Стихи́:

Иоа́нн ни́щим пода́в и расточи́в,

Коли́ко ны́не прие́млет, предстоя́ Христо́ви!

Идя́ше с да́ры в двана́десятый, ми́лостивый.

Сий ки́прянин ро́дом бе́яше, Епифа́ния кня́зя сын. Жене́ приобщи́вся и оте́ц ча́дом их быв, и зане́ у́бо жене́ его́ и ча́дом жития́ сего́ отше́дшим, все жела́ние свое́ к пода́нию доброде́тели и богоуго́дию обрати́в. И све́тлаго ра́ди жития́ его́ архиепи́скоп Александри́йский поста́влен быв, я́ко на све́щнице ева́нгельски положе́н быв, ме́рою злато́ю по вселе́нней возсия́. Пребы́в же во архиепи́скопстве ле́та мно́га и мно́га чудеса́ сотвори́в, тре́бующим неоску́дно пода́в, я́же на потре́бу, и ми́лостиваго нарече́ние зде восприе́м и неве́рным наро́читне супроти́влься, я́коже кни́жное житие́ его́ е́же о нем испове́дает, ко Го́споду отъи́де.

Стихи́:

Еги́пет обти́чет [Нил],

И тварь Нил сло́вом напая́ет,

А́ще и у́мерл Нил вели́кий.

Сий в словесе́х зе́лен бе́яше, в ца́рство Маври́киево епа́рх Константи́ня гра́да быв, че́стне сопря́гся жене́ и роди́в две ча́де, му́жеский пол и же́нский и претвори́в свою́ сопру́жницу оста́вити Константи́нь град и в еги́петских монастыре́х всели́тися, раздели́ же и ча́де – тому́ поя́ти сы́на Феоду́ла, оной же дщерь. И та́ко сотво́рше, разстоя́хуся кождо друг друга. И блаже́нный Нил, [в] го́ру [Сина́й] с сы́ном дости́г пребыва́ти со отцы́. Ва́рвары же не́цыи напр́асно напа́дше, я́ко зве́рие, сы́на его́ Феоду́ла со ине́ми плени́вше мно́гими, похвати́ша; Его́же я́ко пле́нника рыда́ше, я́коже в его́ сло́ве спи́сано пове́дает. Боже́ственому у́бо сподо́блься святи́тельству, и словеса́ по́стническая, вся́кия прему́дрости и поле́зная изложи́в, еписто́лию же и глави́зны мно́жайшая сложи́в, и мно́гих к раче́нию Христо́ву приведе́, с ми́ром сконча́ся. Лежи́т же, яко глаго́лют, и сын его́ Феоду́л с ине́ми по́стники в честне́м хра́ме святы́х апо́стол, в орфанотро́фии, под же́ртвеницем положе́ни Иустиа́ном, христолюби́вым царе́м.

Стихи́:

Я́ко проро́ка Ахи́я,

Пре́жде сме́рти Иеровоа́м сведе́тель сын Сиса́рин.

Сей проро́к Ахи́я бя́ше от Сило́ма, от гра́да И́ли, иде́же бя́ше ски́ния дре́вле. Сей рече́ о Соломо́не, я́ко согрешити и́мать к Бо́гу: и и́мут его́ жены́ уткну́ти во отступле́ние от Бо́га. И Иеровоа́ма изобличи́, я́ко ле́стию прихо́дит ко Го́споду. Ви́дев же и супр́уги воло́выя попира́ющыя це́ркви, и на иере́я напа́дающыя: поне́же наше́дшии вавилоня́не, це́рковь разсы́павше разори́ша. У́мре же, и погребе́н бысть близ исто́чника Силоа́мскаго.

Жена́ не́кая в тя́жек грех впа́дши, и сего́ не могу́щи за срам испове́дати отцу́ духо́вному. И прии́де ве́рующи ко свято́му, и па́дши на ногу́ его́ со мно́гими слеза́ми вопию́щи и глаго́лющи: О́ преблаже́нниче, аз стра́нница тя́жек грех сотвори́х, во уши челове́ком не могу́щь вни́ти. И ве́де, а́ще хо́щеши, мо́жеши мя его́ прости́ти. Рече́ бо вам Госпо́дь: Его́же разрешите́ на земли́, бу́дет разреше́н на небесе́х: и и́мже отпустите́ грехи, отпу́стятся им, а и́мже держите́, держа́тся. Сие́ же слы́шав блаже́нный рече́ ей: А́ще ве́рою пришла́ еси́ испове́ждь и мне. И рече́ жена́: Не могу́ его́ влады́ко испове́дати. Глаго́ла ей преподо́бный: А́ще стыди́шися, иди́ напиши́, и принеси́ ко мне. Она́ же рече́: Ни сего́ могу́ сотвори́ти. Глаго́ла ей святы́й, Напиши́ и запеча́тай, и даждь мне. Написа́вши же свой грех жена́, и закля́т и́ не отреши́ти, ни прочести́ тоя́ срамоты́. Взем же Иоа́нн гра́моту, и в пя́тый день преста́вися: и о сей гра́моте ничто́же глаго́лав. Не су́щи же тогда́ во гра́де жене́ той. И по погребе́нии его́, на у́трия уве́девши жена́, и возопи́, мня́щи я́ко при сме́рти его́ ини́и суть взе́мше прочто́ша грех ея́. И прише́дши над гроб а́ки к жи́ву вопия́ше глаго́лющи: О́ челове́че Бо́жий, тебе самому́ не дерзну́х испове́дати моего́ греха́, и се ны́не всем есть обличе́н: поне́ да бых не дала́ ти гра́моты тоя́ с мои́ми грехи́. Го́ре мне студа́ хотя́щи избы́ти, всем на поруга́ние бых: в цельбы́ ме́сто, ху́льную прия́х я́зву. И ны́не не отступа́ю от гроба твоего́, до́ндеже извести́ши ми, где еси́ мое́ рукописа́ние дел: не бо еси́ у́мерл, но и ны́не жив еси́: и си́це вопию́щи, пребы́сть три дни у гро́ба не я́дши. И в тре́тию нощь изы́де святы́й Иоа́нн из гро́ба своего́ яве, со двема́ епи́скопома лежа́щима с ним. И глаго́ла ей: О́ же́но, доко́ле не да́си на́ма покоя́, но и ри́зы на́ша мо́чиши слеза́ми? И се рек, даде́ ей гра́моту запеча́тану, глаго́ля: приими́ сию́, и отреши́вши виждь. И укрепи́вшися жена́, ви́де па́ки святы́я вле́зша в своя́ ме́ста: и держа́щи хартию, ви́де свою́ печа́ть це́лу. И отреши́вши обре́те свое́ написа́ние загла́жено, и и́но впи́сано та́ко: Иоа́нна ра́ди раба́ Моего́, загла́дися твой грех. И ра́да бысть жена́, возврати́ся в дом свой, прии́мши отпуще́ние грехо́в. Сие́ же слы́шавше бра́тие, просла́вим Блага́го Бо́га. Кто бо та́ко ми́лостивый человеколю́бец ин, я́коже Он, показу́яй нам мно́ги пути́ ко спасе́нию, и не хотя́й сме́рти гре́шником, но ка́ющихся прие́млет, и Своя́ уго́дники прославля́ет, и во́лю боя́щихся Его́ твори́т.