Стихи́:

Нарече́нный брат Осужде́нному на дре́ве,

Умира́еши Его́ ра́ди, блаже́нне, дре́вом сокруше́н:

Страда́вша, бра́та Бо́жия в два́десять тре́тий дре́во уязви́.

Святы́й Иа́ков пе́рвый епи́скоп во Иерусали́ме быв, самы́м Христо́м освяще́н, и той пе́рвую Литурги́ю написа́ и изложи́, самы́м Христо́м о ней науче́н, и́же кратча́йшую Литурги́ю пото́м сотвори́ вели́кий Васи́лие, и по сих боже́ственный Златоу́ст челове́ческия ра́ди не́мощи. Пасы́й же це́рковь, и́же во Иерусали́ме, и мно́ги научи́в иуде́и и е́ллины и обраща́я их к Бо́гу и на гнев подви́же иуде́я. Е́мше его́, ри́нуша низ кри́ла церко́внаго и уби́ша его́ древом по главе́. И от сего́ же нарече́тся брат Бо́жий: Ио́сифу обру́чнику разде́льшу име́ние сыно́м свои́м, и хотя́ сотвори́ти часть и́же от святы́я Деви́цы Сы́ну и Бо́гу, и у́бо про́чии не восхоте́ша, Иа́ков же прие́м свою́ часть и раздели́в со Христо́м, поста́вив Его́ насле́дника. Того́ ра́ди нарече́н бысть брат Бо́жий и пра́ведник.

Стихи́:

Обре́те преста́влься дре́внее блаже́нство,

Игна́тие, первоседа́льниче Но́ваго Ри́ма.

И́же во святы́х оте́ц наш Игна́тий, бысть сын Михаи́ла царя́ Рагкаве́я, и Проко́пии цари́цы, брат Фео́филов, и внук Ники́фора царя́. Ка́женик же быв, та́же и мона́х: пото́м игу́мен хра́ма Арха́нгелова, тогда́ у́бо нарица́ему Восто́чному, ны́не же Сати́ра. Посем поста́влен бысть патриа́рх Константи́ня гра́да. И держа́ лет, единона́десять и пять мес́яц. Посе́м изгна́н бысть Михаи́лом царем Тра́влым. Вме́сто же его́ поста́виша Фо́тия протоспафа́рия и протосигкри́та, бы́вшаго пе́рвее мона́ха. Фо́тий же изгна́н бысть Васи́лием царе́м, и па́ки поста́влен бысть Игна́тий, и епи́скопствова де́сять лет. Изгна́н же бысть па́ки Ники́фором царе́м убие́нным от болга́р. И бысть патриа́рх Стефа́н святы́й, сын Васи́лия царя́. Святы́й же Игна́тий вшед в монасты́рь Сати́ра, и с ми́ром сконча́ся, ле́том осми́десяти, и девяти́.

Сверше́на есть любы́, е́же не раздво́ити челове́ка, реку́щи: о́вого зна́ю, о́вого не зна́ю, ли сей мя хва́лит, а сей клене́т, но на свое́ естество́ при́сно взира́я, вся челове́ки ра́вно люби́, у́бо дру́ги и враги́, до́брыя и злы́я, да соверше́н пред Бо́гом яви́шися, и от враг у́бо со благодаре́нием наноси́мая ти зла́я претерпи́, отъину́дь не помы́сли от тех се твори́мо, но от диа́вола за согреше́ния на́ша: тем и Госпо́дь наш Иису́с Христо́с, Свою́ любо́вь к нам пока́зая, за все челове́чество пострада́ и всем ра́вно наде́жду воскресе́ния дарова́, во́ньже ко́ждо себе́ досто́йна сотвори́т или́ честь или́ му́ку, и́бо Христо́ви раби́ вся лю́бят и́скренно и са́ми же не люби́ми суть все́ми; ми́ра же сего́ дру́зи ни́ктоже от се́рдца лю́бят, а духо́внии до сконча́ния сло́женую любо́вь храня́т: Да потщи́теся вся́каго челове́ка от души́ люби́ти, се бо есть за́поведь Госпо́дня, да а́ще не мо́жете сохрани́ти ея́, поне́ никого́же не возненави́дите, да от Христа́ Бо́га благода́ть восприи́мете ны́не и при́сно и во ве́ки веко́в. Ами́нь.