Стихи́:

Мече́м Тарх, и Андрони́к же и Пров прия́ша побе́ду,

Зе́млю оста́вльше мяте́жну:

Посе́чени бы́ша в двана́десятый Пров, Тарх и Андрони́к.

Си́и бе́яху в о́бласти Диоклитиа́нове и Флавиа́на иге́мона. И уже́ Тарх стар сый, ри́млянин ро́дом, во́ин че́стию, Пров же от Сии́ды Панфили́йския, Андрони́к же гра́да Ефе́са Иони́йскаго. Уже́ Та́рху сокруши́ша че́люсти и вы́ю, и ру́це ему́ пла́менем опали́ша, та́же пове́шен бысть на дре́ве. И ды́мом зады́шеным подка́жен быв. И о́цет лют с со́лию и с сина́пом смеси́вше, влия́ша в но́здри его́. И ражны́ раждеже́ными пе́рси его́ сожго́ша. И бри́твою у́ши ему́ отре́заша и ко́жу со главы́ его́ содра́ша, и звере́м вдан быв. Наконе́ц же на удеса́ мече́м сосече́н, святу́ю ду́шу Бо́гу преда́сть. До́блий же Пров жи́лами суро́выми бие́мь, и желе́зы раждеже́ными сожго́ша ему́ но́зе. Пото́м пове́шен и плещи́ и ре́бра сожго́ша, и ражны́ лы́ста его́ сбодо́ша. Коне́чне же и той мече́м сосече́н и блаже́нную кончи́ну прия́т. Андрони́к же блаже́нный на дре́ве пове́шен, и ногты́ желе́зными стро́ган и со́лию ра́ны его́ посыпа́вше, и кроя́ху, и язы́к тому́ со устна́ми отре́заша. Коне́чнее же и той по ста́вах теле́сных мече́м сосече́н, дух в ру́це Бо́гу преда́сть.

Стихи́:

Козмы́ во у́твари благоле́пней, и́стинен учи́тель:

Свята́го гра́да преславнотво́рец достохва́лен быв:

В двана́десятый преста́вися.

И́же о сем сицево́е сло́во от оте́ц к нам до́йде: ибо отец Иоа́нна Дамаски́нскаго, от ро́да бя́ше бога́тством мно́гим изоби́льна, и сла́вою и ины́м виде́нием укра́шена, жили́ще име́я в Дама́сце: Прия́т же не́коего от асигкри́т, му́жа многоуве́тлива и прему́дра, и́же его́ сы́на Иоа́нна научи́в соверше́нне, вне́шней прему́дрости, и на́шей. И се явлен́но бысть от трудолю́бных его́ списаний, и пра́вил. То́йже отец глаго́лемаго Иоа́нна прему́драго Дамаскина́, прия́т и Косму́ блаже́ннаго свята́го граждани́на, еди́наче мла́да су́ща, си́ра же, и нището́ю томи́ма после́днею. И того приле́жне воспита́в, и я́ко сы́на нарече́, и вся́ким уче́нием боже́ственным, и челове́ческим проити́ того́ сотвори́. Тем сосу́д избра́нный блаже́нный Косма́ показа́ся. Иску́сно же сказа́ти вам подоба́ет: тако́в сло́вом и ра́зумом бысть, яковы́ же его́ трудо́в кано́ны и тропари́, и про́чая пи́смена приле́жно чту́щым явля́ют. И зане́же вы́шняго жития́ восхоте́вшу, и́ноческий яре́м восприи́м: и зве́здною све́тлостию просия́в. И епи́скоп Маю́мский поста́влен бысть, от иерусали́мскаго первоседа́льника. До́бре же и богоуго́дне пожи́в, и па́ству напра́вив на па́жить спасе́нную. И в глубо́кую ста́рость дости́г, почи́ о Го́споде.

Стихи́:

Удеса́ Домни́на заво́ем зави́та,

Но не отметну́вшеся и́стинныя ве́ры.

Сия́ свята́я бя́ше подвиза́ющися при Диоклитиа́не царе́. И предста́вши Лиси́ю иге́мону во Азарве́йстей митропо́лии. Пе́рвее бие́на бы́вши волу́ями жи́лами суро́выми, и желе́зы разжже́ными но́зе ея́ опали́ша. Пото́м же́злием сокруше́на бы́вши, и изви́вше ея́ соста́вы, и в темни́цу вве́ржена, сконча́ся.

Во еди́н у́бо от дний блаже́ный Андре́й ходя́ по гра́ду, прии́де близ хра́мин блудни́ц. Еди́на же от блудни́ц ят его́ за ри́зу. Тогда́ и други́я блудни́цы приидо́ша и ста́вше о́коло Андре́я вопраша́ху его́: «Ка́ко ти ся есть сотвори́ло уро́дство?». О́ному не отвеща́ющу ничто́же. То́чию зае́мь свои́ но́здри, плева́ше. И о́нем вопраша́ющим его́: «Что ра́ди свои́ но́здри кры́я, си́це плюе́ши?» Блаже́ный же рече́: «Аз ви́жу блу́днаго бе́са и́же ва́ми облада́ет, я́ко в злосмра́дну облече́н есть ри́зу. И того́ ра́ди не могу́ смра́да обоня́ти». Они́ же совле́кше с него́ ри́зу и рого́зину нань возло́жше, изгна́ша и́. Не́цыи же христолю́бцы дая́ху ему́ ца́ты. Ели́ко кто ему́ дая́ше, приима́ше. Овогда́ бо два́десять на день приима́ше, и иде́же уве́дяше сбор ни́щих, та́мо идя́ше. И игру́ творя́ше сре́бреники. Ни́щии же а́ки у уро́да похища́ху сре́бреницы. Он же шиба́ше их пя́стию сваря́ся, и та́ко помета́я сре́бреники все, отбега́ше от них. Ни́щии же взе́мше сре́бреницы деля́ху и[х] на главы́. Си́и же творя́ше блаже́ный Андре́й, да не я́ве бу́дет ми́лостыня его́.