Стихи́:

Христо́ви тро́сти и нота́ре вменя́й,

Омоче́на от меча́ уби́йственою кро́вию.

Па́влу испове́днику, патриа́ршествующу в Константи́не гра́де, по успе́нии патриа́рха Алекса́ндра, в ца́рство Константи́на ариа́нина, и за е́же у́бо и́же во святы́х Па́вел изгна́н во Арме́нию и прия́т блаже́ную кончи́ну, уда́влен от ариа́н, та́ко и си́и святи́и правосла́вныя ра́ди ве́ры убие́ни бы́ша мече́м и погребе́ни бы́ше во врате́х Меланди́йских, в том же Константи́не гра́де, и́мже це́рковь, и́же во святы́х оте́ц наш Иоа́нн Златоу́ст, от основа́ния созда́.

Стихи́:

Анаста́сие су́рово проти́влься

Ме́чному нарече́нию на ня.

Той самозва́н к мучи́телем прише́д, и Христа́ Бо́га И́стиннаго вся́ческих Творца́ дерзнове́нно пропове́да, и всех во у́жас устро́и. И непреложе́ние его́ ви́девше, мече́м главу́ его́ отсеко́ша, и в мо́ре вверго́ша. Жена́ же не́кая благочести́ва, из глубины́ взе́мши свято́е те́ло его́, воня́ми благи́ми, и поня́вами обви́вши, и це́ркви своего́ до́ма положи́. И мно́гия цельбы́ творя́, в сла́ву Человеколю́бца Бо́га.

Глаго́лю вам вещь таку́, и́же при мне да навы́кнете, я́ко от сме́рти избавля́ет послуша́ние, е́же не име́ти своего́ хоте́ния. Не́когда ми бы́вшу у а́ввы Си́дора, прии́де ту учени́к вели́кого ста́рца от ча́сти Аскало́на на разсужде́ние а́ввы своего́; имя́ше же за́поведь от ста́рца по вече́рнии возвраща́тися во свою́ клеть. Отто́ле же быть бу́ря у́бо зело и ту́чи и гро́ми, и бе ту близ пото́к по всей стра́не той. Пото́м же восхоте́вшу отъити́ по глаго́лу ста́рчу, мы же моля́хом его́ пребы́ти ту, глаго́люще: я́ко немо́щно есть спасти́ся ему́ от реки́. И тому́ не восхоте́вшу в нас пребыва́ти, глаго́лахом: по́йдем с ним до реки́: узре́в бо ю́, и́мать возврати́тися. И идо́хом с ним, и, егда́ доидо́хом до реки́, сво́лкся он с риз свои́х и навяза́ на главу́ свою́ и препоя́сает по́ясом свои́м и воскочи́ в ре́ку ту велиќую и стра́шную бы́стрину. Мы же стоя́хом, дивя́щеся и трепе́щуще, егда́ ка́ко у́мрет. Той же пребыва́ше бреды́й и обре́теся на друзе́м бре́зе на ка́мене, и облече́ся в ри́зы своя́ и полага́ет нам оттуду поклоне́ние, и прии́м благослове́ние, отъи́де теки́й. Мы же пребыва́хом, чудя́щеся и удивля́ющеся си́лы доброде́тельныя, ка́ко без беды́ пре́йде реку послуша́ния ра́ди своего́.

В Царе́ гра́де ходя́щу свято́му Андре́ю, еди́н не́кто вели́ких боля́р мимоиды́й, ви́дев его́, сгнуси́ся ему́, и плю́ну нань, разуме́в житие́ его́. И рече́ к нему́: Лука́вый блудниче́, церко́вный поруга́телю, не ты ли творя́ся я́ко в це́рковь иду́ рече́ на у́треню, а хо́диши к сатане́ на зау́треню беззако́нниче полу́нощи востая́. Но се уже́ приспе́л ти есть рок твой, да прии́меши я́коже де́ял еси́: или́ утаи́тися мня стра́шнаго о́ка пыт́ающаго вся. Се же он слы́шав уда́ри коня́ и отъи́де, да бы не посрами́лся: халтула́рь бо бя́ше са́ном: По днех же не́колицех неду́гом злым разболе́вся, и нача́ пома́лу суши́тися. Свои́ же ему́ нача́ша его́ носи́ти от це́ркве к це́ркви, от лечца́ к лечцу́ и не бя́ше ему́ по́льзы. Пома́ле же лише́нный по́йде в ве́чную му́ку. Не́коей бо но́щи су́щи, ви́де святы́й близ двора́ его́. А́нгела Госпо́дня прише́дша от за́пада, и́же бя́ше я́ко пла́мень, лю́те о́чи име́я, и держа́ше па́лицу вели́ку пла́менну. И прии́де в дом лише́ннаго того́ грозя́ся и гне́ваяся, раскопа́ти хотя́ дом его́. Егда́ же к больно́му прии́де, услы́ша глас свы́ше глаго́лющь: бий поруга́теля того́ содо́млянина. Бия́ же его́, глаго́ли та́ко: или́ и еще́ грехи́ хо́щеши твори́ти с чужи́ми жена́ми, или́ с му́жеским по́лом содо́мский грех твори́ти на́чнеши, или́ творя́ся на зау́треню иды́й, на беззако́ние же диа́воле и́деши. Нача́ же его́ би́ти, и глаго́лати к нему́: да глас бя́ше слы́шати глаго́лющаго, и па́личный бой, а бию́щаго не ви́дети. Му́чимь же лише́ный, пове́дати нача́ хотя́ и не хотя́ стыдя́ся: я́ко уже́ не согреша́ю николи́же, поми́луй мя. И та́ко му́чимь бе три дни, и три но́щи, глаго́ля: я́ко не согреша́ю, и еще́ души́ своея́ не испусти́л бя́ше. Се же дружи́но моя́ написа́х, слы́шав у блаже́ннаго Андре́я на по́льзу и боя́знь душа́м на́шым, да бы́хом блюли́ся клюк на сем све́те живу́ще. Ничто́же бо мо́жет Бо́га утаи́тися, ни святы́х Его́.

Вельми́ добро́ есть челове́ку ну́дитися, да удержи́т страсть гне́вную, и да сокруши́т я́рость душе́вную, долготерпе́нием, и кро́тостию, моли́твами, и смире́нием. Зело́ бо ре́ет бес челове́ка на гнев, хотя́щаго спасти́ся. Да я́же собере́т труды́, посто́м и моли́твою, бде́нием, или́ слу́жбами, то во еди́н час изгуби́т, бе́су гне́вом многоле́тный плод отъе́мшу от него́: и уже́ обря́щется челове́к без вина́ пия́н. Мно́га у́бо тре́бует челове́к уче́ния, да изжене́т страсть гне́вную. Хотя́й к соверше́нию приити́, и жела́я по́двиги духо́вными подвиза́тися, от сего́ прихо́да гне́внаго чуждь да бу́дет. Дух бо гне́вный в на́шем се́рдце седя́й, о́чи разу́мнеи те́мными мяте́жи ослепля́ет. Да уже́ ни разсужде́ния поле́зных стяжа́ти мо́жем, ни духо́внаго ра́зума обрести́, ни сове́та благ удержа́ти. Не подобает бо нам с гне́вом на единове́рныя наступа́ти, но то́чию на своя́ грехи́, и на злы́я мы́сли, я́же тща́тся соврати́ти ны со и́стиннаго пути́. Того́ бо ра́ди и При́точник глаго́лет: Отъими́ разгне́вание от себе́, и помяни́, я́ко и ты всегда́ прогне́ваеши сотво́ршаго тя. И па́ки: Гнев погубля́ет пра́ведники: сло́во же же́стоко воздвиза́ет гнев. И гнев отцу́, сын безу́мен: слуга́ же мудр, укроти́т гнев му́жа. И па́ки: Тя́жек ка́мень, и неудо́бь носи́мь песо́к: гнев же безу́мнаго тяжча́йши обои́х. И прирече́: Утоли́ гнев, бе́су бо есть оте́ц. Да не подоба́ет нам бра́тие лю́таго бе́са в се́рдце держа́ти, веду́щаго ны в поги́бель. Я́коже бо вода́ дви́жется от ну́жди ве́треныя, та́кожде и гневли́вый смуща́ется от мы́сли гне́вныя. Челове́к гневли́вый, вепрь ди́вий: Ви́дев друг дру́га, и зубы́ поскрежета́. Иа́ков же учи́т ны глаго́ля: Да бу́дет всяк челове́к скор на послуша́ние, ме́длен же в гнев: гнев бо му́жу пра́вду Бо́жию не содева́ет. Па́вел же: Не себе́ отмща́юще возлю́бленнии, но дади́те ме́сто гне́ву. И па́ки: Вся́ка го́ресть, гнев, и хула́, да отъи́мется от вас со вся́кою зло́бою. То́же и Дави́д: Преста́ни от гне́ва, и оста́ви я́рость. Строи́тель же душ на́ших Госпо́дь веща́ет глаго́ля: Я́ко всяк гне́ваяйся на бра́та своего́ без ума́, пови́нен есть суду́. И́же бо рече́т бра́ту своему́ юро́де, пови́нен есть родству́ о́гненному: его́же избы́ти мо́лимся Ми́лостивому Влады́це Христу́ Бо́гу на́шему, Ему́же сла́ва со Отце́м и со Святы́м Ду́хом, ны́не и при́сно, и во ве́ки веко́в. Ами́нь.