Стихи́:

Жре́тся А́гнца ра́ди Бо́жия Заха́рия

Я́коже а́гнец не́кий закла́н бысть среде́ це́ркви:

В пя́тый Заха́рию на земли́ закла́ша безако́нно.

Сей дерзнове́нно пропове́дая Богоро́дицу Мари́ю ма́терь ку́пно и деви́цу, и отлуче́ным деви́ческого стоя́ния неподо́бно бежа́ти повелева́я. И зане́же не обрета́тися сы́ну его́ Иоа́нну во вре́мя избие́нию младе́нец, я́ко кры́ема во верте́пе об он пол Иорда́на с ма́терию свое́ю, повеле́нием мучи́телевым закла́н бысть Заха́рия среди́ це́ркви и же́ртовника от иуде́й.

--- Заха́рия проро́к бя́ше, сын Варахи́и жреца́, оте́ц у́бо Иоа́нна Крести́теля, жрец же бе це́ркве Иеросали́мския. Вшед у́бо не́когда в це́рковь покади́ти, и ви́де а́нгела Бо́жия стоя́ща, одесну́ю олтаря́ кади́льнаго, возвеща́юща ему́ в ста́рости роди́ти сы́на Иоа́нна Предте́чу, е́же и бысть. И по рождестве́ Иоа́ннове, в шесты́й ме́сяц слух бысть, я́ко хо́щет И́род царь жидо́вский изби́ти младе́нцы и́же в Вифлее́ме, Го́спода ра́ди на́шего Иису́са Христа́. Тогда́ у́бо и тому́ Иоа́нну Предте́чи ро́ждшуся. Убоя́вши же ся Елисаве́т ма́ти Иоа́ннова, и скры его́ в верте́пе об он пол Иорда́на. Его́же взыска́в И́род, и не обре́те: и повеле́ закла́ти отца́ его́ Заха́рию посреде́ же́ртвенника, и пролия́ти кровь его́ в це́ркви. И та́ко заколе́н бысть беззако́нными иуде́и, повеле́нием нечести́ваго И́рода: положе́н же бысть во гро́бе пр́адед свои́х.

Сия́ христиа́на су́ща, и Христа́ со дерзнове́нием испове́даста Бо́га су́ща, и Влады́ку всему́ Соде́теля и Промы́сленника. И́долы же дре́во и ка́мение су́ща, глу́хи и истука́нны нарица́юща. И мно́ги от и́дол ко и́стинней ве́ре обраща́юща. Я́та же бы́ста беззако́нными е́ллины, и мно́го му́чена бы́ста от них. Коне́чное же Фифа́ил на дре́ве пове́шен бысть, и разтре́н бысть пило́ю. Сестра́ же его́ Фиве́я, копие́м в вы́ю уя́звена бы́вши, и убие́на бысть. И та́ко по благодаре́нии мно́зем Христу Бо́гу помо́льшася, я́ко сподо́бистася за Него́ умре́ти, да насле́дуета ве́чный живо́т. И та́ко преда́ша святы́я своя́ и блаже́нныя ду́ши, в ру́це Бо́га Жива́го.

Бе не́кто епи́скоп в не́коем гра́де, и по диа́волю злохи́трству впаде́ в блуд. Во еди́н же у́бо от дней, бы́вшу собо́ру в це́ркви, никому́ ве́дущу о гресе́ его́. Всем же лю́дем сше́дшымся, и пред все́ми сам испове́да глаго́ля: «Аз в блуд падо́х». И шед положи́ омофо́р свой на олтаре́, глаго́ля: «Отсе́ле не могу́ бы́ти вам епи́скоп». И возопи́ша вси лю́дие с пла́чем глаго́люще: «Грех той на нас бу́ди о́тче, токмо ты пребу́ди во епископии». И по мно́зе моле́нии рече́ им: «А́ще хо́щете да пребу́ду во епи́скопии, е́же реку́ сотвори́те»: и повеле заключи́ти две́ри сторо́нния. И пове́рже себе́ у еди́нех двере́й на лицы́. И рече́ к лю́дем: «Не и́мате ча́сти у Бо́га, и́же кто исходя́ не попре́т мене́ нога́ми»: и сотвори́ша по словеси́ его́. Егда́ же у́бо после́днему изходя́щу, прии́де с небесе́ глас глаго́ля: «Мно́гаго ра́ди смире́ния его́, прости́х его́ греха́». И сие́ сл́ышавше вси лю́дие, просла́виша Бо́га.

Си́це глаго́лет Госпо́дь Вседержи́тель: суд пра́ведно твори́те, ми́лости и щедро́ты твори́те ко́ждо и́скренему своему́. Вдови́цы и си́роты и прише́льца и убо́га не наси́льствуйте, и зло́бы ко́ждо бра́та своего́ да не по́мните, ни в се́рдцы свое́м вражды́.

Но вы проти́ву сему́ вне́млете зла́я, и да́сте плещи́ их ра́нам, и не му́дрствующе, ушеса́ ва́ша отяжи́сте, не слы́шасте, и се́рдца ва́ша учини́сте проти́вна не послу́шати зако́на Моего́. Гра́бите до́мы вдови́ц, наси́льствуете убо́гим, возопию́т ко Мне, и услы́шу я́, и послю́ на вы мечь я́рости, и вы́несу вы я́ко в ви́хре во вся язы́ки, и дам вы в плен, а́ки Иехо́нию в храм жернва́реск у царя́ Вавилонска, и я́ростию вели́кою поревну́ю на вы. Зане́ зе́млю да́сте в запусте́ние пролия́нием кро́ве мно́гия и непокоре́нием брат бра́ту, и зако́н Мой уничижи́сте, и це́ркви Моя́ оскверни́сте, свяще́ннии Мои́ не поми́ловани бу́дете, а́ще не пока́етеся и ми́лостынею не очи́ститеся.