Стихи́:

Ка́мению ника́коже пожре́ти хотя́,

Ана́нию поби́ша ка́мением злочести́вии:

Побие́н бысть Ана́ние на песце́ в пе́рвый.

Сей святы́й апо́стол Ана́ния, бя́ше от гра́да Дама́ска, и́же и Па́вла апо́стола открове́нием крести́, быв епи́скоп в том гра́де. Творя́ мно́гия цельбы́ в Дама́сце, и в Елевферопо́ли, и мно́ги ко Христу́ приве́д. Лукиа́ном иге́моном ят быв, и бие́н волу́ями жи́лами, и ре́бра ему́ опали́ша. И изведе́н бысть из гра́да, и ка́мением побие́н.

Стихи́:

Пе́рвие поя́ше Рома́н Бо́жия Сло́ва:

Пое́т же и ны́не со а́нгелы.

Сий и́же во святы́х оте́ц наш бе́яше Рома́н от Си́рии от Емеси́нскаго гра́да, диа́кон Вири́тския це́ркви. Вшед же в Константи́нь град, в ле́та Анаста́сия царя́, пребыва́ше в це́ркви Пресвяты́я Влады́чицы на́шея Богоро́дицы и́же в Ки́ре, во благоче́стии ходя́. Предстоя́ на всено́щная пе́ния и́же [во] Влахе́рне, и па́ки отхожда́ше в Ки́рех, иде́же и дар бла́гости соучине́нием кондако́м прия́т. Я́вльшися ему́ Пресвяте́й Влады́чице на́шей Богоро́дице во сне и сви́ток кни́жный тому́ да́вши и повеле́вши сне́сти. И отве́рз уста́ своя́ и поглону́ ха́ртию. И бя́ше же пра́здник Рождества́ Христо́ва. И а́бие доше́д в це́рковь, и взы́де на амбо́н и нача́ пе́ти: «Де́вая днесь Пребога́таго ражда́ет». Сотвори́ же и про́чим пра́здником кондако́в до ты́сящи. И та́ко с ми́ром у́спе.

Стихи́:

Лю́тое Домни́н сокруше́ние го́ленем претерпе́,

Запо́ну сатанину́ посрами́в.

Сей бя́ше от Селу́ня. Максимиа́ну царю́ зи́ждущу Селу́нь, ят быв я́ко христиани́н, и предста́ суди́щу его́. Он же с гне́вом рече́ к нему́: Почто́ мне председя́щу во гра́де, ты дерза́я испове́дуеши Бо́га ино́го? Но пожри́ бого́м, а́ще хо́щеши жив бы́ти. Свято́му же не покаря́ющуся, повеле́ содра́ти те́ло его́. Да я́ко ви́дя себе́ поруга́ема, и укоре́на от свята́го, повеле́ извести́ его́ пред гра́дом, и сокруши́ти ему́ коле́на. И отсе́ченыма нога́ма бы́вшема, святы́й му́ченик седмь дней прежда́ терпя́, не вкуси́в пи́щи. И та́ко благодаря́ Бо́га предаде́ Ему́ блаже́нную свою́ ду́шу, Его́же и возлюби́.

Стра́шно и чу́дно виде́ние честно́ю свя́тцу, Андре́я и Епифа́ния, ка́ко вид́еста на возду́се Святу́ю Богоро́дицу, прише́дшу [во] Влахе́рну во святу́ю це́рковь со а́нгелы и с Предте́чею и с Богосло́вом Иоа́нном и со ине́ми святы́ми мно́гими, наро́ду стоя́щу в це́ркви, ви́деста Моля́щуся со слеза́ми к Сы́ну си за весь мир. И глаго́ла Андре́й ко Епифа́нови: «Ви́диши ли Цари́цу и Госпо́жу всех, Моля́щуся за мир?». Он же рече́: «Ви́жу, о́тче». И покры́вши ся честны́м Свои́м амфо́ром, светя́щися па́че еле́ктра, и лю́ди су́щая в це́ркви. Се у́бо слы́шах и помышля́х, ка́ко стра́шное и милосе́рдное виде́ние, па́че наде́яние на́ше и заступле́ние, бысть без пра́здника. Наде́яжеся Влады́чице на милосе́рдная Твоя́ словеса́ е́же к Сы́ну си рече́, моля́щи: «Царю́ Небе́сный, приими́ вся́кого челове́ка, сла́вящаго Тя и призыва́ющаго и́мя Твое́ на вся́ком ме́сте. Иде́же быва́ет па́мять и́мени Твоего́, святи́ ме́сто то и просла́ви прославля́ющая Тя и́менем Твои́м и прие́мля их вся́ку моли́тву и обе́т». Тем словесе́м наде́яся, восхоте́х да не без пра́здника оста́нет святы́й Покро́в Твой, Преблага́я. Но я́коже Ты хо́щеши украси́ти честны́й пра́здник Твоего́ Покро́ва, Всеми́лостивая, украси́, да прославля́ющии Тя возвеселя́тся, ви́дяще многоиме́нный Твой пра́здник сия́юща. И я́коже та́мо су́щая наро́ды в це́ркви ми́лостивно покры́, та́ко и нас гре́шных раб Твои́х, покры́й кро́вом крилу́ Твое́ю, низлага́ющи сове́ты же и ду́мы, помышля́ющих на ны зла́я. И спаси́ ны по ми́лости Сы́на Твоего́ в сий век и в бу́дущий и вся, прите́кающая к Тебе, со стра́хом и ве́рою и наде́ющеся на Тя, ско́рое на́ше Заступле́ние и По́мощь. Учини́ же ся таковы́й пра́здник пра́здновати ме́сяца окте́врия в пе́рвый, в па́мять свята́го апо́стола Ана́нии.