А́ще ме́рима есть земля́ пя́дию, и ве́рвию опоясу́ется мо́ре: А́ще лакотми́ испыту́ется не́бо, и зве́здное мно́жество исчита́ется: А́ще ка́пли дожде́вныя, и гру́ды земны́я, и ве́тренняя бу́ря, и песка́ коли́чество постиза́ется: си́це и начина́ние на́шея ве́щи бу́дет пости́жно я́ве. Я́ко бо Бо́жия Ма́тере торжество́, и Рождество́ досточу́дныя Отрокови́цы твори́мое, Отрокови́цы Присноде́вы. Отрокови́цы неискусобра́чны, Цари́цы, Проро́чицы. Ея́же ца́рския пелены́ о́ком вообрази́ воззва́: «Вся сла́ва Дще́ре Царе́вы внутрь, в ря́снах златы́х оде́яна и преиспещре́на» . Издале́ча мню, е́же от пеле́н а́бие обложе́но то, и боже́ственныя добро́ты благоле́пие, испещре́нием боже́ственнаго Ду́ха дарова́нии назна́менуя. Се бо суть е́же от зла́та ри́зы, и злати́и ря́сны по моему́ ра́зуму: мню же и ца́рския пелены́, ко благоразу́мному безстра́стней приима́тися. Ея́же вну́треннее благоле́пие, и е́же от добро́ты вне́шния сия́ющую Де́выя прозре́в красоту́, дерзнове́нным гла́сом возопи́: «Слы́ши Дщи, и виждь, и приклони́ у́хо Твое́, и забуди лю́ди Твоя́, и дом отца́ Твоего́, и возжела́ет Царь добро́ты Твоея» . Я́коже а́ще и проявле́нне, о е́же от язы́к це́ркви возво́д и́муть. Но небе́дно и о Сей приима́тися, и́же всея́ це́ркве Неве́сте, це́ркви бы́вшей, воплоще́ния чудесе́.

Гряди́ у́бо вку́пе соше́дшеся со Дави́дом, и́же от Дави́да воспле́щем подо́бныя Бо́жии Ма́тере похвалы́, почти́м пра́здника све́тлость. Принесе́м Де́вей де́вственная честносло́вия. Дароно́сим Цари́це ро́да на́шего, я́ко многоче́стная ми́ра, проро́ческая прорече́ния. Пригласи́м Той Гаврии́лово приглаше́ние. Рцем Ма́тери ра́достная:

Ра́дуйся Благода́тная! Ра́дуйся Пресве́тлая, Ея́же ра́ди тма отгна́ся, и Свет введе́н бысть. Ра́дуйся Благода́тная, Ея́же ра́ди зако́н умолче́, и ра́дость процвете́. Ра́дуйся ра́дости Нача́ло, и кля́твы Потребле́ние. Ра́дуйся вои́стинну Благода́тная, Госпо́дь с Тобо́ю, о Тебе́ по́слежде, И́же Тобо́ю пе́рвее. Си́лою пе́рвее, де́йством второ́е. Ны́не у́бо угото́ви утро́бу Твою́ вселе́ние Тому́, тогда́ же соде́ется из Тебе́ пло́тский вели́каго смотре́ния Царь. Радуйся еди́на Благослове́нная в не́дрех прие́мши Го́спода, да пе́рвыя кля́твы прама́ти совлече́тся. Радуйся богоприя́тное де́вства Сокро́вище, от него́же рождество́ произыде нетле́нно, и бога́тство де́вства пребы́сть некра́домо. Радуйся Ма́ти чисто́тствующая, и де́вою доя́щая. Ра́дуйся добро́ты Ве́нче, и ро́да на́шего Цари́це, ца́рскими отвсю́ду крася́щися изя́щствы. Ра́дуйся богоосвяще́нная Це́ркве Христа́ Еди́наго, Еди́ного в небесных святы́х по чи́ну Мелхиседе́кову свяще́нствующаго. Ра́дуйся Же́зле Ааро́нов, Ко́реню Иессе́ов, Ски́птр[е] Дави́дов, Ца́рское Одея́ние, ра́достный Вене́ц, де́вства О́браз неопи́санный, освяще́ния Дска, недове́домых Сло́во. Ра́дуйся, зако́на Хода́таице и благода́ти, Я́же ве́тхаго и но́ваго Заве́та Печа́ти, вся́каго проро́чества я́вственейшее исполне́ние. Краегране́сие богодохнове́нныя писа́ний и́стины, Я́же Бо́га и Сло́ва одушевле́нный чисте́йший Сви́ток, в не́мже неизглаго́ланне и неопи́санне Сам написа́ся Бог и Сло́во, и на всяк день прочита́ется. Ра́дуйся, Нача́ло на́шего зда́ния: Ко́нче, и́же к нам обеща́ний Бо́жиих, и прорече́нных: предвозвеще́нное Бо́жия сла́вы Святи́лище, богонаде́жное язы́ков спасе́ние. Ра́дуйся, вои́стинну и́стинная Ле́ствице Иа́ковля, дымя́щаяся же Горо́, Ковче́же освяще́ния, всю́ду окова́н зла́том, и сия́я Ду́хом, злата́я Ру́чко, Христа́ небе́сную ма́нну нося́щая, и Пи́ще всех нетле́нная. Ра́дуйся Ея́же ра́ди е́же в печа́лех роди́ши ча́да, ме́ста не име́я ктому́, но е́же в ра́дости ражда́ти претвори́ся. Благослове́на Ты в жена́х, Ея́же в позна́ние призва́шася язы́цы ве́ровавшии. Благослове́н Гряды́й во И́мя Госпо́дне, Бог Госпо́дь и яви́ся нам . Благослове́на Ты в женах, тайный богонасажде́нный Виногра́д, во зва́нии церковнем прозябшая, и зрелый Грозд нетле́ния возра́щший. Благослове́на Ты в жена́х, боговозде́ланная Браздо́, я́же безсе́менный, и ненапое́нный жи́зни на́шея Клас, я́коже в купине́ во утробе поне́сшая. Благослове́на Ты в жена́х, вои́стинну возжеле́нная Земле́, от Ея́же бре́ния Скуде́льник персть на́шу сотво́рь, сокру́шшийся грехо́м сосу́д обнови́. Благослове́на Ты в жена́х, но́вый Сило́ме, в не́мже почи́ мы́сленный Киво́т. Воплоще́ние Бо́жия Сло́ва, в не́йже все исполне́ние теле́сне обита́ Божества́. Благослове́на Ты в жена́х, боже́ственный вои́стинну До́ме Дави́дов, в не́мже богоно́снии свяще́нныя це́ркве таи́нницы, проявле́ние иму́ще боже́ственных открове́ний, проро́чествоваху бу́дущая. Благослове́на Ты в жена́х, мы́сленный Вифлее́ме, Храни́лище, и есте́ственный живо́тнаго Хле́ба До́ме бы́вший, и глаго́лемый, поживе́ бо я́коже весть в Тебе́, и на́шему примеси́ся несме́сне смеше́нию: всего́ себе́ Ада́ма примеси́в, да хлеб бу́дет живо́тный небе́сный. Благослове́на Ты в жена́х, Я́же зако́нныя и сено́вныя ски́нии бо́льшая, от Нея́же вели́кий Веселеи́л, Христо́с Бог су́щая благода́ть, нерукоде́ланне Себе́ храм устро́и, одушевле́нную Свою́ плоть, началохудо́жеством Ду́ха.

И что у́бо а́ще и́но рече́м возлю́бленнии по достоя́нию черто́жне, Той возмо́жно принести́ пе́ние: Но а́ще не от рая́ писа́ний цветы Той та́йныя прине́сше, похва́льный исплете́м вене́ц. Несть бо неве́дети кому́ во вся́ком боже́ственном Писа́нии проходя́щу, разсе́янна разли́чне о Той назна́менания, я́же в сие́м люботру́днем сло́ве, обнаже́на обря́щет у́бо, и боже́ственною благода́тию обымет: Тоя́ бо им́я, многозва́нными именова́нии, имену́емо есть, и мно́жицею писа́нием све́тле изъявля́емо. Ели́ким именова́нии зва́тися обы́че Пречи́стая Богоро́дица, принеси́ рече́м: Де́ву Тя имену́ет: Черто́г: Проро́чицу: Дом Бо́жий: Дом свят: втору́ю Сень: Трапе́зу святу́ю: Же́ртвенник: Очисти́лище: зла́ту Кади́льницу: Свята́я святы́х: Херуви́м сла́вы: Ру́чку зла́ту: Скрижа́ль заве́та: свяще́нный Жезл: Хору́гви Ца́рствия: Диади́му добро́ты: Рог, в не́мже пома́зания ми́ро: Алава́стр: Све́щник: Каже́ние: Свещу́, све́щный Свет: Кади́льницу, Ру́чку: Ка́мень: Зе́млю: Рай: Ни́ву: Бразду́: Исто́чник: Ю́ницу: Ка́плю: и подо́бная сим. Ели́кими сию́ сла́внии Ду́хом проро́цы во обра́зных та́йны зре́ниих, прозорли́ве имену́ют, си́речь:

Купину́ у́бо, я́коже глаго́лет Моисе́й: «Прише́д ви́жду виде́ние вели́кое сие́, что я́ко гори́т купина́, и не сгара́ет» .

Жезл, я́коже егда́ Иса́ия рече́: «Изы́дет жезл из ко́рене Иессе́ова, и цвет от ко́рене про́йдет» .

Ко́рень: «И бу́дет в день он ко́рень Иессе́ов: и воста́яй владе́ти язы́ки, на́ньже язы́цы упова́ют» .

Земля́ свята́я: «Моисее, Моисее, разреши́ сапо́г ногу́ твое́ю, земля́ бо на не́йже стои́ши ты, земля́ свята́ есть» .

Земля́ возжеле́нна: «И уничижи́ша зе́млю жела́нную» .

Земля́ возсия́ющая: «И́стина от земли́ возсия́» .

Юг: «Бог от ю́га прии́дет».

Го́ру: «И святы́я от горы́ приосене́нныя ча́щи» .

Ка́мень: «Отсече́ся ка́мень от горы́ кроме́ рук» .

Гора́: «Ю́же благоволи́ Бог жи́ти в ней» .

Ма́слина: «Аз же я́ко ма́слина плодови́та в дому́ Бо́жии» .

Киво́т: «Воскресни́ Го́споди в поко́й Твой, Ты и киво́т святы́ни Твоея́» .

Престо́л: «Ви́дех Го́спода Савао́фа седя́ща на престо́ле высо́це и превознесе́не, и испо́лнь сла́вы храм Его́» .

Вра́та: «Рече́ Госпо́дь ко мне: врата́ сия́ затворе́на бу́дут, и не отве́рзутся, и никто́же про́йдет сквозе́ их, я́ко Госпо́дь Бог Изра́илев вни́дет и изы́дет и́ми, и бу́дут врата́ затворе́на» .

Сио́н: «Прии́дет от Сио́на избавля́яй, и отврати́т нече́стие от Иа́кова» . «Избра́ Госпо́дь Сио́на, изво́ли Его́ в жили́ще Себе́» .

Ма́ти нарица́ется: «Ма́ти Сио́н рече́т челове́к, и челове́к роди́ся в нем, и той основа́ и́ Вы́шний» . «И отку́ду мне сие́, да прии́де Ма́ти Го́спода моего́ ко мне» .

Носи́ло: «Носи́ло сотвори́ себе́ царь Соломо́н от древе́с Лива́новых» .

Одр: «Се одр Соломо́нов, шестьдеся́ть си́льных о́крест его́, и от си́льных Изра́илевых» .

Сви́ток: «И се рука́ просте́рта ко мне, и в ней сви́ток кни́жен, и разреши́ его́ пре́до мно́ю. И бе в нем напи́сана пре́дняя и за́дняя. И рече́ ко мне: Сы́не челове́чь, снеждь сви́ток сей» .

Кни́га: «И бу́дет по глаго́лех сих, глаго́лет Бог: Я́ко словеса́ кни́ги сея́ запечатле́нныя, ему́же а́ще да́стся челове́ку ве́дущу писа́ния. Глаго́люще: Прочти́ сие́, и рече́т: Не могу́ прочести́, запечатле́нна бо есть кни́га» .

Па́ки сви́ток: «Рече́ Госпо́дь ко мне: приими́ себе́ сви́ток нов, и напиши́ в нем писа́нием челове́ческим, е́же ско́ро сотвори́ти плене́нием коры́стем, настои́т бо» .

Клеща́: «И по́слан бысть ко мне еди́н от серафи́м, и́же в руце́ свое́й име́яй угль, его́же клеща́ми взем от олтаря́, и косну́ся устна́м мои́м. И рече́: Се косну́ся устна́м твои́м, и отъи́мет беззако́ния твоя́, и грехи́ твоя́ очи́стит» .

Де́ва: «Се Де́ва во чре́ве прии́мет, и роди́т Сы́на, и нареку́т и́мя Ему́ Емману́ил» .

Проро́чица: «И присту́пль ко проро́чице, и во чре́ве прия́т, и роди́ сы́на. И рече́ ко мне Госпо́дь: Нарцы́ и́мя ему́, ско́ро плени,́ напра́сно испрове́рзи. Зане́же пре́жде да́же разуме́ти отроча́ти нарещи́ отца́ или́ ма́терь, прии́мет си́лу Дама́скову, и коры́сти Самари́йския» .

Цари́ца: «Предста́ Цари́ца одесну́ю Тебе́, в ри́зах позлаще́нных, оде́янна и преиспещре́нна» .

И́скренняя: «Вся еси́ добра́ и́скренняя моя», «Вся добра́, и поро́ка несть в тебе́, вни́ди, и прииди́ и́скренняя моя́» .

Неве́ста: «Гряди́ от Лива́на неве́сто, прии́деши и про́йдеши, от нача́ла ве́ры» .

Сот: «Иска́плют устне́ твои́ неве́сто, мед, и млеко́ под язы́ком твои́м, и воня́ риз твои́х, я́ко воня́ Лива́нова» .

Сестра́: «Что украси́стеся о́чи твои́ се́стро моя́ неве́сто?»

Вертогра́д: «Вертогра́д заключе́н, исто́чник запеча́тан».

Дщи: «Слы́ши Дщи и виждь, и приклони́ у́хо Твое́, и забу́ди лю́ди лю́ди Твоя́, и дом отца́ Твоего́, и возжела́ет Царь добро́ты Твоея́. Мно́ги дще́ри стяжа́ша си́лу, мно́ги стяжа́ша бога́тство, Ты же превзы́де и превознесе́ся от всех» .

Обруче́ная: «По́слан бысть а́нгел Гаврии́л от Бо́га во град Галиле́йский, ему́же и́мя Назаре́ф, к Де́ве обруче́ней му́жеви, ему́же и́мя Ио́сиф, от до́му и оте́чества Дави́дова, и и́мя Де́ве Мариа́м» .

О́блак: «Се Госпо́дь седи́т на о́блаце ле́гце, и прии́дет во Еги́пет, и потрясу́тся рукотворе́ния еги́петская» .

Зре́ние: «Зрех виде́ние о́гненное, и свет его́ о́крест виде́ние дуги́, егда́ есть на о́блацех в день дождя́, си́це стоя́ние све́та о́крест, се ви́дение, подо́бие сла́вы Госпо́дни» .

Иле́ктр: «И ви́дех я́ко виде́ние иле́ктра, виде́ние о́гненное внутрь его́, виде́ние о по́яса да́же до до́лу» .

День, и нощь: «День дни отрыга́ет глаго́л, и нощь но́щи возвеща́ет ра́зум» .

Не́бо: «С небесе́ призре́ Госпо́дь ви́де вся сы́ны челове́ческия: и не́бо небесе́ Го́сподеви» .

Восто́к: «Ца́рствия земна́я по́йте Бо́гу, воспо́йте Го́сподеви возше́дшему на восто́ки, на не́бо небе́сное» .

За́пад: «Путь сотвори́те возше́дшему на запа́ды, Госпо́дь и́мя Ему́» .

Со́лнце: «В со́лнце положи́ селе́ние Свое́, и Той я́ко жени́х изходя́й от черто́га Своего́» .

Град: «Пресла́вная возглаго́лашася о тебе́ гра́де Бо́жий. Ре́чная устремле́ния веселя́т град Бо́жий. Бог посреде́ его́, и не подви́жится» .

Пли́нфос: «И ты сы́не челове́чь возми́ себе́ пли́нфос, и положи́ его́ пря́мо себе́, и напиши́ в нем град, и сотвори́ши в нем огражде́ние» .

Ме́сто: «Я́ко стра́шно ме́сто сие́, несть сие́, но дом Бо́жий, и сия́ врата́ небе́сная» . «И поя́т мя Дух: и слы́шах за собо́ю глас тру́са вели́ка, благослове́на сла́ва Госпо́дня от ме́ста его́» . «А́ще дам сон очи́ма мои́ма, и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю» .

Руно́: «Сни́дет я́ко дождь на руно́, и я́ко ка́пля ка́плющая на зе́млю» .

Жена́: «Благослове́на Ты в жена́х, и благослове́н плод утро́бы Твоея́» . «И посла́ Бог Сы́на Своего́ ражда́емаго от жены́, быва́ема под зако́ном» .

Блаже́нна: «И блаже́нна ве́ровавшая, я́ко бу́дет соверше́ние глаго́ланным Ей от Го́спода» . «И блаже́нно чре́во носи́вшее Тя, и сосца́ я́же еси́ ссал» .

Мари́я: «Не бо́йся Мари́е, обрела́ бо еси́ благода́ть пред Бо́гом, и се зачне́ши во чре́ве, и роди́ши Сы́на, и нарече́ши и́мя Ему́ Иису́с» : и про́чая.

И кто у́бо не вознесе́т, и́же на толи́ку высоту́ возвыше́нную, я́ко и Ма́терь бы́ти Бо́жию, пресла́внейшу вои́стинну, и вещь и слы́шание. И ны́не ве́ровавше о Ней, востеце́м, пра́зднику нача́льствующей, от Нея́же Сло́во, ма́лым по́слежде изше́д сприпряже́т Себе́ па́ки. Принеси́ у́бо ны́не, да днесь песнопе́нию ко́снемся, и вма́ле со́браная прире́кше, стремле́ние слова упоко́им. Достояше у́бо челове́ческому естеству́, пра́отчим поползне́нием сокруши́вшуся, к могу́щему возста́вити, велегла́сно взыва́ти: «Вску́ю Го́споди дале́че отстоя́?». Бы́вшу же Ему́ от проро́к плаче́вне и умиле́нне зово́му: «Где суть, глаго́люще, м́илости Твоя́ дре́вния Го́споди, и́миже кля́лся еси́ Дави́ду во и́стине Твое́й?». Что убо Воли́тель ми́лости? Не презре́, не отложи́, не в долготу́ обещан́ная протяже́. Кая же сия́? «Не и́мам тебе́ оста́вити, ниже́ и́мам тебе́ отступи́ти» . Е́же и ученико́м по́слежде прише́д, и́хже не отступи́ глаго́ла: «Не оста́влю вас си́ры, но прииду́ к вам» . Сие́ и пре́жде неизрече́ннаго вочелове́чения Своего́, нело́жне проро́ки обеща́ся. Елма́ у́бо си́це сия́, и уже́ время́ приспе́ соверши́тися рече́нным.

Зри, что твори́т, И́же спасе́ние на́шему естеству́ смотря́яй, не зве́рский не́кий потре́бова орга́н, не ино́го существа́ преобрази́ сосу́д, но от того́жде бре́ния, и от того́жде я́коже кто рече́т смеше́ния отдели́в часть, че́стен Себе́, и таково́му вои́стинну соедине́нию храм устро́и: в не́мже у́бо Сам пе́рвый, и то́й́жде Архиере́й, И́же и Царь смотрели́вне о на́шем свяще́нствова, ко Своему́ Отцу́ примире́нии: всю на́шу нищету́ пресу́щественне, и по существу́ от челове́ческаго естества́ восприя́т. Помяну́ у́бо Свое́ созда́ние Бог, созда́ние бо Того́ вси язы́цы. Помяну́ щедро́ты Своя́, я́же от ве́ка, И́же веко́в Госпо́дь. Помяну́ заве́т, и́же к челове́ком завеща́. Помяну́, и помяну́в не закосне́, но а́бие благодея́ние наведе́. Помяну́ у́бо Дави́да, и я́же тому́, обеща́ся, пе́рвее от се́мене его́ Христа́ воздви́гнути, о Не́мже на́шего ро́да па́дшыя ски́нии под небесе́м назда́, творе́ние.

Пресла́вно о пресла́вном чудеси́ совнесе́ чу́до, целому́дренней А́нне мно́гим сове́тованием печа́лию объя́те: еще́ же и супру́жнику ея́ го́рце ско́рбию одержи́му о безча́дствии, благода́тию обои́м разреши́ непло́дие Бог, к моле́нию тех прекло́нься, даде́ непло́дней плод, его́же предвозсия моли́тва. И сожи́тельнику плод, его́же возрасти́ наде́жда, и цвет присноцвету́щь, от и́зшаго безча́дия пла́менем, и бывает плодови́та, я́же пе́рвее непло́дная, и лоза́ присноцветущая, еяже стебло́ не увяде́.

И что сего́ детотворе́ния бу́дет честне́йшее? Что же пресла́внейшее? Е́же зре́ти Ма́терь Бо́жию, разверза́ющу у́бо ма́терня, нерастле́нна же та сохрани́вши ложесна́, от невсе́янныя утро́бы плод чистоты́ расту́щий: Де́ву от непло́дныя, непло́дове израста́ющу. Да что бу́дет, [да] е́же о ней проти́чущым чу́дом, рожде́нное уве́рит нам, е́же пе́рвее естеству́ челове́ческому невед́омо бе, без о́тча рождества́, кроме́ неизрече́нных боле́зней естества́, па́че естества́ привни́де преесте́ственною си́лою. И́же естеству́ Самоде́теля, во утро́бе удетотвори́вши, и бысть ма́ти. Ма́терни не пострада́вши, и Младе́нец не имя́ше отца́ зва́ти на земли́, я́ко не хода́тайствова се́мя зача́тие, ниже́ тли претерпе́вши ро́ждшая породи́.

Она́ же а́ще и о мно́зе, ю́же и в непло́дствии, предвари́вшее, показа́ние име́яше, но всем предпобежда́ющым име́яше суд. А́ще бо и отценача́льнии вку́пе живяху, я́ко купнополо́жни, подо́бнаго и в ле́поту чудотворе́ния сподо́бишася, разре́шшымся и тех у́зам непло́дства. Ей у́бо священноро́дную сию́ отрокови́цу, предвари́ти хотя́ху роди́тели: но о́ви издале́ча не́како, и зело́ изда́вна, боже́ственным смотре́нием, чудесе́ сро́дное и́мут: о́ви же по́слежде у́бо, по вре́мени же и при са́мом конце́ време́н: Внегда́ у́бо и тех предста́ две́рем, и́же дра́хму ца́рскую, глаго́лю же: и́же по нам взыска́вый о́браз, да пе́рсти в не́йже пре́жде погребе́на бе, очище́нием боготво́рным примеси́т Дух, и отту́ду я́коже к Себе́ человеколю́бне, челове́ческое возобрази́ естество́.

Что у́бо персть, е́юже в нас благоро́дие покрове́но бе? Или́ я́ве естество́ о себе́? Оба́че а́ще и мы не глаго́лем, я́ко персть о́ну, от нея́же со́здани бы́хом пе́рвее обре́те, и назда́ни быхом, по́слежде раскопа́в Созда́вый нас, иско́мое обре́те. Ко́е сие́? О́браза началообра́зное? Е́же окаля́но я́ко ви́де страстьми́, И́же по естеству́ Безстра́стный, персть, ю́же во Ада́ме испыта́в, персть же в не́йже иско́мое обре́теся. Земля́ у́бо бя́ше, е́же по нам подобообра́знаго телесе́ име́я вмеще́ние, де́вственная пресвята́я утро́ба: се́ю бо обре́т бразду́, живонача́льный наш Клас, се́мене кроме́, и невозде́ланне прозя́б, па́че естества́ израсте́. Се Персть, се Клас, се Ме́сто земно́е, в не́мже новоле́пне назда́ни бы́хом. И́мже персть на́ша вообрази́вшися, на п́ервое взы́де достоя́ние. Ви́де ли ели́ко А́ннино рождество́ обдержи́т та́инства? Ели́ко преизя́щество чудесе́ е́же о ней пресла́вным детотворе́нием дре́вния непло́ды превзы́де. Такова́ Де́ва Отрокови́ца, богозва́нная и пренепоро́чная. Сия́ Мари́я рождеству́ сподо́бися. И ка́я в жена́х друга́я от таковы́х толи́ких сла́вных чуди́ма есть когда́?

Те́мже поне́же на толи́ку высоту́ вознесе́ся на́ше не́мощнейшее сло́во, и мно́жае вмести́ти не мо́жет, ма́лем устремле́нием Ма́тери радости, Ту целова́вше рече́м, на похвалу́ у́бо Той ра́достное имену́ем приглаго́лание: Ра́дуйся Благода́тная! Ра́дуйся Пресла́вная! Ра́дуйся радостотво́рное о всех спасе́нии Возложе́ние. Ра́дуйся злата́я вои́стинну, мы́сленных арома́т Кади́льнице, в Не́йже мы́сленный Фимиа́м положи́ся Христо́с, от Божества́, и челове́чества во огни́ боже́ственнем, одушевле́ную и мы́сленную Свою́ плоть, благово́нне несме́сну и неразде́льну показа́. Ра́дуйся нерукоде́ланная Сень, и богоде́ланная, в Ню́же еди́ною на кончи́ну веко́в, Еди́н Бог и Слово, и пе́рвый Первосвяще́нник вни́де, ю́же вы́ше всех в Тебе́ та́йно, та́йную священноде́йствовав слу́жбу. Ра́дуйся Свята́я святы́х, втора́я Катапета́смо, я́же пречестне́е херуви́м осене́нием, ели́ко и Того́ и́же в незаходи́мых Го́спода, в ложесна́х, я́ко заве́сою закры́вши во чре́ве понесла́ еси́. Ра́дуйся седмосвети́льный, и седмода́тный седми́ дарова́ний Све́щниче седмосве́тлый, осиява́емый Ду́хом: неугаси́тельный Све́те, Све́та всех просве́щшаго, е́же пома́за та́йно пома́зания ми́ро. Ра́дуйся Очисти́лище, в не́мже та́йный А́гнец, живо́тно всесожже́ние, Христо́с вознесеся. Богота́йная Трапе́зо, я́же па́че ума́ священноде́йствия, на Не́йже небе́сный Хлеб Христо́с, И́же о всех А́гнец я́ко же́ртва и заколе́ние, живозакола́емо положи́ся, оживотворя́я причаща́ющихся. Ра́дуйся всяч́еския богота́йныя слу́жбы Сокро́вище, в не́мже Бог пло́тию закала́ется, и освяща́ет вся́ческая, и та́йно к челове́ком приходя́ сожи́тельствует, и приобща́ется, и терпи́т рука́ма гре́шных осязова́тися, устна́ма же бре́нными вкуша́тися, и в персть пло́ти на́шея излива́тися подава́емь неиждиви́тельно.

О́ несказа́ннаго излия́ния! О́ бла́гости, я́ко ра́ди жены́ соплеме́нныя и сро́дныя па́че естества́ и до́лга, Бог сия́ нам да́рствова! Ю́же у́бо душе́вная добро́та иску́сом неискушен́ная, коли́ко изя́ществова, ели́ко и Христу́ само́й и́стины добро́ты возжела́ти, к таково́й Тоя́ красоте́ приити́, и е́же от Нея́ прия́ти рожде́ние без отца́. Сицево́ же и телесе́ Тоя́ преле́потное устрое́ние, и в толи́ку чистоту́ доспе́вши, ели́ко и то са́мое вмести́ти безтеле́сное же и необыме́нное, пресу́щественнаго естества́ величество, Еди́ну от триех Ипоста́сь. Сия́ есть Богоро́дица Мари́я, о́бщее всех христиа́н Прибе́жище: пе́рвое пе́рваго паде́ния Возведе́ние, ко безстра́стию па́дшаго ро́да Воззва́ние, е́же в купине́ Моисе́ови, пе́рвие та́йно сеннопи́санное Виде́ние. Руно́ Гедео́ново: е́же он образова́нне вла́жно, от и́же с небесе́ без щу́ка, ка́пле ороше́но узре́в, и на чу́до обрати́в де́ло. И зна́мение свяще́нное дожде́м назна́мена. Богоиспещре́нная Дави́дова Багряни́ца: я́же пло́ти прия́тие, я́коже багряни́цу Дави́дову, Бо́гу вопло́щшемуся прине́сшая. Херуви́мский престо́л превели́кий о́гненный превзя́тый: я́же Царя́ Христа́ в не́дре нося́щая. Превы́шшая небе́сных двере́й невходи́мых, у ни́хже серафи́ми стоя́ху согражда́ющеся крилы́: двема́ у́бо покрыва́юще ли́ца, двема́ же но́ги, двема́ же лета́ху, и взыва́ху вели́кую стра́шную о́ную песнь: непристу́пныя о́ныя сла́вы зре́ти не терпя́ще. Дверь небе́сная, е́юже небе́сный Влады́ка про́йде, ни еди́ному же пе́рвее Того́, ниже́ по Нем попусти́ пройти́ вход.

Весели́ся о Ней не́бо, Тебе́ бо подража́вши, и́же Тобо́ю невмести́маго Го́спода, без стуже́ния вмести́. Ликовству́й Тоя́ ра́ди земле́, и́бо Тоя́ рожде́ние, Твое́ онеботвори́ виде́ние, небе́сны земныя соде́лавши. Да воспле́щет же и мо́ре де́вственое чу́до, Бог бо И́же рождество́ от Нея́ приимы́й пло́тию, вод мо́крое существо́ освяти́, кре́щься в вода́х. Вся у́бо тварь ра́дуется, и да ликовству́ет, и рука́ми да пле́щет. Роди́бося днесь Ю́ница, от Нея́же спасе́ние, Христо́с Бог и Сло́во Сый. И бы́вый и приходя́й пребыва́я в век. О Не́мже и на́ше я́коже от вели́кия де́вственныя пучи́ну глаго́лю, упоко́им сло́во, Бо́гу в Тро́ице Еди́ному, И́же во Отце́ и Само́м Сы́не со Святы́м Ду́хом поклоня́емому, возсыла́ем сла́ву, и честь и поклоне́ние: ны́не и в неконча́емыя ве́ки веко́в. Ами́нь.

Стихи́:

Всем пои́стине А́нно одоле́ла еси́ мучи́телем,

Доне́леже ма́ти тебе́ бу́дет дщи:

Изведе́ ко све́ту Богома́терь А́нна.

Ея́же оте́ц Иоаки́м от ца́рскаго пле́мене бе́яше ро́дом, и той сугу́бы да́ры Бо́гу приноша́ше, я́ко благолюбе́зен и бога́т, но безча́дия ра́ди поноша́емь бе́яше, о том же сжа́ли си се́рдце и в го́ру вшед. И супру́жница же его́ в саду́ вертогра́да со слеза́ми моля́ше Бо́га, и́же пода́сть и́ма плод чре́вный свят и Пресвяту́ю Влады́чицу на́шу Богоро́дицу. Да и А́ннино с обою́ по́лу ро́да ви́дим позна́ние, испы́тно и́мам пове́дати. Три от рода Дави́дова и Соломо́нова обрета́ется: Матфа́н, и́же поя́т Мари́ю от Иу́дова пле́мени, и роди́ Иа́кова, Ио́сифа отца́ древоде́ля и дще́ре три: Мари́ю, Сови́ю и А́нну. Мари́я же роди́ Саломи́ю ба́бу, Сови́и же роди́ Елисаве́ть, А́нна же роди́ Богоро́дицу, я́ко бы́ти Богоро́дице вну́це Матфа́ну и Мари́и жене́ его́, Елисаве́ти же и Саломи́и ане́псе, А́нне братуча́ди же Богоро́дицы.

Приспе́ вре́мя бра́тие на́шего спасе́ния, се бо возсия́ нам во тме грехо́вней седя́щым, сия́ние мы́сленнаго Со́лнца, Христа́. Днесь бра́тие всему́ ми́ру ра́дость возсия́. Днесь Ада́му пра́деду Вну́ка и Госпожа́ роди́ся, у́зы а́довы ослабля́ет. Днесь кля́тве Е́вине потребле́ние роди́ся, и ми́ру всему́ Обновле́ние. Днесь ве́тхая лесть разори́ся, и но́вым лю́дем но́вое возсия́ Благове́щение. Же́нским преступле́нием испа́ли бе́хом из поро́ды, и па́ки же́нским рождество́м возвраща́емся в рай. Е́ва бо змие́ю сове́т прия́ла бе, а Сия́ зми́ева уби́йцу роди́ Христа́: И́же у́бо не терпя́ зрети нас безсту́дными де́лы, врагу́ порабо́щшихся: но приклони́ небеса я́ко Щедр, и сни́де на взыска́ние на́ше, благоволе́нием Роди́теля, и осене́нием Пресвята́го Ду́ха: я́коже и Лука́ евангели́ст послу́шествует. И та́ко всели́ся Бог, Вы́шняго Ипоста́сная Прему́ дрость, Сын Бо́жий, Иже со Отце́м Единосу́щен есть, и с Пресвяты́м Ду́хом равно сла́вимь, и бысть вку́пе Бог и Челове́к, да челове́ки спасе́т. Не бе бо каќо челове́ку спасти́ся, а́ще не бы от Самого́ Творца́ обновле́ние прия́л. Той бо не́мощи на́ша на Ся взя, и боле́зни подъя́т. И нищь бы́ти нас ра́ди изво́ли, стра́нен, пору́ган, да нас нището́ю Свое́ю обогати́т.

Да егда́ видим бра́тие ни́ща, или́ на́га, или́ стра́нна, или́ а́лчна, и отъи́дем не сотво́рше сему́ никоего́же добра́, да ве́сте, я́ко Самого́ Христа́ презря́ще мину́ем, и себе лиша́ем ве́чных благ. Не свое́ у́бо кто что и́мать, или́ дае́т, но Бо́жие. Да поне́ от своего́ ему́ дади́м дово́льное. Не про́сит бо от нас име́ния, ни ино́го тя́жка, но пи́щи, и оде́жды про́сты. Тем м́алым избы́тком приобрести́ от Самого́ Го́спода ми́лость, я́ко и Сам глаго́лет: «Поми́луй бо, рече́, да поми́лован бу́деши». И па́ки: «Ми́лости несть, несотво́ршему милости». Не мща́йте же са́ми себе́ возлю́бленнии. Глаго́лет бо проро́к, я́ко от Лица́ Бо́жия глаго́лемая есть месть: «Да Аз возда́м глаго́лет Госпо́дь». И апо́стол Па́вел убужда́я ны глаго́лет: «Не упивайтеся вино́м, в не́мже несть спасе́ния. Но па́че исполня́йтеся Ду́хом Святы́м, пою́ще во псалме́х, и пе́снех духо́вных». И па́ки, востязу́я ны от гне́ва, глаго́лет: «Гне́вайтеся , и не согреша́йте. И со́лнце да не за́йдет во гне́ве ва́шем. И не дади́те ме́ста гне́ву ». Те́мже вся покаря́юще под но́зе, добро́тою препоя́шемся, любо́вию, и кро́тостию, чистото́ю, и трезве́нием, и ми́лостынею: та бо покрыва́ет мно́жество грехо́в на́ших, о Христе́ Иису́се Го́споде на́шем: Ему́же сла́ва, ны́не, и при́сно, и во ве́ки веко́в. Ами́нь.