Стихи́:

Христа́ вообража́еши, обру́чника блудя́ща:

Блудни́цы бесе́довавша, Его́же ны́не проро́че зри́ши:

В седмьна́десятый Оси́е в смерть погребе́ся.

Сей толку́ется «Спаса́емь», или́ «Храни́тель», или́ «Обсеня́яй». Сей бе́яше сын Веи́ров от Валемо́фа, пле́мене Саха́рова. Много пророчествовав о Израили. Умре и погребен бысть в земли своей с миром, и дасть знамение еже приити Господу на землю и к человеком обратитися. Внегда солнце зайдет в Силоме. И разделится на двое частие, и и будут дванадесять источницы последствующе и послушающе на земли явльшемуся Богу. И его ради спасена будет вся земля.

Святы́й сей блаже́нный и присновоспомина́емый Андре́й, бысть рожде́нием и воспита́нием гра́да Кри́тскаго. Ча́до благочести́ву роди́телю и доброде́тельну, и до́бре жи́тельствоваше в нем. И иску́сен са́мым за́поведем Божиим быв де́латель. В ца́рство же Константи́на гноеимени́таго, зря Бо́жия рабы́ ги́блемы от него́, и от бу́ести его́. И прише́д в Константи́нь град, испове́да и́стину, и нече́стие его́ небоя́знено изобличи́в. Он же дерзнове́ния его́ не терпя́, препадается, внеза́пу глаго́лющу до́блему, я́ти его́ предстоя́щым повелева́ет. Они́же уби́йственыма рука́ма, и тяжча́йшим а́бие устреми́вшеся, о́ви за главу́ его́, а ини́и за ру́це пое́мше, друзи́е за ра́ма, а ини́и за оде́жду, па́че и досади́тельне, и к земли́ низлага́ют мы́слию высо́каго. И не пе́рвее бя́ху влача́ще, доне́леже самому́ испыта́ти царю́. По е́же стерпе́вшу дерзнове́нию страда́льца, возвести́ того́ повеле́. Свято́му же мно́гая про́чая известву́ющу царе́ви о святых ико́нах, и я́ко ца́рским изобразова́тися о́бразом о́ царю́, я́ко в тех а́ще не испове́дати бу́дут, то после́дними у́бо облага́ются му́ками: и какову́ преще́нию боже́ственному в позна́ние не бы́ти, и́же на Христо́ву ико́ну руга́ющымся. И зело́ разже́гся мучи́тель, обнажи́ти свята́го повелева́ет, и у́жи растящи́, и зело́ того́ би́ти. Сему же бы́вшу, земля́ на нейже лежа́ше, тече́ние кро́ве его́ очервленя́шеся. И извопроше́н же быв, и ни да́ром, ниже́ преще́нием вдав себе́ до́блий. Зело́ а́бие су́рово томле́н быва́ет, и в ре́бра пробода́ется. И уста́ ка́мением сокруши́ша ему́, и в темни́цу посыла́ется. И па́ки, предста́вшу свято́му: и зане́же дерзнове́ннейша паки мучи́тель того́ ви́дев, ра́нами повеле́ того́ язви́ти. Сему́ же бы́вшу, раздробля́шеся те́ло его́ и распа́даше. Коне́чнее же у́жи за но́зе свя́зан быв, и по земли́ влачи́мь быва́ет среде́ торга, е́же в злоде́йственое ме́сто того́ поврещи́. Влачи́мь же иду́щими, и му́ченику та́ко влеко́му, не́который в мо́ри ры́бу улови́в, и на торг на прода́ние предложив: сам же не́ким бесо́м подви́гся, и се́чиво макела́рско похвати́в, вско́ре но́гу му́ченику пресече́, уста́ви му́ченику страда́льческое тече́ние, и ко о́нем оби́телище отсла́. Честно́е же те́ло его́ в злоде́йственых помета́ют ме́сто. И смеси́вше со о́неми скве́рными телесы́, и бя́ше да́же мно́жае двоюна́десяте седми́ц. И му́жие и́же бесми́ одержи́мии, от разли́чных мест Константи́ня гра́да, я́ко со́звани соше́дшеся, и свята́го те́ло пое́мше, на свяще́ннем ме́сте положи́ша. О́ле суда́, беснова́вшиися вме́сто на́йма цельбу́ прия́ша внеза́пу, мзду обре́тения, врачева́ние прие́мше.

Стихи́:

Отверзо́шася небе́сная врата́ Христо́ву дру́гу,

Прии́мши Ла́заря ме́ртва Рим но́вый,

Друга́я показа́ся но́вая Вифа́ния.

Блаже́нный, и присновоспомина́емый, и в царе́х верне́йший Лео́нт, боже́ственною ре́вностию подви́гся, я́ко от не́коего дохнове́ния, пе́рвее це́рковь прекра́сну созда́ пра́веднику. По сих посла́в во о́стров Ки́прский, обре́те свято́е те́ло его́, в Ките́йстем гра́де, лежи́мо в земли́, в ковче́зе мраморяне, иде́же бя́ху слова́ напи́сана и́нем язы́ком: Ла́зарь четверодне́вный, друг Христо́в. А́бие взем честно́е сокро́вище, и в ра́це сре́бряне положи́в, пренесе́ в Константи́нь град.