Стихи́:

Дорофе́й: поне́ би́ен есмь, рече́,

Но не дости́жу страсте́м Христа́ моего́:

В пя́тый Дорофе́ю те́ло ура́нено истухи́не.

Дорофе́й при́сно воспомина́емый, епи́скоп быв гра́да Ти́рскаго, вся́кое писа́ние кни́жное проше́д. Бя́ше же побе́гнул гоне́ния ра́ди. По сконча́нии же Диоклитиа́нове до́йде па́ки в Тир, пасы́й Бо́жию Це́рковь, да́же до Иулиа́на престу́пника. И зане́же не я́ве, но сокрове́нне, испе́рва боля́р ра́ди свои́х, убива́ше Иулиа́н христиа́ны. Слы́шав же святы́й Дорофе́й, отъи́де от Ти́ра и до́йде во Фраки́ю: но и та́ко от идолослужи́тель не угонзе́, ят же быв от князе́й Иулиа́новых, и мно́га муче́ния претерпе́в, стар сый стом бо и седми́м ле́том быв. В тех му́ках Христо́ва ра́ди испове́дания, блаже́нную свою́ ду́шу предаде́ Бо́гови. И мно́га душеполе́зная писа́ния изложи́в пе́рвие, и изоста́вив.

Стихи́:

Зна́мения творя́ Ану́вие по сме́рти,

Живы́м я́ко и жив да́же и до днесь показу́ет.

Стихи́:

Еще́ и чудоде́йствуемь Аната́ль жив бя́ше неди́вно,

Не чудотво́рец пото́м, но то́чию прост.

Стихи́:

Доброде́телем свети́ло вели́каго Фо́ту,

Мертв блиста́ние всем подае́т

Стихи́:

А́лчут и жа́ждут страда́льцы де́сять,

Пи́щу сим Бог подае́т несконча́емую.

Маркиа́н и Ника́ндр Христо́ва му́ченика с дружи́ною свое́ю, бе́ста от страны́ еги́петския. Испове́дания же ра́ди я́же во Христа́ я́та бы́ста кня́зем, и ну́́жена быста отврещи́ся Христа́, и поклони́тися и́долом, и не покори́стася. И пе́рвое бие́на бы́ста зело́. И ре́бра ею́ свеща́ми подожго́ша. И пове́сивше строга́ша я ногты́ желе́зными, до́ньдеже плоть ею́ отпаде́ на зе́млю. Посе́м затворе́на бы́ста в темни́це е́ле жи́ва су́ща. И ту яви́ся и́ма а́нгел Госпо́день и исцели́ их. И по мно́зех днех изыдо́ста из темни́цы здра́ва. И па́ки предста́ста пред суди́щем кня́зю, и мно́ги от неве́рных чуде́с ра́ди обрати́ста к Бо́гу. И па́ки предана́ бы́ста в темни́цу, и гла́дом и жа́ждею страда́вша, и ту сконча́стася.

Преподо́бный оте́ц нашь Фео́дор, от ю́ности бе скопе́ц, оста́ви же мир, и бысть мних. И посе́м и́де в пусты́ню иорда́нову, и мно́го потружа́вся на доброде́тель. Тем прия́т от Бо́́га дар чудотворения. И се ему́ ну́жа бысть изы́ти в Константи́нь град не́кия ра́ди потре́бы, и вле́зшу ему́ в кора́бль, и заблуди́вшу кораблю́ в пучи́не морсте́й, и скудота́ бысть воде́, и во мно́зе уны́нии и недоуме́нии бя́ху кора́бленицы и вса́дницы. Воста́в же Фео́дор, ру́це возде́в на не́бо к Бо́гу спаса́ющему душя́ на́шя от сме́рти, и сотвори́ моли́тву, и прекрести́ во́ду зна́мением кре́стным, и глаго́ла кора́блеником, благослове́н Бог, почерпи́те воды́ ели́ко вы есть тре́бе. И напо́лниша вся сосу́ды своя́ от мо́ря сла́дкия воды́, и вси просла́виша Бо́га. И поклони́шася ста́рцу до земли́, о́нже рече́, прости́те мя госпо́дие мои́. Не мене́ бо де́ля бысть се, но вас ра́ди скорбя́щих воды́ де́ля. И и́на сотвори́ чудеса́, и преста́вися к Бо́гу.

Внемли́те себе́ изве́стно о глаго́лемых. Казни́те де́ти своя́ и́змлада. Глаго́лет бо прему́дрость, любя́й сы́на своего́, жезла́ на нем не щади́, казни́ его́ от ю́ности, да на ста́рость твою́ поко́ит тя. А́щели и́змлада не нака́жеши его́, то ожесточа́в не повине́т ти ся. Глаго́лет бо в четве́ртых ца́рствах си́це. Бысть не́кто свяще́нник во Иеросали́ме и́менем Илия́, смире́н и кро́ток, уго́дник Бо́жий на вся́ко де́ло бла́го. Сий же бе двою́ отроча́ту оте́ц. И водя́ ею́ на зло ше́ствующа, и не казня́ше их, ни возбраня́ше им ни уча́ше боя́тися Бо́га, и ка́зни не нанесе́ де́тем свои́м жезло́м, но во́лю им бя́ше вдал. Они́ же в бу́ести и в ненаказа́нии все зло́е творя́ста. И рече́ Бог Илии́ отцу́ их, поне́же не казни́л еси́ сы́на своя́ до́бре. Ны́не да у́мрета сы́на твоя́ мече́м. И ты сам, и весь дом твой поги́бнет сы́ну твое́ю де́ля, поне́же не наказа́л еси́ я до́бре боя́тися. А́ще бо и мно́го лет свяще́нствова во Изра́или, и богоуго́дно поживе́, но поне́же детми́ не печа́ловлся с прилежа́нием, того́ ра́ди зле поги́бе. Слы́шасте ли бра́тие словеса́ сия́, я́ко Илии́ та́ко сотвори́л Бог в ве́тсем зако́не, да что подъи́мем мы в но́вем су́ще зако́не, не уча́ще дете́й свои́х на добро́. О сем и Иоа́нн Златоу́стый глаго́лет. И́же дете́й свои́х целому́дрию не наказу́ет, той горе́е разбо́йник осу́дится. Разбо́йник бо те́ло сме́рти предае́т, а он ду́шу. Но вы бра́тие и ча́да люби́мая, учи́те де́ти своя́ и́змлада всему́ Бо́жию зако́ну и добру́ нра́ву, да страх Госпо́день прие́мше не опеча́лят вы на ста́рость ва́шу. А́щели не послу́шают тебе́ де́ти твои́, то не щади́ на них лозы́, я́коже прему́дрость Бо́жия глаго́лет. До шести́ ран, или́ до двуна́десяте ран да́си сы́ну. А́ще ли вели́ка вина́, и ты два́десят ран да́си. Бра́тие наказу́йте де́ти своя́ Бо́га боя́тися, а злых дел оста́тися, да не зле поги́бнете. Иере́и же наказу́йте де́ти своя́ духо́вныя, епитемия́ми свя́зывающе. А́щели зде вы не связу́ете, то ждут вас неразреши́мыя у́зы. Роди́мыя же де́ти своя́ учи́те наказу́юще не сло́вом то́чию, но и ра́нами, да не прии́мете за них ны́не от челове́к сра́ма, а в бу́дущий век муче́ния с ни́ми. Се же не еди́нем попо́м, но и всем христия́ном, да наказу́ют де́ти своя́ до́бре.

Бра́тие убои́мся сме́рти и ужасне́мся. Убои́мся же и родства́ о́гненаго, я́ко ве́чен есть. Убои́мся огня́, я́ко негаси́мь есть. Убои́мся грозы́, я́ко не прелага́ется в теплоту́. Убои́мся тмы, я́ко не прелага́ется в свет. Убои́мся че́рьвий, я́ко безсме́ртен есть. Убои́мся а́нгел и́же над судо́м, я́ко безми́лостиви суть. «Го́ре мне, я́ко Тебе́ Го́споди вопию́щу, не послу́шах глаго́люща ми. Душе́ отста́ни от вся́кого скверне́ния, и вся́ческих веще́й я́ко суть ме́рзска. Го́ре мне, я́ко храм Твой оскверни́х, и Святы́й Дух оскорби́х. Бо́же пра́ведна дела́ Твоя́ и суды́, за мал грех пи́щи ра́йския, и Ца́рствия небе́снаго разлуча́юся, и не умира́я му́чуся. За пло́тныя сла́сти огне́ви предаю́ся. Пра́ведный суд Госпо́день, уча́ху мя, и не послу́шах. Послу́шествоваху ми, аз же руга́хся», - та́ко на́чнеши глаго́лати.

А́ще ключи́т ти ся пре́жде покая́ния исто́ргнутися, челове́че, или́ гее́нны убо́йся, или́ к Ца́рству потщи́ся. Бра́тие, ничто́же пре́жде чти́те ра́зве непрезри́мыя любве́. Мно́го бо согреша́ем по вся дни и времена́ и часы́ и но́щи, да сего́ ра́ди любо́вь име́ем. Сия́ бо покрыва́ет мно́жество грехо́в. Кий успе́х ча́да, а́ще весь мир прии́мем, а спаса́ющия любве́ не и́мам[ы]? Кий успе́х, а́ще кто обе́д вели́к сотвори́т, и убеди́т царя́ или́ кня́зя, и все пригото́вит мно́го ели́коже тре́бует, а со́ли не и́мать, еда́ мо́жется я́сти обе́д той? Не то́же еди́но е́же бу́дет изгото́вил своя́ блага́я, но сам ся обря́щет посра́млен от зва́ных. Та́ко и зде бра́тие моя́, кий успе́х толи́ко труди́тися в ветр без любве́? Без любви́ бо вся́ко де́ло нечи́сто. А́ще кто и́мать де́вство, или́ поще́ние, или́ бо́дрость, или́ моли́тву, или́ странноприя́тие, или́ дар прино́сит Бо́гу и плоды́ своя́ Це́ркви: или́ и́но что твори́т без любве́, все нивочто́же явля́ется пред Бо́гом, не тре́бует бо их. Не мы́сли без любве́ ничто́же твори́ти никогда́же. А́щели рече́ши: «Не хощу́ с бра́том мои́м смири́тися, но Христа́ люблю́», - обря́щешися ложь, облича́ет бо тя Иоа́нн апо́стол: «Кончи́на бо зако́ну любы́».

О́ле си́ла любве́ непобеди́мыя! О́ле си́ла любве́ безчи́сленыя! Ничто́же несть любве́ бо́ле, ни на небеси́, ни на земли́. Сия́ свята́я любы́ есть глава́ добродея́ния. Любы́ есть зна́мение к сему́ добродея́нию. Любы́ есть соль вся́кому. Любы́ не превозно́сится. Любы́ есть кончи́на зако́ну. Сия́ всели́ся в се́рдце А́велево. Сия́ патриа́рхом помога́ше, те́мже сию́ храня́т. Сия́ в проро́ки всели́ся. Сия́ Дави́да дом сотвори́ Свято́му Ду́ху. Сия́ у́бо И́ова укрепи́. Что же глаго́лю вя́щше? Сия́ Сы́на Бо́жия с небесе́ к нам сведе́. Любве́ ра́ди все до́брое яви́ся. Сею́ бо смерть умертви́ся, и ад плени́ся, и Ада́м обнови́ся. Любве́ ра́ди Ца́рство небе́сное пропове́дася. Сия́ пусты́ни яви́ я́ко гра́ды. Сия́ рыбаря́ уму́дри. Сия́ го́ры и верте́пы испо́лни пе́сньми. Сия́ научи́ му́жи и жены́ те́сным и ско́рбным путе́м ходи́ти. Но доко́ле не оста́влю любо́внаго словесе́? А́нгели бо не мо́гут испове́дати я́же о любви́ суть, исправле́нии блаже́нных. Любы́ - приноси́тель всему́ добру́ де́лу. Блаже́н челове́к и́же и́стинную нелицеме́рну любо́вь изобре́т. Я́коже глаго́ла Влады́ка: «Я́ко бо́льши сея́ любве́ никто́же и́мать, да кто ду́шу свою́ преда́ст за и́скренняго своего́». Сию́ любо́вь имы́й Па́вел апо́стол глаго́лаше: «Любы́ бли́жнему зла не твори́т». Не возда́й же никому́ же зла за зло, ни клеветы́ за клевету́. Сию́ же любо́вь изобре́т ни еди́ного же не пре́зри, ни зави́ди, ни ропщи́, ни ненави́ди бра́та своего́ никогда́ же. Не то́кмо тех люби́ и́же тя лю́бят, но и ненави́дящыя тя люби́. Сию́ святу́ю любо́вь имы́й первому́ченик Стефа́н, за ты́я и́же бия́ху и́ ка́мением, моля́ше Бо́га глаго́ля: «Го́споди, не поста́ви им греха́ сего́». Блаже́н челове́к, и́же пре́жде всего́ изобря́щет ю́. Сему́ мзда на всяк день расте́т. Сему́ вене́ц угото́вися. Сего́ вси а́нгели блажа́т. От сего́ Бог не отлуча́ется никогда́же. Бог любы́ есть, да и́же живе́т в любви́, в Бо́зе живе́т, и Бог в нем. И любо́вию все есть. Бо́гу на́шему сла́ва ны́не и при́сно и во ве́ки веко́в. Ами́нь.

А́ще челове́че на уме́ свое́м име́еши скорбь, о гресе́ свое́м и наложи́ и на себя́. Страх Бо́жий. Помяни́ и ве́чную му́ку, и одоле́еши вся́ку непра́вду, я́ко несть труда́ оста́вити гнев опеча́лившему тя. Ка́я боле́знь зла́я моли́тися и проси́тии тмы и благы́х, со усе́рдием даю́щему Бо́гу. Ка́я боле́знь зла не рещ́и и нико́му же. Ка́я спо́на отврещи́и. Ре́вность и за́весть кый труд есть. Е́же люби́ти бли́жнаго. Ка́я страсть не веща́ти страмны́х слове́с. Ни клеветы́ и не досажа́ти. Ка́я беда́ не кля́тися. Ка́я спо́на поми́ловати и. А́ще ли а́лчешии и покаже́ любо́в. До́брая де́ла. А́ще ви́диши убо́гаго и ты поми́луй. А́щели и́маеши вражду́ с кем, и ты сми́рися. А́щели ви́деши и друѓа до́бро успе́юща и ты не зави́ди ему. А́ще ли ви́деше жену́ доброли́чну и красото́ю сея́юще, и ты не здри́и ея́ да не уста́ а́лчут ти́и. То́мко о́ко и слух но́зе и ру́це. И вси у́дове те́ла твоего́ трепе́щут еще́ бра́тия глаго́лю вам. Я́ко не пыта́емое есть челове́ку ми́лостивное ме́сто но о́браз. Ереме́я у́бо проро́к в про́пастех и бых и Бо́га умоли́в. Дани́л проро́к во рве с лвы и пребы́в, и Бо́га призва́. Три́и о́трокы и в пещи́ и Бо́га призва́шя. И́ев на гно́ище седя́й наг и Бо́га ви́де. Моиси́й на мо́ре быв и глаго́ла ему́ Бо́га. Что вопия́ше и ко Мне. Разбо́йник на кресте́ быв и рай отве́рзе. Да и ты у́бо где челове́че на пу́ти ли и еси́ или́ на торгу́. Или́ на ко́ем ме́сте или́ во хра́ме. И ты моли́ся челове́че Бо́гу в чистоте́ све́стии. И Бог послу́шаеть тебе́. Того́ бо есть земля́ и конце́ ея́. И на вся́ком ме́сте влады́чествия Его́. Бо́гу на́шему сла́ва и ны́не и при́сно и во ве́ки веко́в.

Слы́шите люби́мцы ка́ко тии сам Госпо́дь дав зако́н отмета́ет, а ин дае́т лу́чий. Но не разуме́ша они́, ни по пе́рвый држа́щеся ни того́ сохрани́ша до́бре ни но́вы я́шеся?, о не́мже бы́ша спасе́ни бы́ли. Та́ко ти и мы не мо́жем ся оста́ти но́рова того́ пусто́шнаго, е́же кла́нятися тва́ри но то́го же де́ля дано́ им бы́ло неде́лята написа́вше да на том чу́вше Христо́во воскресе́ние познаю́ть. И в той день на́чнуть нико́егоже зла твори́ти. И сирота́м на́чнут поко́й дая́ти, и а́ще во ины́ дни что зло творя́ть, да в той день прихо́дять во це́рьковь и мо́лятся о гресе́х свои́х, ча́юще от Го́спода проще́ния, и кла́няющеся воскресе́нию Христо́ву а не день и неде́ли. И в писа́нии бо не глаго́лет кла́нятися неде́ли но си́це Христо́ву воскресе́нью кла́няющеся не преста́ем. Та бо спасло́ ны есть от безако́нний на́ших. Святы́й Госпо́дь Иису́с явле́й воскресе́ние. То того́ дни не бы́ло ли пре́же воскресе́ния Христо́ва. Неде́ли тое́(е)й. Бы́ло есть день той, но ни нарица́лся неде́ля. Но по воскресе́ние Христо́ве нарече́н неде́ля, зане́же не де́лають в не крестья́не самому́ бо Христу́ и́мя воскресе́ние. Сам бо рече́ Госпо́дь аз есмь воскресе́ние и живо́т. И свет всему́ ми́ру. Ходя́й по Мне не и́мать ходи́ти во тме. И па́ки прииде́те вси ве́рнии поклони́мся свято́му воскресе́нию, то ти не неде́ли рече́ поклони́теся тва́ри дневьне́й, и се бо при́де Креста́ ра́ди ра́дость, то ти не неде́ли ра́ди прии́де ра́дость. И всегда́ Го́спода святи́м то ти не неде́ли пра́здновати но Христа́ ра́ди пра́здновати в той день. Распя́т не бо пострада́ и кресто́м смерть раздруши́ то ти не неде́лею но воскресе́нием свои́м. Крест бо нарица́ется воскресе́ние цено́ю бо ку́плен и есть?? Цена́ бо есть крест и кровь кровь Христо́ва. Глаго́леть бо писа́ние кресту́ Твоему́ поклоня́емся Влады́ко и свято́е воскресе́ние Твое́ сла́вим.