всем, и часть им бу́дет о Бо́зе. И па́ки по́слух ми, сего́ ра́ди у́зы прия́х, я́ко от уст челове́чь не разуме́х. Дух пропове́дает ми си́це, глаго́ля: Без епи́скопа не твори́те ничто́же. Подоба́ет у́бо без епи́скопа твори́ти ничто́же нам. Иде́же бо а́ще яви́тся епи́скоп, ту и мно́жество благосты́нь бу́дет. Иде́же бо нарица́ется Христо́с, ту и собо́рная Це́ркви схо́дится. Но иде́же хотя́т пасу́т ове́ц стада́, но иде́же и пастуси́ снабдя́т. Кроме́ же ста́да и пастуха́ оста́вшая, расхи́тят зве́рие и пи́щу себе́ творя́т в них. Неподо́бно у́бо есть без святи́теля, ни крести́ти, ни лю́бие твори́ти. Се Бого́ви благоуго́дно есть, е́же бо святи́теля чести́т, то от Бо́га почте́н бу́дет. А и́же без епи́скопа что твори́ти ну́жно есть, повинова́тися попо́м, а́ки апо́столом Христо́вым, наде́ждею на́шею да ви́дими и́ми обря́щемся. Подоба́ет же и диа́коном, ре́кше служи́телем Та́ин Христо́вых, по всему́ всем угажда́ти. Не бра́шну у́бо, ни питию́ суть служи́тели, но Бо́жиям слу́жат це́рквам. Подо́бно у́бо рече́ние их храни́ти я́ко огнь. Та́коже вси почту́т служи́теля я́ко отца́, а епи́скопа я́ко Самого́ Христа́, попы́ же ‐ я́ко престо́льники апо́стол и супру́ги апо́столом, без сих бо Це́ркви не нарица́ется. Послу́шествует бо сему́ словеси́ зако́н храня́й. Вся ели́ко а́ще рече́т ти свяще́нник, сотвори́: не уклони́ся ни на ле́во, ни на де́сно о глаго́лемых. Челове́к бо а́ще сотвори́т презре́ние е́же не послу́шати свяще́нника, досто́ин есть сме́рти. Рече́ же проро́к Малахи́я: «Устну́ свяще́нническу сохрани́, глаго́лы ра́зума и зако́на взы́ти от уст его́, зане́ ве́стник есть Бо́га Вседержи́теля, в ми́ре исправля́я ходи́ и мно́го обрати́ от непра́вды». И ин рече́: «Все́ю душе́ю свое́ю благоче́ствуй Го́спода. И свяще́нником Его́ честь возда́й, и все́ю си́лою свое́ю возлюби́ Сотво́ршаго тя и слуг Его́ не оста́ви. Бо́йся Бо́га, сла́ви свяще́нника». И па́ки рече́ зако́н: «Си́и освяще́ни суть Бо́гом, же́ртвы бо и да́ры Бо́гу своему́ прино́сят и свя́ти суть». И па́ки рече́ ко Ааро́ну: «Глаго́ли ты к служа́щим Мне в хра́ме сведе́ния, и ти́и прии́мут грехи́ свои́х люде́й и от име́ния их левги́том, я́ко мзда ва́ша за слу́жбу ва́шу». Иса́ия же рече́: «Вы же свяще́нницы нарече́теся Госпо́дни, слуги́ Бо́жия». Иереми́я: «Возвели́чу, напо́ю ду́шу свяще́нническу». Та́коже и Дави́д: «Иере́и Твои́ облеку́тся в пра́вду, и преподо́бнии Его́ ра́дуются ра́достию». И Па́вел: «Всяк, рече́, старе́йшина свяще́нническ, на приноше́ние даро́в и жертв сотворе́н.., и́же о́бразом и сте́нем слу́жат небе́сным». Но и та бо́льша улучи́ слу́жбу, я́же и бо́льша заве́та, приво́дит, глаго́ля: «Мо́лим же вы бра́тие ви́дети тружда́ющая вас и сотвори́ти любо́вь к ним». Ле́по у́бо есть возлю́бленнии, а́ки дру́ги Бо́жия чести́ свяще́нники, я́же избра́ Госпо́дь и просла́ви. Ну́жда бо челове́ком до́лги возда́ти им, не о себе́ бо кто прие́млет честь, но зва́нный от Бо́га. Несть, рече́но, ны́не, ни пре́жде свяще́ннику проти́витися. Противля́ющии бо ся суд себе́ прие́млет. Пи́сано бо есть: «Старе́йшине люде́й свои́х да не рече́ши зла». Госпо́дь, вели́кий старе́йшина свяще́нническ, прие́мляй вас, рече́, Мене́ прие́млет, а прие́мляй Мене́, прие́млет Посла́вшаго Мя. А прие́мляй проро́ка во и́мя проро́че, мзду проро́чу прии́мет. А прие́мляй пра́ведника во и́мя пра́ведниче, мзду пра́ведничу прии́мет. Ами́нь.