Стихи́:

Посе́чен му́ченик Аре́фа:

Бо́гу приве́д мно́гия подо́бны му́ченики посе́ченыя:

Аре́фа со свои́ми зна́емыми в два́десять четве́ртый посе́чен бысть.

Сей поста́влен бысть воево́да, старе́йшина гра́да Неграни́тска, и́же нарица́ется Герме́й град. Ца́рствующи у́бо гре́ком Иустиниа́ну, ефио́пом же Ели́звою, христиани́ну, омори́тстей же земли́ Ду́насу евре́ину, той евре́ин Дунас подви́г своя́ во́я, по́йде на Неграни́тский град, и́же мно́ги побе́ды и па́кости показа́в, и ничто́же не успе́ окая́нный, бе́яше бо град и гра́ждане потвержде́ни святы́м Аре́фою. По́сле же лука́вый и ле́стию и кля́твами мно́гими вни́де во град, и пе́рвие ископа́в гроб Па́вла освяще́ннаго епи́скопа, и изъе́м ра́ку с мощьми́, и ко́сти его́ огне́м сожже́ и пе́пел лопа́тою разве́я, иере́я же и леви́ты и четца́ и мни́хи, сковраду́ о́гнену вели́ку вжег, и та́мо вве́рже, число́м четы́реста и два́десять и седмь. Благогове́йным же жена́м, число́м сто и два́десять и седмь, мече́м главы́ им усече́, во́ньже и не́кую жену́ боля́рыню, доброро́дну и че́стну, пред собо́ю поста́вив, и дще́рину главу́ пред очи́ма ея́ отсещи́ повеле́ и от кро́ви ея́ пода́ти ма́тери ея́ на вкуше́ние, я́же и вкуси́вши, а́бие настоя́щаго живота́ лиши́ся. По́слеже всех приведе́н бысть вели́кий блаже́ный Аре́фа, двема́ во́инома свя́зан, и отсеко́ша ему́ со ине́ми тремиста́ и четы́редесятью, и про́чих же ста́рец и ста́риц, ю́ношы и де́вы и про́чий весь людски́й сонм отда́сть в рабо́ту, е́же под о́бластию его́ вла́стелем же и вельмо́жам.

Омири́тску царю́ Ду́насу жидови́ну, прие́мшу ле́стию град Негра́н, и мно́ги изби, му́жи и жены́, и млад́енцы ве́рующыя в Го́спода Иису́са Христа. И Аре́фу старе́йшину су́ща гра́да того́, го́рце му́чив, и смерти предаде́. И в то́же у́бо вре́мя жена́ не́кая бе Cигклитики́я, со двема́ дще́рьма, ро́да сла́вна су́ща и бога́та. И мно́гими словесы́ моля́ше ю́ отврещи́ся распя́таго Христа́, да бу́деши рече́, что́ма цари́цею в пала́те: и не мне́е ти бу́дет трех сот муже́й стоя́щих пред тобо́ю. Свята́я же отвеща́вши рече́: Не бу́дет ми честь челове́ческая па́че небе́сныя, еже пожи́ти с ху́льником. И повеле́ царь откры́ти ей лице́, и со двема́ дще́рьма ея́, и яви́ти ея́ наро́ду, не бе бо и со́лнце ея́ ви́дело николи́же: И пла́кахуся мно́ги жены́ ея́ ра́ди. Она́ же обра́щшися к ним рече́: Послу́шайте мене́ жены́, я́ко не изво́лих мно́гаго бога́тства моего́ па́че небе́снаго, и есть ми днесь день ра́достен, па́че бра́чнаго дне, е́же ити́ ми к Жениху́ моему́ Христу́. Тогда́ разгне́вався царь, повеле́ реко́мым чиго́том, отсещи́ главы́ обе́ма дще́рема ея́. И повеле́ собра́ти кровь ею́, и принести́ к ма́тери ею́. Она́ же вку́шши, рече́: Хвалю́ Тя, Го́споди Бо́же мой, я́ко сподо́бил мя еси́ вкуси́ти же́ртвы чи́сты убо́гою мое́ю дще́рию. И пото́м повеле́ Сигклитики́ю и саму́ усе́кнути: я́же благодаря́щи и сла́вящи Бо́га на́шего Иису́са Христа́, предаде́ преблаже́нную и чи́стую свою́ ду́шу, и с пресвяты́м благи́м пло́дом чре́ва своего́, уго́ждшим Христу́ Бо́гу Царю́ Небе́сному.

Той бе царь Ефио́пский во гра́де Сава́, та́ко нарица́еме: христиа́н сый и благове́рен. И егда́ Негра́нский град взят бысть Омири́тским царе́м Дуна́сом жидови́ном, иде́же убие́н бысть Аре́фа Христо́в му́ченик, со ине́ми испове́давшими Христа́, четы́рьми ты́сящами, и шестию́ сты, му́жи и жены́, и де́ти. Тогда́ разгоре́вся ду́хом благове́рный царь Елизво́й, и хотя́ мсти́ти кровь христиа́нскую, возвести́ Иусти́ну царю́, тогда су́щу в Константи́не гра́де. И прии́м моли́тву от Тимофе́я архиепи́скопа Иерусали́мскаго, призва́ своя́ кня́зи и воево́ды. И всех вой собра́, сто и два́десять ты́сящь, и подви́жеся на арави́тскую зе́млю, на Омири́тскаго царя́ жидови́на су́ща. И прише́д в Га́зу, и раздели́ во́и: четы́редесять ты́сящь в корабли́ всади́, а сам воем повеле́ взя́ти бра́шна на два́десять дней, и по́йде на колесни́цах и на ко́нех. По смотре́нию же Бо́жию заблуди́ в гора́х. Недоста́вшу же бра́шну, и того́ ра́ди в печа́ли бя́ху вели́цей. Су́щии же в корабле́х, ту́жаще медле́ния ра́ди царе́ва. Царь же Омири́теск притужа́ше корабле́м, я́ко бя́ху ста́ша на железных у́жищех, и́миже препя́л ме́лину мо́ря, и мня́шеся ту ефио́пска царя́ Елизво́я устрещи́. Царь же Елизво́й прии́де во град Даке́лу, та́ко нарица́емь: и слы́шав ту не́коего мо́наха, Зино́на и́менем, от мног лет рабо́тающа Го́сподеви: и прише́д в во́инском о́бразе, вопроси́ еѓо, а́ще помо́жет им Бог, и мстят кро́ви христиа́нския. Мона́х же рече ему́: Не си ли слы́шал Го́спода глаго́люща: Мне месть, и Аз возда́м. Ты же зле подви́гнулся еси, отъи́мется бо от тебе́ ца́рство, и мно́зи с тобо́ю живота́ го́нзнут. Царь же в вели́цей печа́ли и тузе́ су́щей быв, и хотя́ бежа́ти. Во у́трий же день, па́ки к мона́ху прии́де. И той рече́ ему́: Несть гра́да на земли́, иде́же сме́рти убежа́ти, а́ще не обеща́ешися в мона́шеское жити́е. Он же с кля́твою обеща́ся ему́. И посла́ его́ на Омири́тскаго жидови́на, благослови́в, якоже Саму́ил Дави́да на Голиа́фа. И приспе́вшу ему́ по брегу, я́ша стра́жие сердобо́ля Омири́тскаго кня́зя: И с тем той прише́д, взят сто́льный град арави́тский. И отту́ду идо́ша в тыл царя́ жидо́вска, иде́же бе боря́ся с корабли́ его́, и наше́дше на ня, победи́ша во́я его́. Ят же и самого́ жидови́на, и уби́в его́ свое́ю руко́ю: и крести́в лю́ди страны́ тоя́, возврати́ся в Ефио́пию со мн́огою коры́стию. Посе́м же вшед на го́ру не́кую, и бысть мона́х, и затвори́ся в ке́ллии, и бысть рабо́тая Го́сподеви. Пи́ща же его бысть посма́г еди́н дово́лен на три дни, и смо́кви, и фи́ники ядя́ше то́кмо: ино́го же не име́яше в ке́ллии, то́кмо полсть, и дре́вян водоно́с, и ко́шницу: вина́ же и еле́я николи́же вкуси́. И прия́т от Бо́га прозорли́выя да́ры, и пожи́в лет пятна́десять в черне́честве, и преста́вися к Бо́гу.

«Внемли́те от лжепроро́к. Прихо́дят бо к вам во оде́жди о́вчии, внутрь же суть во́лцы и хи́щницы». Лжепроро́к же зде не еретики́ пове́дает, я́ко мню, но житие́ иму́ща растле́нно, лице́м же доброде́тели обложе́ни: тем и рече́, глаго́ля: «От плод их позна́йте я́»; от ерети́к бо мно́гажды и житие́ есть обрести́, о сих же, и́хже глаго́лах, ника́коже. Что у́бо рече́: а́ще сих осужда́ете, не пременя́тся скоре́е, таково́е бо есть пути́ сего́ естество́, и́мже изво́лиша ходи́ти, тру́ден и зол и лицеме́р, и́же труди́тися небреги́й, но явля́тися то́лько тем и явля́ется скоре́е. Тем у́бо и Па́вел, явля́я, глаго́лаше, я́ко благи́ми словесы́ прельща́ют сердца́ незло́бивых. И виждь кро́тости, не рече́ бо: му́чите их, но не приими́те па́кости от них и да не сохране́ни к ним впаде́те и да не рече́ши, я́ко немо́щно позна́ти таковы́х. И па́ки при́тчею челове́ческою си́це глаго́ля: «Егда́ беру́т от те́рния вино́ или́ от волчца́ смо́кви? Та́ко все дре́во бла́го твори́т плод добр, а гни́ло дре́во плод зол твори́т. Не мо́жет дре́во добро́ плода́ зла сотвори́ти, ни дре́во зло плода́ добра́ не мо́жет твори́ти». А е́же глаго́лет, се есть, и ничто́же и́муть кро́тка, ни сла́дка, до ко́жи то́кмо о́вчи, тем и удо́бен ра́зум. Поне́же у́бо мно́зи благи́х от злых мнят, вся́кого лиша́я их отве́та, се рече́; ни и́маши рещи́, я́ко прельсти́ мя, ни домы́слихся, и́бо изве́сто ти преда́х, е́же от дел увиде́ние, о Христе́ Иису́се Го́споде на́шем, Ему́же сла́ва и держа́ва со Отце́м и со Святы́м Ду́хом, ны́не и при́сно и во ве́ки веко́в. Ами́нь.