Стихи́:

Погружена́ в мо́ри Феодо́сия,

Пита́ет же ю́ Христо́с, поко́йною водо́ю:

В два́десять девя́тый у́мре Феодо́сия струя́ми морски́ми.

Феодо́сия Христо́ва му́ченица, бе от гра́да Ти́ра осмина́десять лет су́щи. Уве́дана же бысть я́ко христиа́на, я́та бысть от идолослужи́тель, и приведена́ бы́вши и предста́ Урва́ну кня́зю. И вопроше́на бысть, испове́да Христа́. И пону́ждена бысть отврещи́ся Христа́, и пожре́ти и́долом, и не послу́шавши, бие́на бысть реме́нием суровы́м по пе́рсем и по ре́бром, и мно́го искуша́ема бысть. Посе́м стро́гана бысть, до́ндеже яви́шася вну́тренняя ея́. И та́ко му́чима терпя́щи скорбя́ше. И еще́ же у́бо ей ды́шущи, вопрошена́ бысть кня́зем, а́ще пожре́т бого́м. И отве́рзши уста́, и очи́ма возре́вши и рече́: «Осла́блене умо́м, прельща́еши ся. Не ве́си ли я́ко обще́ния му́ченическаго сподо́бихся?». Тогда́ разгне́вався князь и вве́рже ю́ в мо́ре, иде́же блаже́нная коне́ц прия́т.

Брат подви́жник не́кий, творя́ пра́вило свое́ с бра́том свои́м, побежда́емь же быва́ше слеза́ми, и оставля́ше стих псалма́. Еди́ною же моли́ его́ брат рещи́ ему́: «Что мы́сля на пра́виле та́ко го́рко пла́чеши?». О́нже глаго́ла ему́: «Прости́ мя бра́те. Аз у́бо всегда́ на пра́виле свое́м Судию́ зрю, и себе́ я́ко пови́нна стоя́ща и истяза́ема, и Судию́ глаго́люща ми: Почто́ согреши́л еси́? Про́чее же не ве́дущу ми что отвеща́ти, загражда́ются уста́ моя́. И сего́ ра́ди оставля́ю стих псалма́. Но прости́ мя, я́ко смуща́ю тя. И а́ще хо́щеши, да твори́т ко́ждо нас осо́бь пра́вило свое́». Глаго́ла ему́ брат: «Ни, о́тче. А́ще и не пла́чу аз, но оба́че зрю тебе́, и и́мам себе́ окая́нна». И ви́дев Бог смире́ние его́, дарова́ ему́ плачь бра́та его́.

Рече́ же па́ки: а́ще уве́си я́ко преставля́ется брат ко Го́споду, иди́ и пребу́ди у него́ в той день, да ви́диши ка́ко душа́ от те́ла разлуча́ется. А́ще рече́т тебе́ челове́к помоли́тися о нем, рцы: «Бог брат моли́тв ра́ди святы́х Его́, мене́ и тебе́ да поми́лует, я́коже есть во́ля Его́».

Рече́ ста́рец: сия́ сохрани́ до сме́рти своея́ и спасе́шися, е́же не я́сти с жено́ю, ниже́ име́ти любле́ние с ю́ным, ни спа́ти с не́коим на еди́ной рого́зине ю́ну ти су́щу, но то́чию с бра́том свои́м, или́ со ста́рцем свои́м, и се со стра́хом, а не презре́нием. И не оста́ви о́чи свои́ облача́щи ри́зы своя́ зре́ти на те́ло свое́. А́ще бу́дет ну́жда о вине́, до три ча́ши прие́мли, и не разреши́ за́поведи гоще́ния ра́ди. Не пребу́ди в ме́сте в не́мже Бо́гу согреши́л еси́. Не пре́зри слу́жбу свою́ да не впаде́ши в ру́ки враг твои́х. Пону́ди себе́ на поуче́ние псалмо́м, поне́же се соблюда́ет тя от плене́ния вра́жия. Возлюби́ вся́ко злострада́ние, и смиря́тся тебе́ стра́сти твоя́. Попецы́ся е́же не вменя́ти себе́ ни в че́мже, и уста́ви пла́кати грех свои́х. Соблюда́й себе́ от лжи, та бо отгоня́ет страх Бо́жий от тебе́. Откры́й помышле́ния своя́ отце́м свои́м, да́же по́мощь Бо́жия покры́ет тя. Пону́ди себе́ на рукоде́лие свое́, и страх Бо́жий всели́тся в тебе́. Не рцы «пра́здник есть днесь, да пие́м вино́, а у́тре пентико́стия, да я́мы бра́шна разли́чна». Несть пра́здника и́ноком. Па́сха Христо́ва - отступле́ние от зла. Пентико́стие же - воскресе́ние души́ па́дшей от нра́ва зла. Помина́й всяк путь, и не бу́дет скве́рны в души́ твое́й. Украша́яй ри́зы своя́, и исполня́яй утро́бу свою́, пасе́т помышле́ния ска́редна, и со благому́дрием не сче́тается. Поста́ви на ме́риле хлеб свой, и пий в ме́ру во́ду свою́, и блуд отъи́дет от тебе́. Чернори́зец мудр без стра́сти есть, а несмы́сленый поче́рпет зла́я. Пе́рси Госпо́дня - ра́зум Бо́жий, а припа́дый на ня феоло́г есть.

Мни́си е́тери ше́дше от хиж свои́х собра́шася вку́пе, и сло́во простира́ху о поще́нии и благове́рствии, и ка́ко подоба́ет угоди́ти Бо́гови. Сим же глаго́лемым, яви́стася а́нгела два е́тером ста́рцем от них, за ма́нтии держа́ща, и хва́ляща кого́ждо и глаго́люща о Бо́жией ве́ре. И умолча́ша и́мже яви́ся виде́ние. И в други́й же собра́шася на том ме́сте, и сло́во нача́ша о е́тере бра́те согре́шшем, и нача́ша глаго́лати о нем. Яви́ся у́бо святы́м ста́рцем вепрь смра́дом воня́яй весь скверне́н. Разуме́вше же согреше́ние их, и́мже яви́ чу́до пове́даша бра́тии а́нгельское похвале́ние, и ве́прево виде́ние.

Глаго́лаху же ста́рцы: я́ко подоба́ет кому́ждо я́же и́скреняго своего́ сотвори́ти, я́коже и́мать. Я́коже облачи́тися вонь пло́тию, и всего́ носи́ти челове́ка, и страда́ти с ним о всем, и ра́доватися и пла́катися, и про́сто рещи́, бы́ти с ним, я́ко ту же плоть носи́ти и ту же ду́шу, и я́ко о себе́ скорбе́ти, а́ще когда́ прилучи́тся ему́ печа́ль. Та́ко бо пи́сано есть: я́ко еди́но те́ло есмы́ о Христе́. И мно́зем ве́ровавшым бе се́рдце и душа́ еди́на. Бо́гу на́шему сла́ва, ны́не и при́сно и во ве́ки веко́в. Ами́нь.