Стихи́:

Хле́ба быв лише́н Лукиа́н,

Терпели́внаго Хле́ба не лиши́тися хотя́.

Гла́дом Лукиа́н в пятна́десятый заморе́н.

Сий благочести́вою роди́телю сын быв, и по сме́рти о́нех разда́ тре́бующим име́ние, и сам же прилежа́ше уче́нию боже́ственых книг, и мно́гия от е́ллин обраща́я к Бо́гу. Оста́вль же Антио́хию, и до́йде в Никомиди́ю. Елма́ же мно́ги обре́те христиа́ны, кры́емы стра́ха ра́ди, и хотя́щих христиа́нства отврещи́ся, и́хже увеща́ и потверди́ к по́двигу. Бе́яше же написа́ние ху́до, написа́ бо кни́ги це́ркви Никомиди́йстей, ве́тхим и но́вым заве́том. И толи́к же челове́к быв, я́ко внегда́ хожда́ше в сквозе́ град, о́вем[и] ви́димь быва́ше, о́веми неви́димь. О нем же уве́дев Диоклитиа́н, и постыде́ся их, лице́м яв́итися к нему́, заве́су заве́сив и бесе́доваше к нему́. И позна́в его́ непреложе́ние, осуди́в того́ гла́дом умре́ти. И та́ко, за мно́ги дни не прие́м пи́щи, в темни́цы сконча́ся. Те́ло же его́, повеле́нием царе́вым, вве́ржено бысть в мо́ре, и повеле́нием Бо́жиим дельфи́ны пое́мше, изверго́ша на су́хо.

Блаже́ный Са́вин, за премно́гую его́ доброде́тель и устрое́ние бысть пре́жде епи́скоп. Посе́м плищ оста́вив, молча́ния ра́ди и добро́ты, и тольми́ подвиз́ася на до́брый нрав алчба́ми и пе́ний и поще́ний себе́ вдав, я́ко чудесе́м сподо́битися, мно́гим неду́ги прогони́ти, прокаже́нныя очища́ти, б́есы изгони́ти, еще́ же и предглаго́лати бу́дущая. Мно́гим же успе́шествовав на доброде́тель, и уче́нием свои́м увещева́в на доброде́тель, ми́ра оста́вити и роди́теля и д́омы, и к мни́шескому житию́ приступи́ти, Христо́ви рабо́тати и де́лати за́поведи Его́. И та́ко до́бре пожи́в, с ми́ром сконча́ся, дух у́бо свой преда́сть Го́сподеви, а честны́я его́ м́ощи сро́дней земли́, и еще́ ны́не исцеле́ние подая́ ве́рным.

Во дни Трая́на царя́, сей святы́й Сарви́л бя́ше иере́й и́дольский, не́ким преподо́бным епи́скопом поуче́н, крести́ся с Веве́ею сестро́ю свое́й. Оклевета́н же быв я́ко христиани́н, кня́зю Едеси́нскаго гра́да. И предста́ суди́щу его́, и повеле́ би́ти его́ же́злием. Свято́му же вельми́ крамоля́щуся облича́ющу того́, и бо́ги его́. Он же мно́гим неи́стовством одержи́мь, не еди́ною ни два́жды, но седми́жды пове́си того́: и на ко́емждо пове́шении волу́ями жи́лами бия́ше того́, и гре́беньми строга́ше, и свеща́ми паля́ше. Свято́му же к Бо́гу взира́ющу и моля́щуся, облегчева́ше ему́ боле́зни Госпо́дь си́лам. Ви́дев же мучи́тель до́бльствие свята́го и терпе́ние, повеле́ гвоздьми́ загвоздити главу́ ему́, я́ко ужаси́ти всех. Сия́ ви́девши Веве́я сестра́ его́, исповеда себе́ христиа́ну. Он же бив ю́ дово́льно, и ве́рже ю́ в темни́цу. Свято́му же содра́ша ко́жу, и ви́деша я́ко еди́наче ды́шет, повеле́ обе́ма главы́ отсещи́. Тогда ве́рнии телеса́ взе́мше, ску́таша в земли́.

Мона́х не́кий бя́ше в ски́те, послушли́в отцу́ в ле́та мно́га. По вре́мени же не́коем, за́вистию бесо́вскою, от послуша́ния испа́д, изы́де от рук ста́рчих без вины́, и без не́коего вре́да, преоби́дев и запреще́ние: и́бо запреще́н бя́ше непослу́шныя ра́ди вины́. Доше́д же во Александри́ю, ят быв та́мошним кня́зем, и снят с него́ схи́му мона́шескую, влеча́ше его́ е́же пожре́ти и́долом. Тому́ же не повину́вшуся, волу́ями жи́лами бив его́ без ми́лости, и пото́м главу́ его́ отсещи́ повеле́. И тому́ бы́вшу, поверго́ша псом те́ло его́. Не́цыи же христолюби́вии но́щию дошедше взя́ша е́, и со благоуха́нии, и воня́ми пови́вше положи́ша е́ в ра́це. И прине́сше положи́ша того́ в же́ртвеннице церков́нем, я́ко му́ченика. Боже́ственней же слу́жбе сбыва́ющися, и свяще́нному пропове́днику вопию́щу: ели́ко оглаше́ннии изыди́те. И всем зря́щым, сам ковче́г исхожда́ше вон, без поткнове́ния челове́ческих рук: и пребыва́ше в паперти церко́вней, да́же и до отпуще́ния. Та́же па́ки сам ковче́г входя́ стоя́ше на ме́сте, иде́же име́яше обы́чай стоя́ти. Сему́ же бываему, удивля́ше ви́дящих. Не́который же от вельмо́ж ви́дев таковая, помоли́ся Бо́гу о сем, и вско́ре отреше́ние прие́м. А́нгел бо предста́в рече́ к нему́: что ужа́сен еси́ о сбываемем? Не прия́ша ли апо́столи о́бласть, е́же вяза́ти и реша́ти? И от них па́ки и́же по сих ученицы́? Сей у́бо брат излия́в кровь свою́ Христа ра́ди, и в же́ртвеннице не моги́й лежа́ти, слу́жбе соверша́емей, изгони́мь быва́ет а́нгелом, да́же и до па́перти. О́нсица по́стника о́ного учени́к бя́ше, и преслуша́ния ра́ди свя́зан быв от него́, и та́ко и досе́ле свя́зан пребыва́ет. Я́ко му́ченик у́бо вене́ц муче́ния прия́л есть, но сего́ ра́ди я́ко свя́зан есть, не мо́жет та́мо стоя́ти слу́жбе соверша́еме, а́ще не связа́вый разреши́т его́. Сицева́я уве́дев боже́ственный мужь, и воста́в по́йде к по́стнику, и сказа́ ему́ вся по чи́ну. И до́йде с ним во Александри́ю. И в це́рковь прише́дше, и иде́же те́ло лежа́ше но́ваго му́ченика внидо́ша: и ковче́г отве́рзше, просты́ню ку́пно сотвори́ша. И того́ целова́вше, ста́ша к славосло́вию. И боже́ственней слу́жбе соверши́вшися, пребы́сть му́ченик в же́ртвеннице непоколеби́мь отто́ле и до ны́не.