Си́и святи́и му́ченицы, пострада́ша при Де́кии царе́, и Фуртуна́те иге́моне: во Африки́и рожде́ни бы́вше. И подви́гшеся о Христо́ве испов́едании: И пе́рвее у́бо бие́ни бы́ша жи́лами суро́выми, пото́м же́злием. Та́же желе́за разжже́на по плеще́ма положе́на бы́ша, и возлива́юще на ра́ны, о́цет с со́лию, и у́жы власяны́ми растрыва́ются. И па́ки а́бие вопроше́ни бы́вше, и не покори́вшеся, у́зами свя́зани бывают: и желе́за разжже́гше, и по земли́ положи́вше, влача́ху их на́ги по них. Пото́м в ров вве́ржени бы́вше, иму́щь змии́, и скорпи́и, и невреди́ми пребы́вше. Пото́м ме́чную прия́ша кончи́ну.

Стихи́:

С седмы́ми ча́ды дво́ица му́ченическая

Честь – ме́чное посече́ние вменя́ше.

Си́и святи́и му́ченицы, во еди́ном дому́ пребыва́юще и Бо́гу вы́ну скро́вне служа́ще, оболга́ни бы́ша и предста́ша суди́щу, и Христа́ испове́даша, и́долы же ху́ляху. Пове́шени бы́вше и стро́гани без ми́лости, та́же о́цтом лю́тым я́звы их кропля́ху, и жу́пелом с до́лу поджига́еми, моля́хуся, мо́лком друг дру́га теша́ше. И не презре́ Бог моле́ния их, но а́нгели неви́димо от уз их свобожда́ху и цельбу́ подава́ху. Злочести́выя же у́жас и боя́знь обдержа́ше. Пото́м на колии́ пове́шени бы́вше, и никоего́же зла пострада́ша. Звере́м в снедь вда́ни бы́ша, без вре́да от всего́ сохране́ни бы́ша. В коно́б, смоло́ю врющь, вве́ржени бы́ша и вре́ние смольно́е в во́ду студену́ преложи́ся. Ви́девше у́бо злочести́вии, я́ко ни в смех му́ки святы́м каса́ются, мече́м главы́ им отсеко́ша.

Стихи́:

Сме́щшь с ма́слом Кириа́че всеблаже́нне,

Свою́ кровь честну́ю, смеше́ние но́во соде́ла.

Сей святы́й Кириа́к, по явле́нии честна́го и животворя́щаго Креста́, и по ве́ровании и по креще́нии, бысть епи́скоп Иеросали́мский, по Мака́рии. И проба́вися живо́т его́ до ца́рства Иулиа́на престу́пника, и́же и на пе́рсы шед, и́де и во Иеросали́м. И уве́дев о святе́м Кириа́це, и ем его́ поста́ви на свое́м суди́щи, и пону́ди его́ пожре́ти и́долом. И обличе́н быв от него́. Тем повеле́ отсещи́ ему́ ру́ку десну́ю, рек: Я́ко ты мно́гая посла́ния написа́л еси́ то́ю руко́ю, и мно́гия отврати́л еси́ от бого́в. Посе́м влия́ о́лово во уста́ его́, та́же положи́ его́ на одре́ ме́дне разже́не. Прише́дши же к нему́ ма́ти его́, я́та бысть и та, и пове́шена бысть за власы́, и стру́жема у́мре. Посе́м вве́ржен бысть в коно́б: и уя́звен копие́м сконча́ся.

В ца́рство Диоклитиа́не та бе от гра́да Икони́йскаго, христиа́на иму́щи роди́теля. В то́йже ве́ре и са́ма воспита́на бысть. Уме́ршима же роди́телема ея́, нача́ облича́ти е́ллины и укаря́ти бо́ги их. И сего́ не терпя́ще, вверго́ша ю́ в темни́цу, и шед, пове́даша тогда́ прише́дшему кня́зю, я́ко есть де́ва во гра́де сем, я́же повеле́ния царе́ва не слу́шает и бо́ги хули́т. И повеле́ привести́ ю́ и вопроси́ первие и́мени ея́. Она́ же рече́: Пя́тница ми и́мя есть, Христо́вым страсте́м обе́щница. Мно́го же пону́ди ю́ князь отврещи́ся Христа́ и куми́ром пожре́ти, и не увеща́ ея́, повеле́ раздра́ти на ней ри́зы и би́ти ю́ волу́ями жи́лами по всему́ те́лу и власяни́цею востира́ти ра́ны ея́. И ви́дев ю́, ни еди́ною испу́стящу гла́са, повеле́ пове́сити ю́ на дре́ве и ногты́ желе́зными дра́ти ре́бра ея́. Посе́м вверго́ша ю́ в темни́цу, жи́ву су́щу. И приш́ед а́нгел Госпо́день, исцели́ ю́ от ран. И пове́даша же стра́жие кня́зю, я́ко исцеле́ от ран. И повеле́ вести́ ю́ в куми́рницу. Она́ же, ше́дши, ят куми́ра за но́гу, све́рже и́ до́лу. Тогда́ вси куми́ры сокруши́шася си́лою Христовою. И приведена́ бысть ко кня́зю и, разгне́вався, повеле́ свещами по всему́ те́лу жещи́ ю́. Си же, му́чима, помоли́ся Богу, да по́слет а́нгела, пожега́юща безако́нники. Косну́ся ангел свещи, и восполе́ся огнь в наро́де и пожега́ше вся безако́нники. И побежа́ша вси во град и сам князь. И повеле́ усекну́ти ю́ мече́м. Помоли́ же ся му́ченица к Бо́гу, да прии́мет князь от Бо́га месть неве́рия своего́ ра́ди. И та́ко усечена́ бысть мече́м и прия́т от Бо́га вене́ц с му́дрыми де́вами. Во у́трий же день изы́де князь на ло́вы, и спаде́ с коня́ в дебрь, и сокруши́шася ко́сти его́, и ту испусти́ окая́нную свою́ ду́шу по моле́нию святы́я му́ченицы Параско́вгии.