Стихи́:

Карп с Папи́лом - Бо́гу о́ба плода́:

Обою́ плоду́ посече́ние отве́рзе не́бо.*

И Агафодо́ру мно́жество даро́в пода́сться

По мно́жеству пострада́вший лю́тых боле́зний:

Не запя́т тебе́, му́ченицо Агафоники́е, сла́бость же́нская,

Е́же от меча́ к Божеству́:

Карп с Папи́лом в тре́тий на́десятый медь иста́я.

Ти́и святи́и Христо́ви му́ченицы бе́яху при Де́кии цари́ и Уалериа́не анфипа́та Аси́йскаго. Вра́чеве худо́жеством, во́ньже святы́й Карп епи́скоп, бе́яше Фиафи́рский, Папи́л же диа́кон, от того́же Ка́рпа поста́влен. Я́ты же бы́вше кня́зем и вопроше́ни, испове́даша пред все́ми и́мя Христо́во. Пону́ждени бы́ша пожре́ти и́долом и не покори́шася. И привя́зани бы́ша к коне́м, идя́ху пред кня́зем влачи́ми к Са́рдию, и та́мо пове́шени на дре́ве и стро́гани.

Святы́й же Агафодо́р раб сый послед́оваше им, боже́ственому а́нгелу укрепля́ющу его́, испове́да и той Христа́. Же́злием бие́н бысть пове́шен и та́ко бие́мь, преда́сть дух Бо́гу.

А святы́й Карп ви́ся ускла́бися. И вопроше́н быв кня́зем: «Почто́ Ка́рпе восмея́ся?». И рече́: «Поне́же ви́дех благода́ть Христа́ моего́. И мне вда́не бы́вши и пора́довахся». Папи́л же свя́зан быв на четы́ре кольца́. И ка́мением побие́н и невреди́м пребы́сть. Посе́м веде́ни бы́ша святи́и на́зи по чрепи́нах влачи́ми, и с горы́ бие́ми и в снедь звере́м поме́тнуты. И лев тогда́ рыка́я, челове́ческим гла́сом провеща́, понося́ гони́телем таково́му суровству́. Они́ же затко́ша ушеса́, и гвоздьми́ загвозди́ша, святы́х в пещь вверго́ша. Во́ньже и сестре́ свята́го Папи́лы Агафоники́и помо́льшися, и вни́де к ним в пещь. Дождю́ же вели́ку сше́дшу, и огню́ пога́сшу, и святи́и неопали́ми пребы́ша, главы́ им отсеко́ша.

* - испра́влен некорре́ктный перево́д с гре́ческого

Стихи́:

О́, колице де́рзости му́ченика Флоре́нтия,

К пла́мени теку́щу [в тридеся́тый].

Святы́й му́ченик Флоре́нтий бе от гра́да Селу́нскаго, христиа́н сый, ревни́тель добру́. Укаря́ше же и обруга́ше бо́ги е́ллинския, и слу́жбы их проклина́ше. Уча́ же вся и́стинней ве́ре Христо́ве, и утвержда́ше христиа́ны, и моля́ше я́ твори́ти во́лю Бо́жию. Сия́ же творя́щу ему́, ят бысть страны́ тоя́ кня́зем. И вопроше́н быв, испове́дася ве́ровати пред все́ми, Го́споду Бо́гу на́шему Иису́су Христу́. Е́ллинския же бо́ги наре́к, дре́во су́ще и ка́мением, зла́то же и сребро́, и медь и желе́зо, и и́долы безду́шны, и нечу́вствены. И се рек подви́же на гнев и на я́рость иге́мона: и му́чен бысть, и бие́н же и стро́ган, и огню́ возгнеще́ну вели́ку, вве́ржен бысть вонь. И ра́дуяся, и моля́ся, и благодаря́ Бо́га сконча́ся.

Сей роди́ся во стране́ Пефлаго́нстей, от благочести́вых и боголюбе́зных роди́телей. Глаго́лют же о нем, я́ко сро́днику ему́ бы́вшу Феодо́ры цари́цы, жены́ Фео́фила иконобо́рца. Вдан же быв святы́й Ники́та к наказа́нию, и вни́де в Царь град седмина́десяти лет сый. Ири́не же тогда́ ца́рства ски́птры держа́щи, и сы́ну ея́ Константи́ну. И уве́девше о нем я́ко скопе́ц есть, восприи́мше того, и пома́ле над все́ми в ца́рстем до́му поста́влен. Таже патрики́йскаго са́на дости́же, и страти́г Сикили́йский вмене́н бысть, от тогда́ у́бо до́бре и богоуго́дне пожи́в, и хотя́ пострищи́ся, и не оста́влен бысть от самоде́ржец, от Ники́фора Ге́ника, и сы́на его́ Ставрики́я. По си́х же прии́мшу ца́рство Михаи́лу Рагкаве́ю. И едва́ не́когда умили́ся е́же бы́ти мона́ху, и не изы́ти из гра́да обеща́вся: но во златы́х вратех да́ти ему́ пребыва́лище, в нарече́нней Хрисоники́я: та́мо тому́ пребыва́ти повеле́но бысть. Пяти́десяти бо лет бя́ше, внегда́ постриже́ся, и сам царь бысть к слугова́нию его́. И пребы́сть в такове́й обители, до́ндеже доспе́ до ца́рства Льва Армени́на иконо́борца. Да я́коже ви́де е́же на святы́я ико́ны быва́емая, изы́де из гра́да, и и́де в подгра́дие, иде́же бя́ше не́коея бра́тии оби́тель: и примеси́ себе́ после́дним бра́тиям, не вкуша́я трудя́ся, и с ни́ми стражда́. Не́цыи же вражде́бницы су́щии пове́даша о ико́не Спа́сове, ю́же той стяжа́л бя́ше из Ри́ма. И не́который к нему́ по́слан бысть от вельмо́ж, словесы́ некро́ткими, но и преще́нием страша́, и прося́ е́же пода́ти о́ну пречестну́ю ико́ну. Да я́ко не возмо́же о́ного препрети́ отве́том, но рече́: Не моя́ есть такова́я пречестна́я ико́на, но Бо́жия, и свяще́нным церко́вным предста́тельница упра́влена. По́сланный же похи́тив еди́наго мона́ха, е́же сказа́ти ему́ иско́мое: и вшед в це́рковь, пречестну́ю о́ну ико́ну, я́ко не́кую ме́рзость метну́в ю́, безче́стно в свой скут. Святы́й же сия́ ви́дев, из глубины́ воздохну́в, нача́ток напа́стей таково́е вмени́в. Да внегда́ отъи́ти хотя́ по́сланный, запове́да тве́рдо, ника́коже свято́му оттуде́ исходи́ти. По си́х же Фео́филу ино́му иконобо́рцу ца́рство похи́тившу, и тому́ е́же на святы́я ико́ны прилежа́щу, е́же не поклоня́тися им. По́слан бысть царе́м к преподо́бному не́который, и́менем Феодо́сий, и та́ко к нему́ пред все́ми сте́кшимися рек: Та́ко повелева́ет ти царь мно́ю, иди́ и приобщи́ся патриа́рху Анто́нию, и не покланя́йся ико́нам: а́ще ли ни, то изгна́н и́маши бы́ти. Святы́й же рече́: Христа́ и Бо́га моего́ ико́не не преста́ну вы́ну покланя́тися: Анто́ния же не нареку патриа́рха, но любоде́йника и законопресту́пника, ты же твори́ е́же хо́щеши. И а́бие изгна́н быв. Благодари́в же Бо́га святы́й: и пое́м с собо́ю три бра́та, и пойде в друго́е ме́сто, и та́мо святы́й пост проводи́в, да́же и до Пятидеся́тницы. До́йде же до не́которыя страны́. Изы́де же повеле́ние от царя́, не приима́ти бе́гающыя христиа́ны, но отгоня́ти я́. Дости́же святы́й к не́коему о́строву и обрати́ся: но и та́мо ага́рянскаго ра́ди нахо́да ско́рбен бя́ше. До́йде же к нему́ не́кто Никола́й сро́дник его́ глаго́ля: А́ще хо́щеши ма́ло поко́ище обрести́, пойди́ к подгра́дию, и есть ме́сто Зило́па нарица́емо. Шед же та́мо по не́коем вре́мени. И изы́де к нему́ весть, или́ приобщи́тися им, или́ отту́ду тому́ отъи́ти. Отше́д же отту́ду, и в подо́лие не́кое шед. И та́мо ма́ло ме́сто обре́т, растреби́в е́, и церковь постави во и́мя Безпло́тных сил небе́сных. И пребы́сть нема́ла времена́ та́мо, и с су́щими с ним бра́тиями: до́бре же и богоуго́дно поживе́. И коне́чное в примо́рский монасты́рь вшед, и та́мо мно́ги мона́хи научи́, и мно́га чудес́а показа́ при животе́. Прови́дев же о свое́м сме́ртнем отше́ствии: и благослови́ всех, отъи́де ко Го́споду. Та́коже и по сме́рти свое́й мно́гая чудоде́йствия яви́. Поживе́ же всех лет живота́ своего́, се́дмьдесять и пять.

Мздои́мец и сребролю́бец и резои́мец и граби́тель ‐ еди́на колесни́ца есть четвери́чна, иму́щи го́рдостнаго воза́тая сатану́, и́же Бо́гом све́ржен бысть. Собира́ет же вся после́дующая ему́ во свою́ поги́бель. Неподо́бно есть у́бо до́бре смы́слящим от вражде́бника води́мым бы́ти, да не с ним в я́му ве́чнаго огня́ вва́лятся. Но лу́чше со апо́столом в жизнь напра́витися, глаго́лющим: «Иму́ще же пи́щу и оде́ние, си́ми дово́льни бу́дем. Хотя́щеи бо богате́ти впа́дают в напа́сть, и в се́ти неприя́знены» (1Тим. 6:8-9) ‐ нехраня́щии за́поведий апо́стольских. Па́чеже Бо́га глаго́люща Самого́: «Не стяжи́те ни зла́та, ни сребра́, ни пецы́теся, что я́сте или́ что пиете́» (Мф. 6:31,34,10), а сби́рающаго бога́тство низлага́ет Бог, и Свои́ма нога́ма стира́ет. До́бре же и прито́чник свари́т мздои́мцы, глаго́ля: «Любя́й сребро́ не насы́тится сребра́. Ни отъима́я и́ у убо́га, нищь бо есть и не уме́ет ходи́ти пря́мо жи́зни». (Еккл. 5:9; Притч. 22:22) Глаго́лет бо и апо́стол: «Лу́чше есть да́яти не́же взъима́ти». (Деян. 20:35) Зако́н же рече́: «Не оправди́ нече́стиваго мзды ра́ди, ни возми́ мзды, мзда бо ослепля́ет о́чи ви́дящим». И Само́ил бо держа́ за́поведь зако́нную к лю́дем глаго́лаше: «Еда́ от руки́ ва́шея взях изба́ву? Се по́слух Госпо́дь, не прии́де мзда в ру́це мои́». Проро́к же Амо́с скорбя́ о судия́х глаго́лаше: «Мзду избра́нну от ни́щих прия́сте». Иса́ия же укаря́я град, глаго́лет: «Кня́зи твои́ лю́бят мзду, гоня́ще возда́ния. Го́ре оправда́ющим нечести́ваго мзды ра́ди. И пра́ведное без пра́вды от пра́ведника взъима́ющим». (Ис. 5:23) И паки: «Губи́тель сам свое́й души́ мздои́мец, а не любя́й мзды и́мати жив бу́дет». И паки: «Прие́мляй мзду в не́дра без пра́вды, не испра́вится пред Бо́гом. Лу́чше бо и́мя добро́ не́же бога́тство». Дави́д же моля́шеся Бо́гу глаго́ля: «Не погуби́ с нечести́выми души́ моея́, и́хже десни́ца испо́лнися мзды». (Пс. 29:5) Ви́диши ли безако́нники и му́жи кро́ви нарица́ет уби́йцы и мздои́мцы. То же рече́ Госпо́дь: «Безу́мне, в сию́ нощь ду́шу твою́ изму́ из тебе́, а и́же угото́ва кому́ бу́дет?» (Лк. 12:20) Безу́мныя нарица́ет наде́ющаяся на бога́тство погиба́ющее. И паќи Дав́ид рече́: «Приклони́ се́рдце мое́ во свиде́ния твоя́, а не в лихои́мство». (Пс. 118:36) И́ов же показа́я свою́ чистоту́: «Еда́ рука́ моя́ прикосну́ся мзде?» (Иов. 31:7) И Госпо́дь Спас наш запове́дает глаго́ля: «Блюди́те и храни́теся от вся́кого лихои́мства, я́ко не от избы́тка кому́ душа́ есть и живо́т; (Лк. 12:15) я́коже пи́сано есть: пра́ведник ве́рою жив бу́дет».