Я́коже в проле́тие сия́ние разли́чно кра́сных цвете́ц ве́село твори́т зре́ние па́че зи́мняго неустрое́ния, и со́лнца чи́стое сия́ние сладча́йши показу́ется пооблаче́ния и наводне́ния дождя́, си́це и духо́внии пра́здницы и торжества́ лю́бящим такова́я высоча́йши зело́ и спаси́тельнейши па́че е́же по пло́ти пра́зднования и торжества́. В сицевы́х у́бо обы́чай есть быва́ти объяде́нию, и пия́нству, и ине́м неполе́зным. Во о́нех же наслажде́нию духо́вных песносло́вий и прочита́ние боже́ственых слове́с, моли́тва исправля́ется, воздержа́ние и пост почита́ется. Сего́ ра́ди поще́ние, я́ко зако́н не́кий ве́чен учини́ся, предочище́ния ра́ди и любве́ вели́ких и госпо́дственых пра́здник, от самови́дец Словесе́ и слуг боже́ственых апо́стол. Сопритече́ же и спросия́ в самы́й вход и преддве́рие ны́нешняго поще́ния от таковы́х еди́наго богослове́снейших верхо́вник све́тлый пра́здник и торжество́ всехва́льнаго апо́стола Фили́ппа, его́же па́мяти день спаси́тельный све́тло торжеству́ем и духо́вно возвесели́мся, и в ра́дости души́ почита́юще. Того́ ублажа́ем, я́ко хода́тая нам всех благи́х бы́вша. И́бо его́ уче́нием вся́кия пре́лести па́губныя, е́же от бесо́в злоко́знене бы́вшия, вся тварь измени́ся и све́том богоразу́мия просвети́ся. К си́мже вме́сто е́же по пло́ти быва́емых ко и́стинным и духо́вным пра́здником и торжеству́ наста́влени бы́хом того́ законоположе́нием, е́же Госпо́дня вочелове́чения та́инственыя и ми́ру спаси́тельныя пра́здники све́тло торжествова́ти, и всех и́же боже́ствене угоди́вших Тому́. Те́мже днесь освяще́нное сосло́вие, я́ко ца́рское свяще́нство, язы́к свят и сы́нове обновле́ния бы́вше, све́тло пра́зднуем боже́ственую па́мять богопропове́дника, похваля́юще е́же о и́стинне вели́кий по́двиг страда́ния его́, и я́коже цве́ти востерза́юще е́же в богодухнове́нном писа́нии лежи́мая о нем к составле́нию благоуха́ния е́же ко услажде́нию на́шим душа́м. Свяще́нное у́бо Ева́нгелие сведе́тельствует бы́ти того́ сограждани́на Андре́ю и Петру́. Худ же той бе, но зело́ возвели́чися па́че ине́х градо́в, я́ко израсти́ не то́чию жи́теля гра́да небе́снаго, но и вселе́нней челове́ком путь показа́вших того́. И́бо свяще́нный Фили́пп по всему́ житию́ де́вственик познава́емь бя́ше, си́лен же сый в кни́гах проро́ческих. Упражне́ние же того́ не к ку́плям и́же в суете́ жития́ су́щих, ниже́ во и́но что тле́емых, но во уче́нии зако́на и прочита́нии в кни́гах слове́с проро́ческих. И е́же в них истязу́я смотря́ше и распала́емь жела́нием зело́ созерца́ше по лежа́щему в них проро́честву, хотя́щему приити́ на спасе́ние Изра́илеви. И к таково́му та́инству поуче́нием всегда́шним неукло́нно зря, и весь к нему́ взима́шеся мы́слию, весь изменя́емь того́ жела́нием е́же ви́дети и сл́ышати сбытие́ таковы́х, еже мно́зи вожделе́ша ца́рие и вси пра́ведницы ви́дети, и не ви́деша, слы́шати, и не слы́шаша – и́же и досто́ин бысть во мно́зе тща́нии не слы́шания то́чию, но и виде́ния. Во вре́мя же сбытия́ таковы́х сей бе пе́рвый глас чу́днаго слы́шания, я́коже Иоа́нн глаго́лет: «Во у́трии же, рече́, восхоте Иису́с изыти́ в Галиле́ю. На у́трии того́, во́ньже призва́ Андре́я и Петра́, взы́де в Галиле́ю, и обре́те Фили́ппа и глаго́ла ему́: гряди́ по Мне» (Ин. 1:48). Обре́те того́ не заблужда́ема пре́лестию, но пра́ве ше́ствующа в зако́не и кни́гах проро́ческих. Обре́те того́ по вся часы́ ожида́юще прише́ствия Его́, обре́те того́ всегда́ жела́юща слы́шати сла́дкий глас хотящаго приити. И я́ко приуготовле́н на се, ско́ро совосхитися сла́достию такова́го возглаше́ния, и весь мы́слене привяза́ся тому и измени́ся в того́ любо́вь, разуме́в и позна́в, я́ко прии́де ча́емых сконча́ние, прии́де жела́емых соверше́ние, прии́де и яви́ся е́же от родо́в сокрове́ное та́инство на спасе́ние всего́ ми́ра. Зело́ же возра́довася о сих, я́ко сподо́бися дости́гнути таковы́х зри́тель бы́ти, и в весе́лии ду́ха взима́яся, подвиза́емь зако́ном любве́, объявля́ет таково́е сокро́вище бли́жнему. О́, вели́кия любве́ богопропове́дника! Ве́дый, я́ко в той весь зако́н и проро́цы ви́сят, и соверше́ние зако́ну и проро́ком та, е́юже распала́емь, блаже́ный рече́ к Нафана́илу: «Обрето́хом Иису́са сы́на Ио́сифова, и́же от Назаре́т, мни́ма по челове́честву си́це, по писа́ниих же Сы́на Бо́жия во плоть прише́дша» (Ин. 1:46). Обрето́хом край жела́ния, о не́мже Моисе́й и проро́цы вопию́т. Обрето́хом сокрове́нное та́инство, Его́же провозвеща́я Иса́ия рече́: «Се Де́вая во чре́ве прии́мет и роди́т Сы́на, Ему́же нареку́т и́мя: С на́ми Бог, и Вели́ка сове́та О́тча а́нгел, Бог Кре́пок, Влады́ка ми́ру и Отец бу́дущаго ве́ка» (Ис. 7:14). Обрето́хом свет Божества́, во зда́нии пло́ти сокрыва́емь и во тме светя́щься, и тма ми́ра Того́ не объя́т, о Не́мже Иереми́я прорече́: «Се Бог нашь, и не вмени́тся ин к Нему́. Изобре́те всяк путь худо́жества… По си́хже на земли́ яви́ся и с челове́ки поживе́». (Иерем. 19:15). Обрето́хом днесь щади́мое ми́ру спасе́ние, его́же вла́сти вся́ко естество́ покори́тся небе́сных, и земны́х, и преиспо́дних. О Не́мже Дании́л проро́к прорече́: «Ви́дех се по облако́м небе́сным, я́ко Сын челове́чь гряды́й, и к Ве́тхому де́ньми дости́же, и Сему́ да́сться вся́ка власть и нача́льство, и власть Его́ власть ве́чна» (Дан. 7:12,14,15). Обрето́хом Сло́во Бо́жие, соше́дше с небесе́ в плоть и Сый на небеси́, о Не́мже на Иорда́ни Оте́ц сведе́тельствова: «Сей есть Сын Мой возлю́бленый, о Не́мже благоволи́х» (Мф. 3:17). И Дух Святы́й сни́де Нань во о́браз го́лубя. Обрето́хом И́же пропове́да а́гнца Иса́ия: «И род Его́ неисповеди́м» (Ис. 53:8). Его́же узре́ Иоа́нн, гряду́ща к себе́, рече́: «Се А́гнец Бо́жий, взе́мляй грехи́ ми́ру» (Ин. 1:29). Обрето́хом в се́ни зако́на благода́ть и и́стинну Самого́ Иису́с Христа́. Гряди́, и ви́дим сла́ву Его́ – сла́ву я́ко Единоро́днаго от Отца́, испо́лнь благода́ти и и́стинны. Такова́я бесе́дуя Нафана́илу изрече́ вели́кий Фили́пп, с ни́мже и после́дова Го́сподеви, жела́емых коне́ц зря, исполня́яся неизрече́нных зри́тель и таи́нник быва́я боговочелове́чнаго смотре́ния и е́же в си́ле Божества́ соверша́емых зна́мений. Егда́ же Госпо́дь ко спасе́ной стра́сти гряды́й наслажда́яше ученики́ боже́ственаго уче́ния, и я́ко хо́щет ити́ ко Отцу́, я́ко Той и Оте́ц еди́но есть. Егда́ же рече́ Фоме́: «Аз есмь путь и и́стинна и живо́т, веды́й ко Отцу́. И а́ще Мя бы́сте зна́ли, и Отца́ Моего́ зна́ли бы́сте. И уже́ позна́сте Его́ и ви́десте», – тогда́ вели́кий Фили́пп теле́сными очи́ма взыска́ ви́дети Отца́, рече́ Го́сподеви: «Го́споди, покажи́ нам Отца́, и довле́ет нам» (Ин. 14:9). Се же рече́, мня, я́ко Христа́ уже́ изве́стно зна́ет, не зна́ет же Отца́. Сего́ ра́ди рече́: «А́ще и тма́ми глаго́леши нам, я́ко а́ще мы бы́сте зна́ли, и Отца́ Моего́ зна́ли бы́сте у́бо, не мо́жем та́ко уве́дети Отца́ – покажи́ у́бо нам теле́сныма очи́ма». Таково́е же умышле́ние Госпо́дь уставля́я, рече́ ему́: «Толи́ко вре́мя с ва́ми есмь, не позна́л еси Мене́, Фили́ппе. Ви́девый Мене́, ви́де Отца́. Аз есмь Сия́ние и О́браз соста́ва О́тча, Аз есмь Сло́во и Прему́дрость Бо́жия, Аз есмь Десни́ца Вы́шняго. И по боже́ственому существу́ не мо́щно есть ви́дети Отца́, ни Мене́, но теле́сне у́бо Мене́ зри́ши, поне́же плоть ношу́. А́ще у́бо и пл́отию с ва́ми есмь, но Божество́м на престо́ле со Отце́м и Ду́хом. Вся исполня́ю, я́ко неопи́сан сый. И сего́ ра́ди нево́зможно есть ви́дети теле́сне Отца́, ни Мене́ по боже́ственому существу́. Ты же толи́ко вре́мя после́довал еси́ Мне, зна́мения же ви́дел еси́ и боже́ственая дела́ такова́я в си́ле Божества́, е́же растле́нных сме́ртию и в преиспо́дняя сведе́ных сло́во возва́ние на живо́т. Сия́ не воздвиго́ша ли тебе́ к позна́нию Божества́ Моего́? Прокаже́ных оструга́ние сло́ва лопа́тою, и разреше́ние связаных соу́зы злых бесо́в, и дарова́ние слепы́м сла́дкаго све́та зре́ние – не просвети́ша ли о́чи мы́сли твоея́ к све́ту боже́ственаго Ми естества́? Разслабле́нием окая́нне пове́рженых на одре́ и сокруше́ным коле́ном и пле́жущим ско́рое риста́ние не возбы́стриша ли мысль ума́ твоего́ к си́ле Божества́ Моего́? Не тла́чный путь мо́ря верху́ того́ вод ше́ствуема немокрено нога́ма Мои́ма и запреще́ние боже́ственых Ми слове́с у́бо я́вльшеся неустрое́ние во́лнам и воста́ние ве́тру не ви́дел ли еси́? И и́на пресла́вная не то́чию не ви́де, но ни слы́ша земны́х ме́ртвеное существо́? Сия́ вся не вразуми́ша ли тебе́ позна́ти Мене, я́ко Бо́га, да Мене́ ра́ди и Отца́ позна́ти возмо́жеши? Ны́не же от таковы́х зна́мений боже́ственых разуме́й свет Божества́ Моего́, и во све́те того́ свет Отца́ познава́й: во све́те бо свет обрета́ется, и я́ко еди́но существо́ Мне же и Отцу́ в разделе́нии соста́в, яко и глаго́лы, е́же рече́ Оте́ц, та́ко и Аз глаго́лю. Не глаго́лы же то́чию, но и дела́, е́же Аз творю́, Оте́ц твори́т. И а́ще Оте́ц твори́т, Аз творю́. Те́мже ве́руй, я́ко Аз во Отце́ и Оте́ц во Мне, и разуме́в Божество́ Мое́, и О́тче разуме́й. Хотя́й же теле́сне ви́дети Отца́ – явле́но, я́ко не ве́рует ни Мне, ни Отцу́ е́же бы́ти Бо́гу. Сего́ же ра́ди па́че ве́руйте, я́ко не то́чию Аз такова́я боже́ственая дела́ могу́ твори́ти, но и ве́рующим в Мя могу́ дарова́ти такова́я же твори́ти и бо́льша сих, е́же и вы последи́ и́мате сотвори́ти во сла́ву Отца́ о и́мени Мое́м». Егда́ же Госпо́дь по спасе́ней стра́сти и сла́внем Воскресе́нии на небеса́ возне́с предприя́тое естество́ и на престо́ле О́тчи сла́вы посади́ и обетова́ние Свята́го Ду́ха излия́, и́мже я́ко мо́лния раждеже́ся вели́кий Госпо́день апо́стол, потече́ на пропове́дание и боже́ственою си́лою такова́я дела́ соверша́я по обетова́нию Госпо́дню. Проходя́ у́бо во Афи́нех и пропове́дая сло́во, архиере́й Иуде́йский, архигра́моте нарица́емь, слы́шав такова́я, прии́де от Иерусали́ма и устреми́ся е́же му́чити богопропове́дника. Госпо́день же апо́стол ослепле́ние наведе́ тому́ и су́щим с ним, ве́ровавших же па́ки просвеща́ет, о́ного же в пе́рвей хуле́ пребыва́юща повеле́ земли́ пожре́ти. Такова́я соверша́я дела́, егда́ прии́де во Иерапо́ль, Ариста́рх, собо́ру нача́льник, прикосну́ся су́рове с я́ростию власо́м свяще́нныя апо́стольския главы́, ею́же Госпо́дь освяти́. Во мно́гих же по́льзу и того́ уцелому́дрити хотя́, сло́вом сотвори́ его́ всего́ кло́сна, сле́па же и глу́ха и не́ма – и па́ки исцели́. Такова́я соверша́я дела́, егда́ ви́де ме́ртва носи́ма, рече́ ти́хо: «Феофиле», ‐ и а́бие воста́ ме́ртвый. Приложи́в же рече́: «Воставля́ет тя Христо́с». Глаго́лаше же всем, я́ко от те́мных князь и та́ртар изба́влен бысть таковы́м гла́сом. Такова́я соверша́я дела́, вся́ку бесо́вскую пре́лесть потреби́ и искорени́, и и́стинныя ве́ры богоразу́мием вся язы́ки просвети. О́, дела́ не смышле́нием и рука́ми челове́ческими состро́ени, но и́хже Оте́ц я́ко Ум мы́сли и в после́дняя ле́та в Сы́не объяви́! О́, дела́ не сло́вом науче́ния челове́ческа объявля́еми, но Сы́ном и Сло́вом Боже́ственым, И́мже вся бы́ша, и на кончи́не време́н е́же в плоть Того́ прише́ствием челове́ком я́ве бы́ша! О́ дела́, не ду́хом ми́ра, но Ду́хом Боже́ственым соверша́ющим вся́ческая, споспе́шествуема и де́йствуема! Не при животе́ же то́чию такова́я дела́ соверша́я Госпо́день апо́стол, но и по оше́ствии е́же от зде су́щих. Тако́в же у́бо бя́ше страда́льный коне́ц: е́мше у́бо того́ безбо́жнии, по сто́гнам влачи́ша, проверте́вше тому́ гле́зне и пя́те, попра́вшая зми́ему главу́, и пове́сиша стремгла́в. А́ще у́бо и ра́достно тому́ бя́ше е́же разреши́тися и со Христо́м бы́ти, но показа́я, я́ко всем стра́шно ча́ша сме́ртная, и мно́ги е́же по возду́хом истяза́теля и́мамы, па́че же смире́нием веды́й, помоли́ся си́це: «Яви́ся, Го́споди, и помози́ ми, и изба́ви мя от руки́ кня́зя и вла́сти и миродержи́телей тмы, да не покры́ет мене́ те́мный тех возду́х, ни дым их помрачи́т ду́шу мою́. Укрепи́ мя, Го́споди мой, Го́споди, да преиду́ о́гненыя во́лны и глубины́ бездо́нныя, я́ко да не потопле́н бу́ду в них. Да не обря́щет враг оклевета́ти мя, но да преиду́ миродержи́теля и лука́ваго вожда́ их, и та́ко явлю́ся пред Тобо́ю непоро́чен, и восприиму́ Тобо́ю обеща́нная святы́м Твои́м». О́ле вели́каго и благоподража́ннаго смире́ния! О́ле неизглаго́ланнаго смиреному́дрия богопропове́дника! Ка́ко можа́ху тому́ прикосну́тися те́мнии кня́зи, его́же Госпо́дь не ктому́ нарече́ раба́, но и дру́га, и обеща́, иде́же Той, и тому́ всели́тися е́же зре́ти сла́ву Его́, и не то́чию не суди́ма, но судию́ сопресто́льна Того́ рече́ бы́ти? Сия́ вся ве́дый, смире́нная па́че изво́ли, и́же не поврежа́ют, но па́че укрепля́ют такова́я. Сего́ ра́ди таковы́я моли́твы источи́ глаго́лы и в Ганеси́тех испусти́ дух в ру́це Госпо́дни. И а́бие трус ве́лий бысть, и просе́деся земля́ и вся безбо́жныя поглоти́, ели́цы же обрати́шася, спасе́ни бы́ша. Госпо́день же апо́стол отъи́де со дерзнове́нием и яви́ся лицу́ Пречи́стаго Отца, Его́же жела́ше ви́дети во пло́ти, и ны́не разреши́вшимся тому́ зерца́лом пло́ти чи́сте узре́ Того́, и лице́ Единоро́днаго Сы́на и лице́ Свята́го Ду́ха, Трисостав́наго Еди́наго Бо́га, и я́ко слуга́ при́сный предста́ стра́шному Того́ престо́лу, и́же и нам про́сит без вре́да премину́ти те́мный возду́х лю́тых миродержи́телей и яви́тися без стра́ха лицу́ Госпо́дню, и́же ве́рою пра́зднующих честна́го его́ страда́ния и све́тлый день боже́ственныя па́мяти его́, во́ньже коне́ц узре́ жела́емых о Саме́м Христе́ Иису́се Го́споде на́шем, Ему́же подоба́ет вся́ка сла́ва, честь и держа́ва со Безнача́льным Отце́м, и Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.

Стихи́:

Возвы́сився, Фили́ппе, от ногу́ на дре́во:

Нога́м твои́м стопы́ омыва́ет:

Пове́шен стрем быв, Филиппе, в четве́ртый на́десять.

Фили́пп апо́стол бе еди́н от двоюна́десяте апо́столу. Бе же от Вифсаи́ды Галиле́йскаго гра́да. По Вознесе́нии же Госпо́дни, Свята́го Ду́ха благода́тию пропове́дая Христа́, мно́га чудеса́ сотвори́ при Троя́не цари́ прии́де в зе́млю Халу́гу, и́же есть ны́не Ерапо́ль, пои́м с собо́ю дще́рей свои́х седмь, и с Мариа́мнею сестро́ю свое́ю и с Варфоломе́ем апо́столом, и уча́ше сло́ву Бо́жию, и моля́ше неве́рныя отступи́ти от льсти и́дольския: име́яху бо ехи́дну, и ту я́ко Бо́га чтя́ху, и же́ртву полага́ху ей. И мно́зи от них ве́роваша Фили́ппу, в ни́хже бе и Никоно́ра жена́ анфипа́това. И то уве́дав анфипа́т, я́ко жена́ его́ ве́рует во Христа́, и им апо́стола свята́я, мно́гими му́чив ра́нами. Посе́м пове́сиша Варфоломе́я стремгла́в и Фили́ппа по стене́ гра́дней. Ви́сящу же Фили́ппу и моля́щуся, внеза́пу разсе́деся земля́ и пожре́ неве́рныя – анфипа́та и ехи́дну, жреца́ ея́. Па́ки же помоли́вшу Фили́ппу за ня, изыдо́ша вси от про́пасти, ра́зве анфипа́т и ехи́дна не изы́доста. Разреше́н же бысть Варфоломе́й и Мариа́мна от уз, Фили́пп же ту скончася.

Вели́кому царю́ Иустиниа́ну, прии́мшу ца́рство в Константи́не гра́де, с цари́цею свое́ю Феодо́рою: и́же благоче́стно пожи́ста, со всем оправда́нием. Той воздви́же це́рковь святы́я Софи́и, я́же есть Прему́дрость Бо́жия, пре́жде су́щу созда́ну вели́ким царе́м Константи́ном. Иустиниа́н же купи́ до́мы мно́ги, и безчи́сленно мно́жество зла́та дав: и созда́ це́рковь вели́кую, я́коже диви́тися всем зря́щым вели́честву и красоте́ ея́. И от того́ ме́ста уста́ви таковы́я пра́здники Христо́вы: Прежде Благове́щение святы́я Богоро́дицы Мари́и. Второ́е, Рождество́ Го́спода на́шего Иису́са Христа́. Тре́тие, Просвеще́ние. Четве́ртое, о стра́сти спаси́тельный день. Пя́тое, пресла́вное Воскресе́ние Христо́во, в не́же в преиспо́дних быв Изба́витель, и воскреси́ с Собо́ю пра́ведныя и ве́рные. Шесто́е, на небеса́ Вознесе́ние Его́, я́ко в четве́ртое неде́льнаго дне бысть. Седмо́е, день Соше́ствия Свята́го Ду́ха. Осмо́е, ча́емое всех ме́ртвых воскресе́ние, ве́лий непреме́нный день. Тогда́ нача́ша пра́здновати и́стинно, со мно́гою ра́достию и весе́лием, хотя́щии насле́дити е́, и́хже о́ко не ви́де, ни у́хо слы́ша, ни на се́рдце челове́ку взы́де, я́же угото́ва Бог лю́бящым Его́. При том же, и пя́тый собо́р бысть святы́х отец ста и шести́десяти и пяти,́ в лето два́десять шестое ца́рства его́, на Ориге́на и его́ нечести́вое преда́ние. Сам же в пра́вде и благоче́стии пожи́в, ца́рствова лет три́десять и де́вять. И упра́вив Це́рковь Христо́ву, у́спе с ми́ром, и с благове́рною цари́цею. Ею́же моли́твами бу́ди и нам улучи́ти ми́лость Го́спода Бо́га и Спа́са на́шего.

Флавиа́ну патриа́рху прии́мшу престо́л Антиохи́йский, и ходя́щу ему́ в епи́скопии церко́вней, и творя́щу нощно́е правле́ние пе́ния, яви́ся а́нгел Госпо́день глаго́ля к нему: Воста́в зау́тра иди́ в монасты́рь, иде́же есть избра́нник Божий Иоа́нн, и того́ приве́д поста́ви пресви́тером: хо́щет бо Бог им мно́ги лю́ди просвети́ти, и на уве́дение Себе́ привести́, и показа́ти единора́вна его́ апо́столом, сосу́д бо избра́н есть Богу: се же и к нему́ по́слан есмь от Бо́га, пове́дати ему́ не ослу́шатися ни в чем же, но сотвори́ти все глаго́лемое от тебе́. Бя́ше же Иоа́нн в той час во отхо́дней свое́й кле́тце, творя́ обы́чныя мольбы́, и моле́ния к Богу. Внеза́пу же у́бо прии́де к нему́ а́нгел Госпо́день, во оде́жди све́тле: его́же ви́де Иоа́нн, убоя́ся зело́, и паде́ на зе́млю ниц, трепе́ща весь. Емь же и а́нгел, возста́ви глаго́ля: Воста́ни, не бо́йся: яви́ся же ему́ а́нгел я́ко челове́к. Иоа́нн же ум собра́в, рече́ к нему́: Кто еси́ ты го́споди, поне́же вид твой возмяте́ мя, и у́жас нападе́ на мя? Сей же отвеща́в рече́ ему: Аз есмь а́нгел Госпо́день, и по́слан есмь к тебе́ пове́дати Бо́жию благода́ть, ю́же прии́меши ны́не. Иоанн же рече́: Молю́ся ти го́споди мой, не сотвори́ мя сту́дна, ни от ра́внаго сего́ жития́ отлучи́ мене́, и от дружи́ны сея́ бра́тии моея́. Отвеща́в же па́ки а́нгел рече́ к нему́: Глаго́лавый к Моисе́ю: «Дам тя бо́га фарао́ну», Той есть мо́щен и о тебе́ сотвори́ти: и сие́ глаго́лав а́нгел, отъи́де от него́. И бысть у́тро бесе́дующу ему́ к бра́тии. И се приидо́ста к нему́ два от кли́рик Флавиа́новых, пове́дающа прихо́д его. Вели́кий же Иоа́нн, и вся бра́тия изше́дше вон из монастыря́, срето́ша его́ и поклони́шася ему́, и внидо́ша с ним в монасты́рь. Воззре́в же патриа́рх к блаже́нному Иоа́нну, рече́: Мир тебе́ цели́телю боля́щих душе́ю и те́лом, и подража́телю святы́х апо́стол, воста́в поиди́ с на́ми, да сотвори́м во́лю Госпо́дню о тебе́. И введо́ша преподо́бнаго Иоа́нна на поставле́ние пресви́терскаго чи́на. Бысть же чу́до изря́дно в той час: сему́ бо прекло́ньшу главу́, егда́ епи́скопу ру́ку возложи́вшу нань, и наче́ншу моли́тву сано́вную. Внеза́пу яви́ся го́лубь бел над главо́ю блаже́ннаго Иоа́нна. Ви́дев же епи́скоп сие́, и вси и́же с ним, ужасо́шася, чудя́щеся на долг час. Пропове́дажеся сло́во сие во всем гра́де. И пребы́сть во антиохи́йстей Це́ркви, ле́та два. Возвеще́но же бысть о нем Аркадию царю, и посла́в приведе́ его́ че́стно на патриа́ршество в Константи́нь град. Бо́гу на́шему сла́ва, ны́не и при́сно, и во ве́ки веко́в. Ами́нь.