Стихи́:

За е́же послужи́л еси́ веще́м на земли́

На небеси́ Фили́ппе мзду прия́л еси́

Той святы́й Фили́пп бя́ше от Галиле́и, поста́влен же бысть диа́коном со ине́ми шестию́ служи́ти трапе́зам повеле́нием Го́спода на́шего Иису́са Христа́. Посе́м и́де в Самари́ю по открове́нию Свята́го Ду́ха, и крести́ и́ Си́мона Корени́тца[1]. И па́ки и́де от Ефио́пии в Га́зу, я́коже ему́ Святы́й Дух повеле́. Сре́те и́ ка́женика си́льна цар́ицы Ефио́пския, Кандаки́и глаго́лемыя. И ви́де и́ на колесни́це седя́ще и почита́юща проро́ка Иса́ию, и приступи́в рече́ ему́: «Разуме́еши ли у́бо е́же чте́ши?». Он же рече́: «Ка́ко у́бо могу́ разуме́ти, а́ще не наста́вит мене́ кто́?». Возведе́ же его́ на колесни́цу, и той сказа́ше ему́ е́же чтя́ше. И ве́рова во Христа́. И обрето́ша во́ду, глаго́ла же ка́женик Фили́пови: «Се вода́, что возраня́ет ми крести́тися?». И а́бие крести́ и́. И ктому́ не ви́де его́, восхи́щен бо бысть а́нгелом. Сам же идя́ше в путь свой ра́дуяся. Последи́ же святы́й Фили́пп в Тра́лии Аси́йстей бысть епи́скоп. И ту сконча́ся, преда́в святу́ю свою́ ду́шу в ру́це Го́сподеви.

Стихи́:

Напи́санный на земли́ ви́дением Феофа́н,

И зва́нием есть уме́рый пи́сан на небесе́х.

Сия́ бя́ста сы́на роди́телю благочести́ву, в Палести́не живу́щих, и страннолю́бию прилежа́щих. Роди́тельным тща́нием, все мудролю́бием навыко́ста, и во и́ноческое житие́ внидо́ста. Та́же поста́влен быв презви́тер. Фео́филу же злочести́вому, на святы́я ико́ны беззаконно́вавшу, и претя́щу сим не поклоня́тися. По́слани бы́ша си́и прему́дрии от патриа́рха свята́го гра́да к христоненави́дцу царю́ с сигге́лом. Ему́же пред лице́м ста́вше, и богопроти́вника того́ обличи́ша. Затворе́ни бы́ста о́ба в темни́це, и́же и за мно́го вре́мя та́мо пребы́ста. Та́же блаже́ннаго Фео́дора от темни́цы к себе́ непреподо́бный призва́в, вельми́ того́ бив, и лице́ ему́ желе́зом одра́в, па́ки в темни́цу того́ отсла́. Феофа́ну же свято́му такова́я и подо́бная бра́ту пострада́вшу, и того́ загна́ в Селу́нь. Ею́же по развраще́нии злочести́ваго Фео́фила призва́в Михаи́л, и Фео́дора благочести́вая царя́: И Феофа́на, митрополи́та поста́виша церкве Нике́йския, рукоположе́нием патриа́рха Мефо́дия разо́ршаго христобо́рную е́ресь. И та́ко боголюбе́зно це́рковь и па́ству упа́с, от зде́шняго жития́ преста́вися.

Стихи́:

Ми́рно заспа́вше ми́рныя дружи́ны,

Филони́лла же и Зинаи́да ку́пно:

В единонадеся́тый Зинаи́да и Филони́лла с Бо́гом успо́ша.

Си́и бя́ху от Та́рса Килики́йскаго, сро́дницы Па́вла апо́стола. И оста́вльше пита́тельницу, и стяжа́ний свои́х отве́ргшеся, враче́вское навыко́ша худо́жество, и́стинное апо́стольское де́ло исполня́ху. И доидо́ша в Димитриа́дский град, и в не́кий верте́п вше́дше, житие́ провожда́ху. Та́мо же Зинаи́да вся́кий неду́г, и вся́ку боле́знь врачева́ше. Филони́лла же до́лгим поще́нием и бде́нием себе́ вда́вши, чу́дна зна́мения соверша́ющи. Такова́я же не терпя́ще неве́рнии, но́щию прише́дше, ка́мением сих поби́ша, и та́ко блаже́нным сном успо́ша.