Стихи́:

Я́ко безсе́менно ви́де сыноутро́бие,

Престро́ган быв, ви́де сынооте́чествие.

Иса́ия бе от Иеросали́ма. У́мре же от Манаси́и, прегре́н пило́ю на́полы. И положе́н бысть под ду́бом Роги́лем, близ водоте́чи, ю́же погуби́ Иезеки́я царь погре́б ю. Бог же зна́мение силоа́мско сотвори́ проро́ка де́ля, я́ко пре́жде уме́ртвия изнемо́гл, помоли́ся воды́ пи́ти, и а́бие по́слано ему́ бысть от нея́. Сего́ де́ля нарече́ся Силоа́м, е́же сказа́ется по́слан. И при Иезеки́и же, да́же не сотвори́т ров, и купе́ль, моли́твою иса́иною ма́ло воды́ изтече́, я́ко обседи́ми бы́ша лю́дие от иноплеме́нник, да не поги́бнет град, я́ко не имы́й воды́, помоли́ся Бо́гови, да́ти им ма́ло воды́. Вопроша́ху бо проти́внии, где во́ду пое́млют. И остро́г поста́вивше при гра́де, приседя́ху Силоа́му. Егда́ у́бо прихожда́ху жи́дове со Иса́иею, тогда́ внеза́пу исхожда́ше вода́. Егда́ же прихожда́ху иноплеме́нницы не исхожда́ше. Те́мже до дне́шняго дне внеза́пу истека́ет, во́ньже час прихожда́ше Иса́ия с жи́довы, да ся яви́т та́йна вели́кая, я́ко Иса́ием бысть. Па́мяти же де́ля лю́дие близ Силоа́ма погребо́ша и́. Приле́жно и сла́вно, да моли́твами святы́ми его́, и по сме́рти его́ и́мут наслажде́ние воды́, я́ко и явле́ние им бысть сотвори́ти его́ де́ля та́ко. Есть же гроб его близ гроб ца́рьских, за проро́ческими гро́бы на ю́жней стране́. Соломо́н бо сотвори́ гроб Дави́да царя́ отца́ своего́, и написа́в с восто́чныя страны́ Сио́на, и́же и́мать вхожде́ние от Гавао́на, в да́ле от гра́да ста́дий 20. И сотвори́ вхожде́ние стро́потно, сложено́ неразу́мично. И есть до дне́шняго дне мно́гими жрецы́ неве́домо, и все́ми людми́. Ту име́яше Соломо́н зла́то ефио́пьско, и ору́жия. И поне́же Езеки́я показа́ та́йну Дави́дову и Соломо́ню, лю́дем вавило́ньским, и оскверни́ ко́сти оте́ц свои́х, сего́ де́ля Бог преда́ пле́мя его́ в рабо́ту враго́м его́, и непло́дна и безча́дна сотвори́ его́ Бог от дня того́, и да́ле.

Стихи́:

Христоно́сца уве́де тебе́ Христо́с терпя́,

Го́споду пожре́ся и Бо́га ра́ди му́чимь:

Христофо́ра в девя́тый главу́ посече́ о́стрее мечу́.

И о сем пресла́вном му́ченице глаго́лется не́кое чу́дно и пресла́вно, я́ко пе́сию главу́ име́яше, от страны́ человекоя́дец. И ят бысть на ра́ти коми́том не́ким, и не моги́й челове́чески веща́ти. Помоли́жеся Бо́гу и по́слан бысть к нему́ а́нгел от Го́спода. Рече́ ему́, Репре́ве мужа́йся, та́ко бо бя́ше и́мя ему́ пе́рвее. И косну́ся усто́м его́, и того́ глаго́лати устро́и. Внегда́ же вни́де во град, облича́ше христиа́ньския гони́тели. Бие́н у́бо быв Ва́кхом не́ким. И́же и к нему́ отвеща́в рече́, я́ко за́поведи ра́ди Христо́вы смиря́емь восприе́млю. И́бо а́ще подви́гнул бых гнев, ниже́ той Вакх постоя́л бы сам. Ниже́ царе́ве кре́пости ничто́же ей су́щей и растле́вшей. Двема́ сто́ма у́бо во́ином тогда́ по́сланым на приведе́ние его́ к царю́, и пре́же тому́ еще́ егда́ ста́ти царе́ви, жезл и́же в руце́ держа́ше, и́же тому́ су́ху су́щу, пресла́вно прозя́бшу. И на пути́ хле́ба во́ином не доста́вшу, во изоби́лии о́нех поста́ви, я́ко и пресла́вному чудеси́ уди́вльшеся, ве́роваша во Христа́, и крести́шася ку́пно со святы́м Христофо́ром, святы́м Вави́лою во Антиохи́и бы́вшем. Иде́же в ме́сто Репре́ва, Христофо́р нарече́н быв. Ви́дев же того́ царь, и у́жасен быв, напра́сно воспя́ть возвали́ся. И па́ки в себе́ прише́д, ле́стию и ласка́нием прегима́в е́же преложи́ти его́, и ка́ко бы того́ сотвори́ти отступи́ти от Христа́, но не я́ве того́ преложи́ти мы́сляше. Тем две жене́ призва́в красноли́чне проку́дене и к зло́му смеше́нию гото́ве, и́же и лю́те того́ раздражи́ти. И привести́ ю́ных муже́й разже́нныя бесе́дами, не покорли́выя и бесны́я стремле́нием. И́мя жене́ еди́ной Калиники́я, а друзе́й Акили́на. И те́ма повеле́ к нему́ вни́ти, и вся́кими мечта́ньми того́ примеша́ти. Я́коже обы́чно оне́ма бя́ше, и́же к ею́ любви́ бы́ти того́ ну́дяще. Отступи́ти же и от ве́ры Христо́вы, и же́ртвы и́долом принести́. Ею́же святы́й поучи́в, и от идолослуже́ния те́ю преложи́в. Я́же пред царе́м христия́не себе́ наре́кше. Лю́тыми боле́зньми обложе́не бы́вше. И та́ко му́ки терпя́ще, муче́ния веньца́ восприя́ша. К сим же на гнев разже́гшуся царю́, и свята́го пред ся приве́дшу и́же и в лице́ досади́тельно свято́му досади́вшу ему́, и прия́телище того́ соде́лованию дия́волю наре́кшу. Деки́ево бя́ше и́мя царе́во. И́же и двою́ сту во́ин по́сланым на приведе́ние свята́го, и к нему ку́пно ве́ровавшим, осужде́ние на них пода́вшу. Зане́же доидо́ша, и пред царе́м поклони́шася свято́му, и́же и всем главы́ отсеко́ша. Та́же телеса́ их огню́ преда́ша. Свята́го же Христофо́ра в сосу́д не́кий ме́дян повеле́ того́ та́мо пригвозди́ти и поджещи́. И тому́ бы́вшу, пребы́сть невреди́м, нико́е зло пострада́в от огня́ и пригвожде́ния. Но стоя́ше я́ко в не́коем хла́де пресла́вне. Бя́ше же мно́гим неятове́рие. Ве́рным же и вельми́ ве́рно, и благоприя́тованная пове́давше, я́ко не́котораго му́жа ви́дети глаго́лющим зело́ в высоту́ вели́ка и добро́тою кра́сна, бе́лыми ри́зами оде́янна, свои́ми луча́ми со́лнцу соодолева́юща. Ему́же на главе́ лежа́ше вене́ц све́тел, и мно́ги во́ины о́крест его́. К ним же му́рини не́цыи че́рни и смердя́щия сража́ющеся, и свята́го я́ти и влещи́ мня́ще. Во́ньже обозре́тися о́ному стра́шному кня́зю с я́ростию, и смути́вшу и попра́вшу вся о́ны супроти́вныя си́лы, и свято́му си́лу пода́вшу. Наро́ду же такова́я слы́шавшу, и свята́го ви́девше без вре́да изше́дша, ве́роваша и приидо́ша ко Христо́ви, и свята́го от огня́ извлеко́ша. И та́ко они́ слуга́ми царе́выми ссе́чени бы́ша. Свято́му же Христофо́ру навяза́ша ка́мень на ши́ю и в студене́ц вверго́ша. И отту́ду а́нгелом извлече́н быв. И в ме́дяну ри́зу разже́ну облече́н быв. И наконе́ц главу́ ему́ отсеко́ша. Соверша́ет же ся собо́р его́ в муче́нии его́, су́щем близ свята́го му́ченика Гео́ргия на кипари́се.

Стихи́:

Посече́ Епима́ха страда́льца мечь,

Боже́ственаго побо́рника на немо́щную пре́лесть:

Ника́ко внима́ше Гордиа́н мечу́,

Моли́твою себе́ дерзова́ше ко венцу́.

Сей и и́же с ним Христо́ва ра́ди испове́дания я́та быша, и пону́ждена кня́зем отврещи́ся Христа́ и пожре́ти и́долом и не покори́стася. Те́мже и мно́гими му́ками обложе́на бы́ста, пото́м главы́ и́ма отсеко́ша. Соверша́ет же собо́р ею́ в муче́нии свята́го Стратони́ка.

Стихи́:

Име́яше трапе́зу сатана́ дре́вле но́вую,

Преле́стницы натка́ша на рожны́ две жене́.

В ле́то по ты́сящи девятьдеся́т шесто́е от воплоще́ния Сы́на Бо́жия. При царе́ гре́честем самоде́ржце Константи́ня гра́да Алекси́и, и патриа́рсе Нико́ле. В ле́та же ру́сских князе́й, христолюби́ваго Все́волода в Ки́еве, и благоро́днаго сы́на его́ Влади́мира в Черни́гове. Судо́м Бо́жиим, и про́мыслом Его́, попуща́ющу грех ра́ди на́шых, наше́дшим исма́ильтяном на зе́млю гре́ческия о́бласти, об ону́ страну́ мо́ря, от Корсу́ня гра́да наче́нше, до Антиохи́и, и самого́ гра́да Бо́жия Иеросали́ма, вся гра́ды и се́ла огне́м сожго́ша, лю́ди изсеко́ша. Му́жы, жены́ и ча́да плени́ша. Це́ркви и монастыри́ и вся́ко благоче́стие христиа́нское пу́сто сотвори́ша, и гра́ды пооблада́ша. Тогда́ же и Ми́ры град Лики́йский пуст сотвори́ша, иде́же лежа́ше те́ло свята́го Нико́лы. Е́же благода́тию Христо́вою невреди́мо сохранено́, явле́нием свята́го свяще́ннику не́коему благогове́йну в Ба́рстем гра́де, я́ко благоуго́дно Го́споду, ему́ от Мир в Бар теле́сне пресели́тися. Во е́же бы благодея́ний бы́вших хода́тайством свята́го, и за́паду не лиши́тися. И у́бо Ба́рстии лю́дие благода́рни бы́ша, ви́денная вско́ре де́лом испо́лнити тща́тся. Корабля́ три пшени́цы испо́лньше, морску́ю пучи́ну возве́явшу благовре́менну ве́тру, удо́бь пла́вавше. И ко брего́м гре́ческим приста́вше, ку́плю па́че наде́жди, моли́твами Нико́лы свята́го, ему́же всяк обе́т благогове́ин предлага́ют, сотво́рше, ко гра́ду Лики́и приста́ша. И истяза́вше изве́стно о це́ркви и ра́це, иде́же драгоце́нное те́ло Нико́лы свята́го сокрове́но лежа́ше, поклони́тися прише́дше. Не мно́жае четыре́х и́нок, храни́телей ме́сту обрето́ша. И сих у́бо е́мше, предложе́ние свое́ во явле́ние, и благоволе́ние свята́го, и́мже наставля́еми, безбе́дно ме́ста достиго́ша, приво́дят. И́ноком же неудо́бно начина́ние мня́щим, искуси́ти же де́ла повелева́ющим. А́бие челове́ком прекосну́вшымся ра́це, вся́кого кроме́ труда́, посо́бием свята́го в часе́ вре́менне корабле́й доспе́вше. Чудоде́йственое те́ло, со до́лжною че́стию, во еди́н от корабле́й влага́ют. И того́ самого́ окормле́нием, в девя́тый ма́ия, ко брего́м Ба́рским, па́че наде́жди вско́ре прихо́дят. О не́мже уви́девше и́же во гра́де, со епи́скопы и свяще́нники и́ноки, со свеща́ми и фимиа́мом и вся́ким украше́нием, и весь при́чет церко́вный, всенаро́дне му́жие с жена́ми и чя́ды, во сре́тение свята́го телесе́ исхо́дят. От него́же всяк во́зраст благослове́ние тогда́ прие́мше. Мно́ги бе́дны, хро́мы, сле́пы, глу́хи, бе́сны, и разли́чными неду́ги оскорбле́нии, незави́стну исцеле́нию сподо́бишася. И по мно́ги дни и до ны́не чудоде́йствене сподобля́ются. И тогда́ у́бо полага́ют свята́го в хра́ме честна́го и сла́внаго проро́ка и Предте́чи Крести́теля Иоа́нна. По трех же ле́тех, в созда́нней во и́мя его́ ка́менней це́ркви, в сре́брене позлаще́нне ра́це, во олтари́, сокро́вище неоскуде́емо, мироточи́вое те́ло то пресвято́е мно́гим благодея́нием вино́вно, положено́. Доны́не о всех на вся́ком ме́сте призыва́ющых того́ к Бо́гу хода́тайствует. Его́же моли́твами Христе́ Бо́же поми́луй и спаси́ нас.

Да не диви́т же тя люби́миче, я́ко от восто́чных стран, мно́гих святы́х телеса́ озлобле́нию от нечести́вых ага́рян на правосла́вие прише́дшу, изво́ли Бог на за́пад пресели́тися. Я́коже у́бо Ма́рка евангели́ста те́ло в Вене́цию, Златоу́стаго в Рим, Нико́лы свята́го в Бар и про́чих и́нде. Ниже́ благоче́стия ра́ди за́падных, о нем же мечта́ются, ниже́ злове́рия ра́ди восто́чных, и́мже безсту́дне проти́внии восто́к пори́чут. И́бо во оте́ц благоче́стии непоро́чни до ны́не благода́тию Христо́вою храни́ми, пребы́ша восто́чницы, сия́ бы́ти да разуме́еши. Я́ве бо я́ко за́падницы о оте́ческом благоче́стии наче́нше от ле́та осмьсо́т девя́таго е́же о исхожде́нии Пресвята́го Ду́ха, е́же всем раско́лом вино́вно погреши́ша. И сего́ ра́ди, я́ко наипа́че жаля́ Всемоги́й Бог поги́бели тех, я́коже жи́вы не́кия апо́столы телеса́ святы́х в страны́ их препосыла́ет, чудоде́йствии наказу́я и поуча́я тех, во е́же бы испове́дания апо́стол и оте́ц па́ки я́тися, и в ра́зум и́стинный приити́ и ко оте́честей возврати́тися и́стине, от новоумы́шленых свои́х преда́ний, про́поведи и ве́ре. Ниже́ бо ве́рующым, но неве́рующым быва́ти чудеса́. Ниже́ ко благоче́стию, но в язы́ки посыла́тися апо́столы. Ниже́ во смире́ние и кро́тость, но я́коже овца́ посреде́ волк, ученицы́ Христо́вы по словеси́ Его́ву приходи́ти обыко́ша. И у́бо от восто́к на за́пад, я́ко довле́ющым саме́м ско́рбным, грех ра́ди быва́емых в наказа́ние восто́чным, к наказа́нию за́падным прихо́дят святи́и, призыва́юще тех в соедине́нии ве́ры. Я́ко да я́ве непокаря́ющыхся И́стине, в день прише́ствия Своего́, безотве́тны сотвори́т Влады́ка.