Стихи́:

Наза́рия сострада́льцы ку́пно три:

Ко Го́споду приве́д Наза́рия, [ме́чниче]:

С треми́ Наза́рия посе́чен бысть в четырена́десятый.

Сий страда́вше в Ри́ме по сконча́нии же святы́х апо́стол, при Неро́не цари́. Петро́м апо́столом науче́н ко благоче́стию. В двадеся́тое же ле́то своего́ во́зраста святы́й Наза́рие сквозе́ Итали́йский град проходя́ и пропове́дуя, и к ве́ре мно́гих приве́д. Пото́м пре́йде в Плакенти́нь град, иде́же обре́те свята́го Герва́сия в темни́цу вве́ржена, Иулиа́ном кня́зем. Па́ки пре́йде в Кимили́ю град нарече́нный, прия́т с собо́ю свята́го Келе́сия, трем ле́том су́ща. А́бие вве́ржени бы́ша в темни́цу. И отту́де изше́дше, и идо́ша в Тивери́йский град благовеству́юще. Свя́зани бы́ша, и звере́м вда́ни, и сохране́ни бы́ша. Па́ки идо́ста в Медиола́нь и обрето́ста в темни́цы Герва́сия и Прота́сия, и́же по́слани бы́ша кня́зем в Рим. И та́мо им главы́ отсеко́ша.

Сей нарица́шеся от Га́зския страны, муж кро́ток ве́рою, свяще́нник це́ркве Га́зския, ста́рец же виде́нием: и́же предста́ Кеса́рию епа́рху, и бие́н бысть по ре́брам. И по не́коем вре́мени от неве́рных мече́м посе́чен бысть.