Стихи́:

Ве́дав Аве́ркие персть,

Пе́рсти у́мер зако́нно:

От убожия принося Естествополо́жнику:

В два́десять вторы́й Аве́ркие в зе́млю и́дет.

Сий бысть епи́скоп иерапо́льский Фриги́я Салута́рие, в ца́рство Ма́рка Антони́на. Чудесе́м мно́гим и цельба́м творе́ц. Вино́ бо и ма́сло влия́ в не́который сосу́д, несме́сно бо им соблюсти́ся моли́твою сотвори́в. И ка́мень вели́к повеле́ бе́су принести́ от Ри́ма во Фриги́ю, и́же по сме́рти его́ поста́витися на гро́бе его́. И те́плыя воды моли́твою от боку́ земны́х изве́д. И та́ко пожи́в преподо́бием и пра́вдою про́чее ле́то живота́ своего́, и ко Го́споду отъи́де.

Чу́дный Иоа́нн Саваи́тский пове́даше, глаголя́, я́ко седя́щу ми, рече́, на край пусты́ни, прии́де ко мне брат не́кто посеще́ния ра́ди от монастыря́, и вопроша́х его́: «Что мо́гут отцы́?» И рече́ ми: «До́бре моли́твами ва́шими». Вопроша́х у́бо его́ о еди́ном бра́те, злу сла́ву иму́ща. Рече́ ми: «И той, ве́руй ми о́тче, не премени́ся от слу́ха того́». Се слы́шав, аз рех: «Ох!» И ре́кшу ми: ох! Взя́хся во у́жасе сну, и ви́дех себе́ пред святы́м кра́нием стоя́ща и Го́спода на́шего Иису́с Христа́ стоя́ща между́ двема́ разбо́йникома. Устреми́хся у́бо на поклоне́ние, и прибли́жшумися, и я́ко се ви́де, и обрати́ся к предстоя́щим а́нгелом и глаго́ла им: «Изри́ните его́ вон, я́ко анти́христ Ми есть, пре́жде бо Моего́ суда́ той осуди́ бра́та своего́». Изгони́му у́бо ми, я́ко приити́ ми из две́рий, удержа́ся ма́нтия моя́, утве́ржши ей; оста́вих ю́ та́мо, и а́бие обу́жься, глаго́лах к прише́дшему бра́ту и рех ему́: «Зол день сий мне». И рече́ ми он: «Что ра́ди, о́тче?» Тогда́ сказа́х ему́ я́вльшая ми ся, и рех: «Ма́нтия – покро́в Бо́жий, оста́ и лише́н есмь по́мощи Бо́жии», и от дне того́ я́же по Госпо́дни сло́ве седмь лет сотвори́х, блудя́ по пусты́ни, ни хле́ба вкуша́я, ни под кров входя́, ни к челове́ку бесе́дуя, до́ндеже ви́дех Го́спода моего́, возврати́вша да́ти ма́нтию мою́.

Мы же, сия́ от чу́днаго Иоанна слы́шавше, ре́хом: а́ще пра́ведник едва́ спасе́тся, нечести́вый гре́шник где яви́тся? Те́мже подоба́ет нам о свои́х пещи́ся гресе́х и никому́же согреша́ющих суди́ти, пи́сано бо есть: а́ще покры́ем бра́тня пргреше́ния, то Бог на́ша покры́ет.

Лют есть клевети́вый вред, па́че бо диа́волу есть подо́бен, по рече́нному о нем во псалме́: Смири́т клеветника́. Врази́ бо суть, и Бо́гу ме́рзцы клеветницы́, и соо́бщнии [прича́стницы] прода́вшым и́стину и распе́ншым Го́спода на́шего Иису́са Христа́. Аз бо есмь, рече́, И́стина и Живо́т. Вели́т же и зако́н глаго́ля: Не бу́ди по́слух на всю непра́вду и согреше́ние. Пред усты́ бо рече́ двою́, или́ трие́х по́слух, всяк глаго́л ве́рен. Сау́л же преступи́в за́поведь сию́, три́ста Господ́них иере́й уби́, послу́шеством еди́наго клеветника́ Дои́ка си́рина. При́точник же глаго́лаше: Оклевета́яй убо́гаго, раздража́ет Сотво́ршаго и́. И па́ки: Сла́ва му́жу отвраща́тися клеветы́. Всяк же безу́мный тем обяза́ется. Дави́д же мо́лится гонзну́ти от клеветы́: Изба́ви мя от клеветы́ челове́чи, глаго́ля: И покры́й мя от сонм лука́внующих, и́же изостри́ша я́ко ору́жие язы́ки своя́. И ин: Оклевета́яй убо́гаго, мно́га собира́ет зла. И па́ки: Нечести́вый мужь хва́лится оклевета́яй дру́га. И па́ки: Лев а́лчай, и волк жа́ждай, обою́ есть го́рши клеветни́к, зане́ пролива́яй кровь язы́ком. И прирече́: Велича́ется клеветни́к, изрыва́я я́му язы́ком бли́жнему, последи́ же сам впа́дает в ню. Екклисиа́ст же: Обрати́хся аз, и ви́дех вся клеветы́ быва́ющыя под со́лнцем: и се сле́зы оклевета́емых, и несть утеша́ющаго их. И па́ки: Оклевета́ние му́драго возмуща́ет, и благодари́ваго погубля́ет. Дави́д же: Спасе́т сы́ны убо́гих, и смирит клеветника́. Утверди́мся у́бо са́ми бра́тие от всея злы́я, клеветы, боя́щеся го́рькия му́ки, де́ющым такова́я. И с Па́влом рцем: Оклевета́еми, благослови́м: гони́ми, терпи́м: ху́лими, мо́лимся. Я́коже отре́би бы́хом всем в попра́ние. Да не бу́дем осужде́ни со враги́ Христо́вы иуде́и, и́же прише́дше к Пила́ту, на Го́спода глаго́лаху оклевета́нием: Сего́ обрето́хом развраща́юща язы́к наш, и возбраня́юща дая́ти да́ни ке́сарю, и Себе́ глаго́люща пома́зана Царя́. Той же я́ко а́гня незло́бивое терпя́ше.

По сме́рти благочести́ваго царя́ и вели́каго кня́зя Васи́лия Иоа́нновича всея́ Росси́и, ца́рствующему вели́кому гра́ду Москве́, грех ра́ди на́ших от злочести́вых ля́хов взя́ту бы́вшу. Тогда́ у́бо все росси́йское во́инство от разли́чных градов́ росси́йския земли́ подви́жеся к нему́, е́же па́ки того́ от о́нех восприя́ти. Егда́ же собра́шася благочести́вии воево́ды, и все христолюби́вое во́инство, тогда́ сове́т сотвориша пе́рвее, е́же моли́ти о сем Всеще́драго Бо́га, и Пречи́стую Его́ Ма́терь, Пресвяту́ю Богоро́дицу на по́мощь призыва́ти. И запове́даша всему́ во́инству, и су́щым с ни́ми, правосла́вному наро́ду тридне́вный пост сотворити, и та́ко приступи́ти ко гра́ду. И у́бо росси́йскому во́инству постя́щуся, Благи́й Человеколюби́вый Бог наш, ви́дя обраще́ние люде́й Свои́х ка́ющихся, вско́ре милосе́рдие Свое́ показа́. В ты́я у́бо дни бысть явле́ние внутрь ца́рствующаго гра́да Москвы́, архиепи́скопу не́коему гре́чину, Галасу́нскаго гра́да, Арсе́нию и́менем, и́же пре́жде от ины́х злочести́вых ля́хов, ну́ждею с ни́ми во оса́де внутрь гра́да удержа́ну бы́вшу ему́: его́же дом и име́ние они́ злочести́вии до конца разгра́биша: И уже́ от гла́да коне́чне изнемога́ющу ему́, и на коне́чном издыха́нии бы́вшу, внеза́пу явля́ется ему́ преподо́бный Се́ргий, ра́донежский чудотво́рец. Слы́шит бо архиепи́скоп, я́ко прише́д не́кто к ке́ллии его́, ти́хо моли́тву сотво́рь а́бие вни́де, и свет возсия́ ве́лий в ке́ллии его́. Та́же глаго́ла ему́: Арсе́ние, се Госпо́дь Бог услы́ша моли́тву раб Свои́х, и моли́тв ра́ди Всенепоро́чныя Ма́тере Своея́, Пресвяты́я Влады́чицы на́шея Богоро́дицы, и при́сно Де́вы Мари́и: и вели́ких чудотво́рцев, Петра́, Алекси́я, и Ио́ны, с ни́миже и аз хода́тай бых, зау́тра град сей предае́т Госпо́дь Бог, в ру́це правосла́вным христиа́ном, и враго́в ва́ших низложи́т. Архиепи́скоп же возведе́ о́чи свои́, и виде преподо́бнаго Се́ргия близ одра́ его́ стоя́ща, едва́ воздви́гся от вели́кия боле́зни, воста́ от одра́ своего́, поклони́ся ему́. Он же неви́дим бысть, и свет он вели́кий я́вльшийся в ке́ллии его́ а́бие разы́деся. Архиепи́скоп же в себе́ прише́д, от ужа́снаго о́ного виде́ния, ощути́ себе́ от належа́щия ему вели́кия боле́зни здра́ва. Пронесе́ся же всќоре виде́ние сие в слу́хи благочести́вых воево́д, и всего́ правосла́внаго росси́йскаго во́инства. И а́бие благонаде́жни бы́вше, по словеси́ свята́го Се́ргия, и вооружи́вшеся приступи́ша ко гра́ду, и вско́ре взя́ша град Кита́й, ме́сяца окто́врия, в два́десять вторы́й день, седмь ты́сящь два́десять пе́рваго ле́та. Во гра́де же Кремле́ велию тесноту́ сотвори́ша злочести́вым ля́хом: Ви́дяще же они я́ко уже́ не избе́гнути им от росси́йскаго во́инства, преда́шася вско́ре, и град Кремль им отвори́ша. В день же неде́льный, собра́шася благочести́вии воево́ды, с су́щими с ни́ми от освяще́ннаго чи́на, архимандри́ты, и свяще́нники, и со всем христолюби́вым во́инством: и взе́мше честны́я кресты́, и святы́я ико́ны, поидо́ша на ло́бное ме́сто моле́бная соверша́юще. Из гра́да же Кремля́ изы́де во сре́тение им пре́жде помяну́тый архиепи́скоп Галасу́нский Арсе́ний, с су́щим с ним освяще́нным чи́ном, и́же бя́ху с ним пре́жде удержа́ни во гра́де, нося́ще с собо́ю ико́ну Пречи́стыя Богоро́дицы Влади́мирския, и честны́я кресты́, и про́чыя святы́я ико́ны. Егда́ же узре́ша благочести́вии воево́ды, и все христолю́бивое во́инство, чудотво́рную о́ну ико́ну Богома́тере, ея́же не наде́яхуся ви́дети никогда́же, от ра́дости мно́гия сле́зы от о́чию излива́юще, целова́ху ю́. И доидо́ша во град Кремль, обы́чныя литии́ соверша́юще: и та́ко внидо́ша в вели́кую соборную це́рковь, Успе́ния Пресвяты́я Богоро́дицы. И боже́ственную Литурги́ю соверши́вше, во мно́зе ра́дости и весе́лии испове́дающеся Го́сподеви. И та́ко разыдо́шася ко́ждо во своя́ си, сла́вяще и благодаря́ще Бо́га, и Пресвяту́ю Богоро́дицу. И отто́ле уста́виша таковый пра́здник праз́дновати Пресвяты́я Богоро́дицы. Ме́сяца окто́врия в два́десять вторы́й день, во́ньже пресла́вная побе́да, и заступле́ние, богома́терними моли́твами бысть, на воспомина́ние предбу́дущым родо́м, во сл́аву Христа́ Бо́га: Ему́же сла́ва, ны́не и при́сно, и во ве́ки веко́в. Ами́нь.