Стихи́:

И́же горта́нем Па́вел ши́ею удавле́ние прие́млет:

Разреша́ет удавле́ние горта́нным тече́нием:

Да его́же испове́да Па́вел в шесты́й удавле́н бысть.

Па́вел Испове́дник бысть от Селу́ня, учени́к бысть Алекса́ндра патриа́рха, диа́кон и́же в Константи́не гра́да святы́я це́ркве. Его́же правосла́внии по сме́рти Алекса́ндрове патриа́рха поста́виша его́ патриа́рхом Константи́ня гра́да. Конста́нцие же царь, ариа́н сый, возврати́ся от Антио́хия и согна́ его́ с престо́ла и вме́сто его́ поста́ви Евсе́вия Никомиди́йскаго. Сий вшед в Рим обре́те вели́каго Афана́сия изгна́на из престо́ла своего́. И писа́нием у́бо царя́ Конста́нта прие́млют о́ба своя́ престо́лы, и па́ки изгна́ны бы́ша Конста́нциевым сове́том ариа́нским. Тогда́ пи́шет Конста́нт к брату своему́ Конста́нцию, я́ко а́ще не прии́мут престо́лы своя́, прииду́ си́лою и ору́жием на тя. И па́ки Па́вел прия́т престо́л свой [на ма́ло вре́мя], и по сме́рти Конста́нтове заточе́н бысть в Ку́косы арме́нския и затворе́н бысть во хра́мине, и та́мо служа́ удавле́н бысть от ариа́н свои́м омофо́ром, преда́сть ду́шу Господеви.

Во осмонадеся́тое ле́то Льва вели́каго царя́, в шесты́й день ное́мврия ме́сяца, в полу́дне все не́бо о́блачно бысть и те́мно. И по чрезъесте́ственней те́мности, о́блацы во о́гненное виде́ние прело́жьшеся. И та́ко бысть до четы́редесятих дней. И всем мня́щым тогда́, я́ко огне́м попалена́ бу́дет вся земля́, я́коже дре́вле о́гненный пла́мень пожига́яй Содо́м. И толи́ко всех ужаси́, я́ко то́чию еди́нем виде́нием мнети, я́ко дождю́ сни́ти от таковы́х о́блак. И недоуме́ннаго ради чаяния таковаго, царю́ Льву, и патриа́рху Генна́дию, и народом всем, по всегда́ со кресты и ико́нами ходя́щым, и к свяще́нным це́рквам притекающым, с моли́твами и моле́нии сле́зными Бо́га моля́ще, да отврати́т гнев Свой. Человеколю́бец же Госпо́дь, преложи́ преще́ние на милость: повеле́ о́блаком дождити необы́чен дождь и стра́нен, страх творя́ согреша́ющым. Ибо от вече́рняго часа́ нача́ ити́, да́же и до полу́нощи: сходя́щее же бя́ше прах черн, и зело́ горя́щь, подо́бящься пе́щному пра́ху, ре́кше пе́пелу: я́ко обрести́ся ему́ верху́ земли́, и на ку́щных стре́хах па́дшу, я́ко пя́ди му́жеския бо́ле, и пожже́ и попали́ я́же от земли́ прозя́бшая бы́лия. Бысть же зело́ ужа́сно. Бо́жий гнев явля́ет, и грехи́ вообража́я ты́кая в лице́. Мно́гим бо и вели́ким зело́ дожде́м во мно́ги дни низходя́щым, едва́ не́когда возмо́же отмы́тися таковы́й прах, явля́ющий прегреше́ний ве́щи я́же в нас. Егда́ же огню́ тому́ и че́рному пра́ху лежа́щу, и вся добропло́дная возраще́ния снеда́ющу, мно́гия сле́зы христиа́ном быша, и лю́тое рыда́ние от са́мыя глубины́ сердеч́ныя, со стена́нием и го́рестию душе́вною хли́пющым, да зло́бный пла́мень ды́мный отъи́мет, и до́брую зе́млю у́мную влажи́мую, плодоноси́ти угото́вит, и гее́нская муче́ния угонзну́ти, попаля́ющаго па́дающих с душа́ми и телесы́, и Ца́рствия Небе́снаго получи́ти сподо́бит.

Стихи́:

Уго́дная Лука́ соде́яв Бо́жию Сло́ву,

И по см́ерти со уго́ждьшими Ти честь име́я.

Сей блаже́нный оте́ц наш Лука́, бя́ше от гра́да Тавромени́йскаго, Сикели́йския о́бласти. Юн сый во́зрастом, я́ко осмина́десяте лет, приле́жно упражня́яся бя́ше по це́рквах Бо́жиих: и боже́ственным словесе́м послу́шатель быв и творе́ц. Да яко роди́телие его́, совеща́ша жену́ ему́ припрящи́, и той в нощи воста́, и в непроходи́мое ме́сто отше́д, со зверьми́ живя́ше. Четы́редесять дней а́лчен пребы́в, боже́ственнаго и а́нгельскаго сподо́блен быв посеще́ния, дости́же оби́тели не́которыя: и наложи́ а́нгельский о́браз на ся, и в жесточа́йшее житие́ себе́ вдав: за три бо или четы́ре дни вкуша́ше ма́ло хле́ба и воды́. И весма́ теле́сно не почива́ше, сверши́ год и полови́ну. И отту́ду дви́гся прии́де с не́ким мона́хом во Етни́йскую го́ру, и от та́мо расту́щих зе́лий пита́яся. И есте́ственныя ра́ди ну́жди ма́ло поседа́ше, и о́во ма́ло полега́ше, в еди́ной своей́ ри́зе и бос. Уста́в же бя́ше ему́ и пра́вило утверже́ное, е́же не исходи́ти из ке́ллии, доне́леже соверши́т псалти́рь весь. Та́же пра́вило к тре́тиему ча́су соверши́ти. Про́чая же дни де́лу прикаса́шеся, доне́леже шесто́му ча́су вре́мя наста́нет. И по шесто́м часе́ о ма́лом вкуше́нии печа́шеся, и про́чаго служе́ния не оставля́ше. В сих же бо сей благода́ти вели́цей сподо́блься, и разреше́ние слове́с сугубомы́сленых уразуме́в, я́ко некоторым недоумева́ющымся глаго́лати, отку́ду сей весть кни́ги? И по сих открове́нием не́кое ме́сто дости́г, и двана́десять мона́хов собра́в, и о сих прилежа́ше. И таковы́я ра́ди вины́, прии́де в Византи́ю, и обше́д мона́шествующих пребыва́лища, и отце́м приобщи́вся. Обрати́вся до́йде да́же и до Кори́нфа, и в не́которой ве́си обита́в не вя́щше седми́ ме́сяц, и с ми́ром у́спе.

Ви́ктор святы́й му́ченик бе от гра́да Кори́нфа христиа́ну роди́телю сын. И сам же [в] до́брых де́лех прилежа́. В то же вре́мя воста́ гон́ение на христиа́ны. Прише́дшу Фео́кту иге́мону в Кори́нф, и повеле́ пожре́ти Артеми́де, и тогда́ не́цыи насочи́ша ему́ Ви́ктора, укаря́ет бо́ги и христиа́на себе́ испове́дает. И повеле́ привести́ его́ ну́ждею, и рече́: Ви́кторе, а́ще отве́ржешися Христа́, то царю́ зна́емь бу́деши, и зато́ мно́го от него́ прии́меши. Мне же друг бу́деши и всем боля́ром. А́ще ли не послу́шаеши мене́, ве́дый бу́ди я́ко го́рькия му́ки ждут тебе́. Име́ние е́же в царе́ву ри́зницу вдано́ бу́дет, и род твой расточу́, а те́ло твое пове́ржено бу́дет псом. Ви́ктор же рече́: Глаго́лет Христо́с Бог мой, и́же лю́бит отца́ или́ ма́терь, и жену́ и де́тий и зла́то, ли се́ла, ли притяжа́ния па́че Мене́, не и́мать вни́ти в Ца́рство небе́сное. Ны́не у́бо веждь иге́моне, я́ко не хощу́ вре́менных, но ве́чных жела́ю . Разгне́вав же ся иге́мон, повеле́ растя́гши би́ти сукова́тым же́злием. Посе́м связа́вше ему́ ру́це, пове́сиша и на дре́ве, и свеща́ми ре́бра его́ пожго́ша. И сне́мше и́ с дре́ва по чрепо́м о́стрым влеча́ху и́. В я́звы его́ лия́ху лю́тый о́цет и ничто́же рече́, я́ко позо́рующими вельми́ похвале́н бысть. И егда́ бысть ему́ преда́ти ду́шу, и не́кто от друг его́ приступи́в рече́: О́ Ви́кторе, что та́ко умира́еши, не обряди́в своего́ име́ния. Ны́не у́бо да ти вре́мя испрошу́ ма́ло. И повеле́ Ви́ктор та́ко тому́ бы́ти. Еди́н же приступль иге́мону и рече́: Пусти́ Ви́ктора, да его́ накажу́ и по́жрет и́долом. И ту а́бие му́чащии преста́ша, и вси ре́ша, яко отве́ржеся Христа́. Ви́ктор же в темни́цы у́мре от ран. Но никто́же да не помы́слит, я́ко не прии́мет венца́, не бо сам испроси́л вре́мени у кня́зя, но е́ллин о себе́ глаго́л[а], ему́же бу́ди ана́фема, му́ченику же Христо́ву Ви́ктору ве́чная па́мять.

Село́ есть близ Кор́инфа нарица́емое Мал, иде́же святы́я де́вы имя́ху оте́чество христиа́ны су́ще, и в чистоте́ живу́ще, и посто́м и бде́нием Бо́гу угожда́юще. Егда́ же свята́го му́ченика Алекса́ндра ту приве́дше уби́ша мече́м, и те́ло его́ в Мику́су реку́ вверго́ша. Святы́я же де́вы ту прише́дше пла́кахуся. Ви́девше же во́ини, напра́сно связа́ша я́, и приведо́ша я́ ко кня́зю: и пону́ди я́ пожре́ти и́долом, и не покори́шася. И повеле любоде́йцем поя́ти я́, и обруга́ти. И собра́вшеся ини́и, поя́ша я́ в блуди́лище. Си́и же со слеза́ми моля́хуся глаго́люще: Го́споди, Ты ве́си я́ко во вся дни на́ша сохрани́хом чи́сто де́вство на́ше, и ны́не я́коже хо́щеши, изба́ви ны. Прия́т же Теку́су еди́н блудни́к. Она́ же со слеза́ми седи́ны своя́ каза́ше моля́щися. И устыде́вшеся они́, отъидо́ша, оста́вльше де́вы, ника́коже оскверне́ны. И се уве́дав князь, повеле́ ю́ным мно́ги ра́ны да́ти. И призва́в Теку́су, рече́: Пожри́ куми́ром, и сотворю́ тя омыва́льницу куми́ром. И бу́деши старе́йшина жри́цам, и мно́ги че́сти прии́меши от царя́. А́ще ли [ни], то го́рце му́чени бу́дете, и телесы́ ва́ша во глубину́ е́зера вве́ржена бу́дут. Свята́я же Теку́са рече́: твори́ е́же хо́щеши, не могу́ у́бо ю́ных обольсти́ти от Бо́га Жи́ва, и болва́ном поклони́тися. И повеле́ обнажи́ти святы́я де́вы, и свя́заны вести́ к е́зеру на поруга́ние всем. И навяза́вше ка́мение велиќо на вы́я их, и вло́жше я́ в корабле́ц, посреде́ е́зере погрузи́ша я́. и в ту нощь яви́ся свята́я Теку́са Феодо́ту корчми́ту, и рече́: Попецы́ся о телесе́х на́ших, я́ко и ты сам по двою́ дни́ю прии́деши ко Христу́. И прише́д в полу́нощи Феодо́т, обре́те мо́щи святы́х деви́ц, и погребе́ на ме́сте зна́еме. И в тре́тий день ят бысть Полихро́ний и с Феодо́том погреба́вшим святы́я, и не стерпе́вше мук, насочи́ша о телесе́х святы́х. И повеле́ мучи́тель сожещ́и я́ огне́м.

Во Антиохи́и Си́рстей бе монасты́рь, в не́мже бе Иоа́нн Златоу́стый пости́глся. Ту бысть чернори́зец си́рин ро́дом, и́менем Иси́хий, состаре́вся те́лом. И сотвори́ ле́та мног в нем, воздержа́яся, и же́стоце живы́й вельми́, име́яше же прозо́р Бо́жия явле́ния: сего́ подража́ше блаже́нный Иоа́нн, нра́вом и о́бразы и воздержа́нием. Во еди́ну же у́бо нощь бдя́щу ему́ и моля́щуся к Бо́гу, ви́дев два му́жа вше́дша ко Иоа́нну, иде́же бе́яше мольбы́ своя́ творя́, облече́на во оде́жду бе́лу и чи́сту, ле́па же зело́ и просвеще́нна сла́вою небе́сною и неисповеди́мою, еди́наго же ви́дяше держа́ща в руце́ свое́й сви́ток напи́сан, а друга́го ключы́ держа́ща. Я́же ви́дев Иоа́нн, в боя́зни быв, и со дерзнове́нием потща́вся, поклони́ся и́ма до земли́. О́на же же о́ба и́мша и за ру́ку, возста́виста и глаго́люща: Упова́й и не бо́йся. Сей же рече́ к ни́ма: Кто еста́ господи́на моя́, и́мже не преоби́деста приити́ ко мне рабу́ ва́ю в такове́ю су́ща са́ну: ни бо есмь николи́же никого́же ви́дех в такове́й су́ща сла́ве, я́коже ва́ю ви́жу. О́на же отвеща́ста паки и реко́ста ему́: Не бо́йся му́же жела́ния, в не́мже изво́ли жи́ти Святы́й Дух, чистоты́ ра́ди жития́ твоего́. По́слана бо есма́ к тебе́, от вели́каго Учи́теля, и Спа́са на́шего Иису́са Христа́, пове́дати тебе ра́дость вели́ку, я́же буд́ет всем це́рквам Бо́жиим. Просте́р же пе́рвый ру́ку свою́, подаде́ ему́ напи́санный сви́ток, его́же держа́ рек: Приими́ сви́ток сей от руку́ мое́ю, аз есмь Иоа́нн, припа́дый на пе́рси Госпо́дни, на та́йней ве́чери: отту́ду поче́рп боже́ственный ка́пли, и бесе́дова: в нача́ле бе Сло́во, и Сло́во бе к Бо́гу. Та́ко и тебе́ даст Госпо́дь и́стины ве́дение, я́коже корми́ти твои́ми усты́ вся лю́ди, я́дию неги́блющею, но пребыва́ющею в жизнь ве́чную, и загради́ти ерети́ческая уста́, глаго́лющая беззако́ние на Го́спода на́шего Иису́са Христа́. А други́й просте́р ру́ку свою́, подаде́ ему́ и той, я́же держа́ше в руце́ свое́й ключи́, глаго́ля: Приими́ сия́: аз бо есмь те́плый ве́рою Петр, испове́давый Го́спода Христа́ Бо́га Жива́го су́ща. И сего́ ра́ди прия́х от Него́ ключи́ Ца́рствия небе́снаго. Та́коже и тебе́ Госпо́дь даст ключи́ церкве́й святы́х Его́. И его́же а́ще свя́жеши, бу́дет свя́зан. И его́же разреши́ши, бу́дет разреше́н, Па́ки у́бо поклони́в коле́на своя́ блаже́нный Иоа́нн, поклони́ся им глаго́ля: кто есмь аз раб Го́спода моего́ гре́шный, и всех челове́к ху́ждший, да бу́ду дово́лен на то, о не́мже глаго́ласте. Несмь досто́ин толи́ки, и вели́ки, и стра́шны прия́ти слу́жбы: не могу́ у́бо аз проти́ву ей бы́ти. Си́и же па́ки и́мше и за десну́ю ру́ку, возста́виша и глаго́люще: Ста́ни на но́гу твое́ю, возмози́ и крепися, и сотвори́ все е́же ти повеле́хом, и не пота́й да́ннаго ти да́ра от Бо́га, на глаго́лание и на освяще́ние, и утверже́ние люде́й Его́ уче́нием твои́м, и́хже ра́ди кровь свою́ пролия́, да спасе́т от пре́лести мно́гия: и глаго́ли сло́во Бо́жие без сумне́ния. Воспомяни́ Го́спода ре́кшаго: не бо́йся ма́лое мое́ ста́до, ему́же изво́ли Оте́ц Мой да́ти Ца́рство: и ты у́бо не бо́йся и́мже благоизво́ли Христо́с Бог наш, тобо́ю освяти́ти мно́ги ду́шы, и на уве́дение свое́ привести́. И́маши же в печа́ли в ско́рби мно́ги дни прейти́, пра́вости ра́ди душе́вныя твоея́. И ты терпи́ я́ко кре́пкий тре́звеник, тем бо ца́рство прии́меши. Сие́ же си́ма ре́кшема, и назна́менавшема чело́, и вся у́ды его́: и да́вшема и́ма ему́, е́же о Го́споде целова́ние, и отъидо́ста. Иоа́нн же сотвори́ в себе́ жили́ще Святаго Ду́ха, и нача́т учи́ти ве́ре Бо́жии.

Преподо́бный отец́ наш Варлаа́м роди́ся в Но́вгороде Вели́цем от роди́телю благове́рну и богобоя́зниву и воспита́н бысть до́бре в наказа́нии Госпо́дни, извы́че всю хи́трость кни́жную и псало́мская толкова́ния расмотри́в. И еще́ юн сый, на и́гры с ю́ными челове́ки не исхожда́ше, но огреба́яся от вся́кия мирски́я ве́щи, и бысть сосу́д избра́н Свята́го Ду́ха, и рече́ к себе́: «Пои́стинне житие́ се а́ки сень и сон, и я́ко ко́ло верти́тся», - и возненави́де ми́ра и я́же в ми́ре, оста́вив сла́ву све́та сего́ и мирско́е бога́тство, взы́де в пу́сто ме́сто, име́я наставля́ющаго его́ Бо́га и отца́ своего́ Порфи́рия и брата своего́ Фео́дора и и́ну бра́тию, и́хже добронра́вие по́следь ска́жем. Сий у́бо преподо́бный оте́ц наш Варлаа́м вшед в пу́сто ме́сто вда́ле от гра́да, и постриже́ся во и́ноческий о́браз от не́котораго мни́ха презви́тера, возгради́ себе́ хи́жину ма́лу, иде́же пе́ния и моли́твы день и нощь непреста́нно возсыла́ше Бо́гу, неосла́бно тружда́яся посто́м и бде́нием, де́лая безпреста́ни, древа́ посека́я и ни́вы творя́, понуждаяся сам на дела́ Го́спода ра́ди, храня́ за́поведь апо́стольскую, е́же рече́: «А́ще кто не де́лает, да не яст». По вся бо дни не дадя́ше сна очи́ма свои́ма, боря́ся с бе́сы. Овогда́ от мирски́х люде́й от них науща́еми бя́ху, овогда́ же са́ми лука́вии де́мони хотя́ху низложи́ти блаже́ннаго Варлаама и напа́сти принося́ще ему́ и печали и па́кости, он же вся терпя́ше Бо́жиею десни́цею укрепля́емь. Произы́де же сло́во о нем всю́ду и отвсю́ду собира́хуся к нему́ кня́зи и вельмо́жи и ни́щии. Он же [всегда́] же не ле́ностно Го́спода ра́ди уча́ лю́ди, по вся часы́ нака́зая вся е́же от приходя́щих к нему хранити вся́ку пра́вду. И глаго́ля кро́тким гла́сом: «Ча́да, храни́теся от вся́кия непра́вды, от за́висти, и от клеветы́, и от гне́ва, и лжи, и от резоима́ния, и от крива́го суда́, охаби́теся ходи́ти к ро́те на кри́ве ни води́ти, и от блуда́ воздержи́теся, кро́тость и любо́вь возлюби́те, та бо есть ма́ти всем до́брым дело́м, да не лишите́ся всех благи́х, е́же пра́ведных обеща́ Госпо́дь, а гре́шным обеща́ Госпо́дь му́ку ве́чную, ея́же, ча́да, потщи́теся убежа́ти посто́м и моли́твою и до́брыми де́лы и всено́щным стоя́нием, в день же страдо́ю». И посе́м возгради́ це́рковь во и́мя Свята́го Спа́са Преображе́ния, и бысть монасты́рь че́стен, и бы́ша мно́зи чернори́зцы моли́твою его́, испо́лниша це́рковь чте́ния, и пе́ния и слу́жбы, и бысть ра́дость вели́ка всем христиа́ном и прибе́жище. Снедь же его́ бе со́чиво от земны́х зе́лий, и того́ ма́ло, и хле́ба три ку́сы, и воды́ поску́ду. Чернори́зцы же идя́ху на каза́ние его́ ра́ди, да вси слы́шаще приходя́щеи к нему ра́довахуся, а диа́вол пла́кашеся, ви́дя себе́ побежда́ема по вся дни моли́твою свята́го. Сей же преподо́бный Варлаа́м я́ко исто́чник воды́ живо́тныя оби́льно источа́я, и напая́ше вся уче́нием свои́м. Егда́ же про́мыслом Бо́жиим и его́ моли́твою води́мь Анто́ние, све́рстник его́, и прии́де из Константи́ня гра́да, рад же бысть блаже́нный о духо́внем си бра́те и преда́сть в ру́це его монасты́рь, ему́ рек: «Та́ко вашь и пре́жде сего́ был по́мысл о сем святе́м ме́сте, ны́не же предаю́ его́ тебе́, ты же снабди́ его́ до́бре и соблюди́. Аз же уже́ отхожду́ к Небе́сному Царю́. Я́ко ви́дех тя, рад есмь, уже́ бо зове́т мя Госпо́дь от све́та сего́. Да си́це, бра́тие, те́лом отхожду́, да ду́хом при́сно с ва́ми бу́ду». И та́ко наказа́в бра́тию свою́ вся́кому правове́рию, преда́сть честну́ю свою́ ду́шу в ру́це всех Бо́га, трудолю́бное же его́ и честно́е те́ло погребе́ влады́ка Антон́ие в це́ркви свята́го Спа́са на Ху́тыне с канди́лы и со свеща́ми че́стно. Сконча́в же ся блаже́нный Варлаа́м ме́сяца ное́мврия в шесты́й день на па́мять свята́го Па́вла Испове́дника. Душа́ же его взы́де на небеси́ в ве́чныя оби́тели и в безконе́чное ца́рствие со все́ми уго́ждьшими, моля́ся Бо́гу за христиа́ны. К нему́ же вси рече́м:

О́ преблаже́нный отче Варлаа́ме! Дерзнове́ние име́я ко Влады́це, моли́ся за ны твое́ю свято́ю моли́твою, не оста́ви ме́ста своего́ свята́го и гра́да сего, своея́ отчи́ны, да пода́ст ны Госпо́дь жизнь в ми́ре устрое́ну и ми́лость Свою́ в сий век и в бу́дущий, да не́гли моли́твою твое́ю свято́ю получи́м оставле́ние грехо́в, да бы́хом прича́стницы бы́ли ча́сти избра́нных и десна́го стоя́ния. Ами́нь.

Всем потре́бно есть нам е́же ну́дитися воздержа́тися от объяде́ния, па́че хотя́щим Богу рабо́тати, добро́ я́сти в ме́ру ла́годно . Е́жели не воздержа́тися я́сти подо́бно есть кораблю́ обремене́ну, те́ло бо пи́щи тре́бует, а не сла́сти дово́лая непресы́тия. О́во бо души́ и те́лу подо́бно на здра́вие и кре́пость. О́воже обое́ врежа́ет, не то́чию здра́вие тля́ще, но и неду́г па́костный ражда́юще. Ука́зано бо малояде́нием подви́жнику, я́ко воздержа́й чре́во, удаля́ет грехо́вныя мы́сли. Побежда́емый же бра́шны по́хоти расти́т злы́я. Я́коже бо дрова́ вели́к ражда́ют огнь, та́ко и мно́жество брашен мысли злыя. Сла́дко бра́шно, то́кмо горта́нь весели́т, ко́рмит же червь неусыпа́ющий. Я́коже опусте́вши земля́ те́рние ражда́ет, та́коже и ум велеяди́ваго расти́т блу́дныя мы́сли. Челове́к ласкосе́рдив ча́сто память святы́х твори́т, да чре́ву угодит́, а воздержа́йся, житию́ святы́х подо́бится. Объясти́вый ничи́мже хва́лится, но то́кмо бра́шном мно́гим. Но Дух Живы́й в ласкосе́рдем человеч́е скорбит, и нетерпя́ смерде́ния отхо́дит от него́. Я́коже бо дым прого́нит пче́лы, та́ко и объясти́вый благода́ть Свята́го Ду́ха. Лу́чше бо есть отврещи́ сла́дкая бра́шна, и про́стую пи́щу тре́бование сотвори́ти теле́сное. Да не уподо́бимся на пусты́ни чре́ву рабо́тавшим лю́дем. Седо́ша бо рече́ лю́дие я́сти и пи́ти и воста́ша игра́ть. Тогда́ за́поведь Бо́жию забы́ша, и на идолобе́сие уклони́шася. До́бре у́бо, и насле́дником их пи́шет Па́вел: «И́хже бог чре́во, и сла́ва в студе́ их, мы́сляще земна́я» . И па́ки: «Бра́шна чре́ву и чре́во бра́шну, Бог же та и сия́ да упраздни́т» . И па́ки: «А́ще бра́шна ра́ди скорби́т брат твой, уже́ не по любви́ хо́диши» . И наво́дит: «Такови́и Бо́гу не рабо́тают, но своему́ чре́ву: и добросло́вием прельща́ют сердца́ беззло́бивых» . И па́ки: «Му́дрость пло́тная смерть есть, а му́дрость духо́вная жизнь и мир» . «Добро́ есть благода́тию утвержа́ти сердца́, а не бра́шны» . И па́ки: «Царствие Бо́жие несть пи́ща и питие́, но правда и послуша́ние и мир о Ду́се Святе́» , а не объяде́ние и пия́нство, я́коже Иа́ков понося́ чре́ву, рабо́м глаго́лет: «Весели́стеся на земли́ и наслади́стеся, упите́сте сердца́ ва́ша я́ко в день заколе́ния» . Госпо́дь неве́рным иуде́ем рече́: «Ами́нь глаго́лю вам: и́щете Мене́ не я́ко ви́десте зна́мение, но я́ко я́сте хле́бы и насы́тистеся» . И прирече́: «Не де́лайте бра́шна ги́блющаго, но пребыва́ющее в жизнь ве́чную, е́же Сын Челове́чь даст вам» . [Ему́же сла́ва, честь и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.]