Стихи́:

Ме́дяна твоя́ ре́бра, Ва́кхе к желе́зным уже́м

И к мечу́ Се́ргие, раждеже́ное твое́ сердце:

Се́ргия в седмы́й меч посече́,

Жи́лы же Ва́кха умертви́вша.

Си́и бе́яху при Максимиа́не цари́. У́бо Се́ргие примики́р бе́яше Гонтили́йскаго полка́. Оклевета́ни бы́ша к царю́ и по́слани бы́ша ко иге́мону Антио́ху. И во град Африки́йский ве́дени бы́ша. И а́бие Вакх пе́рвие бие́н бысть жи́лами суро́выми на мно́ги часы́ и в тех му́ках предасть дух. Се́ргие же разли́чно испыта́н. И в сапоги́ желе́зны обуве́н быв, и тещи́ пону́жден быв дале́че. И в тех му́ках главу́ ему́ отсеко́ша.

Стихи́:

Ро́ву пода́нию глубине́, Бог Сло́во,

Обои́м страда́льцем вре́тище в ра́дость претвори́л есть.

Ца́рствующу Клавди́ю в Ри́ме, и свою́ ма́терь уби́вшу Христо́вы ве́ры ради: и от тогда́ не пощаде́ христиа́ны. Тогда́ блаже́нный Кеса́рий от Афро́нския страны́ прише́д, во град Ри́мския держа́вы, глаго́лемый Таракини́й. И я́ко ви́де скве́рныя же́ртвы, поплева́ и попра́ их. И держа́н бысть три дни в темни́це а́лчен, и пре́дан бысть анфипа́ту. И связа́ша ру́це его́ на о́пак, влеко́мь во́ины пред колесни́цею кня́жею, да́же и до це́ркве Аполо́новы. И я́коже к це́ркви приближа́хуся, помо́льшуся свято́му, а́бие паде́ це́рковь от основа́ния, та́ко и со иере́и, и со инеми про́чими подави́ я́. Се же ви́дев Лео́нтий ипа́т, припаде́ ко свято́му, и ве́рова во Христа́: и крести́ его́ святы́й Иулиа́н пред все́ми, и причасти́ его́ пречи́стых Та́ин: и а́бие ипа́ту в ру́це Бо́жии ду́шу преда́вшу, прошением и моли́твами свята́го. Ви́дев же бы́вшее Локсо́рий князь, ят Иулиа́на презви́тера, и Кеса́рия диа́кона, и повеле́ вложи́ти их во вре́тища, и воврещи́ их в мо́ре. Святи́и же к нему́ реко́ша: мы Локсо́рие вмета́еми хо́щем бы́ти в море, ты же лю́тым зми́ем убие́н бу́деши, и зло́ю сме́ртию душу изри́неши: е́же и сбы́сться. По двою́ же дни́ю по песку́ морско́му тому́ ходя́щу, лю́тый змий обви́ся ему́, и по всех удесе́х того́ сокруши́в, и безду́шна, и ме́ртва сотвори́ его́: и наду́вся лежа́ше, позо́рище вели́ко зря́щым быв. Телеса́ же святы́х изше́дше лю́дие прия́ша сия́, и мимохожда́ху иде́же окая́нный он лежа́ше, и́хже ви́дев он, бия́ше себе́. Сын же Лео́нтия ипа́тика, по е́же положи́ти им мо́щи святы́х близ гра́да, отсече́ сим главы́ и в реку́ вве́рже. Куа́рт же презви́тер от гра́да Капу́я, боже́ственным а́нгелом наста́влен быв, прише́д поя́т мо́щи святы́х, и положи́ их в наро́чите ме́сте, во сла́ву Бо́гу.

Стихи́:

Убива́ют мно́зи мечи́ Полихро́ния,

Проти́ву же мече́м и венцы́ прие́млет.

Сей бя́ше от епа́рхии Агафани́дския, отца́ Парда́ния земледе́льца, иже о́трока и кни́гам научи́в: и сим всем после́дствуя. И зане́же не бы́ти воде́, и моли́твою о́трока исто́чник искипе́: мног бо име́яше в ю́ности ра́зум и воздержа́ние. И внегда́ пости́же в ме́ру во́зраста, и ло́зному де́ланию себе́ вдаде́, и к царскому граду по́йде, и рабо́таше ло́зия с про́чими де́латели. За два, и три дни пи́щу вкуша́я, и ма́ло воды́. Ная́вый же его́, диви́ся боже́ственному де́лателю, и наслади́вся его́ доброде́телей, и наме́рив злата дово́льно, посла́ к нему́ рек: «Иди́ во своя́, и моли́ся о мне». Он же прии́м дики́ль свой, и доше́д мно́га чудеса́ показа́. Таже по прия́тии зла́та, це́рковь сотвори́: и в Ниќейстем собо́ре обре́теся чтец сый, и свяще́нническому са́ну сподо́бися. И поне́же вели́кому Константи́ну от жития́ отше́дшу, а́бие А́риеве е́реси наста́вши, и наче́нши мно́зех возмуща́ти. Тем и злове́рнии за́вистию тае́ми, обрето́ша свята́го в же́ртвенице предстоя́ща, и внеза́пу наскака́вше, закла́ша его́ и ссеко́ша его́ мечи́, и смеси́вше его́ с Та́йною и боже́ственною Кро́вию, посла́ша его́ нево́лею свое́ю, же́ртву Свято́му Бо́гу.

Пия́нство па́че объяде́ния пу́ще есть, и зело́ отрече́но святы́ми кни́гами. И́бо неподо́бно есть сим отягча́тися, я́коже безу́мнии хва́лятся, но пома́ле нището́ю боля́т. Добро́ у́бо ма́ло испива́ти не́мощи ра́ди теле́сныя. Я́коже земля́ с го́да напая́ема, чи́сто все́яное в ню се́мя с прибы́тком возрасти́т; мно́гими же ту́чами умача́ема, то́чию бы́лие и волче́ц расти́т. Та́ко и мно́гое питие́ твори́т челове́ка безу́мным в поруга́ние, а му́дрым опла́кание. Рече́ бо Бо́жие Писа́ние: «Ной бе муж пра́веден, и упи́вся лежа́ше наг. От безу́мнаго же Ха́ма пору́ган бысть, а от му́дрою сы́ну покрове́н» (Быт. 9:21-22). Бежи́м у́бо бра́тия пия́нственаго бе́са да не пору́гани им бу́дем, но па́че трезви́мся утверди́м да бу́дет цел вну́трений челове́к. Я́коже и Прито́чник учи́т ны глаго́ля: «Не бу́ди винопи́йца, всяк бо пия́ница обнища́ет» (Прит. 23:20). И па́ки: «Кому́ лю́те, кому́ молва́ и сва́ри и суди́, и прям ‐ и искуше́ние вотще́. Кому́ си́ни о́чи не пребыва́ющим ли в корчме́ и назира́ющим где пи́рове быва́ют» (Прит. 23:28-30). И прирече́: «В вине́ не мужа́йся, мно́ги бо погуби́ло пия́нство» (Сир. 31:29). И па́ки: «Не по́льзует безу́мному пи́ща и питие́. Неи́стово бо и досади́тельно пия́нство и весь примеша́яйся ему́ не бу́дет мудр». Иса́ия же укаря́я в пия́нстве бу́дущих глаго́лаше: «Го́ре квас гоня́щих и жду́щим ве́чера, вино́ бо я́ сожже́т» (Ис. 5:11). Ио́иль же рече́: «Прельще́ни есте́ истрезви́теся упива́ющиися. И пла́читеся рыда́юще па́губы ва́шего пия́нства». Вои́стину бо неве́рных и некреще́ных челове́к весе́лие пия́нствено. Я́коже рече́, И́ов моля́ на е́теры «Да заблудя́т я́ко пия́ни» (Иов. 12:25), а хотя́щии чи́сто пожи́ти сего́ да полиша́тся и по пра́вому пути́ безбла́знене да по́йдут. Слы́шите же апо́стола глаго́люща: «Не упива́йтеся вино́м, в нем́же несть спасе́ния» (1Кор. 11:12). И па́ки: «Пия́ницы ца́рства Бо́жия не насле́дят» (1Кор. 6:10). И прирече́: «Не бу́дете безу́мни но разуме́йте что есть во́ля Бо́жия» (Еф. 5:17), вси бо студо́внии вре́ди от пия́нства быва́ют. Я́коже Дави́д рече́: «Нощь просвеще́ния в пи́щи моей» (Пс. 138:11). Пи́щу нощь нарица́ше. Мрак же тма есть вино́ и питие́. Упива́ющеи бо ся но́щию упива́ются по апо́столу, а и́же о Ло́тову дще́рию напи́саное во́лею премину́, Госпо́дь же наш Иису́с Христос всем запове́да глаго́ля: «Блюде́теся да не отягча́ют сердца́ ва́ша, объяде́нием и пия́нством и печа́льми жите́йскими».