Стихи́:

Мно́гим воста́нием, Фео́доре треблаже́нне,

Сеѓо жития́ преста́влься, и блага́го жития́ насыща́ешися.

Той бе́яше при Константи́не Копрони́ме, роди́телю благочести́вою сын быв, Фоти́на и Феокти́стии. Изде́тска до́брое житие́ стяжа́в, научи́вся пи́смени и в соверше́ную высоту́ ра́зума дости́г. И́ноческое житие́ проходя́ и вся́кую вещь доброде́тельную испр́авив, свяще́нства дар от вели́каго Тара́сия прии́м. И преподо́бному тому́ тогда́ игу́мену хра́ма Студи́йския оби́тели случи́вшуся, и тому́ мимоше́дшу [егда́ отрече́ся игу́менства], сий блаже́нный Фео́дор игу́менство восприе́млет, и до́бре вруче́нную ему́ па́ству пасы́й и наказа́я, и на па́жить спасе́нную приводя́. Той же вели́кий Фео́дор, и и́же во святы́х Тара́сие, о́в из це́ркве отсыла́ется, сий же бие́мь в Селу́нь прогони́мь быв от Константи́на и Ири́ны царе́ма, зане́же зако́нную свою́ жену́ отложи́в и ину́ю приведе́, и си́ми обличе́ныма бы́вшима. И елма́ Константи́н ослепе́, ца́рствия изве́ржен бысть, призыва́емь быва́ет па́ки Фео́дор. И Ники́фору ца́рство прие́мшу, и святы́я ико́ны наче́ншему покаря́ти, и па́ки изгна́н быва́ет вели́кий Фео́дор во Аполониа́дское е́зеро. И отту́ду па́ки посыла́емь быва́ет [в] восто́чное позо́рище (о́бласть), во́ньже (иде́же) на плеще́х сто язв прия́т, и до́блествене терпя́ бе́яше. И па́ки от стратопеда́рха лю́тыми я́звами томи́мь быв. И отту́ду в Зму́рну по́слан в темни́цу лю́тую затворе́н, и но́зе его́ в кла́де заби́ша. Внегда́ и той ца́рствия отча́явся, и Михаил ски́петры восприя́т, призва́н бысть от прогна́ния и от уз преподо́бный Фео́дор, и блажи́мь быв мно́гими, зане́ мно́га зла пострада́ пречестны́х ра́ди ико́н. И ма́ло пожи́в с дру́ги любо́вными, с благо́ю наде́ждею почи́ о Го́споде. Бе́яше же сухня́в, бел лице́м, размесе́н власы́ и плеши́в.

Стихи́:

Не устраши́вшеся бя́ше Ви́кторе к мечу́,

Вся́кое надале́че серде́чное положи́в страхова́ние.

Сей подвиза́шеся при Антони́не царе́, и при Севастиа́не ду́ксе во Итта́лии. Пону́жден быв отврещи́ся Христа́, и не поко́рься. Пе́рвее сокруши́ша пе́рсты ему́. Та́же в пещь разже́ну вверго́ша его́. И в ней пребы́сть три дни, и изы́де невреди́мь. И обая́нная бы́лия пи́ти пону́жден быв, и ничто́же успе́в пода́вый ему́ сия́, но ве́ровав и той, и прии́де ко Христу́. По сих же свято́му истерза́ша жи́лы, и разва́реным ма́слом полива́ется. И пове́шен, свеща́ми поджига́емь бя́ше. И прах не́который со о́цтом смеше́н пону́жден быв испи́ти. И о́чи его́ избодо́ша. И за три дни стремгла́в пове́шен быв. Пото́м ко́жу содра́ша его́, и тогда́ дух свой Го́споду предаде́.

Стихи́:

Затворен́ Вике́нтие в темни́цы стра́ждет,

Отреши́вжеся теле́сныя темни́цы, вы́ше востече́.

Сей святы́й Вике́нтий во Августопо́ли иуде́йстем быв, уча́ше лю́ди со епи́скопом Уале́рием, диа́кон сый. Я́ти же бы́вше и приведе́ни на суди́ще Датиа́на кня́зя. И́хже а́бие желе́зы обложи́в, и во град Александри́йский отвести́ их повеле́, и во мра́чней темни́це их затвори́ти. По не́ких же днех изве́д Вике́нтия, и повеле́ строга́ти его́. Посе́м повеле́ на кресте́ пригвозди́ти, и коего́ждо у́да томи́ти. И отту́ду сведе́н и свя́зан быв, и бие́н. И же́злие разже́гше желе́зно, сожгоша пе́рси его́. И па́ки в темни́цу вверго́ша его́. И посе́м главу его отсеко́ша. И та́ко предаде́ дух свой Го́сподеви.

Стихи́:

Еги́пет пои́стине храни́теля вели́ка стяжа́:

Вои́стину посека́емь сие́ Ми́на показу́ет:

Ми́на в единона́десятый мече́м претерпе́ ра́достно.

Сей бе́яше во́инствуя при Максимиа́не в ну́мерех, глаго́лемых Рутали́кии, в Котиа́не Фриги́и Салута́рии. Не терпя́ зре́ти и́дольскую что́мую пре́лесть, на го́ру вшед, и посто́м и моли́твами себе́ очи́стив дово́льно, и утверди́в себе́, и к любви́ Христо́ви ду́шу распали́в, и сни́де с горы́, и ста посреде́ идолослуже́бник и Христа́ пропове́да. Тем томле́н быв и пе́рсиняны у́жи тремь, и желе́зными па́лицами все те́ло его́ сокруше́но. Посе́м ме́чную прия́т кончи́ну.