Чтение на день: Октябрь, 30 число (старый стиль)
По шестой песни:
И поется кондак и икос (или мученичен, аще несть).Стихи́:
Пожида́ет тебе́ мечь, Зино́вие,
Терпеливому́дреная поне́ жена́ Зинови́я.
Сия́ бы́ста в ца́рство Диоклитиа́ново, благочести́вых роди́телей ча́да. И у́бо Зино́вий ят быв, и предста́ иге́мону. И я́ко вопроша́емь бя́ше, вдаде́ себе́ на муче́ние, и сестра́ его́ Зинови́я. Бие́ни у́бо быва́ют ку́пно о́ба, и в коно́б врю́щий со смоло́ю вме́тани бы́ста. И невреди́мы Христо́вою благода́тию, соблюда́еми от мук: и ме́чный коне́ц прия́ста.
В то́йже день свята́го Маркиа́на, епи́скопа Сиракуси́йскаго, ученика́ свята́го апо́стола Петра́
Стихи́:
Христо́ва раба́ благоу́мнаго Маркиа́на,
Ну́ждею убива́ют христоуби́йцы иуде́и.
Сей поста́влен бысть епи́скоп Петро́м апо́столом. И по́слан в Сираку́сы Сикили́йския. Хра́мы идо́льския, моли́твою разори́, и мно́гих ко и́стине приве́д. И зна́мении, и чудесы́ удиви́в, и сы́ны Све́та соде́ла. Тем за́вистию обложи́ми иуде́и, уби́ша его́ ну́жною сме́ртию.
В то́йже день страсть святы́я му́ченицы Евтро́пии
Стихи́:
Евтро́пию, я́ко неве́сту,
Свещми́ предпосыла́ет в дом мы́сленаго Жениха́.
Сия́ опове́дана бы́вши Апелиа́ну иге́мону, я́ко христианы́ни и ходя́щи по темни́цах и потвержда́ющи затворе́ныя святы́я, я́та бы́вши, и пове́шена, и свеща́ми пали́ма, и вменя́ше пла́мень я́ко во́ду, и явля́ше всем, я́ко му́жа ви́дети стра́шна, простужа́ющаго рося́щаго ю́, его́же и во́ини очи́ма зря́ху. И та́ко вельми́ му́чена бы́вши, и в тех му́ках преда́сть дух свой Го́сподеви.