От тех святы́х Оли́мп и Родио́н, восле́дующа свято́му Петру́, о́ба в Ри́мстем гра́де от Неро́на усе́чена бы́ста. Сосипа́тр же, его́же святы́й Па́вел в посл́ании к ри́мляном помина́ет, в Икони́и епи́скоп быв, и ту с ми́ром сконча́ся. А Тере́нтий по Сосипа́тре по́слан святы́м Па́влом, вторы́й епи́скоп бысть в Икони́и, и ту ко Го́споду отъи́де. Ера́ст же иконо́м святы́я це́ркве Иерусали́мския бысть, посе́м епи́скоп Панеа́ды, и той ту сконча́ся о Го́спода с ми́ром. Кварт же епи́скоп бысть Вири́тскаго гра́да и, мно́го пострада́в по Христе́ и мно́ги от е́ллин обрати́в ко Христо́ве ве́ре, та́мо коне́ц жития́ прия́т о Го́споде.

Стихи́:

Страда́льческим Оре́ста сриста́нием

Побе́дныя по́чести мно́гия ча́я:

К ди́виему коню́ привя́зан быв в деся́тый Оре́ст.

Сий святы́й му́ченик Оре́ст бя́ше от гра́да Туа́ны страны́ Каппадоки́йския. И преоби́дяше и́долы, Христа же испове́даша над все́ми Бога – и ят бысть Максимиа́ном иге́моном, повеле́но бысть ему́ Диоклитиа́ном. И пону́жен бысть поклони́тися и́долом и не покори́вся, бие́н бысть же́злием тольми́, я́ко и вну́треним растерза́тися и яви́тися внеу́ду. Посе́м веде́н бысть в це́рковь и́дольскую поклони́тися и́долом. Он же плю́ну на лице́ и́долом и сокруши́ я́ – и бы́ша я́ко прах. И затворе́н бысть в темни́цы. И по седми́ дний предста́ суди́щу Максимиа́нову и, па́ки пону́жен быв пожре́ти и́долом и не повину́вся, гвозды́ желе́зными приби́ша но́зе его́, и привя́зан бысть к ди́виему коню́ вери́гами и гони́мь бысть ну́ждею вели́кою и влече́н бысть два́десять и четы́ри по́прища от гра́да Туа́на. И та́ко преда́сть дух свой Го́сподеви.

Сей святы́й оте́ц наш Ми́лий епи́скоп, роди́ся в еди́ной от ве́сей пе́рсских, и крести́вся уча́шеся свяще́нным пи́сменам. Дости́г же в му́жеский во́зраст, и хотя́ вво́инитися тогда́ та́мо бы́вшему царю́, виде́ние но́щное запрети ему́ стра́шно. И от тогда́ в де́встве пребыва́ше и пощении, моля́ся Бо́гу о себе же и о свое́м ро́де. И по не́коем вре́мени оста́ви град свой, и бысть мона́х. И обита́в на ме́сте, иде́же проро́к Дании́л виде́ние ви́де. И сподобля́емь быва́ет епи́скопству святы́я це́ркве, рукоположе́нием Генна́дия епи́скопа, испове́дника и му́ченика бы́вшаго, и мно́го потруди́вся та́мо святы́й, обличая и де́лы и словесы́ беззако́ннующыя. Та́же от них бие́н быв и гони́мь. Да я́ко позна́в их неиспра́влены, проре́к о них хотя́щий наити́ на них от Бо́га гнев, и отъи́де. И не мимоше́дшу вре́мени трем ме́сяцем, кня́зю гра́да того́ не́которым грехо́м прегреши́вшу, и гне́ву ца́рску нань напа́дшу. И посла́в царь во́ины, и он град до конца́ разсы́па, а живу́щих в нем мече́м изсече́. Святы́й же во Иерусали́м прии́де ко Аммо́нию, ученику́ вели́каго Анто́ния: и сотворив та́мо два ле́та, и возврати́ся в Перси́ду. Иду́щу же ему к не́коему мона́ху, живущу в верте́пе: и ви́де зми́я стра́шна, вше́дша в верте́п иде́же бя́ше он, три́десятим и двои́м лакте́м су́ща. И рече́ к нему́: дости́же на тя зми́ю ору́жие Госпо́дне. И сотворив́ зна́мение кре́стное, и ду́нув нань, и разсе́деся. И доше́д во град свой, созда́ це́рковь на проще́ние непокори́вшымся лю́дем, и го́рькою сме́ртию живота́ своего́ лиши́вшымся. И та́ко ле́та дово́льна сотвори́в. И во Ктисифо́нтский град отъи́де, в не́мже и собо́р обре́те епи́скопский: ста посреде́ их, облича́я епи́скопа на него́же собо́р бысть. О́ному же уничижа́ющу и укоря́ющу свята́го, и свои́ми гада́ньми о вся́ких хваля́ся. Святы́й же к нему́ рече́: Внегда́ неиспра́влен еси́, пререку́еши и востае́ши на Госпо́дни архиере́и, и́хже собра́ Святый Дух. Се пости́же на тя гнев Госпо́день, и пол су́ха тебе поста́вит ле́та мно́гая, поне́же тебе ра́ди и про́чым уцелому́дритися. И а́бие с сло́вом блеск бысть с небеси́ громом стра́шным я́ко виде́ние мо́лнии, и пол су́ха его́ сотвори́. И пребы́сть та́ко пол сух за двана́десять лет, и по сих житие́ оста́ви. Святы́й же па́ки во ин град отъи́де. Князь же гра́да о́ного лю́тым неду́гом му́чимь двои́ми ле́ты, и его́ прише́ствие уве́дав, посла́в моля́ше доити́ свято́му к нему́, и моли́тву пода́ти ему́, и посети́ти боле́знующаго лю́то. И я́ко шед по́сланный, и сказа́ весть. Рече́ к нему́ святы́й: Иди́ и рцы ве́лиим гла́сом, посла́вшему тя болю: Си́це вели́т епи́скоп о и́мени Иису́с Христо́ве, Его́же аз пропове́даю недосто́йный и худы́й, отложи́ вся́кий одержа́щий тебе́ неду́г, и препоя́сав чре́сла своя́, доиди́ ходя́ свои́ми нога́ми, и ви́жу тя. О́ному же ше́дшу, и ре́кшу посла́ние, и князь оздраве́в, и укрепи́вся, я́ко никогда́ боле́в лю́тым неду́гом. И и́де ко свято́му свои́ми нога́ми ходя́, и́же и честны́м стопа́м его́ припа́д, и того́ свои́ми рука́ми объе́м валяшеся и целова́ше, благодаря́ Бо́га, И́же си́це Себе́ просла́вив. Сие пресла́вное чу́до мно́гих ко Христо́ве ве́ре привлече́. Та́може и не ма́лы бе́сы прогна́ святый. И жену́ разсла́блену на одре́ за де́вять лет, за ру́ку ем воздви́же здра́ву. И не́которому по непра́вде ино́го влача́щу, и неправди́вый кля́твою известву́я преоби́дно, и словеса́ свята́го нивочто́же вмени́в: Святы́й же моли́твою гиози́еву прока́зу по всему́ те́лу, на оболга́теля наведе́, во исправле́ние мно́гим. Я́ко не ма́лу мно́жеству гра́да приходи́ти к свято́му, и Христо́ву ве́ру нарица́ти. И друга́я зна́мения в разли́чных ме́стех мно́гая сотвори́. Но царь о них слы́шав, и призв́ав свята́го, и пред собо́ю поста́вив со двема́ ученико́ма его́. И я́ко ви́де я́же во Христа́ ве́ру их, неукло́нну и недви́жиму, мно́гая зла зело́ пе́рвее показа́в на них. Пото́м сам царь свой мечь исто́рг, пронзе́ пе́рси свята́го. Та́коже и брат царе́в своему́ бра́ту подобяся, и той свои́м ноже́м уда́ри в се́рдце свята́го. Страстоте́рпец же Госпо́день еще дыха́я, рече́ к царю́ и бра́ту его́: Внегда́ и о́ба совеща́стася на мене́, непови́нна мя су́ща уби́ти, зау́тра в сий час во́ньже мене́ вы уби́сте, от рук ва́ших друг дру́гу кровь да пролие́те: и ма́ти ва́ша безча́дна бу́дет. И се рек, предаде́ дух свой. О́ба же ученика́ его́, нечести́вая царя́, на два холма́ разста́виста ка́мением поби́ста. Нау́трия же изше́д нечестив́ый царь на лов с бра́том свои́м и ничто́же вмени́в свята́го рече́ние, еле́ня вели́ка изгна́вше, и то́чию два устреми́стася и погна́ста в след еле́ня. И утоми́вша его́ между́ собо́ю сюду и сю́ду, стрели́ша о́ба в еле́ня, и греши́вше, са́ми себе́ друг дру́га стрела́ми в се́рдце уязви́ша. И та́ко ду́шы своя́ ну́жно изверго́ша, и живота́ су́щаго лиши́шася. Святы́х же му́ченик телеса́ ве́рными че́стно погребе́на бы́ша с пе́нии и пе́сньми.

Глаго́лаше не́кий от фиваи́дских ста́рец: Аз бех рече́ и́долськаго жерца́ сын, мал у́бо сый седя́х в це́ркви идо́льстей, и ви́дех отца́ своего́ мно́жицею творя́ща же́ртвы и́долом. Еди́ною же внидо́х тай в след его́, и ви́дех сатану́ седя́ща, и воя предстоя́ща ему́, и се еди́н от князь кла́няшеся ему́. Вопроси́в же диа́вол, рече́ ему́: Отку́ду прише́л еси́ ты? Отвеща́в же рече́: На сей стране́ бех, и воздвиго́х брань, и проли́тие кро́ве сотвори́х, и приидо́х возвести́ти тебе́. И рече́ ему́: Коли́цем вре́менем сотвори́л еси́ сие́? Он же рече́: В четы́редесять дний. И повеле́ его́ би́ти, реки́й: За толи́ко вре́мя сие́ сотвори́л еси́. И се ин прии́де кла́няшеся ему́. И рече́: Ты отку́ду гряде́ши? И рече́ де́мон: В мо́ри бех, и воздвиго́х ветр, и потопи́х кора́бль, и мно́ги му́жы погуби́х, и приидо́х возвести́ти тебе́. Он же рече́: За коли́ко вре́мя сие сотвори́л еси́? Де́мон рече́: Есть дний два́десять. Повеле́ же и сего́ би́ти, я́ко уме́дливша, глаго́ля: Почто́ за толи́ко дний се еди́но сотвори́л еси́? И се тре́тий присту́пль, поклони́ся ему́. И рече́ и сему́: Отку́ду прише́л еси́? И рече́: Во о́ном гра́де брак бысть, и воздвиго́х брань, и мно́гое проли́тие кро́ви сотвори́х и с женихо́м и с неве́стою, и приидо́х возвести́ти тебе́. Он же рече́: За коли́ко дний сие́ сотвори́л еси́? И рече́: Десятию́ дний. Повеле́ же и того́ би́ти, я́ко уме́дливша. Прии́де же ин, и поклони́ся ему́. И рече́: Отку́ду ты прише́л еси́? Он же рече́: В пусты́ни бех, три́десять лет боря́ся с не́ким мона́хом, и в сию́ низложи́х его́ в любодея́ние. Он же слы́шав се, воста́в лобза́ и́. И снем вене́ц и́же ноша́ше на главе́ свое́й, и возложи́ на главу́ ему́, и посади́ и на престо́ле с собо́ю, глаго́ля: Я́ко ве́лию сию́ вещь возмо́же сотвори́ти. Рече́ же ста́рец: Се аз вои́стинну ви́дех и глаго́ла. Помы́слив же рех, а́ще та́ко вели́к есть чин мона́шеский, и Бо́гу благоде́явшему ми спасе́ние, изыдо́х и бых мона́х.